1-2. (a) Ano ang ginsugo sa tatlo ka apostoles ni Jesus, kag ano ang ginhimo nila? (b) Ano ang binagbinagon naton sa sini nga artikulo?

PAGKATAPOS sang Paskua sang 32 C.E., nakakita ang mga apostoles nga sanday Pedro, Santiago, kag Juan sang isa ka dalayawon nga palanan-awon. Sa isa ka mataas nga bahin sang bukid, nga posible Bukid Hermon, nagbaylo ang dagway ni Jesus sa atubangan nila. “Ang iya nawong nagsilak subong sang adlaw, kag ang iya bayo nagsanag subong sang kapawa.” (Mat. 17:1-4) Sang malapit na matapos ang palanan-awon, nabatian sang mga apostoles nga nagsiling ang Dios: “Ini ang akon Anak, ang hinigugma, nga ginakahamut-an ko. Magpamati kamo sa iya.” (Mat. 17:5) Makita sa kabuhi sining tatlo ka apostoles nga namati gid sila kay Jesus. Gusto naton ilugon ang ila halimbawa.

² Sa nagligad nga artikulo, natun-an naton nga nalakip sa pagpamati sa tingog ni Jesus ang pag-untat sa paghimo sang pila ka butang. Sa sini nga artikulo, binagbinagon naton ang duha ka butang nga ginsiling ni Jesus nga dapat naton himuon.

3. Suno sa Mateo 7:13, 14, ano ang dapat naton himuon?

³ Basaha ang Mateo 7:13, 14. Talupangda nga may ginsambit si Jesus nga duha ka klase sang gawang nga nagapakadto sa duha ka klase sang dalan. Ang isa amo ang “malapad” nga dalan, kag ang isa pa amo ang “mabudlay” nga dalan. Wala sing ikatlo nga dalan. Dapat kita magdesisyon kon sa diin kita nga dalan maagi. Amo ini ang pinakaimportante nga desisyon nga dapat naton himuon kay isa lang ang dalan nga nagapadulong sa kabuhi nga wala sing katapusan.

4. Paano mo ilaragway ang “malapad” nga dalan?

⁴ Dapat naton tandaan ang kinalain sang duha ka dalan. Gusto  sang mga tawo ang “malapad” nga dalan bangod mahapos ang pag-agi diri. Masubo gid kay madamo ang nagaagi sa sini nga dalan kag ginasunod nila ang ginahimo sang mga tawo nga nagaagi man sa sini. Wala nila nahangpan nga si Satanas nga Yawa amo ang nagaimpluwensia sa mga tawo nga mag-agi sa sini nga dalan, kag nagapadulong ini sa kamatayon.—1 Cor. 6:9, 10; 1 Juan 5:19.

5. Ano ang ginhimo sang iban para makita nila ang “mabudlay” nga dalan kag makaagi sila sa sini?

⁵ Indi pareho sa “malapad” nga dalan ang isa pa ka dalan. Nagsiling si Jesus nga “mabudlay” ini nga dalan kag pila lamang ang nakatultol sini. Ngaa? Sa masunod nga bersikulo, ginpaandaman ni Jesus ang iya mga sumulunod parte sa butig nga mga manalagna. (Mat. 7:15) Suno sa pila ka tawo, linibo ang relihion. Ang kalabanan sa sini nagasiling nga nagatudlo sila sang kamatuoran. Bangod sang kadamuon sang mga relihion, nagamuhan ang madamo nga tawo kag wala na sila gana nga pangitaon ang dalan nga nagapadulong sa kabuhi. Pero posible gid nga makita ini nga dalan. Si Jesus nagsiling: “Kon ginatuman ninyo pirme ang akon ginatudlo, mga disipulo ko gid kamo, kag mahibaluan ninyo ang kamatuoran, kag ang kamatuoran magahilway sa inyo.” (Juan 8:31, 32) Maayo gid ang inyo ginhimo kay wala ninyo ginsunod ang ginahimo sang kalabanan nga tawo. Sa baylo, ginpangita ninyo ang kamatuoran. Gintun-an ninyo sing maayo ang Pulong sang Dios para mabal-an ninyo ang iya mga ginapatuman, kag ginpamatian ninyo ang mga gintudlo ni Jesus. Natun-an ninyo nga gusto ni Jehova nga indi naton pagpatihan ang mga ginatudlo sang butig nga relihion, kag gusto niya nga indi na naton pagselebrahon ang mga selebrasyon nga naghalin sa butig nga relihion. Natun-an man ninyo nga indi mahapos ang paghimo sa mga ginapatuman ni Jehova kag ang pag-untat sa mga buhat nga wala niya nahamut-an. (Mat. 10:34-36) Posible nga ginbudlayan kamo sa paghimo sang mga pagbag-o. Pero nagpanikasog kamo bangod palangga ninyo ang inyo Amay sa langit kag gusto ninyo nga malipay sia. Sigurado gid nga nalipay sia sa inyo.—Hulu. 27:11.

6. Suno sa Salmo 119:9, 10, 45, 133, ano ang makabulig sa aton nga makapabilin sa mabudlay nga dalan?

⁶ Kon nagaagi na kita sa mabudlay nga dalan, ano ang makabulig sa aton nga makapabilin sa sini? Binagbinaga ini nga ilustrasyon. Kon makitid ang dalan kag ara ini sa banglid, ginabutangan sang lambay ang kilid sang dalan para maproteksionan ang mga drayber kag ang ila mga salakyan. Ginatawag ini nga guardrail. Nagabulig ini sa mga drayber nga indi magpatibitibi sa banglid ukon mahulog sa sini. Sigurado gid nga wala sing drayber nga magareklamo kon ngaa ginbutangan pa sang guardrail ang dalan. Daw pareho sa sini nga guardrail ang mga kasuguan ni Jehova nga mabasa sa Biblia. Ginabuligan kita sini nga mga kasuguan nga makapabilin sa mabudlay nga dalan.—Basaha ang Salmo 119:9, 10, 45, 133.

7. Paano dapat tamdon sang mga pamatan-on ang mabudlay nga dalan?

⁷ Mga pamatan-on, nagabatyag bala kamo kon kaisa nga estrikto katama ang mga kasuguan ni Jehova? Amo ini ang gusto ni Satanas nga hunahunaon ninyo. Gusto niya kamo papatihon nga malipayon ang mga tawo nga nagaagi sa malapad nga dalan sa ila mga ginahimo. Gusto niya ipabatyag sa inyo nga makaluluoy kamo kay indi ninyo mahimo ang ginahimo sang inyo mga schoolmate kag sang mga tawo nga makita ninyo sa Internet. Gusto ni Satanas nga hunahunaon ninyo nga ginapunggan kamo sang mga kasuguan ni Jehova  nga magpagusto sa inyo kabuhi. * Pero dumduma ninyo ini: Indi gusto ni Satanas nga mabal-an sang mga tawo nga nagaagi sa malapad nga dalan ang padulungan nila. Pero ginapabalo sa inyo ni Jehova nga mangin maayo gid ang inyo palaabuton kon magpabilin kamo sa dalan nga nagapadulong sa kabuhi.—Sal. 37:29; Isa. 35:5, 6; 65:21-23.

8. Ano ang matun-an sang mga pamatan-on sa halimbawa ni Olaf?

⁸ Binagbinaga ang matun-an ninyo sa eksperiensia sang isa ka pamatan-on nga brother nga si Olaf. * Gin-pressure sia sang iya mga klasmeyt nga magpakig-sex. Sang ginpaathag niya nga ginasunod niya ang mga kasuguan sa Biblia bilang isa ka Saksi ni Jehova, mas gin-pressure pa gid sia sang pila niya ka klasmeyt nga babayi nga magpakig-sex sa ila. Pero nangin malig-on si Olaf kag ginhimo niya kon ano  ang husto. Indi lang amo sini ang naeksperiensiahan niya nga pagtilaw. Si Olaf nagsiling: “Gin-pressure ako sang akon mga maestro kag maestra nga mag-eskwela sa unibersidad para dayawon ako sang mga tawo. Nagsiling sila nga kon indi ako mag-eskwela sa unibersidad, indi kuno ako makakita sang obra kag indi ako mangin malipayon.” Ano ang nakabulig kay Olaf? Nagsiling sia: “Ginpanikasugan ko nga mangin suod nga abyan ang mga kauturan sa kongregasyon. Gani daw nangin pamilya ko na sila. Ginserioso ko man ang akon pagtuon sang Biblia. Samtang ginatun-an ko ini sing maayo, nangin mas kumbinsido ako nga amo gid ini ang kamatuoran. Bangod sini, gusto ko gid nga alagdon si Jehova.”

9. Ano ang dapat naton himuon para makapabilin kita sa mabudlay nga dalan?

⁹ Gusto ni Satanas nga maghalin ka sa dalan nga nagapadulong sa kabuhi. Gusto niya nga mag-upod ka sa madamo nga tawo nga ara sa malapad nga dalan nga “nagapadulong sa kalaglagan.” (Mat. 7:13) Pero, makapabilin kita sa mabudlay nga dalan kon padayon kita nga magpamati kay Jesus kag kon kabigon naton ini nga dalan nga isa ka proteksion. Binagbinagon naman naton ang isa pa ka butang nga ginsiling ni Jesus nga dapat naton himuon.

10. Suno sa Mateo 5:23, 24, ano ang ginsiling ni Jesus nga dapat naton himuon?

¹⁰ Basaha ang Mateo 5:23, 24. Ginsambit ni Jesus ang ginahimo sang mga Judiyo nga importante gid sa ila pagsimba. Imadyina nga ara sa templo ang isa ka tawo para maghalad sang sapat. Sang ihatag na niya ang sapat sa saserdote, nadumduman niya nga nagalain ang buot sang iya utod sa iya. Sa sini nga sitwasyon, dapat niya ibilin ang iya halad kag dapat sia “maglakat.” Ngaa? Bangod may dapat sia himuon nga mas importante pa sangsa paghalad kay Jehova. Si Jesus nagsiling: “Makighidait ka anay sa imo utod.”

11. Isaysay ang mga pagpanikasog ni Jacob para magpakighidait kay Esau.

¹¹ Madamo kita sing matun-an kay Jacob parte sa pagpakighidait. Pagligad sang mga 20 ka tuig pagkatapos niya maghalin sa duta nga iya natawhan, ginsugo sia sang Dios paagi sa isa ka anghel nga magbalik didto. (Gen. 31:11, 13, 38) Pero may isa ka problema. Gusto gid sia sadto patyon sang iya magulang nga si Esau. (Gen. 27:41) “Hinadlukan gid si Jacob kag nahangawa sia” kay basi akig gihapon ang iya utod sa iya. (Gen. 32:7) Ano ang ginhimo ni Jacob para magpakighidait sa iya utod? Una, hanuot niya ini nga ginpangamuyo kay Jehova. Dayon, nagpadala sia sing madamo nga regalo kay Esau. (Gen. 32:9-15) Kag sang nagkit-anay na sila nga duha, ginpakita ni Jacob nga ginarespeto niya si Esau. Indi lang isa ukon duha ka beses sia nga nagluhod kag nagduko kay Esau, kundi pito gid ka beses. Nagpaubos si Jacob kag ginrespeto niya ang iya utod para magpakighidait sa iya.—Gen. 33:3, 4.

12. Ano ang matun-an naton sa halimbawa ni Jacob?

¹² May matun-an kita sa mga ginhimo ni Jacob antes sia makigkita sa iya utod kag kon paano niya gin-istorya si Esau. Mapainubuson nga nagpabulig si Jacob kay Jehova. Dayon ginpakita niya nga sinsero gid sia sa iya ginpangamuyo paagi sa paghimo sang iya bug-os nga masarangan nga makighidait sa iya utod. Pagkit-anay nila nga duha, wala ginbais ni Jacob si Esau kon sin-o sa ila ang husto kag kon sin-o ang sala. Gusto gid ni Jacob nga makighidait sa iya utod. Paano naton mailog si Jacob?

13-14. Kon naglain ang buot sang isa ka utod sa aton, ano ang dapat naton himuon?

¹³ Dapat naton panikasugan nga mangin maayo ang aton kaangtanan sa aton mga kauturan  nga nagalakat man sa dalan nga nagapadulong sa kabuhi. (Roma 12:18) Ano ang dapat naton himuon kon narealisar naton nga naglain ang buot sang isa ka utod sa aton? Pareho kay Jacob, dapat kita mangamuyo sing hanuot kay Jehova. Puede naton sia pangabayon nga pakamaayuhon niya ang aton mga pagpanikasog para magpakighidait sa aton utod.

¹⁴ Dapat man naton usisaon ang aton kaugalingon. Puede naton pamangkuton ang aton kaugalingon: ‘Handa bala ako nga tunlon ang akon bugal, mapainubuson nga mangayo sing pasaylo, kag magpakighidait? Ano ang batyagon ni Jehova kag ni Jesus kon ako mismo ang magpanikasog nga magpakighidait sa akon utod?’ Ang aton mga sabat magapalig-on sa aton nga pamatian si Jesus kag mapainubuson nga istoryahon ang aton utod para magpakighidait sa iya. Kon himuon naton ini, ginailog naton si Jacob.

15. Paano makabulig sa aton ang prinsipio sa Efeso 4:2, 3 para makapakighidait kita sa aton utod?

¹⁵ Imadyina ang natabo kon wala nagpaubos si Jacob kag ginbais niya ang iya utod. Posible gid nga lain ang nangin resulta. Kon nagapakighidait kita sa aton utod, dapat kita mangin mapainubuson. (Basaha ang Efeso 4:2, 3.) Ang Hulubaton 18:19 nagasiling: “Ang utod nga nahimuan sing sala mas mabudlay daugon sangsa mabakod nga siudad, kag may mga pagbaisay nga kaangay sang pintal sang pamakod.” Kon naglain ang buot sang isa ka utod sa aton, daw pareho sia sa isa ka “pamakod.” Pero kon mapainubuson kita nga magpangayo sing pasaylo sa iya, makabulig ini para madula ang kalain sang iya buot.

16. Ano pa ang dapat naton hunahunaon sing maayo, kag ngaa?

¹⁶ Dapat man naton hunahunaon sing maayo kon ano ang aton isiling sa aton utod kag kon paano naton ini isiling. Kon handa na kita nga istoryahon ang utod nga naglain ang buot sa aton, dapat naton panikasugan nga mag-ayuhay liwat ang aton kaangtanan. Sa umpisa, posible nga may mahambal sia nga makasakit sang aton balatyagon. Bangod sini, basi maakig kita ukon magrason kita sa iya. Pero kon amo sini ang aton reaksion, indi gid kita makapakighidait. Tandaan naton nga mas importante nga mag-ayuhay kita liwat sang aton utod sangsa pamatud-an kon sin-o ang husto kag kon sin-o ang sala.—1 Cor. 6:7.

17. Ano ang matun-an mo sa halimbawa ni Gilbert?

¹⁷ Nagpanikasog gid nga makighidait ang isa  ka brother nga si Gilbert. Nagsiling sia: “Indi kami mag-intiendihanay sang isa ka miembro sang amon pamilya. Sobra duha ka tuig nga nagpanikasog ako nga mag-ayuhay kami liwat. Ginatinguhaan ko nga mangin tampad kag kalmado kon mag-istorya ako sa iya.” Ano pa ang ginhimo ni Gilbert? “Sa kada tion nga maistorya ako sa iya, nagapangamuyo anay ako kag ginahunahuna ko na nga daan nga indi ako dapat maakig kon may ihambal sia nga masakit. Dapat handa ako magpatawad. Natun-an ko nga indi ko dapat pag-ipilit nga ako gid ang husto, kag nahangpan ko nga mas importante nga makighidait ako sa iya.” Ano ang resulta? Si Gilbert nagsiling: “Subong, malinong ang akon hunahuna bangod maayo ang akon kaangtanan sa tanan nga miembro sang amon pamilya.”

18-19. Kon naglain ang buot sang isa ka utod sa aton, ano ang dapat naton himuon, kag ngaa?

¹⁸ Gani, ano ang dapat mo himuon kon narealisar mo nga naglain ang buot sang isa ka utod sa imo? Sunda ang sugo ni Jesus nga makighidait. Ipangamuyo ini kay Jehova, kag pangabaya sia nga buligan ka sang iya balaan nga espiritu nga makighidait. Kon himuon mo ini, mangin malipayon ka, kag mapakita mo nga nagapamati ka kay Jesus.—Mat. 5:9.

¹⁹ Nagapasalamat kita kay palangga kita ni Jehova kag ginagiyahan niya kita paagi kay Jesucristo nga amo ang “ulo sang kongregasyon.” (Efe. 5:23) Kabay pa nga panikasugan gid naton nga ‘magpamati sa iya’ pareho sa ginhimo sang mga apostoles nga sanday Pedro, Santiago, kag Juan. (Mat. 17:5) Nabinagbinag naton nga mahimo naton ini kon makighidait kita sa aton utod nga naglain ang buot sa aton. Kon himuon naton ini kag kon magpabilin kita sa dalan nga nagapadulong sa kabuhi, mabaton naton ang madamo nga pagpakamaayo subong kag sa palaabuton, kag mangin malipayon kita asta sa wala sing katapusan.