Sang ginsugo ni Jehova ang mga tawo nga ‘pun-on ang duta kag dumalahan ini,’ ginapahangop sini nga mangin paraiso sa ulihi ang bilog nga duta. (Gen. 1:28) Dapat man tumanon sang mga magapanubli sang duta ini nga sugo. Pero indi pareho sang tion nga ara pa ang hardin sang Eden, indi pa paraiso ang duta pagkatapos sang Armageddon. Gani sa umpisa, madamo gid sang dapat himuon para tinluan ang duta. Daku gid ini nga obra.

Madumduman naton sa sini ang mga dapat himuon sang mga Israelinhon sang nagbalik na sila sa ila duta halin sa Babilonia. Wala sing may nag-istar sa ila duta sa sulod sang 70 ka tuig. Pero gintagna ni Isaias nga mapatahom nila liwat ang ila duta bangod buligan sila ni Jehova. Ang tagna nagsiling: “Himuon niya ang iya kamingawan nga kaangay sang Eden kag ang iya desyerto nga kapatagan kaangay sang hardin ni Jehova.” (Isa. 51:3) Nahimo gid ini sang mga Israelinhon. Masarangan man sang mga magapanubli sang duta nga himuon ini nga matahom  nga paraiso bangod buligan sila ni Jehova. Kag puede mo mapakita subong nga gusto mo gid nga himuon ini nga hilikuton.

Ang isa ka paagi amo ang paghimo sang imo bug-os nga masarangan para mangin matinlo ang imo balay kag palibot. Himua ini bisan pa wala ini ginahimo sang imo mga kaingod. Magbulig man sa pagpaninlo kag pagmentinar sang Kingdom Hall kag Assembly Hall. Kon posible sa imo kahimtangan, puede ka man maka-apply nga mangin isa ka boluntaryo sa pagbulig sa mga nahalitan sang kalamidad. Paagi sa sini, mapakita mo nga handa ka sa pagbulig sa imo mga kauturan. Pamangkuta ang imo kaugalingon, ‘Kon kabubut-on ni Jehova nga mapanubli ko ang duta, ano nga mga ikasarang ang puede ko tun-an subong nga magamit ko sa bag-ong kalibutan?’

Pagkatapos mabanhaw ni Jesus ang bata nga babayi ni Jairo, nagsiling sia dayon nga pakan-on ang bata. (Mar. 5:42, 43) Indi mabudlay nga pakan-on ang 12 anyos nga bata. Pero hunahunaa kon daw ano kadaku nga hilikuton ang dapat himuon kon tumanon na ni Jesus ang iya promisa nga “ang tanan nga yara sa handumanan nga mga lulubngan makabati sang iya tingog kag magagua.” (Juan 5:28, 29) Wala sing mabasa sa Biblia parte sa mga dapat himuon para may pagkaon, ilistaran, kag bayo ang mga banhawon, pero masiling gid naton nga kinahanglan nila ini. Paano mo mapakita subong nga handa ka sa pagbulig sa ila? Ari ang pila ka pamangkot nga puede mo pamalandungan.

Kon ginpahibalo sa inyo kongregasyon ang parte sa pagbisita sang manugtatap sang sirkito, nagapaiskedyul ka bala para mapakaon sia? Kon gin-asayn nga espesyal payunir ang isa ka Bethelite ukon indi na makapadayon sa iya asaynment ang manugtatap sang sirkito, makabulig ka bala sa pagpangita sang ila ilistaran? Kon may hiwaton nga rehiyonal ukon espesyal nga kombension sa inyo lugar, makaboluntaryo ka bala sa pagbulig antes kag pagkatapos sang kombension ukon puede mo bala maabiabi ang mga delegado?

Base sa Binuhatan 24:15, mapaabot naton nga binilyon ang banhawon. Madamo sa ila ang napatay nga wala nakilala si Jehova. Hatagan sila sang tsansa nga makilala sia pagkatapos sila mabanhaw. a Tudluan sila sang matutom kag eksperiensiado nga mga alagad sang Dios. (Isa. 11:9) Excited na gid si Charlotte nga himuon ini. Naeksperiensiahan niya nga magbantala sa Europe, South America, kag Africa. Nagsiling sia: “Excited na gid ako nga tudluan ang mga banhawon. Kon may mabasa ako parte sa isa ka tawo nga nagkabuhi sadto, pirme ko ginapamensar: ‘Kon nakilala lang kuntani sini nga tawo si Jehova, indi kuntani amo sini ang iya kabuhi.’ Gusto ko gid nga tudluan ang mga banhawon parte kay Jehova kag kon ngaa mangin maayo gid ang ila kabuhi kon alagaron nila sia.”

Madamo man sang dapat tun-an bisan ang matutom nga mga alagad ni Jehova nga nagkabuhi sang una antes magkadto si Jesus sa duta. Imadyina ang imo kalipay samtang ginapaathag mo kay Daniel kon paano natuman ang iya mga gintagna nga wala niya nahangpan sadto. (Dan. 12:8) Isa gid ini ka daku nga pribilehiyo. Imadyina man ang imo mabatyagan samtang ginapaathag mo kanday Rut kag Noemi nga nangin katigulangan sila sang Mesias. Malipay gid kita sa pagtudlo sa mga tawo sa bilog nga kalibutan. Makapokus kita sa sini nga hilikuton kay madula na ang mga problema sa sining malain nga kalibutan.

Paano mo mapakita subong nga gusto mo nga tudluan ang mga banhawon? Panikasugi nga pauswagon ang imo paagi sang pagtudlo sa iban kag magbantala sing regular. (Mat. 24:14) Bisan pa gamay na lang ang imo mahimo sa pagbantala bangod sa imo edad ukon iban pa nga rason, mapakita mo nga gusto mo nga tudluan ang mga banhawon paagi sa paghimo sang imo bug-os nga masarangan.

Maayo gid kon pamalandungan mo ini nga mga pamangkot: Excited ka gid bala nga panublion ang duta? Excited ka bala nga himuon nga paraiso ang duta, buligan ang mga banhawon, kag tudluan sila? Kon ginahimo mo subong ang mga hilikuton nga pareho sa mga hilikuton nga himuon mo sa bag-ong kalibutan, ginapakita mo nga handa ka nga panublion ang duta.