1. Ano ang resulta kon pamalandungan naton ang ginpromisa ni Jehova nga kabuhi nga wala sing katapusan?

 NAGPROMISA si Jehova nga hatagan niya sang “kabuhi nga wala sing katapusan” ang mga magatuman sa iya. (Roma 6:23) Kon pamalandungan naton ini, mas palanggaon pa gid naton si Jehova. Hunahunaa ini: Palangga gid kita sang aton Amay sa langit gani gusto niya nga makaupod naton sia asta sa wala sing katapusan.

2. Ano ang mabulig sa aton sang ginpromisa sang Dios nga kabuhi nga wala sing katapusan?

² Ang ginpromisa sang Dios nga kabuhi nga wala sing katapusan nagabulig sa aton nga mabatas ang mga pagtilaw. Bisan pa pahugon kita sang aton mga kaaway nga patyon nila kita, indi gid kita mag-untat sa pag-alagad kay Jehova. Ngaa? Bangod kabalo kita nga kon mapatay kita nga matutom kay Jehova, banhawon niya kita kag may paglaum kita nga indi na gid mapatay. (Juan 5:28, 29; 1 Cor. 15:55-58; Heb. 2:15) Ngaa makasigurado kita nga mahimo kita mabuhi sing wala sing katapusan? Binagbinagon naton ang mga rason.

3. Ngaa makasigurado kita nga masarangan ni Jehova nga hatagan kita sang kabuhi nga wala sing katapusan? (Salmo 102:12, 24, 27)

³ Kabalo kita nga masarangan ni Jehova nga hatagan kita sang kabuhi nga wala sing katapusan bangod sia ang ginhalinan sang kabuhi kag nagakabuhi sia sing wala sing katapusan. (Sal. 36:9) Talupangda ang pila ka teksto sa Biblia nga nagapamatuod nga si Jehova wala sing ginsuguran kag wala sing katapusan. Ang Salmo 90:2 nagasiling nga si Jehova “halin sa wala sing katubtuban tubtob sa wala sing katubtuban.” Pareho man sa sini ang mabasa sa Salmo 102. (Basaha ang Salmo 102:12, 24, 27.) Kag amo ini ang ginsiling ni manalagna Habacuc parte sa aton Amay sa langit: “O Jehova, indi bala nga nagakabuhi ka na sang una pa? Ikaw ang  akon Balaan nga Dios, kag wala ka sing kamatayon.”—Hab. 1:12.

4. Dapat bala kita mabalaka kon nabudlayan kita nga hangpon nga si Jehova wala sing ginsuguran? Ipaathag.

⁴ Ara na si Jehova halin pa “sa wala sing katubtuban.” (Isa. 40:28) Nabudlayan ka bala nga hangpon ini? Madamo nga tawo ang amo man sini ang ginabatyag. Amo ini ang ginsiling ni Elihu parte sa Dios: “Indi maisip ang iya mga tinuig.” (Job 36:26) Pero bisan pa wala naton nahangpan ang parte sa isa ka butang, indi buot silingon sini nga indi ini matuod. Halimbawa, bisan pa wala naton nahangpan sing bug-os ang parte sa kasanag, indi buot silingon sini nga indi matuod ang kasanag. Sing kaanggid, indi naton mahangpan sing bug-os kon paano nga si Jehova wala sing ginsuguran kag wala sing katapusan. Pero indi buot silingon sini nga indi ini matuod. Ang kamatuoran parte sa Manunuga wala nagadepende sa aton nahangpan ukon wala nahangpan. (Roma 11:33-36) Kag ara na sia antes pa nagluntad ang tanan nga ara sa uniberso lakip ang adlaw kag mga bituon. Sigurado kita nga si Jehova “ang Manunuga sang duta kag paagi sa iya gahom ginhimo niya ini.” Huo, ara na sia antes niya ‘ginhumlad ang kalangitan.’ (Jer. 51:15; Binu. 17:24) Ano ang isa pa ka rason kon ngaa sigurado kita nga mahimo kita mabuhi sing wala sing katapusan?

5. Ano nga paglaum ang ginhatag sa una nga mag-asawa?

⁵ May kamatayon ang tanan nga gintuga ni Jehova sa duta nga may kabuhi magluwas lang sa mga tawo. Gintuga niya sila nga may pinasahi nga paglaum nga indi mapatay. Pero, ginpaandaman ni Jehova si Adan: “Indi gid ikaw magkaon sang bunga sang kahoy sang pagkilala sang maayo kag malain, kay sa adlaw nga magkaon ka sang bunga sini pat-od gid nga mapatay ka.” (Gen. 2:17) Kon gintuman lang ni Adan kag ni Eva si Jehova, wala sila kuntani napatay. Kon wala sila nagpakasala, posible gid nga tugutan sila ni Jehova nga kaunon ang bunga sang “kahoy sang kabuhi.” Kon makakaon sila sini, makasalig gid sila nga hatagan sila sang Dios sing ‘kabuhi nga dayon’ ukon kabuhi nga wala sing katapusan. b—Gen. 3:22.

6-7. (a) Ano pa ang nagapamatuod nga gintuga ang mga tawo para magkabuhi sing wala sing katapusan? (b) Ano ang mga gusto mo nga himuon sa paraiso? (Tan-awa ang mga piktyur.)

⁶ Masarangan sang aton utok nga magtago sang madamo nga impormasyon sa bilog naton nga kabuhi. Pero suno sa pila ka scientist,  mas madamo pa kuntani ang masarangan nga matago sang aton utok. Makapahunahuna gid ini. Sang 2010, ang isa ka artikulo sa magasin nga Scientific American Mind nagsiling nga masarangan sang aton utok nga magtago sing mga 2.5 ka milyon ka gigabyte nga impormasyon. Katumbas ini sang tatlo ka milyon ka oras (sobra 300 ka tuig) nga programa sa TV. Pero posible nga sobra pa sa sini ang masarangan sang aton utok. Ginapakita sini nga gindesinyo ni Jehova ang aton utok nga makasarang magtago sang impormasyon nga sobra pa sa matun-an naton sa sulod lang sang 70 ukon 80 ka tuig.—Sal. 90:10.

⁷ Gintuga man kita ni Jehova nga may mabaskog nga handum nga magkabuhi sing wala sing katapusan. Ang Biblia nagasiling nga ‘ginbutang sang Dios sa tagipusuon sang mga tawo ang wala sing katubtuban.’ (Man. 3:11) Amo ini ang isa ka rason kon ngaa ginakabig naton nga kaaway ang kamatayon. (1 Cor. 15:26) Kon magmasakit kita sing grabe, nagahulat na lang bala kita nga mapatay? Wala. Sa masami, nagapadoktor kita kag nagatomar kita sang bulong para mag-ayo kita. Ginahimo naton ang tanan para indi kita mapatay. Kag kon may mapatay sa aton mga pinalangga, bata man ukon tigulang, indi bala nga nasubuan gid kita? (Juan 11:32, 33) Handum gid naton nga mabuhi sing wala sing katapusan kag may ikasarang kita nga makatuon asta san-o. Kon indi katuyuan sang aton mahigugmaon nga Manunuga nga magkabuhi kita sing wala sing katapusan, wala niya kuntani kita ginhatagan sini nga handum kag ikasarang. Pero may iban pa nga mga rason kon ngaa makapati gid kita nga mahimo kita mabuhi sing wala sing katapusan. Binagbinagon naman naton ang mga ginhimo ni Jehova sang una kag ang mga ginahimo niya subong nga nagapamatuod nga wala nagbag-o ang iya katuyuan.

8. Base sa Isaias 55:11, ano ang masiling naton parte sa katuyuan ni Jehova para sa aton?

⁸ Sang nagpakasala si Adan kag si Eva, nagresulta ini sa kamatayon sang ila mga anak. Pero bisan pa amo sini ang natabo, wala ginbag-o ni Jehova ang iya katuyuan. (Basaha ang Isaias 55:11.) Katuyuan niya gihapon nga mabuhi sing wala sing katapusan ang matutom nga mga tawo. Masiling gid naton ini base sa mga ginsiling kag ginhimo ni Jehova para matuman ang iya katuyuan.

9. Ano ang ginpromisa sang Dios? (Daniel 12:2, 13)

⁹ Nagpromisa si Jehova nga banhawon niya ang mga patay kag hatagan niya sila sang paglaum nga mabuhi sing wala sing katapusan. (Binu. 24:15; Tito 1:1, 2) Sigurado ang matutom nga si Job nga gusto gid ni Jehova nga banhawon ang mga patay. (Job 14:14, 15) Kabalo si manalagna Daniel nga banhawon ang mga patay kag may paglaum sila nga mabuhi sing wala sing katapusan. (Sal. 37:29; basaha ang Daniel 12:2, 13.) Kabalo man ang mga Judiyo sang panahon ni Jesus nga hatagan ni Jehova sang “kabuhi nga wala sing katapusan” ang Iya matutom nga mga alagad. (Luc. 10:25; 18:18) Madamo nga beses nga ginsambit ni Jesus ini nga promisa, kag ginbanhaw sia mismo sang iya Amay.—Mat. 19:29; 22:31, 32; Luc. 18:30; Juan 11:25.

10. Kon basihan ang ginhimo nga mga pagbanhaw sang una, ano ang ginapamatud-an sini? (Tan-awa ang piktyur.)

¹⁰ Si Jehova ang naghatag sang kabuhi kag may gahom sia nga banhawon ang mga patay. Ginhatagan niya si manalagna Elias sang gahom para banhawon ang bata nga lalaki sang balo sa Sarepta. (1 Hari 17:21-23) Sang ulihi, sa bulig sang Dios, ginbanhaw ni manalagna Eliseo ang bata nga lalaki sang babayi nga Sunemnon. (2 Hari 4:18-20, 34-37) Ini nga mga halimbawa kag ang iban pa nga mga rekord parte sa pagbanhaw nagapamatuod nga may gahom si Jehova nga banhawon ang mga patay. Sang ari si Jesus sa duta, ginpakita niya nga ginhatagan sia sang iya Amay sini nga gahom. (Juan 11:23-25, 43, 44) Ara na subong si Jesus sa langit kag ginhatag sa iya ang “bug-os nga awtoridad sa langit kag sa duta.” Gani masarangan niya nga tumanon ang promisa nga banhawon “ang tanan nga yara sa handumanan nga mga lulubngan” kag may paglaum sila nga mabuhi sing wala sing katapusan.—Mat. 28:18; Juan 5:25-29.

11. Paano ginpaposible sang gawad ang kabuhi nga wala sing katapusan para sa aton?

¹¹ Ngaa gintugutan ni Jehova nga maeksperiensiahan sang iya pinalangga nga Anak ang masakit nga kamatayon? Amo ini ang sabat ni Jesus: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tanan nga nagatuo sa iya indi malaglag kundi makatigayon sang kabuhi nga wala sing katapusan.” (Juan 3:16) Bangod ginhatag sang Dios ang iya Anak bilang gawad para tabunan ang aton mga sala, nangin posible ang kabuhi nga wala sing katapusan para sa aton. (Mat. 20:28) Ginpaathag ni apostol Pablo ining importante nga bahin sang katuyuan sang Dios. Nagsulat sia: “Tungod sa isa ka tawo may kamatayon, kag tungod man sa isa ka tawo may pagkabanhaw. Tungod kay Adan ang tanan nagakapatay, kag tungod man sa Cristo ang tanan mabanhaw.”—1 Cor. 15:21, 22.

12. Paano tumanon ni Jehova ang iya katuyuan?

¹² Gintudluan ni Jesus ang iya mga sumulunod nga ipangamuyo ang pagkari sang Ginharian sang Dios kag ang katumanan sang kabubut-on sang Dios sa duta. (Mat. 6:9, 10) Nalakip sa katuyuan sang Dios ang paghatag sa mga tawo sang kabuhi nga wala sing katapusan. Para matuman ini, gintangdo ni Jehova ang iya Anak nga mangin Hari sang Mesianikong Ginharian. Kag ginatipon sang Dios ang 144,000 ka tawo halin sa duta para mangin kaupod ni Jesus sa pagtuman sang kabubut-on sang Dios.—Bug. 5:9, 10.

13. Ano ang ginahimo subong ni Jehova, kag ano ang dapat mo himuon?

 ¹³ Ginatipon subong ni Jehova “ang daku nga kadam-an” sang mga tawo, kag ginahanas niya sila nga mangin sakop sang iya Ginharian. (Bug. 7:9, 10; Sant. 2:8) Nabahinbahin ang kalabanan nga mga tawo sa kalibutan bangod sang kaakig kag inaway, pero ginapanikasugan sang “daku nga kadam-an” nga madula ang ila kaakig sa tanan nga tawo ano man ang ila pungsod, tribo, kag rasa. Daw pareho lang nga ginasalsal nila ang ila espada para mangin punta sang arado. (Miq. 4:3) Imbes nga mag-entra sa mga inaway nga nagaresulta sa pagkapatay sang madamo nga tawo, ginabuligan nila ang mga tawo nga makita ang “matuod nga kabuhi” paagi sa pagtudlo sa ila parte sa matuod nga Dios kag sa iya mga katuyuan. (1 Tim. 6:19) Bangod ginasuportahan nila ang Ginharian sang Dios, posible nga pamatukan sila sang ila pamilya ukon posible nga maapektuhan ang ila palangabuhian. Pero ginasigurado ni Jehova nga may ara sila sang ila mga kinahanglanon. (Mat. 6:25, 30-33; Luc. 18:29, 30) Ginapakita sini nga matuod gid ang Ginharian sang Dios kag padayon sini nga tumanon ang katuyuan ni Jehova.

14-15. Paano matuman ang promisa ni Jehova nga dulaon ang kamatayon?

¹⁴ Nagahari na subong si Jesus sa Ginharian sang Dios sa langit, kag tumanon niya ang tanan nga ginpromisa ni Jehova. (2 Cor. 1:20) Sugod sang 1914, nagagahom na si Jesus sa tunga  sang iya mga kaaway. (Sal. 110:1, 2) Sa indi na lang madugay, tapuson niya kag sang iya kaupod nga mga manuggahom ang ila pagpangdaug kag laglagon nila ang tanan nga malain nga tawo.—Bug. 6:2.

¹⁵ Sa tion sang Isa ka Libo ka Tuig nga Paggahom ni Jesus, banhawon niya ang mga patay kag buligan niya ang matinumanon nga mga tawo nga mangin perpekto. Pagkatapos sang katapusan nga pagtilaw, ang mga matarong base sa paghukom ni Jehova “magapanubli sang duta, kag magapuyo sila sa sini sa wala sing katubtuban.” (Sal. 37:10, 11, 29) Makalilipay gid kay ‘dulaon na ang katapusan nga kaaway nga amo ang kamatayon.’—1 Cor. 15:26.

16. Ano dapat ang aton panguna nga rason sa pag-alagad kay Jehova?

¹⁶ Natun-an naton nga nabase gid sa Pulong sang Dios ang aton paglaum nga mabuhi sing wala sing katapusan. Mabuligan kita sini nga paglaum nga magpabilin nga matutom sa sining mabudlay nga katapusan nga mga adlaw. Pero para malipay sa aton si Jehova, dapat matutom kita sa iya indi lang bangod gusto naton nga mabuhi sing wala sing katapusan. Ano dapat ang aton panguna nga rason? Gusto naton nga magpabilin nga matutom kay Jehova kag kay Jesus bangod palangga gid naton sila. (2 Cor. 5:14, 15) Kon palangga naton sila, mapalig-on kita sini nga ilugon sila kag isugid sa iban ang aton paglaum. (Roma 10:13-15) Kon amo ini ang aton rason sa pag-alagad kag kon ginahimo naton ang aton bug-os nga masarangan sa pagbulig sa iban, mangin abyan kita ni Jehova asta sa wala sing katapusan.—Heb. 13:16.

17. Ano ang dapat himuon sang kada isa sa aton? (Mateo 7:13, 14)

¹⁷ Gusto bala naton nga mabuhi sing wala sing katapusan? Ginhatagan kita ni Jehova sini nga paglaum. Pero mabaton lang naton ini kon magpabilin kita sa dalan nga nagapadulong sa kabuhi. (Basaha ang Mateo 7:13, 14.) Ano ang mapaabot naton kon may kabuhi na kita nga wala sing katapusan? Binagbinagon naton ini sa masunod nga artikulo.