1. Antes mapatay si Jesus, ano ang ginsiling niya sa kriminal sa tupad niya? (Lucas 23:39-43)

 GRABE gid ang pag-antos ni Jesus kag sang duha ka kriminal sa tupad niya, kag nabatyagan nila nga lapit na lang sila mapatay. (Luc. 23:32, 33) Indi mga disipulo ni Jesus ining duha ka kriminal kay ginayaguta nila sia. (Mat. 27:44; Mar. 15:32) Pero nagbag-o ang isa sa ila. Nagsiling sia: “Jesus, dumduma ako kon magsulod ka sa imo Ginharian.” Nagsabat si Jesus: “Sa pagkamatuod ginasiling ko sa imo karon nga adlaw, mangin kaupod ko ikaw sa Paraiso.” (Basaha ang Lucas 23:39-43.) Posible nga nabatian sini nga kriminal ang parte sa “Ginharian sang langit” nga ginbantala ni Jesus, pero wala sia nangin disipulo ni Jesus. Kag wala man nagsiling si Jesus nga makasulod ini nga tawo sa Ginharian. (Mat. 4:17) Gani ang ginapatuhuyan ni Jesus amo ang Paraiso sa duta sa palaabuton. Ngaa masiling naton ini?

2. Ngaa masiling naton nga isa ka Judiyo ang kriminal nga naghinulsol?

² Posible gid nga isa ka Judiyo ang kriminal nga naghinulsol. Kay man, ginsilingan niya ang isa pa ka kriminal: “Wala ka gid bala mahadlok sa Dios, karon nga ginasilutan ka man?” (Luc. 23:40) Isa lang ka Dios ang ginasimba sang mga Judiyo, pero madamo nga dios ang ginasimba sang mga tawo sa iban nga pungsod. (Ex. 20:2, 3; 1 Cor. 8:5, 6) Kon indi Judiyo ining duha ka kriminal, mahimo nga amo ini kuntani ang pamangkot sang isa ka kriminal sa iya upod, “Wala ka gid bala mahadlok sa mga dios?” Isa pa, wala ginpadala si Jesus para sa mga tawo sa iban nga pungsod, kundi para sa “nadula nga mga karnero sang panimalay sang Israel.” (Mat. 15:24) Ginpahayag sang Dios sa mga Israelinhon nga banhawon niya ang mga patay. Posible nga nabal-an ini sang kriminal nga naghinulsol kay daw ginapahangop sang iya ginsiling nga nagapati sia nga banhawon ni Jehova si Jesus para maggahom sa Ginharian sang Dios. Posible nga nagalaum man sia nga banhawon sia sang Dios.

3. Sang ginsambit ni Jesus ang Paraiso, ano ang posible nga nahunahuna sang kriminal nga naghinulsol? Ipaathag. (Genesis 2:15)

 ³ Bilang isa ka Judiyo, posible nga nabal-an sang kriminal nga naghinulsol ang parte kanday Adan kag Eva kag ang parte sa Paraiso nga ginpaistaran sa ila ni Jehova. Gani sang ginsambit ni Jesus ang Paraiso, posible nga nahunahuna sang kriminal ang isa ka matahom nga hardin sa duta sa ulihi.—Basaha ang Genesis 2:15.

4. Ano ang dapat naton pamalandungan kon binagbinagon naton ang ginsiling ni Jesus sa kriminal?

⁴ Kon binagbinagon naton ang ginsiling ni Jesus sa kriminal, mapalig-on kita sini nga pamalandungan ang kabuhi sa Paraiso. Ang matuod, kon binagbinagon naton ang maayo nga kahimtangan sang Israel sang naggahom si Hari Solomon, may matun-an kita parte sa Paraiso. Ang Biblia nagasiling nga si Jesus labaw pa kay Solomon. Gani mapaabot naton nga magabuligay si Jesus kag ang kaupod niya nga mga manuggahom para himuon ang duta nga isa ka matahom nga paraiso. (Mat. 12:42) Maathag nga dapat mangin interesado ang “iban nga mga karnero” kon ano ang dapat nila himuon para makaistar sila sa Paraiso asta sa wala sing katapusan.—Juan 10:16.

5. Ano sa banta mo ang mangin kabuhi sa Paraiso?

⁵ Ano ang ginaimadyin mo nga mangin kabuhi sa Paraiso? Posible nga ginaimadyin mo ang isa ka matahom nga parke pareho sang hardin sang Eden. (Gen. 2:7-9) Posible nga madumduman mo ang tagna ni Miqueas nga ang kada isa sa katawhan sang Dios magapungko “sa idalom sang ila puno sang ubas kag sa idalom sang ila kahoy nga higuera.” (Miq. 4:3, 4) Posible nga madumduman mo man ang mga teksto sa Biblia nga nagasiling nga mangin bugana ang pagkaon. (Sal. 72:16; Isa. 65:21, 22) Gani posible nga ginaimadyin mo nga ara ka sa isa ka matahom nga hardin, dayon may lamesa nga puno sang manamit nga mga pagkaon, kag mapanimahuan mo ang mahamot nga mga bulak kag mga tanom. Kag posible gid nga ginaimadyin mo nga kaupod mo ang imo pamilya, mga abyan, kag ang imo mga pinalangga kag mga abyan nga nabanhaw, kag masadya ang inyo pag-istoryahanay. Indi ini isa ka damgo. Sigurado kita nga matabo gid ini diri sa duta. Magluwas sa sini, may himuon man kita nga makalilipay nga hilikuton sa Paraiso.

6. Ano ang mga himuon naton sa Paraiso? (Tan-awa ang piktyur.)

⁶ Gintuga kita ni Jehova nga may ikasarang nga mangin malipayon sa aton ginahimo. (Man. 2:24) Mangin masako gid kita sa tion sang Isa ka Libo ka Tuig nga Paggahom sang Cristo. Kinahanglan sang mga makalampuwas sa dakung kapipit-an kag sang minilyon nga banhawon ang bayo, pagkaon, kag ilistaran. Madamo gid kita sang dapat himuon para mahatag ini sa ila, pero mangin malipayon gid kita sa paghimo sini. Pareho kanday Adan kag Eva nga ginsugo sadto nga palaparon ang hardin nga ila ginaistaran, pribilehiyo man naton nga himuon nga paraiso  ang duta. Minilyon sa mga banhawon ang diutay lang ang nabal-an parte kay Jehova kag sa iya katuyuan, gani dapat naton sila tudluan. Nalakip man sa mga banhawon ang mga matutom nga napatay antes pa sang panahon ni Jesus, gani dapat naton sila buligan nga madugangan ang ila nabal-an. Imadyina ang aton kalipay samtang ginatudluan naton sila.

7. Sa ano kita makasalig, kag ngaa?

⁷ Makasalig kita nga sa Paraiso, mangin malinong ang aton kabuhi, kompleto ang aton mga kinahanglanon, kag mangin organisado ang tanan. Ngaa masiling naton ini? Bangod napakita na sa aton ni Jehova ang mangin kahimtangan kon maggahom na ang iya Anak. Pero sampol lang ini. Makita naton ini sang naggahom si Hari Solomon.

8. Paano natuman sang una ang ginsiling ni Hari David sa Salmo 37:10, 11, 29? (Tan-awa ang “Mga Pamangkot Gikan sa mga Bumalasa” sa sini nga isyu.)

⁸ Gintuytuyan si Hari David sa pagsulat parte sa mangin kahimtangan kon maggahom na ang isa ka maalam kag matutom nga hari. (Basaha ang Salmo 37:10, 11, 29.) Kon ginaistorya naton sa iban ang parte sa Paraiso sa palaabuton, masami nga ginabasa naton sa ila ang Salmo 37:11. Husto gid nga ginabasa naton ini bangod ginkutlo ini ni Jesus sa iya Sermon sa Bukid nga nagapahangop nga matuman ini sa palaabuton. (Mat. 5:5) Pero ginapakita man sang ginsiling ni David kon ano ang mangin kahimtangan sa panahon ni Hari Solomon. Sang naggahom si Solomon sa Israel, naeksperiensiahan sang katawhan sang Dios ang pinasahi nga paghidait kag kabuganaan sa duta diin “nagailig ang gatas kag dugos.” Nagsiling ang Dios: “Kon padayon ninyo nga tumanon ang akon mga pagsulundan . . . , paluntaron ko ang paghidait sa sini nga duta, kag magahigda kamo nga wala sing nagapahadlok sa inyo.” (Lev. 20:24; 26:3, 6) Natuman ini nga mga promisa sang naggahom si Solomon. (1 Cron. 22:9; 29:26-28) Kag nagpromisa si Jehova nga “madula na” ang malain nga mga tawo. (Sal. 37:10) Gani natuman sang una ang ginasiling sang Salmo 37:10, 11, 29, kag matuman pa gid ini sa palaabuton.

9. Ano ang ginsiling sang rayna sang Sheba parte sa paggahom ni Hari Solomon?

⁹ Nabatian sang rayna sang Sheba ang parte sa  paghidait kag kabuganaan sang Israel sang naggahom si Solomon, gani naglakbay sia sing malayo pakadto sa Jerusalem para makita niya ini mismo. (1 Hari 10:1) Sang makita niya ang ginharian ni Solomon, nagsiling sia: “Wala pa gali sa katunga ang nasugid sa akon. . . . Malipayon ang imo mga tinawo, kag malipayon ang imo mga alagad nga nagaalagad pirme sa imo kag nagapamati sa imo kaalam!” (1 Hari 10:6-8) Pero ang kahimtangan sang naggahom si Solomon sampol lang sang himuon ni Jehova para sa mga tawo paagi sa Iya Anak nga si Jesus.

10. Ngaa labaw gid si Jesus kay Solomon?

¹⁰ Labaw gid si Jesus kay Solomon. Indi perpekto si Solomon kag nakahimo sia sang serioso nga mga sala nga nagresulta sa mga problema sa katawhan sang Dios. Sa bahin naman ni Jesus, perpekto sia nga Manuggahom nga wala gid sang sala. (Luc. 1:32; Heb. 4:14, 15) Nangin matutom si Jesus sa Dios bisan pa sang mabudlay gid nga mga pagtilaw ni Satanas. Ginpamatud-an sang Cristo nga indi gid sia maghimo sang sala ukon sang bisan ano nga posible makahalit sa iya matutom nga mga sakop. Isa gid ka kadungganan nga sia ang aton Hari.

11. Sin-o ang magabulig kay Jesus sa iya paggahom?

¹¹ May magabulig kay Jesus sa pag-atipan sa mga tawo kag sa pagtuman sang katuyuan ni Jehova sa duta. Sila amo ang 144,000 nga kaupod niya nga mga manuggahom. (Bug. 14:1-3) Nakaeksperiensia sila sang madamo nga mga pagtilaw kag mga problema sang ari sila sa duta, gani mahangpan nila ang sitwasyon sang mga tawo. Pero, ano gid ang himuon sining mga kaupod ni Jesus nga mga manuggahom?

12. Ano ang ipahimo ni Jehova sa 144,000?

¹² Mas madamo ang himuon ni Jesus kag sang iya kaupod nga mga manuggahom sangsa ginhimo ni Solomon. Minilyon ka tawo sa isa lang ka pungsod ang dapat atipanon ni Hari Solomon. Pero binilyon ka tawo sa bilog nga kalibutan ang dapat atipanon sang mga nagagahom sa Ginharian sang Dios. Isa gid ka dalayawon nga pribilehiyo ang ginhatag ni Jehova sa 144,000.

13. Ano ang pinasahi nga responsibilidad sang kaupod ni Jesus nga mga manuggahom?

¹³ Pareho kay Jesus, magaalagad man ang 144,000 bilang mga hari kag mga saserdote. (Bug. 5:10) Sang ginapatuman sadto sa mga Israelinhon ang Mosaikong Kasuguan, responsibilidad sang mga saserdote nga siguraduhon nga mangin maayo ang panglawas sang katawhan kag mangin suod sila kay Jehova. Ang Kasuguan ‘landong lamang sang maayong mga butang nga magaabot,’ gani makasiling kita nga may pinasahi man nga responsibilidad ang kaupod ni Jesus nga mga manuggahom. Buligan nila ang katawhan sang Dios nga mangin maayo pirme ang ila panglawas kag magpabilin nga suod kay Jehova. (Heb. 10:1) Wala pa kita kabalo subong kon paano magakomunikar ining mga hari kag mga saserdote sa mga sakop sang Ginharian sa duta. Ano man ang himuon ni Jehova nga paagi, makasalig kita nga mabaton gid sang mga magaistar sa Paraiso sa palaabuton ang paggiya nga kinahanglan nila.—Bug. 21:3, 4.

14. Paano nahiusa ang “iban nga mga karnero” kag ang “diutay nga panong”?

¹⁴ Gintawag ni Jesus nga “diutay nga panong” ang kaupod niya nga mga manuggahom. (Luc. 12:32) May ginsambit man sia nga ikaduha nga grupo nga gintawag niya nga “iban nga mga karnero.” Nahiusa bilang isa ka panong ining duha ka grupo. (Juan 10:16) Nagabuligay ining duha ka grupo subong, kag padayon nila ini nga himuon asta nga mangin paraiso ang duta. Sa sina nga tion, ara na sa langit ang “diutay nga panong” kag may paglaum naman ang “iban nga mga karnero” nga mabuhi sa duta sing wala sing  katapusan. Pero may dapat himuon subong ang “iban nga mga karnero” para makaistar sila sa Paraiso.

15. (a) Paano ginasuportahan sang “iban nga mga karnero” ang mga utod sang Cristo? (b) Paano mo mailog ang halimbawa sang brother nga may ginabakal sa botika? (Tan-awa ang piktyur.)

¹⁵ Napatay ang kriminal nga naghinulsol, gani wala niya mapakita nga nagapasalamat gid sia sa ginhimo sang Cristo para sa iya. Pero bilang bahin sang “iban nga mga karnero,” madamo kita sang kahigayunan subong nga mapakita ini kay Jesus. Halimbawa, mapakita naton nga palangga naton sia paagi sa aton mga ginahimo para suportahan ang iya hinaplas nga mga utod. Nagsiling si Jesus nga amo ini ang basihan niya sa paghukom kon sin-o ang mga karnero. (Mat. 25:31-40) Masuportahan naton ang mga utod sang Cristo paagi sa mapisan nga pagbulig sa ila sa pagbantala kag pagtudlo sa mga tawo. (Mat. 28:18-20) Gani dapat naton gamiton ang mga gamit sa pag-Bible study nga ginahatag nila sa aton, pareho sang libro nga Magkabuhi sing Wala Katapusan! Kon wala ka sing Bible study subong, panikasugi nga makaumpisa sing Bible study sa mga tawo nga maistorya mo.

16. Ano ang himuon naton subong para mahandaan ang kabuhi sa Paraiso?

¹⁶ May mga kinaiya nga gusto ni Jehova nga makita sa mga tawo sa Paraiso. Pero indi naton paghunahunaon nga hulaton na lang naton ang Paraiso antes naton ipakita ini nga mga kinaiya. Subong pa lang, ipakita na naton ang pagpugong sa kaugalingon kag mangin honest kita sa aton mga ginahambal kag ginahimo. Kag ipakita naton nga matutom kita kay Jehova, sa aton asawa ukon bana, kag sa aton mga kauturan. Kon ginatuman naton si Jehova samtang ari pa kita sa sining malain nga kalibutan, mangin mahapos na lang para sa aton nga tumanon sia sa Paraiso. Panikasugan man naton nga ipakita ang iban pa nga mga kinaiya, kag magtuon kita sang mga ikasarang nga magamit naton sa bag-ong kalibutan. Tan-awa ang artikulo nga “Handa Ka Na Bala nga ‘Panublion ang Duta’?” sa sini nga isyu.

17. Dapat bala kita maluyahan sang buot bangod sa nahimo naton nga serioso nga mga sala sang una? Ipaathag.

¹⁷ Kon ginakonsiensia kita gihapon bangod nakahimo kita sang serioso nga mga sala sang una, panikasugan man naton nga dulaon ini nga balatyagon. Siempre, indi gid naton paggamiton nga  rason ang halad-gawad para ‘hungod nga maghimo sang sala.’ (Heb. 10:26-31) Pero makasalig kita nga kon matuod gid ang aton paghinulsol sa nahimo naton nga serioso nga sala, kon nagpabulig kita kay Jehova kag sa mga gulang, kag kon ginbag-o naton ang aton ginahimo, ginpatawad na niya kita sing bugana. (Isa. 55:7; Binu. 3:19) Dumduma ang ginsiling ni Jesus sa mga Fariseo: “Wala ako nagkari sa pagtawag sa mga matarong, kundi sa mga makasasala.” (Mat. 9:13) Masarangan sang halad-gawad nga tabunan ang tanan naton nga sala.

18. Ano ang gusto mo nga ipamangkot sa kriminal nga napatay kaupod ni Jesus?

¹⁸ Imadyina nga ara ka sa Paraiso kag ginaistorya mo ang kriminal nga may ginpangabay kay Jesus. Sigurado gid nga magapasalamat kamo nga duha sa sakripisyo nga ginhimo ni Jesus. Puede mo sia pamangkuton parte sa mga natabo mga pila ka oras antes napatay si Jesus kag kon ano ang ginbatyag niya sang ginsabat ni Jesus ang iya pangabay. Pero posible nga pamangkuton ka man niya kon ano ang sitwasyon sa kalibutan sang malapit na matapos ang sistema ni Satanas. Isa gid ka kadungganan nga tudluan parte sa Pulong sang Dios ang mga tawo nga pareho sa sini nga kriminal.—Efe. 4:22-24.

19. Ngaa indi mangin makatalaka ang kabuhi sa Paraiso? (Tan-awa ang piktyur sa kober.)

¹⁹ Indi gid mangin makatalaka ang kabuhi sa Paraiso. Madamo kita sang maistorya nga mga tawo nga may makapalig-on nga mga eksperiensia, kag may himuon kita pirme nga makalilipay nga hilikuton. Labaw sa tanan, kada adlaw mas makilala naton sing maayo ang aton Amay sa langit kag mangin malipayon gid kita sa iya mga ginahatag. May matun-an gid kita pirme parte sa iya, kag madamo gid kita sang puede tun-an parte sa iya mga tinuga. Samtang nagalawig ang aton kabuhi, nagabakod man ang aton gugma sa Dios. Nagapasalamat gid kita kay Jehova kag kay Jesus sa ila ginpromisa nga kabuhi nga wala sing katapusan sa Paraiso.