Nabasa mo na bala sing maayo ang bag-o nga mga isyu sang Ang Lalantawan? Kon amo, tilawi kon masabat mo ang masunod nga mga pamangkot:

Ano ang dapat naton himuon para ‘mabag-o naton ang aton panghunahuna’? (Roma 12:2)

Indi bastante nga maghimo lang kita sang pila ka maayo nga mga butang. Sa baylo, dapat naton usisaon ang aton nasulod nga pagkatawo kag dapat kita maghimo sang mga pagbag-o para matuman naton ang mga kasuguan ni Jehova sa bug-os naton nga masarangan.​—w23.01, p. 8-9.

Paano naton dapat tamdon ang mga nagakatabo sa kalibutan?

Ang mga nagakatabo subong sa kalibutan nagapakita nga nagakatuman ang mga tagna sa Biblia. Gani interesado kita sa sini. Pero indi kita dapat maghaumhaum bangod posible ini makaguba sang aton paghiusa. Sa baylo, ibase naton ang aton mga ginasiling sa mga publikasyon nga ginhimo sang organisasyon ni Jehova. (1 Cor. 1:10)—w23.02, p. 16.

Ano ang kinalain sang pagpabawtismo ni Jesus sa pagpabawtismo sang iya mga sumulunod?

Indi pareho sa aton, indi kinahanglan ni Jesus nga idedikar ang iya kaugalingon kay Jehova bangod natawo sia sa pungsod nga nadedikar sa Dios. Perpekto si Jesus kag wala sia sing nahimo nga sala, gani indi niya kinahanglan nga maghinulsol.​—w23.03, p. 5.

Paano naton mabuligan ang iban nga magkomento sa mga miting?

Lip-uton lang naton ang aton komento para madamo ang makakomento. Likawan man naton nga magkomento sang madamo nga punto para may mabilin pa nga mga punto nga puede ikomento sang iban.​—w23.04, p. 23.

Ano ang ginapatuhuyan sang “Dalan sang Pagkabalaan” nga ginsambit sa Isaias 35:8?

Sadto, nagapatuhoy ini sa malaragwayon nga ruta sang mga Judiyo nga nagbalik sa ila pungsod halin sa Babilonia. Kamusta naman subong? Sa sulod sang ginatos ka tuig antes sang 1919, may mga ginhimo para mahanda ini nga dalan. Nalakip sa sini ang pag-translate kag pag-imprinta sang Biblia. Ang katawhan sang Dios ara sa espirituwal nga paraiso, kag padayon sila nga nagalakat sa “Dalan sang Pagkabalaan” asta nga mabaton nila ang mga pagpakamaayo sang Ginharian.​—w23.05, p. 15-19.

Ano ang ginapatuhuyan sang duha ka babayi sa Hulubaton kapitulo 9?

Ginsambit sa Hulubaton ang parte sa pangagda sang “buangbuang nga babayi” nga nagapadulong sa “Lulubngan.” Ginsambit man sini ang parte sa pangagda sang “matuod nga kaalam,” nga ginlaragway bilang isa ka babayi, nga nagapadulong “sa dalanon sang paghangop” kag sa kabuhi. (Hulu. 9:1, 6, 13, 18)—w23.06, p. 22-24.

Base sa eksperiensia ni Lot, paano ginpakita sang Dios nga mapainubuson Sia kag makatarunganon?

Ginsugo ni Jehova si Lot nga maghalin sa Sodoma kag magpalagyo sa bukid. Sang nakitluoy si Lot nga sa Zoar lang sia malagyo, ginpasugtan sia sang Dios.​—w23.07, p. 21.

Ano ang puede himuon sang asawa kon nagatan-aw sang pornograpiya ang iya bana?

Indi niya dapat pagbasulon ang iya kaugalingon. Dapat sia magpokus sa iya kaangtanan sa Dios, kag pamalandungan niya ang mga kasaysayan sa Biblia parte sa mga babayi nga ginpaumpawan sang Dios sang nakabatyag sila sang grabe nga kasubo. Puede niya buligan ang iya bana nga malikawan ang mga sitwasyon nga masulay sia.​—w23.08, p. 14-17.

Kon ginakuestyon sang iban ang aton mga ginapatihan, paano makabulig ang paghangop para mangin malulo kita?

Gamiton naton ang ila pamangkot para mabal-an naton kon ano ayhan ang ila mga ginahunahuna ukon ginakabalak-an. Makabulig ini para mangin malulo kita sa aton pagsabat sa ila.​—w23.09, p. 17.

Ano ang matun-an naton kay Maria parte sa pagbaton sang kabakod nga kinahanglan naton?

Sang nabal-an ni Maria nga sia ang mangin iloy sang Mesias, ginpabakod sia sang iban. Ginpalig-on sia ni Gabriel kag ni Elisabet. Mapabakod man kita sang aton mga kauturan.​—w23.10, p. 15.

Paano posible sabton ni Jehova ang aton mga pangamuyo?

Nagapromisa sia nga pamatian niya ang aton mga pangamuyo, kag ginabinagbinag niya kon ano ang epekto sang aton mga ginapangabay sa iya katuyuan. (Jer. 29:12) Posible nga sabton niya sa lainlain nga paagi ang pangamuyo sang mga tawo nga pareho ang ginapangabay, pero buligan gid niya kita pirme.​—w23.11, p. 21-22.

Ginsambit na sa Roma 5:2 ang parte sa “paglaum,” gani ngaa ginsambit pa ini liwat sa bersikulo 4?

Kon matun-an sang isa ka tawo ang parte sa maayong balita, may paglaum sia nga mabuhi sa paraiso sa duta. Pero kon makaeksperiensia na sia sang mga kabudlayan kag ginbatas niya ini, malipay sa iya ang Dios. Gani nagabakod pa gid ang iya pagsalig nga matuman gid ang iya paglaum.​—w23.12, p. 12-13.