SIGURADO gid nga nalipay ka sa madamo nga regalo ni Jehova, kag nagapasalamat ka sa iya kay ginhatagan ka niya sing kahilwayan kon paano mo gamiton ini nga mga regalo. Suno sa Biblia, regalo sang Dios ang alak. Nagsiling man ini: “Ang tinapay nagapakadlaw, kag ang alak nagapahalipay sang kabuhi.” (Man. 10:19; Sal. 104:15) Pero, posible natalupangdan mo nga nangin problema sang pila ka tawo ang parte sa makahulubog nga ilimnon. Lainlain man ang opinyon sang mga tawo sa bilog nga kalibutan parte sa pag-inom. Ano ang makabulig sa aton para makahimo kita sang maayo nga desisyon parte sa sini?

Bisan diin man kita nagaistar ukon ano man ang aton kultura, dapat kita magpagiya sa panghunahuna sang Dios imbes nga sa panghunahuna sang mga tawo kon nagahimo kita sang desisyon. Kon himuon naton ini, magaresulta ini sa aton kaayuhan kag mangin mas malipayon kita.

Posible natalupangdan mo nga madamo nga tawo ang palainom kag grabe sila paimnon. Nagainom ang iban bangod makaparelaks kuno ini sa ila. May iban naman nga nagasiling nga nagainom sila para malipatan nila ang ila mga problema. Kag sa pila ka lugar, kon grabe ka paimnon, ginadayaw ka sang iban.

Pero, may laygay para sa aton ang aton mahigugmaon nga Manunuga. Halimbawa, ginpaandaman niya kita parte sa indi maayo nga mga resulta sang sobra nga pag-inom. Mabasa naton sa Hulubaton 23:29-35 ang nagakatabo sa isa ka hubog nga tawo kag ang pila ka problema nga resulta sang pagpahubog. a Binagbinaga si Daniel nga isa ka gulang sa Europe. Amo ini ang ginsiling niya parte sa iya kabuhi antes sia nangin alagad ni Jehova: “Grabe ako paimnon, gani nakahimo ako sang indi maayo nga mga desisyon. Bangod sini, masakit gid ang akon mga naeksperiensiahan kag nasubuan gid ako kon madumduman ko ini.”

Gusto naton malikawan ang mga problema nga resulta sang sobra nga pag-inom. Ti, paano kita makahimo sang maayo nga desisyon parte sa pag-inom sang makahulubog nga ilimnon? Dapat kita magpagiya sa panghunahuna sang Dios.

Binagbinagon naton kon ano ang ginasiling sang Biblia parte sa makahulubog nga ilimnon, kag kon ano ang rason sang iban ngaa nagainom sila.

Wala ginapakamalaut sang Pulong sang Dios ang haganhagan nga pag-inom. Nagsiling pa gani ini nga makahatag sing kalipay ang pag-inom sang alak. Nagsiling ini: “Magkaon nga may kasadya, kag mag-inom sang alak nga may malipayon nga tagipusuon.” (Man. 9:7) May mga tion nga nag-inom si Jesus sang alak kag ang iban pa nga matutom nga mga alagad ni Jehova.​—Mat. 26:27-29; Luc. 7:34; 1 Tim. 5:23.

Pero, ginapakamalaut sang Pulong sang Dios ang pagpahubog. Ini nagasiling: “Indi . . . kamo magpahubog sa alak.” (Efe. 5:18) Nagasiling pa gani ini nga ang “mga palahubog . . . indi makapanubli sang Ginharian sang Dios.” (1 Cor. 6:10) Maathag nga ginapakamalaut gid ni Jehova ang sobra nga pag-inom kag ang pagpahubog. Gani imbes nga magpaimpluwensia sa kultura sa aton lugar, dapat kita magpagiya sa panghunahuna sang Dios.

May iban nga nagasiling nga wala sila nagakahubog bisan pa madamo ang ila ginainom. Pero, makatalagam gid ini. Ang Biblia nagasiling nga kon “ulipon sang alak” ang isa ka lalaki (ukon isa ka babayi), posible makahimo sia sang serioso nga mga sala kag maguba ang iya kaangtanan kay Jehova. (Tito 2:3; Hulu. 20:1) Nagpaandam pa gani si Jesus nga posible indi makasulod ang isa ka tawo sa bag-ong kalibutan sang Dios bangod sang “sobra nga pag-inom.” (Luc. 21:34-36) Ti, ano ang makabulig sa aton para malikawan naton ang mga problema nga resulta sang pag-inom?

Kon sundon lang naton ang kultura sa aton lugar parte sa pag-inom, makatalagam gid ini. Gani kon nagadesisyon kita parte sa aton ginakaon kag ginainom, ginahimo naton kon ano ang makapahalipay kay Jehova. Ang Biblia nagapahanumdom sa aton: “Bisan nagakaon kamo ukon nagainom ukon bisan ano ang inyo ginahimo, himua ang tanan para sa himaya sang Dios.” (1 Cor. 10:31) Ari ang pila ka pamangkot kag mga prinsipio sa Biblia nga dapat naton binagbinagon:

Nagainom bala ako para manamian sa akon ang iban? Ang Exodo 23:2 nagasiling: “Indi kamo dapat magsunod sa kadam-an.” Base sa sini nga teksto, ginlaygayan ni Jehova ang mga Israelinhon nga indi nila dapat pag-ilugon ang mga tawo nga nagapaakig sa iya. Dapat man naton sundon ini nga laygay. Kon maimpluwensiahan sang iban nga tawo ang aton panghunahuna kag mga desisyon parte sa pag-inom, posible gid nga indi na naton pagtumanon ang mga kasuguan ni Jehova sa ulihi kag maguba ang aton kaangtanan sa iya.​—Roma 12:2.

Nagainom bala ako para ipakita sa iban nga mabakod ako? Sa pila ka kultura, kon palainom ka kag grabe ka paimnon, normal lang ini kag wala ini ginapakalain. (1 Ped. 4:3) Pero talupangda ang ginapalig-on sa aton sang 1 Corinto 16:13: “Magpabilin kamo nga nagamata, magtindog kamo sing malig-on sa inyo pagtuo, magpakaisog kamo, magpakabakod kamo.” Ti, makabulig bala ang makahulubog nga ilimnon para mangin mabakod ang isa ka tawo? Indi gid. Kay man, maapektuhan sang makahulubog nga ilimnon ang panghunahuna sang isa ka tawo amo nga indi na sia makapamensar sing maayo. Gani, kon grabe paimnon ang isa ka tawo, wala ini nagapakita nga mabakod sia. Sa baylo, ginapakita sini nga may kaluyahon sia. Suno sa Isaias 28:7, nagadalangdalang kag nagahimo sang sala nga paghukom ang mga tawo nga nagtalang bangod sang makahulubog nga ilimnon.

Si Jehova ang makahatag sa aton sang kabakod para mahimo naton ang husto, gani kinahanglan naton magpabilin nga nagamata kag magtindog sing malig-on. (Sal. 18:32) Mahimo naton ini paagi sa pagpabilin nga alisto kag paghimo sang mga desisyon nga makaamlig sa aton kaangtanan kay Jehova. Ginpakita ni Jesus ini nga kabakod sang ari sia sa duta, kag ginrespeto sia sang madamo nga tawo bangod maisog sia kag ginahimo gid niya kon ano ang husto.

Nagainom bala ako para malipatan ko ang akon mga problema? Amo ini ang ginsiling sang isa ka salmista parte kay Jehova: “Sang nagdamo ang akon  kabalaka, ginlugpayan kag ginpaumpawan mo ako.” (Sal. 94:19) Kon nabug-atan ka sa imo mga problema, magdangop kay Jehova imbes nga sa makahulubog nga ilimnon. Ang isa ka maayo nga paagi para mahimo mo ini amo ang pagpangamuyo pirme kay Jehova. Madamo man ang nagsiling nga nakabulig sa ila ang pagpangayo sing laygay sa hamtong nga mga kauturan sa kongregasyon. Malipatan gid man bala sang isa ka tawo ang iya mga problema kon mag-inom sia? Ang matuod, kon nagainom ang isa ka tawo, mas nagaluya sia nga himuon kon ano ang husto. (Os. 4:11) Si Daniel, nga ginsambit kaina, nagsiling: “Kon grabe ang akon kabalaka kag kon ginakonsiensia ako, nagainom ako para maghaganhagan ang akon ginabatyag. Pero mas nagdamo pa gid ang akon mga problema, nadulaan ako sang mga abyan, kag nagnubo ang pagtan-aw ko sa akon kaugalingon.” Ti, ano ang nakabulig kay Daniel? Nagsiling sia: “Narealisar ko nga dapat ako magdangop kay Jehova imbes nga sa ilimnon. Sa bulig ni Jehova, nasarangan ko gid man ang akon mga problema.” May mga tion nga pamatyag naton daw wala na sing paglaum ang aton sitwasyon, pero handa gid pirme si Jehova sa pagbulig sa aton.​—Fil. 4:6, 7; 1 Ped. 5:7.

Kon nagainom ka kon kaisa, usisaa ang imo kaugalingon para mabal-an mo kon kinahanglan mo maghimo sang mga pagbag-o. Pamangkuta ang imo kaugalingon: ‘May miembro bala sang akon pamilya ukon may suod bala ako nga abyan nga nakamuno sa akon nga nabalaka sila parte sa akon pag-inom?’ Kon huo, posible ginapakita sini nga may problema ka sa pag-inom nga wala mo natalupangdan. ‘Mas nagdamo bala ang ginainom ko subong kon ikumparar sang una?’ Ginapakita sini nga bisan pa indi ka palainom, posible nga mangin amo ka sini sa ulihi. ‘Kon indi ako makainom sa sulod sang pila ka adlaw, ginapangita ko bala ini?’ Kon huo, posible ginapakita sini nga nangin palainom ka na. Kag posible nga kinahanglan mo ang bulig sang mga eksperto ukon mga doktor sa sini nga problema.   

Bangod ang pag-inom amo ang rason sang madamo nga problema, may pila ka utod nga nagdesisyon nga indi gid sila mag-inom. May iban naman nga wala nagainom bangod wala sila nanamian sang sabor sang bisan ano nga ilimnon. Kon wala nagainom ang imo upod, respetuha ang iya desisyon kag indi sia pagpakalaina.

 Posible narealisar mo nga mas maayo kon limitahan mo kon daw ano lang kadamo ang imo imnon. Puede mo man pat-uron kon san-o ka lang mainom. Halimbawa, puede mo pat-uron nga isa ka beses ka lang mainom kada semana. Puede mo man pat-uron nga mainom ka sing haganhagan lang samtang nagakaon, pero sing panalagsa lang. May iban nga ginapili lang nila ang ila imnon. Halimbawa, mainom sila sang alak ukon sang beer sing haganhagan lang, pero indi sila mag-inom sang maisog nga mga ilimnon. Indi man sila mag-inom sang juice nga nasimbugan sang maisog nga mga ilimnon. Kon kabalo ka kon daw ano lang kadamo ang imo imnon kag napat-od mo kon san-o ka lang mainom, mas mahapos para sa imo nga sundon ini. Kon estrikto mo nga ginasunod ang imo desisyon parte sa pag-inom, indi ka dapat mabalaka sa posible hunahunaon sang iban.

Kon nagahimo kita sang desisyon parte sa pag-inom, dapat man naton binagbinagon ang balatyagon sang iban. Ang Roma 14:21 nagasiling: “Mas maayo nga indi magkaon sing karne ukon mag-inom sing alak ukon maghimo sing bisan ano nga butang nga makapasandad sa imo utod.” Paano mo maaplikar ini nga laygay? Paagi sa pagpakita sang gugma sa imo utod. Kon sa banta mo may masandad sa imo kon mag-inom ka sang makahulubog nga ilimnon sa isa ka okasyon, mapalig-on ka sang imo gugma sa iban nga indi na lang anay mag-inom. Kon himuon mo ini, ginapakita mo nga ginapalangga mo ang iban kag ginarespeto mo ang ila balatyagon. Ginapakita mo man nga ginauna mo ang kaayuhan sang iban, indi ang imo kaayuhan.​—1 Cor. 10:24.

Dugang pa, posible may mga kasuguan ang gobierno parte sa makahulubog nga ilimnon. Kon may ara, dapat naton ini tumanon. Halimbawa, may kasuguan nga nagasiling nga indi puede makainom ang mga wala pa nakalab-ot sa edad nga ginsambit sa kasuguan, ukon indi puede magdrayb sang salakyan kag mag-operate sang pila ka makina ang mga nakainom.​—Roma 13:1-5.

Ginhatagan kita ni Jehova sing madamo nga dalayawon nga mga regalo, kag ginhatagan man niya kita sing kahilwayan kon paano naton gamiton ini nga mga regalo. Gani may kahilwayan kita kon ano ang gusto naton nga kaunon kag imnon. Kabay pa nga gamiton naton ini nga kahilwayan sa paagi nga malipay sa aton ang aton Amay sa langit. Kon himuon naton ini, ginapakita naton nga ginapabaloran naton ini nga kahilwayan.