1. Kon ginabinagbinag naton ang parte sa pagtuo ni Abraham, ano ang posible naton ipamangkot?

 MADAMO nga tawo ang nakabati parte kay Abraham, pero diutay lang ang nabal-an sang kalabanan sa ila parte sa iya. Pero, madamo ka sang nabal-an parte kay Abraham. Halimbawa, kabalo ka nga gintawag si Abraham nga ‘amay sang tanan nga may pagtuo.’ (Roma 4:11) Pero, posible ginapamensar mo, ‘Masarangan ko ayhan nga mapakita ang pagtuo nga ginpakita ni Abraham?’ Huo, masarangan mo ini.

2. Ngaa importante nga tun-an naton ang halimbawa ni Abraham? (Santiago 2:22, 23)

² Ang isa ka paagi para mapakita mo ang pagtuo nga ginpakita ni Abraham amo ang pagtuon sa iya halimbawa. Gintuman gid ni Abraham ang mga ginsugo sang Dios sa iya. Halimbawa, nagsaylo sia sa malayo nga lugar, nag-istar sia sa mga tolda sa sulod sang madamo nga tinuig, kag ginpakita niya nga handa sia nga ihalad ang iya pinalangga nga anak nga si Isaac. Ginhimo ini tanan ni Abraham bangod mabakod ang iya pagtuo kay Jehova. Bangod sang iya pagtuo kag mga binuhatan, nalipay sa iya si Jehova kag nangin abyan niya si Jehova. (Basaha ang Santiago 2:22, 23.) Gusto ni Jehova nga mabaton mo man ini nga mga pagpakamaayo. Ang matuod, gusto gid ni Jehova nga mabaton naton ini tanan. Gani ginpasulat niya kay Pablo kag kay Santiago ang parte sa halimbawa ni Abraham. Binagbinagon naton ang ginasiling sang Roma kapitulo 4 kag sang Santiago kapitulo 2 parte sa iya halimbawa. Talalupangdon gid ang ginasiling sining duha ka kapitulo parte kay Abraham.

3. Ano nga teksto ang ginkutlo ni Pablo kag ni Santiago?

³ Pareho nga ginkutlo ni Pablo kag ni Santiago ang Genesis 15:6, nga nagasiling: “Nagtuo [si Abraham] kay Jehova, kag bangod sini ginkabig Niya sia nga matarong.” Kon nalipay si Jehova sa isa ka  tawo, ginakabig sia ni Jehova nga matarong ukon wala sing sala. Gani bisan pa indi perpekto kag makasasala ang isa ka tawo, puede sia kabigon ni Jehova nga wala sing sala. Makapalig-on gid ini. Sigurado gid nga gusto mo nga kabigon ka man ni Jehova nga matarong, kag posible gid ini. Para mabal-an naton kon ano ang dapat naton himuon para kabigon kita ni Jehova nga matarong, tun-an naton kon ngaa ginkabig ni Jehova si Abraham nga matarong.

4. Ngaa mabudlay para sa mga tawo nga mangin matarong?

⁴ Sa sulat ni Pablo para sa mga taga-Roma, nagsiling sia nga makasasala ang tanan nga tawo. (Roma 3:23) Bangod sini, makabig pa bala kita sang Dios nga matarong kag malipay bala sia sa aton? Para mabuligan ang tanan nga sinsero nga Cristiano nga masabat ini nga pamangkot, gingamit ni Pablo ang halimbawa ni Abraham.

5. Ngaa ginkabig ni Jehova si Abraham nga matarong? (Roma 4:2-4)

⁵ Ginkabig ni Jehova si Abraham nga matarong sang nagaistar sia sa Canaan. Ngaa? Bangod bala gintuman ni Abraham ang Mosaikong Kasuguan? Indi amo sina ang rason. (Roma 4:13) Kay man, sang ginkabig ni Jehova si Abraham nga matarong, wala pa ang Mosaikong Kasuguan. Ginhatag ini nga Kasuguan sa pungsod sang Israel pagligad pa sang sobra 400 ka tuig pagkatapos ginkabig ni Jehova si Abraham nga matarong. Ti, ngaa ginkabig sang Dios si Abraham nga matarong? Ginpakitaan ni Jehova si Abraham sang Iya wala tupong nga kaayo kag ginkabig niya si Abraham nga matarong bangod sang iya pagtuo.​—Basaha ang Roma 4:2-4.

6. Ano ang ginabasihan ni Jehova para makabig niya nga matarong ang makasasala nga mga tawo?

⁶ Nagsiling si Pablo nga kon ‘nagatuo sa Dios ang isa ka tawo, ginakabig sia nga matarong.’ (Roma 4:5) Nagsiling pa si Pablo: “Nagahambal man si David tuhoy sa kalipay sang tawo nga ginakabig sang Dios nga matarong, bisan pa ang iya mga binuhatan indi suno sa kasuguan: ‘Malipayon ang mga tawo nga ang iya mga paglapas ginpatawad kag ang ila mga sala gintabunan; malipayon ang tawo nga ang iya sala indi pag-isipon ni Jehova.’” (Roma 4:6-8; Sal. 32:1, 2) Gani ginapatawad sang Dios ang mga sala sang mga nagatuo sa iya, ukon ginatabunan niya ini. Bug-os gid ang iya pagpatawad kay wala niya ginaisip ang ila mga sala. Para sa iya, wala sila sing sala kag matarong sila bangod sang ila pagtuo.

7. Ngaa masiling naton nga matarong ang matutom nga mga alagad sang Dios sang una?

⁷ Bisan pa ginkabig sang Dios nga matarong ang iya matutom nga mga alagad pareho kanday Abraham kag David, mga makasasala gihapon sila kag indi perpekto. Pero bangod sang ila pagtuo, ginkabig sila sang Dios nga wala sing sala, ilabi na kon ikumparar sila sa mga wala nagasimba sa iya. (Efe. 2:12) Sa sulat ni Pablo para sa mga taga-Roma, ginpaathag niya nga kinahanglan may pagtuo kita para mangin abyan kita sang Dios. Sa bahin nanday Abraham kag David, nangin abyan sila sang Dios bangod nagtuo sila sa iya. Gani puede man kita mangin abyan sang Dios kon magtuo kita sa iya.

8-9. Ano ang indi husto nga ginsiling sang iban parte sa mga ginsulat ni Pablo kag ni Santiago, kag ngaa?

⁸ Ginatos na ka tuig nga ginabaisan sang mga lider sang relihion ang kaangtanan sang pagtuo kag sang mga binuhatan. Suno sa pila ka lider sang relihion, maluwas ka na basta magtuo ka lang kay Ginuong Jesucristo. Posible nabatian mo sila nga nagasiling, “Magtuo kay Jesus para maluwas ka.” Amo kuno ini ang gintudlo ni Pablo kay nagsiling sia: “Ginakabig sang Dios nga matarong [ang isa ka tawo], bisan pa ang iya mga binuhatan indi suno sa kasuguan.” (Roma 4:6) Pero may iban naman nga nagasiling nga para  maluwas ka, dapat mo kuno kadtuan ang mga lugar nga ginakabig sang simbahan nga balaan kag dapat ka kuno maghimo sing maayo. Amo kuno ini ang buot silingon sang Santiago 2:24, nga nagasiling: “Ang isa ka tawo ipahayag nga matarong paagi sa mga buhat kag indi paagi sa pagtuo lamang.”

⁹ Bangod sa sining lainlain nga pagpati, may pila ka manunulat parte sa relihion ang nagsiling nga nagasumpakilay kuno ang ginsiling ni Pablo kag ni Santiago parte sa pagtuo kag mga binuhatan. Suno sa pila ka lider sang relihion, nagsiling kuno si Pablo nga pagtuo lang ang kinahanglan sang isa ka tawo para makabig sia sang Dios nga matarong, pero nagsiling naman kuno si Santiago nga importante ang mga binuhatan sang isa ka tawo para malipay sa iya ang Dios. Ang isa ka propesor sang relihion nagsiling: “Wala nahangpan ni Santiago kon ngaa ginainsister gid ni Pablo nga pagtuo lang ang kinahanglan sang isa ka tawo para makabig sia sang Dios nga matarong, kag indi na kinahanglan ang mga binuhatan.” Pero pareho nga gintuytuyan ni Jehova si Pablo kag si Santiago sang ginhimo nila ang ila mga sulat. (2 Tim. 3:16) Gani sigurado nga may simple nga paagi para makita naton nga wala nagasumpakilay ang ila ginsiling. Makita naton ini paagi sa pagbinagbinag sa iban pa nila nga ginsiling sa ila mga sulat.

10. Ano nga “mga buhat” ang ginapatuhuyan ni Pablo? (Roma 3:21, 28) (Tan-awa man ang piktyur.)

¹⁰ Ano nga “mga buhat” ukon “mga binuhatan” ang ginapatuhuyan ni Pablo sa Roma 3 kag 4? Ginapatuhuyan niya ang “mga buhat nga nahisanto sa kasuguan,” ukon sa Mosaikong Kasuguan nga ginhatag sa mga Israelinhon sa Bukid Sinai. (Basaha ang Roma 3:21, 28.) Sang panahon ni Pablo, may pila ka Judiyo nga mga Cristiano nga nagapati nga dapat nila gihapon tumanon ang Mosaikong Kasuguan. Gani, gingamit ni Pablo ang halimbawa ni Abraham para  ipakita nga ang “mga buhat nga nahisanto sa kasuguan” indi amo ang ginabasihan para kabigon sang Dios nga matarong ang isa ka tawo. Sa baylo, ginpaathag ni Pablo nga kinahanglan naton magpakita sang pagtuo. Makapalig-on gid ini kay masarangan naton ini nga mapakita. Gani kon nagatuo kita sa Dios kag sa Cristo, malipay sa aton ang Dios.

11. Ano nga “mga buhat” ang ginapatuhuyan ni Santiago?

¹¹ Pero, lain ang ginapatuhuyan sang “mga buhat” nga ginsambit sa Santiago kapitulo 2 sa “mga buhat nga nahisanto sa kasuguan” nga ginsambit ni Pablo. Ang ginapatuhuyan ni Santiago amo ang mga buhat ukon mga ginahimo sang mga Cristiano sa ila adlaw-adlaw nga pagkabuhi. Makita sa mga ginahimo sang isa ka Cristiano kon bala matuod gid ang iya pagtuo sa Dios ukon indi. Binagbinaga ang duha ka halimbawa nga gingamit ni Santiago.

12. Paano ginpaathag ni Santiago ang kaangtanan sang pagtuo kag sang mga binuhatan? (Tan-awa man ang piktyur.)

¹² Sa una nga halimbawa, ginpaathag ni Santiago nga dapat wala sing may ginapasulabi ang mga Cristiano. Para ipaathag ang iya punto, gingamit niya nga halimbawa ang isa ka Cristiano nga nagpakita sang pabor sa manggaranon nga tawo pero nagpakanubo sa imol nga tawo. Posible magsiling ini nga Cristiano nga may pagtuo sia, pero makita sa iya ginahimo nga indi matuod ang iya pagtuo. (Sant. 2:1-5, 9) Sa ikaduha nga halimbawa, ginsambit ni Santiago ang parte sa isa ka Cristiano nga wala nagbulig sa isa ka utod bisan pa nakita niya nga ‘wala sing bastante nga bayo ukon pagkaon ang utod.’ Bisan pa magsiling ini nga Cristiano nga may pagtuo sia, wala ini sing pulos kay indi ini makita sa iya ginahimo. Wala sing pulos ang iya pagtuo. Gani nagsiling si Santiago: “Ang pagtuo, kon wala ini sing mga buhat, patay ini.”​—Sant. 2:14-17.

13. Kay sin-o halimbawa ang gingamit ni Santiago para pamatud-an nga importante gid nga ipakita naton ang aton pagtuo paagi sa aton mga ginahimo? (Santiago 2:25, 26)

 ¹³ Ginsambit ni Santiago si Rahab bilang maayo nga halimbawa. Ginpamatud-an ni Rahab nga may pagtuo sia paagi sa iya ginhimo. (Basaha ang Santiago 2:25, 26.) Nabatian niya ang parte kay Jehova kag narealisar niya nga ginabuligan ni Jehova ang mga Israelinhon. (Jos. 2:9-11) Ginpakita niya ang iya pagtuo paagi sa pag-amlig sa duha ka Israelinhon nga mga espiya sang ara sa peligro ang ila kabuhi. Gani pareho kay Abraham, ginkabig man nga matarong ining indi perpekto kag indi Israelinhon nga babayi. Matun-an naton kay Rahab nga importante gid nga ipakita naton ang aton pagtuo paagi sa aton mga ginahimo.

14. Ngaa masiling naton nga wala nagasumpakilay ang mga ginsulat ni Pablo kag ni Santiago?

¹⁴ Gani sang ginbinagbinag sang duha ka manunulat sang Biblia nga sanday Pablo kag Santiago ang parte sa pagtuo kag mga binuhatan, indi pareho ang ila anggulo. Sa bahin ni Pablo, ginasilingan niya ang Judiyo nga mga Cristiano nga kon gusto nila nga malipay sa ila si Jehova, indi bastante ang pagtuman lang sa Mosaikong Kasuguan. Sa bahin naman ni Santiago, ginasilingan niya ang tanan nga Cristiano nga dapat nila ipakita ang ila pagtuo paagi sa paghimo sing maayo sa iban.

15. Ano ang mga puede naton himuon para mapakita naton ang aton pagtuo? (Tan-awa man ang mga piktyur.)

¹⁵ Wala nagsiling si Jehova nga dapat himuon man naton ang mga ginhimo ni Abraham para kabigon Niya kita nga matarong. Kay man, madamo kita sang puede himuon para mapakita naton ang aton pagtuo. Puede naton abiabihon ang mga bag-uhan sa kongregasyon, buligan ang mga kauturan nga nagakinahanglan, kag himuan sing maayo ang mga miembro sang aton pamilya. Kon himuon naton ini, malipay sa aton ang Dios kag  pakamaayuhon niya kita. (Roma 15:7; 1 Tim. 5:4, 8; 1 Juan 3:18) Ang isa ka importante nga paagi para mapakita naton ang aton pagtuo amo ang mapisan nga pagbantala sang maayong balita. (1 Tim. 4:16) Mapakita naton tanan sa aton mga ginahimo nga nagatuo kita nga matuman gid ang mga promisa ni Jehova kag ang iya mga paagi amo ang pinakamaayo. Kon himuon naton ini, makasalig gid kita nga kabigon kita sang Dios nga matarong kag mangin abyan naton sia.

16. Ano ang kaangtanan sang paglaum kag sang pagtuo ni Abraham?

¹⁶ Sa Roma kapitulo 4, matun-an man naton sa halimbawa ni Abraham nga importante ang paglaum. Nagpromisa si Jehova nga paagi kay Abraham, pakamaayuhon ang “madamo nga pungsod.” Dalayawon gid ang paglaum ni Abraham. (Gen. 12:3; 15:5; 17:4; Roma 4:17) Pero sang 100 ka tuig na ang edad ni Abraham kag 90 anyos na si Sara, wala gihapon sila nakabata nga ginpromisa sa ila. Gani daw imposible nga makabata pa si Abraham kag si Sara sing lalaki. Natilawan gid ang pagtuo ni Abraham. Pero, “naglaum sia kag nagtuo nga mangin amay sia sang madamo nga pungsod.” (Roma 4:18, 19) Sang ulihi, nangin amay sia ni Isaac, gani natabo gid ang iya ginalauman.​—Roma 4:20-22.

17. Ngaa sigurado kita nga makabig kita sang Dios nga matarong kag mangin abyan naton sia?

¹⁷ Pareho kay Abraham, may mahimo man kita para malipay sa aton ang Dios. Gani, makabig man kita sang Dios nga matarong kag mangin abyan man naton sia. Ang matuod, ginsambit ni Pablo ang parte sa sini. Nagsulat sia: “Ang ginsiling, ‘bangod sini ginkabig [si Abraham] nga matarong,’ wala ginsulat para lamang sa iya, kundi para man sa aton, nga pagakabigon nga matarong, bangod nagatuo kita sa Iya nga nagbanhaw kay Jesus nga aton Ginuo.” (Roma 4:23, 24) Pareho kay Abraham, kinahanglan naton magtuo kay Jehova, ipakita naton ini paagi sa aton mga ginahimo, kag magsalig kita nga matuman gid ang aton paglaum nga ginpromisa ni Jehova. Ginbinagbinag ni Pablo sa Roma kapitulo 5 ang parte sa aton paglaum, kag amo ini ang binagbinagon naton sa masunod nga artikulo.