1. Ngaa makasiling kita nga may rason gid si Abraham nga magsalig nga matuman gid ang ginpromisa sa iya?

 NAGPROMISA si Jehova sa iya abyan nga si Abraham nga pakamaayuhon ang tanan nga pungsod sa duta paagi sa iya kaliwat. (Gen. 15:5; 22:18) Bangod mabakod ang pagtuo ni Abraham sa Dios, kumbinsido sia nga matuman gid ang Iya promisa. Pero sang 100 ka tuig na ang edad ni Abraham kag 90 anyos na ang iya asawa, wala gihapon sila sing bata. (Gen. 21:1-7) Bisan pa sa sini, nagtuo si Abraham sa ginsiling sa iya. Ang Biblia nagasiling: “Naglaum [si Abraham] kag nagtuo nga mangin amay sia sang madamo nga pungsod.” (Roma 4:18) Kabalo kita nga nangin amay sia sang isa ka anak nga lalaki nga si Isaac. Gani natuman gid ang ginpromisa kay Abraham bisan pa madugay niya ini nga ginhulat. Ngaa kumbinsido gid si Abraham nga tumanon ni Jehova ang iya promisa?

2. Ngaa kumbinsido gid si Abraham nga tumanon ni Jehova ang Iya promisa?

² Bangod suod gid si Abraham kay Jehova, “kumbinsido gid sia nga tumanon sang Dios ang iya ginsaad.” (Roma 4:21) Nalipay si Jehova kay Abraham kag ginkabig Niya sia nga matarong bangod sang iya pagtuo. (Sant. 2:23) Base sa Roma 4:18, may pagtuo si Abraham kag may ara man sia paglaum. Binagbinagon naton ang ginsiling ni apostol Pablo parte sa paglaum nga mabasa sa kapitulo 5 sang Roma.

3. Ano ang ginpaathag ni Pablo parte sa paglaum?

³ Ginpaathag ni Pablo kon ngaa makasalig kita nga “ang paglaum wala nagaresulta sa kapaslawan.” (Roma 5:5) Ginabuligan man niya kita kon paano naton mapabakod ang aton pagsalig nga matuman gid ang aton paglaum. Samtang ginabinagbinag naton ang Roma 5:1-5, hunahunaa kon paano nagbakod ang imo pagsalig nga matuman gid ang imo paglaum kon ikumparar  sang una. Matun-an man naton sa aton pagbinagbinag kon paano mo pa gid ini mapabakod. Pero binagbinagon anay naton ang ginsiling ni Pablo nga dalayawon nga paglaum nga wala nagaresulta sa kapaslawan.

4. Ano ang ginabinagbinag sa Roma 5:1, 2?

⁴ Basaha ang Roma 5:1, 2. Ginsulat ini ni Pablo para sa kongregasyon sa Roma. Natun-an sang mga kauturan didto ang parte kay Jehova kag kay Jesus, dayon nagtuo sila, kag nangin Cristiano sila. Gani ‘ginpakamatarong sila sang Dios tungod sang ila pagtuo,’ kag ginhaplasan niya sila sang balaan nga espiritu. Matahom gid ang ila paglaum kag makasigurado sila nga mabaton nila ini.

5. Ano ang paglaum sang mga hinaplas?

⁵ Sang ulihi, ginsulatan ni Pablo ang mga hinaplas sa Efeso parte sa paglaum nga ginhatag sa ila sang Dios. Nalakip sa sini nga paglaum ang pagbaton nila sang “palanublion para sa mga balaan.” (Efe. 1:18) Kag mahangpan naton sa ginsiling ni Pablo sa mga taga-Colosas kon diin nila mabaton ang ila padya. Gintawag niya ini nga “paglaum nga natigana para sa inyo sa langit.” (Col. 1:4, 5) Gani amo ini ang paglaum sang mga hinaplas: Banhawon sila sa langit para magkabuhi didto sing wala sing katapusan kag magagahom sila upod sa Cristo.​—1 Tes. 4:13-17; Bug. 20:6.

6. Ano ang ginsiling sang isa ka hinaplas nga brother parte sa iya paglaum?

⁶ Ginapabaloran gid sang mga hinaplas ang ila paglaum. Ang isa sa ila amo si Brother Frederick Franz nga nag-alagad sing matutom sa Dios sa sulod sang madamo nga tinuig. Sang 1991, nagsiling sia: “Ang amon paglaum isa ka sigurado nga butang, kag matuman ini sing bug-os tubtob sa kada katapusan sang 144,000 ka katapo sang diutay nga panong sa kasangkaron nga labaw sa nahanduraw na namon. . . . Wala [kami] nagdula sang amon pagpabili sa sinang paglaum. . . . Ginaapresyar namon [ini] sing labi nga nagahulat kami para sini. Isa ini ka butang nga takus hulaton, bisan  pa nagakinahanglan ini sing isa ka milyon ka tuig. Mas mataas sang sa nagligad ang akon pagtamod sa amon paglaum.”

7-8. Ano ang paglaum sang kalabanan nga alagad ni Jehova? (Roma 8:20, 21)

⁷ Lain ang paglaum sang kalabanan nga alagad ni Jehova subong. Pareho ini sa paglaum ni Abraham nga amo ang kabuhi nga wala sing katapusan sa duta bilang sakop sang Ginharian sang Dios. (Heb. 11:8-10, 13) Ginsulat ni Pablo kon ano ang mabaton sang mga alagad ni Jehova nga may amo sini nga paglaum. (Basaha ang Roma 8:20, 21.) Sang natun-an mo ang parte sa mga promisa sang Biblia sa palaabuton, ano ang nanamian mo gid sa sini? Excited ka na bala sa tion nga mangin perpekto ka na? Nalipay ka bala sang natun-an mo nga banhawon sa paraiso sa duta ang imo mga pinalangga nga napatay? Bangod sang ‘paglaum nga ginhatag’ sa aton sang Dios, excited na gid kita nga matuman ang madamo nga matahom nga mga butang.

⁸ Sa langit man ukon sa duta ang aton paglaum nga mabuhi sing wala sing katapusan, may dalayawon kita nga paglaum nga nagahatag sa aton sang kalipay. Kag may mahimo kita para mapabakod naton ang aton pagsalig nga matuman gid ang aton paglaum. Ginpaathag ni Pablo kon paano naton ini mahimo. Gani binagbinagon naton ang iya ginsiling parte sa aton paglaum. Makabulig ini sa aton para magsalig pa gid kita nga matuman gid ang aton paglaum.

9-10. Base sa halimbawa ni Pablo, ano ang mapaabot sang mga Cristiano? (Roma 5:3) (Tan-awa man ang mga piktyur.)

⁹ Basaha ang Roma 5:3. Nagsiling si Pablo nga kon may ginabatas kita nga kabudlayan, mas nagabakod ang aton pagsalig nga matuman gid ang aton paglaum. Posible nga wala naton ini nahunahuna. Pero, mapaabot gid sang tanan nga sumulunod sang Cristo ang mga kabudlayan. Binagbinaga ang halimbawa ni Pablo. Nagsiling sia sa mga taga-Tesalonica: “Sang kaupod pa kami ninyo, ginsilingan na namon kamo nga magaantos kita sang kapipit-an,  kag subong sang nahibaluan ninyo amo gid sina ang natabo.” (1 Tes. 3:4) Kag nagsulat sia sa mga taga-Corinto: “Mga kauturan, luyag namon nga mahibaluan ninyo ang kapipit-an nga naagihan namon . . . Indi gani kami sigurado kon malampuwasan namon yadto ukon indi.”​—2 Cor. 1:8; 11:23-27.

¹⁰ Subong, mapaabot man naton ang mga kabudlayan. (2 Tim. 3:12) Kamusta sa imo bahin? Nakaeksperiensia ka na bala sang mga kabudlayan bangod nagtuo ka kay Jesus kag ginsunod mo sia? Posible nga ginpakalain ka sang imo mga abyan kag mga paryente. Posible pa gani nga ginpabudlayan ka nila. Ginhingabot ka bala sang imo boss ukon sang mga upod mo sa obra bangod honest ka? (Heb. 13:18) Ginpamatukan ka bala sang gobierno bangod ginbantala mo sa iban ang imo paglaum? Pero bisan ano pa nga kabudlayan ang aton maeksperiensiahan, nagsiling si Pablo nga dapat kita malipay. Ngaa?

11. Ngaa dapat naton batason ang bisan ano nga kabudlayan?

¹¹ Puede kita mangin malipayon bisan pa may mga kabudlayan bangod makabulig ini sa aton nga mapakita ang isa ka importante nga kinaiya. Ang Roma 5:3 nagasiling nga “ang kabudlayan nagaresulta sa pagbatas.” Ang tanan nga Cristiano makaeksperiensia gid sang kabudlayan, gani dapat panikasugan gid naton nga batason ang bisan ano man nga kabudlayan. Kay man, mabaton lang naton ang aton paglaum kon magbatas kita kag padayon kita nga mag-alagad kay Jehova. Indi naton gusto nga mangin pareho sa mga tawo nga ginapatuhuyan ni Jesus sang ginsambit niya ang parte sa mga binhi nga nagtupa sa batuhon nga duta. Sang ginbaton nila ang kamatuoran, nalipay gid sila. Pero “pag-abot sang kapipit-an ukon paghingabot,” nadula ang ila pagtuo. (Mat. 13:5, 6, 20, 21) Mabudlay gid man kon makaeksperiensia kita sang mga pagpamatok ukon mga problema, pero makabenepisyo kita kon batason naton ini. Ano ini nga mga benepisyo?

12. Ano ang mga benepisyo kon ginabatas naton ang aton mga problema?

¹² Ginsambit ni disipulo Santiago ang mga benepisyo kon ginabatas naton ang mga problema. Nagsiling sia: “Tuguti nga makapanghikot sing bug-os ang pagbatas, agod mangin bug-os kamo kag maayo sa tanan nga paagi, nga wala sing kulang nga bisan ano.” (Sant. 1:2-4) Suno kay Santiago, nagapanghikot ang pagbatas ukon daw may ginahimo ini nga dapat tapuson. Ano ang ginahimo sini? Ginabuligan ka sini nga mangin mas mapinasensiahon, magbakod ang imo pagtuo, kag mas magsalig pa gid sa Dios. Pero, may isa pa gid ka benepisyo kon nagabatas kita.

13-14. Ano ang resulta sang pagbatas, kag ano ang koneksion sini sa aton paglaum? (Roma 5:4)

¹³ Basaha ang Roma 5:4. Ginsambit ni Pablo nga ang pagbatas nagaresulta “sa kahimtangan nga nahamut-an sang Dios.” Gani kon nagabatas ka, nalipay si Jehova. Indi buot silingon sini nga nalipay si Jehova kon may problema ka. Sa baylo, nalipay sia sa imo kay bisan pa may problema ka, matutom ka nga nagabatas. Makapalig-on gid mabal-an nga kon nagabatas kita, nalipay sa aton si Jehova.​—Sal. 5:12.

¹⁴ Dumduma nga sang ginbatas ni Abraham ang iya mga problema, nalipay sa iya si Jehova. Ginkabig sia ni Jehova nga matarong kag Iya abyan. (Gen. 15:6; Roma 4:13, 22) Posible man naton mabaton ini nga pagpakamaayo. Paano? Nagadepende bala ini sa kon daw ano kadamo ang aton ginahimo sa pag-alagad sa iya ukon sa aton mga pribilehiyo? Indi. Sa baylo, nalipay sa aton si Jehova kon padayon kita nga nagaalagad sing matutom sa iya bisan pa may mga problema kita. Kag ano man ang aton  edad, kahimtangan, ukon ikasarang, masarangan naton tanan nga magbatas. Padayon ka bala nga nagaalagad sing matutom kay Jehova bisan pa may ginabatas ka nga problema? Kon huo, dumduma nga nalipay sia sa imo. Bangod kabalo kita nga nalipay sa aton ang Dios, nagabakod pa gid ang aton pagsalig nga matuman gid ang aton paglaum.

15. Ano ang ginsiling ni Pablo sa Roma 5:4, 5, kag ano ang posible ipamangkot sang iban parte sa sini?

¹⁵ Suno kay Pablo, nalipay sa aton si Jehova kon padayon kita nga nagaalagad sing matutom sa iya bisan pa may mga problema kita. Talupangda ang masunod nga ginsiling ni Pablo: “Ang kahimtangan naman nga nahamut-an sang Dios, [nagaresulta] sa paglaum, kag ang paglaum wala nagaresulta sa kapaslawan.” (Roma 5:4, 5) Pero sa Roma 5:2, nasambit na ni Pablo ang parte sa paglaum sang mga Cristiano sa Roma, nga amo ang ‘paglaum nga matigayon ang himaya sang Dios.’ Gani, posible mamangkot ang iban, ‘Ngaa ginsambit pa gid ni Pablo ang parte sa paglaum sa bersikulo 4 kag 5?’

16. Paano nagabakod ang pagsalig sang isa ka tawo nga matuman gid ang iya paglaum? (Tan-awa man ang mga piktyur.)

¹⁶ Para mahangpan naton ang gusto itudlo ni Pablo, dapat naton tandaan nga ang paglaum daw pareho sa isa ka butang nga nagatubo kag nagabakod. Binagbinaga ini: Ano ang nahunahuna mo sang natun-an mo ang parte sa dalayawon nga paglaum nga mabasa sa Pulong sang Dios? Posible nahunahuna mo nga kanami gid nga mabuhi sing wala sing katapusan sa paraiso sa duta, pero daw imposible ini matabo. Pero, sang madamo ka na sing natun-an parte kay Jehova kag sa iya mga promisa, nakumbinsi ka nga matuman gid ini nga paglaum.

17. Paano nagabakod ang imo pagsalig nga matuman gid ang imo paglaum bisan pa nabawtismuhan ka na?

¹⁷ Padayon ka nga nagtuon bisan pa nabawtismuhan ka na, gani mas nakilala mo pa gid si Jehova, mas ginpalangga mo pa gid sia, kag nagbakod pa gid ang imo pagsalig nga matuman  gid ang imo paglaum. (Heb. 5:13–6:1) Posible gid nga naeksperiensiahan mo ang ginasiling sang Roma 5:2-4. Ginbatas mo ang sarisari nga mga kabudlayan, gani kumbinsido ka nga nalipay sa imo ang Dios. Kag bangod kabalo ka nga palangga ka niya kag nalipay sia sa imo, mas nagbakod ang imo pagsalig nga mabaton mo gid ang iya mga ginpromisa. Kon ikumparar sang una, mas mabakod subong ang imo pagsalig nga matuman gid ang imo paglaum. Gani mas ginapabaloran mo pa gid ini. Daku gid ang nangin epekto sini sa tanan nga bahin sang imo kabuhi, gani naghimo ka sang mga pagbag-o. Ginbag-o mo kon paano mo ginatratar ang imo pamilya, kon paano ka nagahimo sang mga desisyon, kag kon paano mo ginagamit ang imo tion.

18. Ano ang garantiya nga ginhatag ni Jehova?

¹⁸ May isa ka importante gid nga punto nga ginsiling si apostol Pablo parte sa imo paglaum. Nagsiling sia nga kon nalipay sa imo ang Dios, makasalig ka nga matuman gid ang imo paglaum. Ngaa makasigurado ka sa sini? Kay man, ginlakip ni Pablo ining garantiya sang Dios: “Ang paglaum wala nagaresulta sa kapaslawan; bangod ginagamit sang Dios ang iya balaan nga espiritu nga ginahatag niya sa aton agod ipakita nga ginahigugma niya kita.” (Roma 5:5) Gani makasalig ka gid sa paglaum nga ginhatag sa imo ni Jehova.

19. Ano ang masaligan mo parte sa imo paglaum?

¹⁹ Pamalandungi ang ginpromisa ni Jehova kay Abraham, kag kon ngaa nalipay si Jehova kay Abraham kag ginkabig sia nga abyan. Nabaton gid ni Abraham ang iya ginalauman. Ang Biblia nagasiling: “Sa tapos naghulat sing mapinasensiahon si Abraham, nabaton niya ini nga saad.” (Heb. 6:15; 11:9, 18; Roma 4:20-22) Gani wala gid sia napaslawan. Makasalig ka man nga kon padayon ka nga mangin matutom, mabaton mo man ang padya nga imo ginalauman. Matuman gid ang imo paglaum, gani dapat ka malipay bangod indi ini mapaslawan. (Roma 12:12) Nagsulat si Pablo: “Kabay pa nga ang Dios nga nagahatag sing paglaum maghatag sa inyo sing kalipay kag paghidait bangod sang inyo pagtuo sa iya, agod mapabakod pa ang inyo paglaum paagi sa gahom sang balaan nga espiritu.”​—Roma 15:13.