1. Ano ang dapat himuon sang isa ka Cristiano?

 GINSILINGAN ni apostol Pablo ang mga Cristiano sa Efeso: “Mangin hamtong gid nga tawo, kaangay sang bug-os nga kahamtong sang Cristo.” (Efe. 4:13) Dapat man ini iaplikar sang tanan nga Cristiano nga mga lalaki subong. Para mahimo nila ini, dapat nila tumanon ang mga kasuguan sang Dios kag dapat nila iaplikar ang mga prinsipio sang Biblia sa tanan nga bahin sang ila kabuhi. (Luc. 2:52) Ngaa importante gid nga mangin hamtong nga mga Cristiano ang pamatan-on nga mga brother?

2-3. Ngaa importante nga mangin hamtong nga Cristiano ang isa ka pamatan-on nga brother?

² Madamo sang importante nga mga responsibilidad sa pamilya kag sa kongregasyon ang isa ka brother. Pamatan-on nga mga brother, sigurado gid nga ginapamensaran na ninyo ang posible mga responsibilidad ninyo sa palaabuton. Posible nga goal ninyo ukon tulumuron nga mag-alagad sing full-time, mangin isa ka ministeryal nga alagad, kag mangin isa ka gulang sa ulihi. Posible man nga gusto ninyo magpangasawa kag makabata. (Efe. 6:4; 1 Tim. 3:1) Para malab-ot ninyo ini nga mga tulumuron kag mangin madinalag-on kamo, kinahanglan nga mangin hamtong kamo nga mga Cristiano. b

³ Ano ang makabulig sa inyo para mangin hamtong kamo nga mga Cristiano? May importante nga mga ikasarang nga dapat ninyo tun-an. Ti, ano ang puede ninyo himuon subong para mahandaan ninyo ang posible mga responsibilidad ninyo sa palaabuton?

4. Diin ka makakita sang maayo nga mga halimbawa nga puede mo ilugon? (Tan-awa man ang piktyur.)

⁴ Iluga ang maayo nga mga halimbawa. Madamo sing mabasa sa Biblia parte sa mga lalaki nga alagad sang Dios nga maayo nga mga  halimbawa. Palangga nila ang Dios kag gintungdan nila ang lainlain nga mga responsibilidad para atipanon ang iya katawhan. Puede gid sila ilugon sang pamatan-on nga mga lalaki subong. May hamtong man nga mga brother sa inyo pamilya kag sa inyo kongregasyon, kag maayo sila nga mga halimbawa para sa inyo. (Heb. 13:7) Kag ang pinakamaayo gid ninyo nga halimbawa amo si Jesucristo. (1 Ped. 2:21) Samtang ginatun-an ninyo sing maayo ang ila mga halimbawa, binagbinaga ninyo ang ila maayo nga mga kinaiya. (Heb. 12:1, 2) Dayon hunahunaa ninyo kon paano ninyo mailog ini nga mga lalaki.

5. Paano mo matun-an nga ipakita ang ikasarang sa paghunahuna sing maayo, kag ngaa importante ini? (Salmo 119:9)

⁵ Tun-i kon paano ipakita “ang ikasarang sa paghunahuna sing maayo” kag “tipigi” ini. (Hulu. 3:21) Kon may ikasarang sa paghunahuna sing maayo ang isa ka tawo, wala sia nagapadasudaso kundi ginapamensaran niya anay sing maayo ang iya gusto himuon. Gani panikasugi nga tun-i kon paano mo ipakita ini nga ikasarang. Ngaa? Bangod posible ka maimpluwensiahan sang kalabanan nga pamatan-on nga mga lalaki sa kalibutan subong. Kon nagahimo sila sang desisyon, ginabase lang nila ini sa ila kaugalingon nga mga ideya kag balatyagon. (Hulu. 7:7; 29:11) Posible ka man maimpluwensiahan sang mga palaguaon sa TV, mga pelikula, Internet, kag social media. Paano mo matun-an nga ipakita ang ikasarang sa paghunahuna sing maayo? Una, tun-i ang mga prinsipio sang Biblia kag hunahunaa kon ngaa para sa imo kaayuhan ang pagsunod sa sini. Dayon, iaplikar ini nga mga prinsipio kon nagahimo ka sang desisyon para malipay sa imo si Jehova. (Basaha ang Salmo 119:9.) Kon may amo ka sini nga ikasarang, makabulig gid ini sa imo para mangin hamtong ka nga Cristiano. (Hulu. 2:11, 12; Heb. 5:14) Binagbinaga kon paano makabulig sa imo ini nga ikasarang sa sining duha ka sitwasyon: (1) kon paano mo ginatratar ang mga sister kag (2) kon nagahimo ka sang desisyon parte sa imo pamayo kag estilo sang buhok.

6. Kon may ikasarang sa paghunahuna sing maayo ang isa ka pamatan-on nga brother, paano ini makabulig sa iya nga respetuhon ang mga sister?

⁶ Kon may ikasarang ka sa paghunahuna sing maayo, respetuhon mo ang mga babayi. Halimbawa, kon gusto sang isa ka pamatan-on nga brother nga makilala sing maayo ang isa ka sister, normal lang ini kag indi ini sala. Pero kon may ikasarang sa paghunahuna sing maayo ang brother, likawan niya nga magsiling, magsulat, ukon maghimo sang  bisan ano nga makapahunahuna sa sister nga naluyag ang brother sa iya. Indi gid ini dapat paghimuon sang brother magluwas lang kon may plano gid man sia nga pangaluyagan ang sister kay gusto niya nga pangasaw-on sia. (1 Tim. 5:1, 2) Kon gina-date sang brother ang sister, amligan niya ang maayo nga reputasyon sang sister paagi sa pagsigurado nga may upod sila pirme nga hamtong nga tsaperon.​—1 Cor. 6:18.

7. Kon may ikasarang sa paghunahuna sing maayo ang isa ka pamatan-on nga brother, paano ini makabulig sa iya parte sa iya pamayo kag estilo sang buhok?

⁷ Mapakita man sang isa ka pamatan-on nga brother nga may ikasarang sia sa paghunahuna sing maayo paagi sa iya pamayo kag estilo sang buhok. Wala sang respeto kay Jehova ang kalabanan nga mga tawo nga nagapauso sang mga bayo kag estilo sang buhok, kag imoral ang ila klase sang pagkabuhi. Makita ang ila imoral nga panghunahuna sa desinyo sang mga bayo nga ila ginahimo. Pikit katama ang ila mga desinyo ukon daw mga babayi na tan-awon ang mga lalaki. Kon nagadesisyon ang isa ka pamatan-on nga brother parte sa iya pamayo, mapakita niya nga amat-amat na sia nga nagahamtong kon nagapagiya sia sa mga prinsipio sang Biblia kag kon ginasunod niya ang maayo nga mga halimbawa sa kongregasyon. Puede niya pamangkuton ang iya kaugalingon: ‘Makita bala sa akon pamayo kag estilo sang buhok nga ginahunahuna ko sing maayo ang akon mga desisyon kag ginarespeto ko ang iban? Kon basihan ang akon pamayo, indi bala magduhaduha ang mga tawo nga isa ako ka alagad sang Dios?’ (1 Cor. 10:31-33; Tito 2:6) Kon may ikasarang sa paghunahuna sing maayo ang isa ka brother, respetuhon sia sang iya mga kauturan kag malipay sa iya ang iya Amay sa langit.

8. Ano ang dapat himuon sang isa ka pamatan-on nga brother para mapakita niya nga masaligan sia?

⁸ Ipakita nga masaligan ka. Masaligan ang isa ka pamatan-on nga lalaki kon ginahimo niya sing maayo ang tanan niya nga responsibilidad. (Luc. 16:10) Binagbinaga si Jesus nga aton pinakamaayo nga halimbawa. Wala sia nagpabaya kag indi sia iresponsable. Sa baylo, gintuman niya ang tanan nga ginpahimo sa iya ni Jehova bisan pa mabudlay ini himuon. Palangga niya ang mga tawo ilabi na ang iya mga disipulo, gani kinabubut-on niya nga ginhatag ang iya kabuhi para sa ila. (Juan 13:1) Iluga si Jesus paagi sa paghimo sang imo bug-os nga masarangan sa tanan nga asaynment nga ginhatag sa imo. Kon daw indi ka sigurado kon paano mo himuon ang imo asaynment, mangin mapainubuson kag magpabulig sa hamtong nga mga brother. Indi makontento nga nahimo mo lang ang imo asaynment. (Roma 12:11) Sa baylo, tapusa ini sing maayo, kag himua ini “para kay Jehova, kag indi para sa mga tawo.” (Col. 3:23) Siempre, indi ka perpekto, gani mangin mapainubuson kag akua kon may nahimo ka nga sala.​—Hulu. 11:2.

9. Ngaa dapat magtuon ang isa ka pamatan-on nga brother sang mga ikasarang nga makabulig sa iya?

⁹ Para mangin hamtong ka nga Cristiano, dapat mo tun-an ang mga ikasarang nga makabulig sa imo. Makabulig ini sa imo nga batunon ang mga responsibilidad sa kongregasyon, makakita sang obra para masuportahan mo ang imo kaugalingon ukon ang imo pamilya, kag mangin maayo ang imo  kaangtanan sa iban. Binagbinagon naton ang pila sa sini nga mga ikasarang.

10-11. Kon maayo magbasa kag magsulat ang isa ka pamatan-on nga brother, paano sia makabenepisyo kag ang kongregasyon? (Salmo 1:1-3) (Tan-awa man ang piktyur.)

¹⁰ Magtuon kon paano magbasa kag magsulat sing maayo. Ang Biblia nagasiling nga ang malipayon kag madinalag-on nga tawo nagabasa sang Biblia adlaw-adlaw kag ginapamalandungan niya ini. (Basaha ang Salmo 1:1-3.) Paagi sa pagbasa sang Biblia adlaw-adlaw, matun-an niya ang panghunahuna ni Jehova, nga amo ang makabulig sa iya nga maghunahuna sing maayo kag iaplikar ang iya natun-an. (Hulu. 1:3, 4) Kinahanglan gid sa kongregasyon ang mga brother nga may amo sini nga ikasarang. Ngaa?

¹¹ Kinahanglan sang aton mga kauturan ang bulig sang mga brother nga may ikasarang nga magtudlo kag maglaygay nga nabase sa Biblia. (Tito 1:9) Kon maayo ka magbasa kag magsulat, makahanda ka sang mga pamulongpulong kag mga komento nga makabulig sa iban kag makapalig-on sang ila pagtuo. Makahimo ka man sang mga notes kon nagatuon ka kag kon nagapamati ka sa mga bahin sa miting sang kongregasyon, sa mga asembleya, kag sa mga kombension. Makabulig ini nga mga notes para mapabakod mo ang imo pagtuo kag para mapalig-on mo ang iban.

12. Ano ang dapat mo himuon para matun-an mo kon paano mag-istorya sing maayo sa iban?

¹² Magtuon kon paano mag-istorya sing maayo sa iban. Dapat gid matun-an sang isa ka brother ini nga ikasarang. Makabulig ini sa iya nga pamatian ang iban kag intiendihon ang ila ginahunahuna kag ginabatyag. (Hulu. 20:5) Makabulig man ini sa iya nga mahangpan ang ginabatyag sang isa ka tawo base sa tono sang iya tingog, ekspresyon sang iya nawong, kag sa iya panghulaghulag. Indi mo matun-an ini nga ikasarang kon indi ka magpakig-upod sa mga tawo. Kon gadyet lang pirme ang imo ginagamit para mag-istorya, pareho sang pag-email kag pag-text, mabudlayan ka sa ulihi sa pag-istorya sa mga tawo sing personal. Gani, panikasugi nga istoryaha ang iban sing personal.​—2 Juan 12.

13. Ano pa ang dapat matun-an sang isa ka pamatan-on nga lalaki? (1 Timoteo 5:8) (Tan-awa man ang piktyur.)

¹³ Magtuon kon paano mo suportahan ang imo kaugalingon. Dapat masarangan sang isa ka hamtong nga brother nga suportahan ang iya kaugalingon kag ang iya pamilya. (Basaha ang 1 Timoteo 5:8.) Sa pila ka pungsod, posible makatuon sang obra ang pamatan-on nga mga brother sa ila amay ukon sa ila paryente. Sa iban naman nga pungsod, posible makatuon sang obra ang pamatan-on nga mga lalaki samtang nagaeskwela sila sa high school. Maayo gid kon makatuon ka sang ikasarang nga makabulig sa imo nga makakita sang obra. (Binu. 18:2, 3; 20:34; Efe. 4:28) Mangin mapisan kag siguraduha nga matapos mo ang imo mga ginahimo. Kon himuon mo ini, matalupangdan ka sang iban kag  magadayaw sila sa imo. Gani posible gid nga makakita ka sang obra. Ginbinagbinag naton ang mga kinaiya kag mga ikasarang nga importante para sa pamatan-on nga mga brother. Importante man ini para mahimo sang isa ka brother ang posible mga responsibilidad niya sa palaabuton. Binagbinagon naton ang pila sa sini.

14. Ano ang dapat himuon sang isa ka pamatan-on nga brother para makaalagad sia sing full-time?

¹⁴ Full-time nga alagad. Madamo nga hamtong nga mga brother ang nag-umpisa sa pag-alagad sing full-time sang pamatan-on pa sila. Kon payunir ang isa ka pamatan-on nga brother, matun-an niya kon paano makigbagay sa mga tawo nga lainlain ang personalidad. Makatuon man sia kon paano badyeton ang iya kuarta. (Fil. 4:11-13) Ang isa ka maayo nga umpisa para makaalagad ka sing full-time amo ang pag-auxiliary payunir. Madamo ang nag-auxiliary payunir anay sing pila ka bulan, kag nakabulig ini sa ila nga mangin regular payunir. Kon payunir ka, puede ka imbitahon nga mag-alagad sing full-time bilang isa ka construction servant ukon isa ka Bethelite.

15-16. Ano ang dapat himuon sang isa ka pamatan-on nga brother para makalipikar sia nga mag-alagad bilang ministeryal nga alagad ukon gulang?

¹⁵ Ministeryal nga alagad ukon gulang. Dapat panikasugan sang mga brother nga makalipikar bilang mga gulang sa kongregasyon para makaalagad sila sa ila mga kauturan. Ang Biblia nagasiling nga ang mga lalaki nga nagatinguha sa sini nga responsibilidad ‘nagahandum sang maayo nga buhat.’ (1 Tim. 3:1) Pero antes makaalagad bilang gulang ang isa ka brother, dapat anay sia makalipikar bilang isa ka ministeryal nga alagad. Ginabuligan sang ministeryal nga mga alagad ang mga gulang sa madamo nga paagi. Mapainubuson nga ginabuligan sang mga gulang kag sang ministeryal nga mga alagad ang ila mga kauturan kag mapisan sila nga nagabantala. Puede mangin ministeryal nga alagad ang pamatan-on nga brother nga wala pa mag-20 anyos. Kag puede mangin gulang ang huwaran nga ministeryal nga alagad bisan 20 anyos pa lang sia.

¹⁶ Paano ka makalipikar sa sini nga mga responsibilidad? Mabasa sa Biblia ang listahan sang mga kinaiya nga dapat mo ipakita. Para mapalig-on ka nga mapakita ini, dapat mo palanggaon si Jehova, ang imo pamilya, kag ang imo mga kauturan. (1 Tim. 3:1-13; Tito 1:6-9; 1 Ped. 5:2, 3) Panikasugi nga mahangpan ang kada kinaiya, kag mangamuyo kay Jehova nga buligan ka nga mapakita ini. c

17. Ano ang dapat himuon sang isa ka pamatan-on nga brother para mahandaan niya ang responsibilidad bilang bana kag ulo sang pamilya? (Tan-awa man ang piktyur.)

¹⁷ Bana kag ulo sang pamilya. Pareho sa ginsiling ni Jesus, may pila ka hamtong nga mga brother ang nagdesisyon nga indi magpangasawa. (Mat. 19:12)  Pero kon gusto mo magpangasawa, madugangan ang imo responsibilidad kay mangin isa na ikaw ka bana kag ulo sang pamilya. (1 Cor. 11:3) Gusto ni Jehova nga palanggaon sang bana ang iya asawa kag siguraduhon sang bana nga mahatag niya ang pisikal, emosyonal, kag espirituwal nga mga kinahanglanon sang iya asawa. (Efe. 5:28, 29) Ang mga kinaiya kag mga ikasarang nga ginbinagbinag sa sini nga artikulo makabulig sa imo nga mangin isa ka maayo nga bana. Nalakip sa sini ang ikasarang sa paghunahuna sing maayo, ang pagrespeto sa mga babayi, kag ang pagtinguha nga mapakita sa iban nga masaligan ka. Makabulig ini sa imo nga mangin handa sa imo responsibilidad bilang bana kag ulo sang pamilya.

18. Ano ang dapat himuon sang isa ka pamatan-on nga brother para mahandaan niya ang responsibilidad bilang amay?

¹⁸ Amay. Kon magpangasawa ka, posible nga mangin isa ikaw ka amay. Ano ang matun-an mo kay Jehova parte sa kon paano mangin isa ka maayo nga amay? Madamo ka sing matun-an sa iya. (Efe. 6:4) Ginsilingan ni Jehova ang iya Anak nga si Jesus nga palangga niya sia kag nahamuot sia sa iya. (Mat. 3:17) Kon mangin isa na ikaw ka amay, siguraduha nga pirme mo silingan ang imo kabataan nga palangga mo sila. Dayawa sila pirme sa ila maayo nga mga ginahimo. Kon ilugon sang mga amay ang halimbawa ni Jehova, ginabuligan nila ang ila kabataan nga mangin hamtong nga mga Cristiano. Para mahandaan mo subong kon paano mangin isa ka maayo nga amay, palanggaa kag buligi ang mga miembro sang inyo pamilya kag ang mga kauturan sa inyo kongregasyon. Kag panikasugi nga isiling sa ila nga palangga mo sila kag importante sila sa imo. (Juan 15:9) Makabulig ini sa imo kon mangin isa na ikaw ka bana kag amay sa ulihi. Pero samtang wala ka pa sing amo sini nga mga responsibilidad, magamit ka ni Jehova kag daku ang mabulig mo sa inyo pamilya kag sa inyo kongregasyon.

19-20. Ano ang dapat himuon sang pamatan-on nga mga brother para mangin hamtong sila nga mga Cristiano? (Tan-awa ang piktyur sa kober.)

¹⁹ Pamatan-on nga mga brother, kinahanglan ninyo magpanikasog para mangin hamtong kamo nga mga Cristiano. Kinahanglan ninyo ilugon ang maayo nga mga halimbawa, ipakita ninyo ang ikasarang sa paghunahuna sing maayo, ipakita ninyo nga masaligan kamo, magtuon kamo sang mga ikasarang nga makabulig sa inyo, kag handai ninyo ang posible mga responsibilidad ninyo sa palaabuton.

²⁰ Kon binagbinagon ninyo ang mga dapat ninyo himuon, posible mahunahuna ninyo nga mabudlay gid ini. Pero masarangan ninyo ini. Tandai ninyo nga gusto gid kamo buligan ni Jehova. (Isa. 41:10, 13) Kag siempre, buligan man kamo sang inyo mga kauturan sa kongregasyon. Kon mangin hamtong kamo nga mga Cristiano, mangin malipayon gid kamo kag kontento. Pamatan-on nga mga brother, palangga gid namon kamo. Kabay pa nga pakamaayuhon gid ni Jehova ang inyo ginahimo nga pagpanikasog para mangin hamtong kamo nga mga Cristiano.​—Hulu. 22:4.