1. Ano ang dapat naton himuon para mangin hamtong kita nga Cristiano?

 NATALUPANGDAN mo bala nga kadasig lang magdalagku sang mga bata? Nagadaku sila bisan pa daw wala sila nagapanikasog. Pero, para magdaku kita bilang isa ka Cristiano ukon para mangin hamtong kita, kinahanglan naton magpanikasog. b (1 Cor. 13:11; Heb. 6:1) Para mangin hamtong kita, dapat suod gid ang aton kaangtanan kay Jehova. Kinahanglan man naton ang iya balaan nga espiritu para mapakita naton ang mga kinaiya nga nanamian niya, para makatuon kita sang mga ikasarang nga makabulig sa aton, kag para mahandaan naton ang posible mga responsibilidad naton sa palaabuton.​—Hulu. 1:5.

2. Ano ang ginatudlo sa aton sang Genesis 1:27, kag ano ang binagbinagon naton sa sini nga artikulo?

² Sang gintuga ni Jehova ang mga tawo, nagtuga sia sing lalaki kag babayi. (Basaha ang Genesis 1:27.) Indi lang sa pisikal may kinalain ang mga lalaki kag mga babayi, kundi madamo pa sila sing kinalain. Halimbawa, gintuga ni Jehova ang mga lalaki kag mga babayi para tungdan ang lainlain nga mga responsibilidad. Para mahimo nila ini nga mga responsibilidad, kinahanglan nila ang pila ka kinaiya kag mga ikasarang. (Gen. 2:18) Sa sini nga artikulo, binagbinagon naton kon ano ang puede himuon sang pamatan-on nga mga sister para mangin hamtong sila nga mga Cristiano. Sa masunod nga artikulo, binagbinagon naman naton kon ano ang puede himuon sang pamatan-on nga mga brother.

3-4. Diin makakita ang pamatan-on nga mga sister sang maayo nga mga halimbawa nga puede nila ilugon? (Tan-awa man ang piktyur.)

³ Madamo sing mabasa sa Biblia parte sa halimbawa sang dalayawon  nga mga babayi. Palangga nila si Jehova kag nag-alagad sila sa iya. (Tan-awa sa jw.org/hil ang artikulo nga “Mga Babayi sa Biblia—Ano ang Matun-an Naton sa Ila?”) Ginpakita nila ang mga kinaiya nga ginsambit sa teksto nga ginbasihan sini nga artikulo. ‘Kahibalo sila magpugong sang ila kaugalingon’ kag ‘matutom sila sa Dios sa tanan nga butang.’ Magluwas sa sini nga mga halimbawa, madamo man nga hamtong nga mga sister sa kongregasyon ang puede ilugon sang pamatan-on nga mga sister.

⁴ Pamatan-on nga mga sister, hunahunaa ninyo kon sin-o nga hamtong nga mga babayi nga alagad ni Jehova ang gusto ninyo ilugon. Obserbahi ang ila maayo nga mga kinaiya. Dayon hunahunaa kon paano ninyo ini mapakita. Binagbinagon naton sa masunod nga mga parapo ang tatlo ka importante nga mga kinaiya nga dapat ipakita sang mga sister para mangin hamtong sila.

5. Ngaa importante nga mangin mapainubuson ang isa ka hamtong nga Cristiano nga babayi?

⁵ Para mangin hamtong, importante ang pagkamapainubuson. Kon mapainubuson ang isa ka babayi, mangin maayo ang iya kaangtanan kay Jehova kag sa iban. (Sant. 4:6) Halimbawa, kon palangga sang isa ka babayi si Jehova, mapainubuson niya nga tumanon ang 1 Corinto 11:3. Suno sa sini nga teksto, may ginhatagan si Jehova sang awtoridad nga manguna sa kongregasyon kag sa pamilya. c

6. Ano ang matun-an sang pamatan-on nga mga sister kay Rebeca parte sa pagkamapainubuson?

⁶ Binagbinaga ang halimbawa ni Rebeca nga isa ka maalam nga babayi. Sa bilog niya nga kabuhi, ginpakita niya nga kabalo sia kon ano ang dapat himuon sa isa ka sitwasyon. (Gen. 24:58; 27:5-17) Pero, matinahuron sia kag handa sia magpasakop. (Gen. 24:17, 18, 65) Kon mapainubuson mo nga suportahan ang mga ginhatagan ni Jehova sang awtoridad, pareho sa ginhimo ni Rebeca, mangin maayo ka nga halimbawa sa inyo pamilya kag sa inyo kongregasyon.

7. Paano mailog sang pamatan-on nga mga sister ang kaugdang ni Ester?

⁷ Para mangin hamtong, importante man ang kaugdang. Ang Biblia nagasiling nga “ang kaalam yara  sa mga maugdang.” (Hulu. 11:2) Binagbinaga si Ester nga isa ka maugdang kag matutom nga alagad sang Dios. Bangod maugdang sia, wala sia nangin matinaastaason sang nangin rayna sia. Ginpamatian niya kag gintuman ang laygay sang iya pakaisa nga si Mardoqueo nga mas magulang sa iya. (Est. 2:10, 20, 22) Mapakita mo man ang kaugdang kon mangayo ka sing laygay sa iban kag kon pamatian mo ang ila maayo nga mga laygay.​—Tito 2:3-5.

8. Suno sa 1 Timoteo 2:9, 10, paano mapakita sang mga sister nga maugdang sila sa ila pamayo kag estilo sang buhok?

⁸ May isa pa ka paagi nga ginpakita ni Ester ang kaugdang. “Manami [sia] sing lawas kag matahom,” pero wala sia nagpadayaw. (Est. 2:7, 15) Ano ang matun-an sang mga sister sa halimbawa ni Ester? Ang isa amo ang mabasa sa 1 Timoteo 2:9, 10. (Basaha.) Ginsilingan ni apostol Pablo ang Cristiano nga mga babayi nga dapat makita sa ila pamayo nga maugdang sila kag maligdong ang ila hunahuna. Ang Griego nga mga tinaga nga gingamit sa sini nga teksto nagapahangop nga dapat makita sa pamayo sang mga babayi nga ginarespeto nila ang Dios kag ang balatyagon sang iban. Ginapabugal gid naton ang aton hamtong nga mga sister nga maugdang ang pamayo.

9. Ano ang matun-an naton sa halimbawa ni Abigail?

⁹ Para mangin hamtong ang mga sister, importante man ang paghantop. Ano ang paghantop? Amo ini ang ikasarang nga mabal-an kon ano ang husto kag sala kag dayon himuon ang husto. Binagbinaga ang halimbawa ni Abigail. Bangod sang indi maayo nga desisyon sang iya bana, nabutang sa peligro ang bilog nila nga panimalay. Pero bangod may paghantop si Abigail, may ginhimo sia dayon para maluwas ang ila kabuhi. (1 Sam. 25:14-23, 32-35) Kon may paghantop kita, makabulig man ini sa aton nga mabal-an kon san-o kita dapat maghambal kag kon san-o kita dapat maghipos. Makabulig man ang paghantop kon nagaistorya kita sa iban. Punggan kita sini nga mamangkot parte sa mga butang nga wala kita sing labot ukon sang mga pamangkot nga posible masaw-ahan ang aton ginaistorya.​—1 Tes. 4:11.

10-11. Kon maayo ka magbasa kag magsulat, ano ang mga benepisyo sini sa imo kag sa iban? (Tan-awa man ang piktyur.)

¹⁰ Dapat magtuon ang mga sister sang mga ikasarang nga makabulig sa ila. Samtang bata pa ang isa ka babayi, madamo sia sing matun-an nga mga ikasarang. Ang pila sa sini makabulig gid sa iya sa bilog niya nga kabuhi. Binagbinagon naton ang pila ka halimbawa sa sini.

¹¹ Magtuon kon paano magbasa kag magsulat sing maayo. May pila ka kultura nga nagasiling nga indi na kinahanglan nga tun-an pa sang mga babayi kon paano magbasa kag magsulat. Pero, importante ini nga mga ikasarang para sa tanan nga Cristiano. d (1 Tim. 4:13) Gani bisan pa mabudlay, padayon gid nga magtuon kon paano magbasa kag magsulat sing maayo. Ano ang mga benepisyo kon maayo ka  magbasa kag magsulat? Makabulig ini nga mga ikasarang para makakita ka sang obra. Makabulig man ini para matun-an mo sing maayo ang Biblia kag matudlo ini sa iban. Kag kon ginabasa mo ang Biblia kag ginapamalandungan ini, mabaton mo ang pinakamaayo nga benepisyo nga amo ang mangin suod pa gid kay Jehova.​—Jos. 1:8; 1 Tim. 4:15.

12. Para matun-an mo kon paano mag-istorya sing maayo sa iban, paano makabulig sa imo ang Hulubaton 31:26?

¹² Magtuon kon paano mag-istorya sing maayo sa iban. Importante gid para sa mga Cristiano ini nga ikasarang. Parte sa sini, amo ini ang ginlaygay sa aton ni disipulo Santiago: “Ang tagsa ka tawo dapat mangin maabtik sa pagpamati, mahinay sa paghambal.” (Sant. 1:19) Kon nagahambal ang iban kag ginapamatian mo sila sing maayo, ginapakitaan mo sila sang “simpatiya.” (1 Ped. 3:8) Kon daw indi ka sigurado sang buot silingon sang ginsiling sang imo kaistorya ukon sang iya ginabatyag, magpamangkot sing nagakaigo. Dayon pamensari anay sing maayo ang imo ihambal. (Hulu. 15:28, footnote) Pamangkuta ang imo kaugalingon: ‘Matuod bala kag makapalig-on ang akon ihambal? Kon ihambal ko ini, mabatyagan bala sang akon kaistorya nga ginarespeto ko sia kag ginapakitaan sang kaayo?’ Obserbahi ang hamtong nga mga sister nga nagapamati kag nagaistorya sing maayo sa iban. (Basaha ang Hulubaton 31:26.) Obserbahi sila kon paano nila ini ginahimo. Kon matun-an mo sing maayo ini nga ikasarang, mangin mas maayo ang imo kaangtanan sa iban.

13. Paano mo matun-an kon paano mangabuhi? (Tan-awa man ang piktyur.)

¹³ Magtuon kon paano mangabuhi. Sa madamo nga lugar, ang mga babayi amo ang nagaobra sang kalabanan nga ulubrahon sa balay. Para matun-an mo ini nga mga ulubrahon, posible gid nga mabuligan ka sang imo iloy ukon sang mga sister nga kabalo sini. Ang isa ka sister nga si Cindy nagsiling: “Ang isa sa pinakamanami nga regalo nga ginhatag sa akon ni Mama amo ang pagtudlo niya sa akon nga puede kita mangin malipayon bisan pa nagapangabudlay kita. Bangod gintudluan niya ako kon paano magluto, magpaninlo, magpanahi, kag magpanindahan, wala ako nabudlayan sa pag-atipan sang akon kaugalingon kag mas madamo ako sang mahimo sa akon pag-alagad kay Jehova. Gintudluan man ako ni Mama nga mangin maabiabihon, gani nakilala ko ang madamo nga kauturan nga maayo gid nga mga halimbawa nga puede ko ilugon.” (Hulu. 31:15, 21, 22) Kon mapisan, maabiabihon, kag kabalo mangabuhi ang isa ka babayi, pagpakamaayo gid sia sa iya pamilya kag sa kongregasyon.​—Hulu. 31:13, 17, 27; Binu. 16:15.

14. Ano ang natun-an mo sa eksperiensia ni Crystal, kag ano ang dapat mo himuon?

¹⁴ Magtuon kon paano mo suportahan ang imo kaugalingon. Importante gid ini nga ikasarang nga dapat matun-an sang tanan nga Cristiano. (Fil. 4:11) Ang isa ka sister nga si Crystal nagsiling: “Ginpalig-on ako sang akon mga ginikanan nga pilion ang kurso sa high school nga makatudlo sa akon sang mga ikasarang nga magamit ko sa ulihi. Ginpalig-on ako ni Tatay nga pilion ang mga klase parte sa accounting, kag daku gid ang nabulig sini sa akon.” Magluwas nga dapat mo tun-an ang mga ikasarang nga makabulig sa imo nga makakita sang obra, panikasugi man nga tun-an kon paano mo  badyeton ang imo kuarta. (Hulu. 31:16, 18) Dapat mangin kontento ka, magkabuhi sing simple, kag likawan mo nga mangutang kon indi man lang kinahanglanon. Kon himuon mo ini, mas madamo ka sang mahimo sa imo pag-alagad kay Jehova.​—1 Tim. 6:8.

15-16. Paano nakabulig sa iban ang mga sister nga wala sing bana? (Marcos 10:29, 30)

¹⁵ Kon ipakita mo ang mga kinaiya nga nanamian ni Jehova kag kon magtuon ka sang mga ikasarang nga makabulig sa imo, mas mangin handa ka sa posible mga responsibilidad mo sa palaabuton. Binagbinagon naton ang pila sa sini.

¹⁶ Posible nga gusto mo nga indi lang anay magpamana. Pareho sa ginsiling ni Jesus, may pila ka babayi nga nagdesisyon nga indi magpamana bisan pa nga ginapakalain sa ila kultura ang mga wala sing bana. (Mat. 19:10-12) May iban naman nga wala nagpamana bangod sang ila mga kahimtangan. Makasalig kamo nga wala ginapakanubo ni Jehova kag ni Jesus ang mga Cristiano nga wala sing bana ukon asawa. Sa bilog nga kalibutan, pagpakamaayo gid sa kongregasyon ang mga sister nga wala sing bana. Palangga nila ang mga kauturan kag handa sila magbulig, gani daw nangin mga utod sila kag mga iloy sang madamo nga kauturan.​—Basaha ang Marcos 10:29, 30; 1 Tim. 5:2.

17. Ano ang puede himuon sang pamatan-on nga mga sister para mahandaan nila ang pag-alagad sing full-time?

¹⁷ Posible nga gusto mo nga mag-alagad sing full-time. Daku ang ginahimo sang mga sister sa aton bug-os kalibutan nga pagbantala nga hilikuton. (Sal. 68:11) Puede mo na subong sugdan ang paghimo sing plano para makaalagad ka sing full-time. Puede ka mag-alagad bilang isa ka payunir, construction volunteer, ukon Bethelite. Ipangamuyo ang parte sa imo goal ukon tulumuron. Istoryaha ang iban nga nagaalagad sing full-time, kag hibalua kon ano ang mga dapat mo himuon. Dayon maghimo sing plano nga makabulig sa imo nga malab-ot ang imo tulumuron sa pag-alagad. Kon nagaalagad ka sing full-time, madamo nga mga pribilehiyo sa pag-alagad kay Jehova ang puede mo maeksperiensiahan.

18. Ngaa dapat pilion sing maayo sang isa ka sister ang iya pamanahon? (Tan-awa man ang piktyur.)

¹⁸ Posible nga gusto mo nga magpamana. Makabulig sa imo nga mangin isa ka maayo nga asawa ang mga kinaiya kag mga ikasarang nga ginbinagbinag naton. Siempre, kon gusto mo magpamana, dapat mo pilion sing maayo ang imo pamanahon. Kay man, isa ini sa pinakaimportante nga desisyon nga himuon mo. Dumduma nga dapat ka magpasakop sa lalaki nga pamanahon mo kay sia ang imo ulo. (Roma 7:2; Efe. 5:23, 33) Gani pamangkuta ang imo kaugalingon: ‘Hamtong bala sia nga Cristiano? Ginauna bala niya si Jehova sa iya kabuhi?  Maayo bala ang ginahimo niya nga mga desisyon? Ginaako bala niya ang iya mga sala? Ginarespeto bala niya ang mga babayi? May ikasarang bala sia nga amanan ang akon espirituwal, materyal, kag emosyonal nga mga kinahanglanon? Ginatungdan bala niya sing maayo ang iya mga responsibilidad? Halimbawa, ano ang iya mga responsibilidad sa kongregasyon kag paano niya ini ginatungdan?’ (Luc. 16:10; 1 Tim. 5:8) Siempre, kon gusto mo makakita sang brother nga mangin isa ka maayo nga bana, dapat handaan mo man nga mangin isa ka maayo nga asawa.

19. Ngaa nagapadungog sa isa ka asawa ang iya katungdanan bilang isa ka “kabulig”?

¹⁹ Ang Biblia nagasiling nga ang isa ka maayo nga asawa isa ka “kabulig” sang iya bana kag “kaupod nga bagay” sa iya. (Gen. 2:18) Ginapakanubo bala sini ang mga asawa? Wala. Ang katungdanan sang isa ka asawa bilang isa ka kabulig nagapadungog sa iya. Dumduma nga bisan si Jehova ginsambit man sa Biblia bilang isa ka “manugbulig” sing pila ka beses. (Sal. 54:4; Heb. 13:6) Mapakita sang asawa nga isa sia ka matuod nga kabulig sang iya bana kon suportahan niya ang iya bana. Halimbawa, kon may ginhimo nga desisyon ang iya bana para sa ila pamilya, ginasuportahan niya ini. Kag bangod palangga sang asawa si Jehova, ginapanikasugan niya nga makita sang iban ang maayo nga mga kinaiya sang iya bana. (Hulu. 31:11, 12; 1 Tim. 3:11) Kon gusto mo nga mangin isa ka maayo nga asawa, mahandaan mo ini paagi sa pagpabakod sang imo gugma kay Jehova kag paagi sa pagbulig sa mga miembro sang inyo pamilya kag sa mga kauturan sa kongregasyon.

20. Ano ang mabulig sang isa ka iloy sa iya pamilya?

²⁰ Posible nga gusto mo nga mangin isa ka iloy. Kon mamana ka, posible nga makabata kamo sang imo bana. (Sal. 127:3) Gani, hunahunaa kon ano nga mga kinaiya kag mga ikasarang ang kinahanglan sang isa ka maayo nga iloy. Para mangin isa ikaw ka maayo nga asawa kag iloy sa ulihi, makabulig sa imo ang mga kinaiya kag mga ikasarang nga ginbinagbinag naton sa sini nga artikulo. Kon mangin mahigugmaon ka, mainayuhon, kag mapinasensiahon, makabulig ka para mangin malipayon ang inyo pamilya. Mabatyagan man sang imo kabataan nga ginaamligan sila kag ginapalangga.​—Hulu. 24:3.

21. Ano ang ginabatyag naton para sa aton mga sister, kag ngaa? (Tan-awa ang piktyur sa kober.)

²¹ Pamatan-on nga mga sister, palangga gid namon kamo bangod sa tanan ninyo nga ginahimo para kay Jehova kag sa iya katawhan. (Heb. 6:10) Nagapanikasog gid kamo para mapakita ninyo ang mga kinaiya nga nanamian ni Jehova, para matun-an ninyo ang mga ikasarang nga makabulig sa inyo kag sa iban nga mangin malipayon, kag para mahandaan ninyo ang posible mga responsibilidad ninyo sa palaabuton. Hamili gid kamo sa organisasyon ni Jehova.