1-2. Ano nga mga sitwasyon nga mahimo makahibi kita?

 MAY mga tion nga makahibi gid kita. Kon kaisa makahibi kita bangod sa sobra nga kalipay. Posible nakahibi ka sang nabun-ag ang imo bata, sang nadumduman mo ang isa ka makalilipay nga eksperiensia, ukon sang nagkit-anay kamo liwat sang imo abyan pagkatapos sang malawig nga tion.

² Pero sa masami, nagahibi kita bangod sa kasubo ukon pag-antos. Halimbawa, nagahibi kita bangod indi maayo ang pagtratar sa aton sang iban. Ukon nagaantos kita bangod sa balatian kag kon napatay ang isa sa aton pinalangga. Sa sini nga mga tion, mahimo nabatyagan man naton ang ginbatyag ni manalagna Jeremias sang ginlaglag sang mga taga-Babilonia ang Jerusalem. Nagsiling sia: “Ang akon luha nagatululagay . . . Wala ako nagauntat sa paghilibion.”​—Pan. 3:​48, 49.

3. Ano ang nabatyagan ni Jehova kon makita niya nga nagaantos ang iya mga alagad? (Isaias 63:9)

³ Nakahibalo gid si Jehova kon pila ka beses kita nga naghibi bangod sa mabudlay nga mga sitwasyon sa aton kabuhi. Ang Biblia nagapasalig sa aton nga nabal-an ni Jehova ang kabudlayan nga ginaatubang sang kada isa sa aton, kag nagapamati sia kon nagapangayo kita sang bulig sa iya. (Sal. 34:15) Pero indi lang basta nga nagatan-aw ukon nagapamati si Jehova sa aton. Pareho sa isa ka mapinalanggaon nga ginikanan, nasubuan gid sia kon makita niya nga nagahibi ang iya mga anak kag buligan niya sila dayon.​—Basaha ang Isaias 63:9.

4. Sin-o nga mga halimbawa sa Biblia ang binagbinagon naton, kag ano ang matun-an naton parte kay Jehova?

⁴ Sa Biblia, ginasugiran kita ni Jehova kon ano ang nabatyagan  niya kon nagahibi ang iya mga alagad kag kon paano niya sila ginbuligan. Binagbinagon naton ang halimbawa nanday Hana, David, kag Hari Ezequias. Ngaa naghibi sila? Paano sila ginbuligan ni Jehova? Kag paano ang ila halimbawa makapaumpaw sa aton kon nasubuan kita, ginluiban kita sang iban, kag kon daw nadulaan na kita sing paglaum?

LUHA BANGOD SANG KASUBO

5. Ano ang ginbatyag ni Hana sa iya sitwasyon?

⁵ Madamo sang problema si Hana amo nga grabe gid ang iya kasubo kag paghilibion. Ang isa niya ka problema amo nga ang iya bana may isa pa ka asawa nga amo si Penina. Kag malain gid ang pagtratar sa iya ni Penina. Dugang pa, indi makabata si Hana pero si Penina may mga anak. (1 Sam. 1:​1, 2) Bangod sini, pirme sia ginayaguta ni Penina kay baw-as sia. Kon ikaw si Hana, ano ang imo batyagon? Naakig gid si Hana amo nga ‘naghibi sia kag indi na magkaon,’ kag “nasubuan gid” sia.​—1 Sam. 1:​6, 7, 10.

6. Ano ang ginhimo ni Hana para maumpawan sia?

⁶ Ano ang ginhimo ni Hana para maumpawan sia? Ang isa nga nakabulig sa iya amo ang pagkadto sa tabernakulo para simbahon si Jehova. “Nagpangamuyo sia kay Jehova kag naghilibion” posible malapit sa luwang sang tabernakulo. Nagpakitluoy sia kay Jehova: ‘Talupangda ang kalisdanan sang imo alagad kag dumduma ako.’ (1 Sam. 1:10b, 11) Ginpautwas ni Hana ang iya nabatyagan kay Jehova paagi sa pangamuyo. Palangga gid ni Jehova si Hana, gani nasubuan gid Sia nga makita si Hana nga nagahibi.

7. Ano ang nabatyagan ni Hana pagkatapos niya ginpautwas ang iya ginbatyag kay Jehova paagi sa pangamuyo?

⁷ Ano ang nabatyagan ni Hana pagkatapos niya napautwas ang iya ginabatyag kay Jehova paagi sa pangamuyo kag sang ginpaumpawan sia sang Mataas nga Saserdote nga si Eli? Ang Biblia nagsiling: “Naglakat ang babayi kag nagkaon, kag wala na sia nagkalisod.” (1 Sam. 1:​17, 18) Bisan wala pa nagbag-o ang sitwasyon ni Hana, naghaganhagan ang iya nabatyagan. Gintugyan niya kay Jehova ang iya mga problema. Nakita ni Jehova ang iya mga kabudlayan, nabatian ang iya paghibi, kag sang ulihi ginhatagan sia sing anak.​—1 Sam. 1:​19, 20; 2:21.

8-9. Base sa Hebreo 10:​24, 25, ngaa importante nga mag-attend kita sa mga miting sang kongregasyon? (Tan-awa man ang piktyur.)

⁸ Ang matun-an naton. Posible may problema ka subong nga nagapasubo gid sa imo. Mahimo napatay ang isa sa mga miembro sang imo pamilya ukon abyan. Sa sini nga mga tion, normal lang nga gusto mo mag-isahanon. Pero dumduma ang halimbawa ni Hana. Nakabatyag sia sang paumpaw sang nagkadto sia sa tabernakulo. Amo man sini  ang mabatyagan mo kon mag-attend ka sa mga miting bisan pa nakapoy ka kag nasubuan. (Basaha ang Hebreo 10:​24, 25.) Sa tion sang miting, mapalig-on kita sa mga teksto sa Biblia kag buligan kita ni Jehova nga madula ang aton negatibo nga panghunahuna kag mangin positibo. Gani, magahaganhagan ang aton ginabatyag bisan pa ang aton sitwasyon indi dayon magbag-o.

⁹ Sa aton mga miting, makabatyag kita sang paumpaw bangod ginapalig-on kita kag ginapalangga sang aton mga kauturan. (1 Tes. 5:​11, 14) Amo sini ang nabatyagan sang isa ka espesyal payunir nga brother sang napatay ang iya asawa. Nagsiling sia: “Nagahibi gihapon ako. Kon kaisa, gusto ko lang mag-isahanon kag maghibi. Pero kon mag-attend ako sa miting, mapalig-on gid ako. Ang mga komento sang mga kauturan kag ang ila ginasiling sa akon nagapahaganhagan sang akon nabatyagan. Bisan pa may ginakabalak-an ako antes mag-attend sa miting, nagakaumpawan gid ako kon ara na ako didto.” Kon mag-attend kita sa mga miting, gamiton ni Jehova ang mga kauturan para buligan kita.

10. Paano naton mailog ang halimbawa ni Hana kon grabe ang aton kasubo?

¹⁰ Naumpawan man si Hana sang ginpabutyag niya kay Jehova ang iya nabatyagan paagi sa pangamuyo. Puede mo man ‘matugyan kay Jehova ang tanan mo nga kabalaka’ kag makasalig ka nga pamatian ka niya. (1 Ped. 5:7) Ang isa ka sister nga ang iya bana ginpatay sang mga kawatan nagsiling: “Grabe gid ang akon kasubo nga pamatyag ko daw indi na gid ako mangin malipayon liwat. Pero nagahaganhagan ang akon pamatyag kon mangamuyo ako sa akon mapinalanggaon nga Amay sa langit nga si Jehova. Kon kaisa, indi ako kabalo sang akon ihambal pero naintiendihan niya ang akon ginabatyag. Kon nasubuan gid ako kag nabalaka, nagapangamuyo ako sa iya nga hatagan niya ako sing kalinong. Dayon nagahaganhagan ang akon pamatyag kag mahimo ko na ang akon mga ulubrahon sa sina nga adlaw.” Kon isugid mo kay Jehova ang imo mga kabalaka, nasubuan man sia kag nabatyagan niya ang imo pag-antos. Bisan ara lang gihapon ang imo problema, paumpawan ka ni Jehova para makabatyag ka sang kalinong. (Sal. 94:19; Fil. 4:​6, 7) Kag padyaan gid niya ang imo katutom kag pagbatas.​—Heb. 11:6.

LUHA BANGOD SANG PAGLUIB

11. Ano ang ginbatyag ni David kay indi maayo ang pagtratar sa iya sang iban?

¹¹ Madamo sing kabudlayan nga dapat batason si David sa iya kabuhi, gani may mga tion nga naghibi man sia. Madamo nga tawo ang nagdumot sa iya, kag bisan gani ang mga ginsaligan niya nagluib sa iya. (1 Sam. 19:​10, 11; 2 Sam. 15:​10-14, 30) Isa ka bes, nagsiling sia: “Ginalapyo ako sa akon pagpanghayhay; sa bug-os nga gab-i nahumog sang luha ang akon hiligdaan; nagadanaw ang akon hiligdaan bangod sang akon paghibi.” Ngaa amo sini ang ginbatyag ni David? “Bangod sang tanan nga nagasalakay sa akon,” siling niya. (Sal. 6:​6, 7) Bangod indi maayo ang pagtratar sang iban kay David, grabe gid ang iya kasubo kag paghibi.

12. Base sa Salmo 56:​8, sa ano kumbinsido si David?

¹² Bisan pa madamo sing kabudlayan si David, sigurado sia nga palangga sia ni Jehova. Nagsiling sia: “Pamatian gid ni Jehova ang akon paghibi.” (Sal. 6:8) Sa isa pa ka tion, may ginsulat si David nga matahom nga mga tinaga nga mabasa naton sa Salmo 56:8. (Basaha.) Ini nga mga tinaga nagapakita nga palangga gid kita ni Jehova kag importante sa iya ang aton nabatyagan. Nagsiling si David  nga daw pareho lang nga ginatipon ni Jehova ang aton mga luha sa isa ka suludlan ukon daw ginasulat Niya ang aton nabatyagan sa isa ka libro. Sigurado si David nga nakita kag ginadumdom ni Jehova ang iya pag-antos. Kumbinsido si David nga kabalo ang iya mapinalanggaon nga Amay sa langit kon ano ang iya mga problema kag kon ano ang epekto sini sa iya.

13. Kon nasakitan kita bangod sang ginhimo sang iban sa aton, ano ang dapat naton dumdumon? (Tan-awa man ang piktyur.)

¹³ Ang matun-an naton. Nasakitan ka bala ukon nasubuan bangod ginluiban ka sang isa nga imo ginasaligan? Mahimo nagalalain ka gid bangod ginbulagan ka sang imo nobyo ukon nobya, ukon sang imo bana ukon asawa. Ukon basi ang isa sa imo pinalangga nag-untat sa pag-alagad kay Jehova. May isa ka brother nga ang iya asawa nanghilahi kag ginbulagan sia. Nagsiling sia: “Indi gid ako makapati nga natabo ini sa akon. Nasubuan gid ’ko, naakig, kag pamatyag ko wala na ako sing pulos.” Kon amo sini ang imo nabatyagan, makasalig ka nga indi ka pagbiyaan ni Jehova. Nagsiling ang brother: “Narealisar ko nga may mga tawo nga indi mangin mainunungon sa imo, pero si Jehova ang aton Igang. Bisan ano man ang matabo, ara gid sia pirme sa pagbulig sa aton. Indi niya pagbiyaan ang mga mainunungon sa iya.” (Sal. 37:28) Dumduma man nga ang pagpalangga ni Jehova mas labaw pa sangsa pagpalangga sang bisan sin-o nga tawo. Masakit gid kon ginluiban ukon ginbiyaan ka sang isa nga palangga mo, pero ang pagpalangga ni Jehova sa imo wala gid nagabag-o. (Roma 8:​38, 39) Ang punto: Bisan ano man ang pagtratar sang iban sa imo, palangga ka sang imo Amay sa langit.

14. Ano ang ginapasalig sa aton sang Salmo 34:18?

¹⁴ Kon ginluiban ka, makabulig sa imo ang ginsiling ni David sa Salmo 34:18. (Basaha.) Ang isa ka reperensia nagsiling nga ang mga “nalisdan” mahimo nagapatuhoy sa “mga nagabatyag nga wala na sing tsansa nga mangin maayo pa ang ila sitwasyon.” Paano ginabuligan ni Jehova ang mga nagabatyag sini? Pareho sa isa ka ginikanan nga nagakugos kag nagauloulo sa iya bata nga nagahibi, si Jehova “malapit” sa aton. Buot silingon, handa gid si Jehova sa pagbulig sa aton kon ginluiban kita ukon ginbiyaan sang iban. Gusto gid niya kita paumpawan kon naluyahan kita sing buot ukon daw nagabatyag kita nga wala sing pulos. Kag madamo sia sang ginahatag nga maayo nga mga butang nga makabulig sa aton nga mabatas ang aton mga kabudlayan.​—Isa. 65:17.

 LUHA BANGOD NADULAAN NA SING PAGLAUM

15. Ngaa naghibi si Ezequias?

¹⁵ Sang nagaedad sing 39 anyos si Hari Ezequias sang Juda, nabal-an niya nga may ara sia sing malala nga balatian. Ginsugid sa iya ni manalagna Isaias ang mensahe ni Jehova nga mapatay sia sa iya balatian. (2 Hari 20:1) Daw wala na sing paglaum nga mag-ayo si Ezequias. Bangod sini, naghilibion gid sia kag nagpakitluoy kay Jehova sa pangamuyo.​—2 Hari 20:​2, 3.

16. Ano ang ginhimo ni Jehova sang nakitluoy si Ezequias?

¹⁶ Natandog gid si Jehova sang naghibi kag nakitluoy si Ezequias, gani nagsiling Sia sa iya: “Nabatian ko ang imo pangamuyo. Nakita ko ang imo mga luha. Gani ayuhon ko ikaw.” Paagi kay Isaias, nagpromisa si Jehova nga palawigon niya ang kabuhi ni Ezequias kag luwason ang Jerusalem sa mga Asirianhon.​—2 Hari 20:​4-6.

17. Paano kita ginabuligan ni Jehova kon may ara kita sing malala nga balatian? (Salmo 41:3) (Tan-awa man ang piktyur.)

¹⁷ Ang matun-an naton. Ano ang himuon mo kon daw wala na sing tsansa nga mag-ayo ang imo balatian? Ipangamuyo ini kay Jehova. Ang Biblia nagapasalig sa aton nga “ang Amay nga may mapinalanggaon nga kaluoy kag ang Dios nga nagahatag sang tanan nga sahi sang lugpay” magalugpay sa aton sa tanan naton nga mga pagtilaw. (2 Cor. 1:​3, 4) Subong, indi kita makapaabot nga dulaon ni Jehova ang tanan naton nga mga problema, pero makasalig kita nga buligan gid niya kita. (Basaha ang Salmo 41:3.) Paagi sa iya balaan nga espiritu, hatagan kita ni Jehova sang kusog, kaalam, kag kalinong para makabatas. (Hulu. 18:14; Fil. 4:13) Ginapaumpawan man niya kita paagi sa paghatag sa aton sang paglaum nga dulaon niya ang tanan nga balatian.​—Isa. 33:24.

18. Ano nga teksto ang nakapaumpaw sa imo sang nakaatubang ka sang mabudlay gid nga pagtilaw? (Tan-awa ang kahon nga “ Makapaumpaw nga mga Teksto Kon Nasubuan Kita.”)

¹⁸ Napaumpawan si Ezequias sa ginsiling sa iya ni Jehova. Mapaumpawan man kita kon basahon naton ang Pulong sang Dios. Kon may ara kita sang balatian, ang ginasiling ni Jehova sa Biblia makapaumpaw kag makabulig sa aton nga mangin kalmado. (Roma 15:4) Ang isa ka sister sa West Africa pirme nagahibi sang nabal-an niya nga may ara sia sing kanser. Nagsiling sia: “Ang teksto nga nakapaumpaw gid sa akon amo ang Isaias 26:3. Bisan indi man naton mabag-o ang aton sitwasyon, ini nga teksto nagapasalig sa akon nga hatagan ako ni Jehova sing kalinong kag buligan niya ako nga mabatas ang bisan ano nga pagtilaw.” Ano nga teksto ang nakapaumpaw sa imo sang nakaatubang ka sang mabudlay gid  nga pagtilaw ukon mga problema nga daw wala na sing solusyon?

19. Ano ang matabo sa palaabuton?

¹⁹ Malapit na gid matapos ini nga sistema, kag mapaabot naton nga madamo pa kita sing maatubang nga kabudlayan nga makapahibi sa aton. Pero natun-an naton sa halimbawa nanday Hana, David, kag Hari Ezequias nga makita ni Jehova ang aton paghibi kag nasubuan man sia. Ang aton mga luha hamili gid kay Jehova. Gani kon nagaatubang ka sang mabudlay nga mga problema, ipautwas kay Jehova ang imo nabatyagan sa pangamuyo. Indi gid pag-ipain ang imo kaugalingon sa mga kauturan sa kongregasyon. Kag kon basahon mo pirme ang Biblia, paumpawan ka ni Jehova. Kon padayon kita nga nagabatas kag nagapabilin nga matutom, sigurado nga padyaan gid kita ni Jehova. Ang isa sa sini amo ang matahom nga promisa nga sa indi madugay, pahiran niya ang aton mga luha bangod sang kasubo, pagluib, kag pagkadula sing paglaum. (Bug. 21:4) Kag kon maghibi gid man kita sa ulihi, luha na ini sang kalipay.