1-2. Ano dapat ang mangin reaksion sang mga ginikanan kon mamangkot ang ila bata parte sa Dios kag sa Biblia?

 MADAMO nga ginikanan ang nagasiling nga indi mahapos ang pagpadaku sa mga bata. Kon isa ikaw ka ginikanan, dalayawon gid ang imo ginahimo para mapabakod ang pagtuo sang imo bata. (Deut. 6:​6, 7) Samtang nagadaku ang imo bata, posible may mga pamangkot sia parte sa aton ginapatihan, lakip ang moral nga talaksan nga ginatudlo sang Biblia.

² Sa umpisa, basi maghunahuna ka nga ginpamangkot ini sang imo bata kay maluya ang iya pagtuo sa Dios. Pero ang matuod, samtang nagadaku ang imo bata, kinahanglan niya mamangkot para magbakod ang iya pagtuo. (1 Cor. 13:11) Gani indi ka dapat mabalaka. Kon may pamangkot sia, buligi sia nga mangatarungan kag maghunahuna sing maayo.

3. Ano ang binagbinagon naton sa sini nga artikulo?

³ Sa sini nga artikulo, binagbinagon naton kon paano buligan sang mga ginikanan ang ila bata ukon kabataan nga (1) mapabakod ang ila pagtuo sa Dios kag pagsalig sa Biblia, (2) maintiendihan kon ngaa para sa ila kaayuhan ang mga talaksan sang Biblia, kag (3) manindugan sa ila ginapatihan. Hibaluon man naton kon ngaa maayo gid nga nagapamangkot ang kabataan kag kon ano nga mga hilimuon ang puede himuon sang mga ginikanan para matudluan ang ila kabataan parte sa aton ginapatihan.

BULIGI ANG IMO BATA NGA MAGBAKOD ANG IYA PAGTUO SA DIOS KAG PAGSALIG SA BIBLIA

4. Ano ang posible nga ipamangkot sang imo bata, kag ngaa?

⁴ Kabalo ang mga ginikanan nga indi awtomatiko nga mangin mabakod ang pagtuo sang ila bata bangod lang nga mabakod ang  ila pagtuo sa Dios. Wala sing tawo nga nabun-ag nga may pagtuo na nga daan kay Jehova. Gani maabot gid ang tion nga mamangkot ang imo bata pareho sang: ‘May ara gid man bala sing Dios? Mapatihan ko gid bala ang ginasiling sang Biblia?’ Nagsiling ang Biblia nga maayo gid kon gamiton naton ang aton “ikasarang sa pagpangatarungan” kag ‘pat-uron ang tanan nga butang.’ (Roma 12:1; 1 Tes. 5:21) Gani, paano mo buligan ang imo bata nga magbakod ang iya pagtuo?

5. Ano ang puede himuon sang mga ginikanan para magbakod ang pagsalig sang ila bata sa Biblia? (Roma 12:2)

⁵ Buligi ang imo bata nga makumbinsi sia nga matuod ang ginatudlo sang Biblia. (Basaha ang Roma 12:2.) Kon may pamangkot ang imo bata, buligi sia nga makita ang mga sabat paagi sa aton mga gamit sa pag-research pareho sang Watch Tower Publications Index kag Giya sa Pagtuon Para sa mga Saksi ni Jehova. Sa Giya sa Pagtuon, puede niya kadtuan ang topiko nga “Biblia,” dayon tan-awon ang “Gin-inspirar sang Dios” para makita niya ang mga ebidensia nga ang Biblia indi lang basta isa ka libro nga ginsulat sang mga tawo kundi ini nga libro “pulong sang Dios.” (1 Tes. 2:13) Halimbawa, puede niya i-research ang mga impormasyon parte sa Ninive nga isa ka siudad sang Asiria sang una. Nagsiling sadto ang mga scholar sang Biblia nga ang siudad sang Ninive indi matuod. Pero sang mga 1850, may nakutkutan nga mga kagulub-an sini nga siudad nga nagapakita nga matuod gid ang ginasiling sang Biblia. (Sof. 2:​13-15) Para mabal-an sang imo bata kon paano natuman ang tagna sang Biblia parte sa kalaglagan sang Ninive, puede niya tun-an ang “Nahibaluan Mo Bala?” sa Nobiembre 2021 nga isyu sang Ang Lalantawan. Kon ikumparar sang imo bata ang iya natun-an sa aton mga publikasyon sa iya mga nabasa sa mga encyclopedia kag iban pa nga reperensia, makabulig ini nga makumbinsi pa gid sia nga matuod ang ginatudlo sang Biblia.

6. Paano mabuligan sang mga ginikanan ang ila bata nga gamiton ang iya ikasarang sa paghunahuna? Maghatag sing halimbawa. (Tan-awa man ang piktyur.)

⁶ Buligi ang imo bata nga gamiton ang iya ikasarang sa paghunahuna. Madamo sing kahigayunan ang mga ginikanan para matudluan ang ila bata parte sa Biblia. Puede mo ini mahimo kon magkadto kamo sa mga museum, park, ukon mag-tour sa branch office sang mga Saksi ni Jehova. Halimbawa, kon naga-tour kamo sa isa ka museum ukon ginatan-aw ini sa Internet, ipakita sa imo bata ang mga natabo sang una ukon ang mga artifact nga makapabakod sang iya pagsalig nga sibu gid ang Biblia. Puede mo tudluan ang imo bata nga makita ang ngalan sang Dios sa isa ka bato nga ginatawag Moabite Stone nga 3,000 ka tuig na ang  kadugayon. Ang orihinal nga Moabite Stone makita sa Louvre Museum sa Paris, France. Ang replika sang Moabite Stone makita man sa “The Bible and the Divine Name” nga exhibit sa World Headquarters sang Mga Saksi ni Jehova sa Warwick, New York. Mabasa sa Moabite Stone nga si Hari Mesa sang Moab nagrebelde batok sa Israel. Kag nahisuno gid ini sa ginasiling sang Biblia. (2 Hari 3:​4, 5) Kon makita sang imo bata nga matuod gid kag sibu ang ginasiling sang Biblia, magabakod pa gid ang iya pagtuo.​—Ipaanggid ang 2 Cronica 9:6.

7-8. (a) Ano ang matun-an naton sa matahom kag sarisari nga desinyo sang mga tinuga sa palibot? Maghatag sing halimbawa. (Tan-awa man ang piktyur.) (b) Ano nga pamangkot ang makabulig sa imo bata nga mapabakod ang iya pagtuo nga may ara sing Manunuga?

⁷ Buligi ang imo bata nga hunahunaon ang mga tinuga ni Jehova. Samtang nagalakatlakat kamo sa park ukon nagapananom sa inyo hardin, ipakita sa imo bata ang matahom kag sarisari nga desinyo sa palibot. Ngaa? Para itudlo sa iya nga may Isa ka maalam nga nagdesinyo sini tanan. Halimbawa, madugay na nga ginatun-an sang mga scientist ang pila sa mga tinuga sa palibot nga may spiral nga pattern. Ang scientist nga si Nicola Fameli nagsiling nga kon isipon mo ang mga spiral nga makita sa mga tinuga, madiskobrehan mo nga palareho ang pattern ukon series sang mga spiral sini. Ginatawag ini nga Fibonacci sequence. Makita naton ang spiral nga pattern sa madamo nga tinuga pareho sa pila ka galaxy, nautilus shell, mga dahon, kag sunflower. a

⁸ Matun-an sang imo bata sa eskwelahan ang iban pa nga tinuga sa palibot nga may sarisari nga desinyo. Halimbawa, ang kalabanan nga puno sang kahoy may sulitsulit nga pattern. Halin sa lawas sini may matubo nga mga sanga, kag halin sa sanga, may matubo nga mga singil. Ginatawag ini nga fractal pattern. Ini nga pattern makita man sa iban pa nga tinuga. Pero sin-o ang naghimo sining matahom nga pattern? Kon hunahunaon sing maayo sang imo bata ini nga pamangkot, magabakod pa gid ang iya pagtuo kay Jehova. (Heb. 3:4) Samtang nagadaku ang imo bata, puede mo sia pamangkuton, “Bangod ang Dios ang nagtuga sa aton, sa banta mo kabalo bala sia kon ano ang pinakamaayo para sa aton para mangin malipayon kita?” Dayon ipaathag sa iya nga ginhatag sang Dios ang Biblia para ipakita sa aton kon paano kita mangin malipayon.

BULIGI ANG IMO BATA NGA MAINTIENDIHAN KON NGAA PARA SA IYA KAAYUHAN ANG MGA TALAKSAN SANG BIBLIA

9. Ano ang posible nga rason kon ngaa nagapamangkot ang imo bata parte sa talaksan sang Biblia sa moral?

⁹ Kon ang imo bata indi kumbinsido nga para sa iya kaayuhan ang talaksan sang Biblia sa moral, hibalua kon ano ang rason. Wala gid man  bala sia nagapati sa ginasiling sang Biblia ukon nabudlayan lang sia sa pagpaathag sang iya ginapatihan sa iban? Ano man ang rason, buligi ang imo bata nga maintiendihan kon ngaa para sa iya kaayuhan ang mga talaksan sang Biblia paagi sa pagtuon sa iya sang libro nga Magkabuhi sing Wala Katapusan! b

10. Paano mo mabuligan ang imo bata nga mangin suod niya nga abyan si Jehova?

¹⁰ Buligi ang imo bata nga mangin suod niya nga abyan si Jehova. Samtang naga-Bible study kamo sang imo bata, gamita ang mga pamangkot kag mga ilustrasyon sa libro nga Magkabuhi sing Wala Katapusan! para mabal-an mo kon ano ang iya ginapamensar ukon ginabatyag. (Hulu. 20:5) Halimbawa sa leksion 8, ginkumparar si Jehova sa isa ka maayo nga abyan nga nagahatag sa aton sang mga pahanumdom para sa aton kaayuhan. Pagkatapos ninyo mabinagbinag ang 1 Juan 5:​3, puede mo sia pamangkuton, “Bangod maayo nga Abyan si Jehova, ano ang dapat naton batyagon sa mga ginapahimo niya sa aton?” Daw simple lang ini nga pamangkot, pero makabulig ini sa imo bata para maintiendihan niya nga ginahatagan kita ni Jehova sang mga kasuguan kay palangga niya kita.​—Isa. 48:​17, 18.

11. Paano mo mabuligan ang imo bata nga maintiendihan niya ang mga benepisyo sa pagsunod sa mga prinsipio sa Biblia? (Hulubaton 2:​10, 11)

¹¹ Istoryahi ninyo ang mga benepisyo kon ginasunod naton ang mga prinsipio sa Biblia. Kon nagabasa kamo sang Biblia ukon naga-daily text, istoryahi ninyo kon paano ang mga prinsipio sa Biblia nakabulig sa inyo pamilya. Halimbawa, puede mo ipakita sa imo bata ang mga benepisyo kon mangin mapisan sia kag indi magbinutig. (Heb. 13:18) Puede mo man ipaathag sa iya nga mangin maayo ang aton panglawas kag mas malipayon kita kon ginasunod naton ang mga prinsipio sa Biblia. (Hulu. 14:​29, 30) Kon maintiendihan sang imo bata ang mga benepisyo sa pagsunod sa sini nga mga prinsipio, posible nga sundon gid niya ini sa bilog niya nga kabuhi.​—Basaha ang Hulubaton 2:​10, 11.

12. Paano ginbuligan ni Steve kag sang iya asawa nga maintiendihan sang ila bata nga para gid sa iya kaayuhan kon sundon niya ang mga prinsipio sa Biblia?

¹² Si Steve, nga isa ka amay sa France, nagsiling kon paano nila ginbuligan sang iya asawa ang ila tin-edyer nga bata nga si Ethan para maintiendihan niya nga nagahatag si Jehova sang mga kasuguan kay palangga niya kita. Siling niya: “Ginapamangkot namon sia pareho sang, ‘Ngaa gusto ni Jehova nga sundon naton ini nga prinsipio? Paano ini nagapakita nga palangga niya kita? Ano ang matabo kon indi mo pagsundon ini nga prinsipio?’” Paagi sini, nakumbinsi pa gid si Ethan nga para gid sa iya kaayuhan ang moral nga talaksan ni Jehova. Nagsiling pa si Steve: “Ang amon goal amo nga buligan si Ethan nga makita niya nga ang kaalam halin sa Biblia mas labaw sangsa kaalam sang tawo.”

13. Paano mahanas sang mga ginikanan ang ila bata nga sundon ang mga prinsipio sa Biblia? Maghatag sing halimbawa.

¹³ Hanasa ang imo bata kon paano niya masunod ang mga prinsipio sa Biblia. Halimbawa, may asaynment ang imo bata sa eskwelahan nga mabasa sia sang isa ka libro. Pero ang mga karakter sa libro nagahimo sang seksuwal nga imoralidad ukon mapintas, kag ginapakita sa libro nga indi man ini malain. Puede mo pamangkuton ang imo bata kon ano ang ginabatyag ni Jehova parte sa sini nga mga butang. (Hulu. 22:​24, 25; 1 Cor. 15:33; Fil. 4:8) Makabulig ini sa imo bata nga makapanaksi sa iya maestro ukon maestra kag mga classmate kon pamangkuton na nila sia sang iya opinyon parte sa sini.

 BULIGI ANG IMO BATA NGA MANINDUGAN SA IYA GINAPATIHAN

14. Ano nga topiko ang posible nakulbaan nga istoryahan sang isa ka pamatan-on, kag ngaa?

¹⁴ Ang iban nga mga pamatan-on nakulbaan nga isugid sa iban ang ila ginapatihan. Halimbawa, posible nahadlok sila nga ipaathag kon ngaa wala sila nagapati sa ebolusyon. Ngaa? Kay ang ila maestro ukon maestra posible magsiling nga ang ebolusyon indi lang basta isa ka theory kundi matuod gid ini. Kon isa ikaw ka ginikanan, paano mo buligan ang imo bata nga manindugan sa iya ginapatihan?

15. Ano ang makabulig sa isa ka pamatan-on nga makumbinsi pa gid sa iya ginapatihan?

¹⁵ Buligi ang imo bata nga makumbinsi pa gid sa iya ginapatihan. Indi dapat mahuya ang imo bata sa iya pagpati nga may ara sing Manunuga. (2 Tim. 1:8) Ngaa? Kay madamo nga scientist ang nagapati nga ang kabuhi wala lang nagtuhaw ukon natabuan. Nadiskobrehan nila nga may mga ebidensia nga nagapamatuod nga may isa nga maalam nga nagtuga sang tanan nga buhi nga butang. Gani, wala sila nagapati sa ebolusyon nga ginatudlo sa madamo nga eskwelahan sa bilog nga kalibutan. Ang isa ka paagi para makumbinsi pa gid ang imo bata sa iya ginapatihan amo ang pagpamangkot sa mga utod kon ano ang nagkumbinsi sa ila nga may nagtuga gid sang kabuhi. c

16. Paano mabuligan sang mga ginikanan ang ila bata nga pangapinan ang iya pagpati nga may ara sing Manunuga? (1 Pedro 3:15) (Tan-awa man ang piktyur.)

¹⁶ Buligi ang imo bata kon paano niya pangapinan ang iya pagpati nga may ara sing Manunuga. (Basaha ang 1 Pedro 3:15.) Makabulig sa imo bata kon i-research ninyo ang serye sang artikulo nga “Pamangkot sang mga Pamatan-on—Creation Ukon Evolution?” sa jw.org. Dayon binagbinaga ninyo ang impormasyon nga sa banta niya makabulig sa iya nga mapaathag sa iban nga may ara gid sing Manunuga. Ipahanumdom sa iya nga indi niya kinahanglan nga makigbais sa iya mga classmate. Buligi sia kon paano niya mapaathag sing simple kag mahapos maintiendihan ang iya ginapatihan sa iban. Halimbawa, posible magsiling ang iya classmate: “Wala ’ko nagapati nga may Dios kay wala ko man sia nakita.” Puede isiling sang imo bata: “Halimbawa, nagalakatlakat ka sa isa ka forest nga malayo gid sa siudad kag banwa. Dayon,  may nakita ka didto nga isa ka matahom nga balay. Ano ayhan ang imo mapensaran? Posible nga magsiling ka nga kon may naghimo sini nga balay, sigurado nga may naghimo man sang aton planeta kag sa tanan nga buhi nga butang.”

17. Paano mabuligan sang mga ginikanan ang ila bata nga mangita sing mga kahigayunan para masugid niya sa iban ang kamatuoran parte sa Biblia? IIlustrar.

¹⁷ Buligi ang imo bata nga mangita sing mga kahigayunan para masugid niya sa iban ang kamatuoran parte sa Biblia. (Roma 10:10) Ang pagpanikasog sang imo bata nga isugid sa iban ang parte sa iya pagtuo daw pareho sa pagtuon kon paano magtokar sang isa ka instrumento. Sa umpisa, simple lang anay nga kanta ang ginatokar sang isa. Dayon amat-amat nga mangin sagad na sia sa pagtokar sang instrumento. Sing kaanggid, puede man praktison sang imo bata ang simple nga paagi sa pagsugid sa iban sang iya ginapatihan. Halimbawa, puede niya pamangkuton ang iya classmate: “Kabalo ka bala nga may mga gin-imbento ang mga scientist nga ang desinyo ginsunod lang nila sa mga tinuga sa palibot? May ipakita ko bala sa imo nga ’nami nga video.” Pagkatapos niya mapatan-aw ang isa ka video sa serye nga Gindesinyo Bala Ini? puede niya isiling: “Kon nagabilib ang mga tawo sa mga scientist sa ila naimbento nga ang desinyo ginsunod lang nila sa mga tinuga sa palibot, sin-o ang dapat dayawon sa naghimo sini nga mga tinuga?” Sa sining simple nga paagi, posible nga mangin interesado ang iya classmate nga magtuon sa Biblia.

PADAYON NGA BULIGI ANG IMO BATA NGA MAGBAKOD ANG IYA PAGTUO

18. Paano padayon nga mabuligan sang mga ginikanan ang ila bata nga magbakod ang iya pagtuo?

¹⁸ Nagakabuhi kita sa kalibutan nga ang mga tawo wala sing pagtuo kay Jehova. (2 Ped. 3:3) Gani, mga ginikanan, samtang naga-Bible study kamo sang imo bata, palig-una sia nga tun-an ang mga topiko nga magabulig sa iya nga pabaloran pa gid ang Pulong sang Dios kag ang mga talaksan sang Biblia sa moral. Buligi sia nga gamiton ang iya ikasarang sa paghunahuna paagi sa pagtudlo sa iya parte sa mga tinuga ni Jehova. Buligi sia nga maintiendihan kon paano natuman ang mga tagna sa Biblia. Labaw sa tanan, mangamuyo upod sa iya kag ilakip sia sa imo pangamuyo. Kon himuon mo ini, makasalig ka nga padyaan ni Jehova ang imo mga panikasog para buligan ang imo bata nga magbakod ang iya pagtuo.​—2 Cron. 15:7.