Natawo ako sang 1927 sa isa ka gamay nga banwa malapit sa Chicago, Illinois, U.S.A. Sanday Tatay kag Nanay may lima ka kabataan: Sanday Jetha, Don, ako, Karl, kag Joy. Gusto namon alagaron si Jehova sa bug-os namon nga kabuhi. Nakaeskwela si Jetha sa ikaduha nga klase sang Gilead sang 1943. Nag-alagad si Don sa Bethel sa Brooklyn, New York sang 1944. Dayon si Karl sang 1947, kag si Joy naman sang 1951. Ang ila maayo nga halimbawa pati na sang amon mga ginikanan, nagpalig-on sa akon nga dugangan pa gid ang akon mahimo sa pag-alagad kay Jehova.

Nanamian gid sanday Tatay kag Nanay sa pagbasa sang Biblia kag palangga nila ang Dios, kag amo man sini ang gintudlo nila sa amon. Pero nadula ang pagsalig ni Tatay sa relihion sang nangin soldado sia sa Europe sa tion sang Bug-os Kalibutan nga Inaway I. Grabe gid ang pasalamat ni Nanay sa Dios sang nakapuli si Tatay nga buhi halin sa inaway, gani nagsiling sia kay Tatay: “Karl, masimba ’ta bala liwat pareho sang una.” Nagsabat si Tatay: “Idul-ong ta lang ka, pero indi ko magsulod sa simbahan.” Namangkot si Nanay: “Ngaa indi ka haw?” Nagsabat si Tatay: “Sa tion sang inaway, ginapangamuyuan sang mga pari nga pareho sing relihion ang mga soldado nga nagakontrahanay! Ti, sin-o gid bala ang ginadampigan sang Dios?”

Sang nagkadto si Nanay sa simbahan, may duha ka Saksi ni Jehova ang nanuktok sa amon balay. Gintanyagan nila si Tatay sing duha ka volume sang libro nga Light, nga nagapaathag parte sa libro sang Bugna. Nanamian sini si Tatay kag ginbaton niya ang mga libro. Sang nakita ini ni Nanay, ginbasa niya ini. Isa ka adlaw, nabasa niya sa newspaper nga ginaagda ang mga interesado nga magtuon sa Biblia kag gamiton ang Light nga mga libro. Gani ginkadtuan ini ni Nanay. Sang nag-abot na sia didto, tigulang nga babayi ang nagbukas sa iya sang puertahan. Ginpakita ni Nanay ang isa sa mga libro kag namangkot sia, “Amo ’ni ang ginatun-an ninyo diri?” Nagsabat ang babayi: “Huo ’ga, sulod diri.” Pagkasunod nga semana, gin-upod kami ni Nanay nga mag-ulutod, pagkatapos sini, kada semana na kami nga naga-attend.

Isa ka bes sa miting, ginpangabay ako sang nagadumala nga basahon ang Salmo 144:15 nga nagasiling  nga malipayon ang mga nagasimba kay Jehova. Nanamian gid ako sa sina nga teksto, kag amo man ang duha ka teksto—ang 1 Timoteo 1:11 nga nagasiling nga si Jehova isa ka “malipayon nga Dios,” kag ang Efeso 5:1 nga nagapalig-on sa aton nga ‘mangin manug-ilog sa Dios.’ Narealisar ko nga dapat ako malipay sa pag-alagad sa akon Manunuga kag dapat ko sia pasalamatan sa sini nga pribilehiyo. Amo gid sini ang ginhimo ko sa akon kabuhi.

Ang pinakamalapit nga kongregasyon sa amon 32 kilometros ang kalayuon sa Chicago. Bisan pa sini, naga-attend gid kami, gani madamo ako sing natun-an sa Biblia. Nadumduman ko sang isa ka bes, gintukso sang nagadumala si Jetha para magkomento. Samtang nagapamati ako sa iya, sa pensar ko: ‘Bal-an ko man ’na. Tani nagbayaw man ’ko.’ Sugod sadto, nagtuon na ako kag naghanda sang akon mga komento. Bangod sini, nag-uswag ako sa espirituwal pareho sa akon mga utod. Nabawtismuhan ako sang 1941.

Indi ko gid malipatan ang kombension sang 1942 sa Cleveland, Ohio. Sobra 50 ka lugar sa United States ang naka-tie-in sa kombension paagi sa telepono. Ang amon pamilya kag ang iban pa nga kauturan nagtulog sa mga tent malapit sa ginhiwatan sang kombension. Nagsugod na sadto ang Bug-os Kalibutan nga Inaway II kag nagadamo pa gid ang mga nagapamatok sa mga Saksi ni Jehova. Kon gab-i, gina-park sang mga brother ang ila mga salakyan patalikod sa mga tent. Nagsugtanay sila nga may isa nga mabilin sa kada salakyan para magbantay sa bilog nga gab-i. Kon mabatyagan nila nga may iban nga tawo sa palibot, pasigahon nila ang mga suga sang salakyan kag mamusina sila. Dayon kadtuan sila sang iban nga utod. Sa pensar ko, ‘Ang katawhan ni Jehova preparado gid sa tanan nga tion!’ Wala man sang malain nga natabo, gani mahamuok ang akon tulog.

Bisan pila na ka tuig ang nagligad, kon madumduman ko ina nga kombension, masiling ko nga wala gid nabalaka ukon nahadlok si Nanay. Nagsalig gid sia kay Jehova kag sa iya organisasyon. Indi ko gid malipatan ang iya maayo nga halimbawa.

Antes pa sina nga kombension, regular payunir na si Nanay. Gani ginpamatian gid niya sing maayo ang mga pamulongpulong parte sa bug-os tion nga pag-alagad. Sang nagapauli na kami, nagsiling si Nanay, “Gusto ko magpadayon sa pagpayunir, pero indi ko ’na mahimo kay kadamo sang ulubrahon sa balay.” Gani nangabay sia sa amon nga buligan sia sa mga ulubrahon. Gusto gid namon sia buligan, gani ginhatagan niya sing asaynment ang kada isa sa amon nga tinluan ang isa ukon duha ka kuarto antes mamahaw sa aga. Kon makahalin na kami pakadto sa eskwelahan, ginasigurado ni Nanay nga matinlo ang balay antes sia mag-preaching. Madamo sing obra si Nanay pero wala gid niya kami ginapabay-an. Kon mapuli kami para manyaga kag kon tapos na ang klase, ara gid sia pirme para atipanon kami. Kon kaisa, pagkatapos sang amon klase, nagaupod kami kay Nanay para mag-preaching, kag nakabulig ini sa amon nga maintiendihan kon ano ang ginahimo sang mga payunir.

Nagpayunir ako sang 16 anyos ako. Bisan indi pa sadto Saksi si Tatay, interesado sia sa akon ginahimo sa ministeryo. Isa ka gab-i, ginsilingan ko sia nga bisan pa nahimo ko man ang tanan, wala gid  sing gusto nga magpa-Bible study. Dayon, ginpamangkot ko sia, “’Tay, gusto mo magpa-Bible study?” Namensar sia anay kag nagsiling, “Sige a.” Gani, si Tatay amo ang una ko nga Bible study. Nalipay gid ako sa sini!

Gintun-an namon ang libro nga “The Truth Shall Make You Free.” Pagligad sang tion, narealisar ko nga ginabuligan ako ni Tatay nga mapauswag pa gid ang akon pagtuon sa Biblia kag pagtudlo sini sa iban. Halimbawa isa ka gab-i, pagkatapos niya basahon ang isa ka parapo, nagsiling sia: “Naintiendihan ko ang ginasiling sa libro. Pero paano naton mabal-an nga husto ang ginasiling sini?” Wala ko nahandaan ini nga pamangkot, gani nagsiling ako: “Indi ko pa ini masabat subong ’Tay, pero sabton ko ini sa sunod naton nga pag-study.” Gani, nangita ako sang mga teksto nga makapaathag sang punto nga ginbinagbinag namon. Sugod sadto, natun-an ko kon paano mag-research para mas handa ako sa amon pag-study. Nakabulig ini sa akon nga mag-uswag sa espirituwal kag amo man si Tatay. Gin-aplikar niya ang iya natun-an kag nabawtismuhan sia sang 1952.

Naghalin ako sa balay sang 17 anyos ako. Si Jetha a nangin misyonero, kag si Don nangin Bethelite. Nanamian gid sila sa ila asaynment kag nagpalig-on ini sa akon. Gani nag-aplay ako para makaalagad sa Bethel kag para makaeskwela sa Gilead, kag gintugyan ko kay Jehova kon diin niya ako gamiton. Ano ang resulta? Ginpatawag ako sa Bethel sang 1946.

Sa sulod sang mga tinuig, sarisari ang akon asaynment sa Bethel, gani madamo ako sing natun-an. Nagaalagad ako sa Bethel sa sulod na sing 75 ka tuig, kag natun-an ko ang parte sa accounting kag kon paano mag-imprinta sang mga libro. Natun-an ko man kon paano mag-import kag mag-export sang mga kinahanglanon sa Bethel. Labaw sa tanan, nanamian gid ako sa akon mga natun-an sa Bethel sa morning worship kag sa iban pa nga programa.

May natun-an man ako sa akon manghod nga si Karl nga nag-alagad sa Bethel sang 1947. Maayo gid sia nga estudyante kag manunudlo sang Biblia. Isa ka bes, nagpabulig ako sa iya sa akon pamulongpulong. Ginsilingan ko sia nga madamo ako sang gin-research pero nabudlayan ako kon paano ini gamiton. Dayon ginpamangkot niya ako, “Joel, ano ang tema sang imo pamulongpulong?” Naintiendihan ko dayon ang iya buot silingon. Ang dapat ko lang gamiton nga impormasyon amo ang makabulig sa akon para mapaathag ko sing maayo ang akon tema. Indi ko gid ina malipatan.

 Para mangin malipayon kami sa pag-alagad sa Bethel, nagapakigbahin kami sing bug-os sa ministeryo kag madamo kami sing makapalig-on nga mga eksperiensia. Ang isa nga indi ko gid malipatan amo ang natabo sang isa ka gab-i sa Bronx sa New York City. Ginbalikan namon sang isa ka brother ang isa ka babayi nga nagbaton sang Ang Lalantawan kag Magmata! Nagpakilala kami liwat kag nagsiling, “Nagkadto kami sini nga gab-i para buligan ang mga tawo nga matun-an ang maayo nga mga butang nga ginasugid sang Biblia.” Nagsabat sia, “Kon parte ’na sa Biblia, sulod kamo a.” Ginbasa kag gin-istoryahan namon ang pila ka teksto parte sa Ginharian sang Dios kag parte sa bag-o nga kalibutan. Nanamian gid sia sa sini, gani pagkadason nga semana, ginhagad niya ang pila sa iya mga abyan nga mamati man sa amon. Sang ulihi, sia kag ang iya bana nangin matutom nga mga alagad ni Jehova.

Sang ulihi, naghunahuna ako nga mangasawa. Pagligad sang 10 ka tuig, nakilala ko ang isa ka sister nga nangin asawa ko sang ulihi. Ano ang nakabulig sa akon nga makakita sang maayo nga asawa? Ginpangamuyo ko ini kag ginpamangkot ko ang akon kaugalingon, ‘Pagkatapos sang amon kasal, ano ang amon tulumuron sang akon asawa?’

Pagkatapos sang 1953 nga kombension sa Yankee Stadium, nakilala ko ang isa ka sister nga si Mary Aniol. Classmate sia ni Jetha sa ikaduha nga klase sang Gilead, kag updanay sila sa pagmisyonero. Nalipay gid si Mary samtang ginasugid niya sa akon ang iya asaynment bilang misyonero sa Caribbean kag parte sa iya mga Bible study sa sulod sang pila ka tuig. Sang nakilala pa gid namon ang isa kag isa, narealisar namon nga pareho kami sang espirituwal nga mga tulumuron. Bangod sini, nagbakod pa gid ang amon gugma sa isa kag isa kag nagpakasal kami sang Abril 1955. Nakita ko sa madamo nga paagi nga regalo gid ni Jehova sa akon si Mary kag maayo gid sia nga halimbawa. Malipayon sia bisan ano man nga asaynment ang ihatag sa iya. Mapisan sia, mapinalanggaon, kag ginauna gid niya sa iya kabuhi ang Ginharian. (Mat. 6:33) Nag-alagad kami sa sirkito sa sulod sang tatlo ka tuig, kag sang 1958, ginpatawag kami nga mag-alagad sa Bethel.

Madamo gid ako sing natun-an kay Mary. Halimbawa sang bag-o pa lang kami nag-asawahay, 15 ka bersikulo sa Biblia ang ginabasa namon kada adlaw sing magkaupod. Sa tapos namon basa ang pila ka bersikulo, ginakomentuhan namon ini kag ginabinagbinag namon kon paano namon ini maaplikar. Pirme ako ginasugiran ni Mary parte sa iya mga natun-an sa Gilead kag sa iya pagmisyonero. Nakabulig ini sa akon nga mapauswag pa gid ang akon pamulongpulong kag kon paano ko mapalig-on ang mga sister.​—Hulu. 25:11.

Ang akon pinalangga nga asawa nga si Mary napatay sang 2013. Excited na gid ako nga makita sia sa bag-o nga kalibutan! Samtang wala pa ini, padayon ako nga magtuon kag magsalig sing bug-os tagipusuon kay Jehova. (Hulu. 3:​5, 6) Nalipay gid ako kon imadyinon ko ang himuon sang katawhan ni Jehova sa bag-o nga kalibutan. Lakip sa sini ang pagtuon sang bag-o nga mga butang parte sa aton Daku nga Instruktor! Nagapasalamat gid ako sa tanan nga gintudlo niya sa akon kag sa iya wala tupong nga kaayo.