Nabasa mo na bala sing maayo ang bag-o nga mga isyu sang Ang Lalantawan? Kon amo, tilawi kon masabat mo ang masunod nga mga pamangkot:

Paano ginatratar ni Jehova ang mga babayi?

Wala niya ginapakanubo ang mga babayi kag wala niya ginapasulabi ang mga lalaki sangsa mga babayi. Ginapamatian niya ang mga babayi, kag interesado sia sa ila ginabatyag kag ginakabalak-an. Kag ginahatagan niya sila sing asaynment para himuon ang iya hilikuton.​—w24.01, p. 15-16.

Paano naton maaplikar ang Efeso 5:​7, nga nagasiling: “Indi kamo mangin umalambit upod sa ila”?

Ginpaandaman kita ni apostol Pablo nga indi kita dapat mag-upod sa mga tawo nga magapabudlay sa aton nga tumanon ang mga kasuguan ni Jehova. Ining indi maayo nga kaupdanan nagapatuhoy indi lang sa mga tawo nga makaupod naton sing personal kundi sa mga ginaistorya man naton sa social media.​—w24.03, p. 22-23.

Sa ano nga klase sang kabutigan dapat kita mag-andam?

Dapat kita mag-andam sa indi matuod nga istorya nga ginapasa sang aton mga abyan, mga email halin sa mga tawo nga indi naton kilala, kag halin sa mga apostata nga nagapakunokuno nga interesado sa kamatuoran.​—w24.04, p. 12.

Ano ang aton nabal-an kag wala nabal-an parte sa himuon ni Jehova kay Hari Solomon pati na sa mga ginlaglag sa Sodoma kag Gomorra kag sa tion sang Baha?

Wala kita kabalo kon ginhukman na sila ni Jehova sing dayon nga kalaglagan. Pero, kabalo kita nga nahibaluan niya ang tanan nga detalye kag maluluy-on gid sia.​—w24.05, p. 3-4.

Bangod ang Dios “Igang,” ano ang ginapasalig sini sa aton? (Deut. 32:4)

Dalangpan naton si Jehova. Masaligan sia, kay ginatuman gid niya ang iya mga promisa. Wala sia nagabag-o, bangod wala nagabag-o ang iya personalidad kag ang iya katuyuan.​—w24.06, p. 26-28.

Ano ang makabulig sa imo nga maka-adjust sa bag-o nga kongregasyon?

Magsalig kay Jehova kay buligan ka niya pareho sa ginhimo niya sa iya mga alagad sang una. Indi pag-ikumparar ang imo bag-o nga kongregasyon sa imo kongregasyon sang una. Mangin masako sa pag-alagad sa imo bag-o nga kongregasyon, kag panikasugi nga makakita ka sang bag-o nga mga abyan.​—w24.07, p. 26-28.

Ano ang matun-an naton sa tatlo ka parabola nga mabasa sa Mateo kapitulo 25?

Ginapakita sang parabola parte sa mga karnero kag mga kanding nga dapat kita mangin matutom kag mainunungon. Ang parabola parte sa mainandamon kag buangbuang nga mga birhen nagatudlo sa aton nga dapat nakahanda kita kag nagabantay. Ang parabola parte sa mga talanton nagatudlo sa aton nga dapat kita mangin mapisan.​—w24.09, p. 20-24.

Ano kataas ang portiko sa templo ni Solomon?

Sa 2 Cronica 3:​4, mabasa sa pila ka dumaan nga manuskrito ang “120 ka maniko,” buot silingon, 53 ka metro ang kataason sang portiko. Pero mabasa sa pila ka masaligan nga manuskrito ang “20 ka maniko,” buot silingon, mga 9 ka metro ang kataason sini. Kon basihan ang kadamulon sang dingding sang templo, nagasibu ang mabasa sa masaligan nga mga manuskrito.​—w24.10, p. 31.

Ano ang buot silingon nga ang ministeryal nga alagad “dapat isa lang ang asawa”? (1 Tim. 3:12)

Buot silingon, dapat isa lang ang iya asawa kag indi sia dapat maghimo sang seksuwal nga imoralidad. Dugang pa, indi niya dapat pagpakitaan sang indi nagakaigo nga atension ang iban nga babayi.​—w24.11, p. 19.

Ngaa masiling naton nga ang Juan 6:53 indi sulundan sa pagsaulog sang Panihapon sang Ginuo?

Mabasa sa Juan 6:53 ang parte sa pagkaon sa unod ni Jesus kag pag-inom sa iya dugo. Ginsiling ini ni Jesus sa Galilea sang 32 C.E. sa mga Judiyo nga dapat magtuo sa iya. Pero, ang Panihapon sang Ginuo ginsugdan sa Jerusalem mga isa ka tuig pa sang ulihi. Ang mga gin-istorya diri ni Jesus amo ang mangin kaupod niya sa paggahom sa langit.​—w24.12, p. 10-11.