Nagsulat si apostol Pablo kay Timoteo nga isa man ka gulang pareho sa iya: “Ginasugo ko ikaw sa atubangan sang Dios kag ni Cristo Jesus kag sang pinili nga mga anghel nga sundon mo ini nga mga instruksion nga wala sing ginadampigan ukon ginapasulabi.”​—1 Tim. 5:21.

Una, hibaluon anay naton kon sin-o nga mga anghel ang wala nalakip sa sining grupo sang mga anghel. Ang 144,000 wala nalakip sa sini nga grupo kay sang nagsulat si Pablo kay Timoteo, wala pa nagsugod ang pagbanhaw sa hinaplas nga mga Cristiano para mag-istar sila sa langit. Ang mga apostoles kag iban nga hinaplas wala pa nangin espiritu nga tinuga, gani indi sila ang ginapatuhuyan sang “pinili nga mga anghel.”​—1 Cor. 15:​50-54; 1 Tes. 4:​13-17; 1 Juan 3:2.

Ang “pinili nga mga anghel” wala man nagapatuhoy sa mga anghel nga nangin indi matinumanon sa tion sang Baha. Ini nga mga anghel nagsunod kay Satanas kag nangin mga demonyo, gani nangin kaaway sila ni Jesus. (Gen. 6:2; Luc. 8:​30, 31; 2 Ped. 2:4) Sa ulihi, ihaboy sila ni Jesus sa kadadalman sa sulod sang 1,000 ka tuig kag dayon laglagon sila upod sa Yawa.​—Jud. 6; Bug. 20:​1-3, 10.

Gani, ang “pinili nga mga anghel” nga ginsambit ni Pablo nagapatuhoy sa mga anghel sa langit nga mainunungon nga nagasuporta sa ‘Dios kag kay Cristo Jesus.’

May ara sing linibo ka matutom nga mga anghel. (Heb. 12:​22, 23) Indi palareho nga asaynment ang ginhatag ni Jehova sa kada isa sa ila. (Bug. 14:​17, 18) Halimbawa, isa lang ka anghel ang ginpadala ni Jehova para pamatyon ang 185,000 ka soldado sang Asiria. (2 Hari 19:35) Madamo naman nga anghel ang gin-asayn para “kuhaon nila sa Ginharian [ni Jesus] ang tanan nga nagapasandad kag nagahimo sing malain.” (Mat. 13:​39-41) Ang iban nga anghel ginhatagan sang asaynment para “tipunon nila ang iya mga pinili” nga maistar sa langit. (Mat. 24:31) Ang iban naman ginsugo nga ‘magbantay sa aton bisan diin kita magkadto.’—Sal. 91:11; Mat. 18:10; ipaanggid ang Mateo 4:11; Lucas 22:43.

Ang “pinili nga mga anghel” nga ginsambit sa 1 Timoteo 5:21 mahimo ang mga anghel nga ginhatagan sang asaynment para tatapon ang mga kongregasyon. Mabasa sa iban nga bersikulo sa sulat ni Pablo nga ginlaygayan niya ang mga gulang kon paano nila dapat himuon ang ila mga responsibilidad kag dapat respetuhon sila sang mga kauturan. Sa bahin sang mga gulang, dapat nila himuon ang ila responsibilidad nga “wala sing ginadampigan ukon ginapasulabi” kag indi sila dapat magpadasudaso sa pagdesisyon. Dapat nila sundon ang laygay ni Pablo bangod nagaalagad sila sa ila mga kauturan “sa atubangan sang Dios kag ni Cristo Jesus kag sang pinili nga mga anghel.” Gani, ang pila ka anghel ginhatagan sang asaynment para tatapon ang kongregasyon. Lakip sa sini ang pag-amlig sa mga alagad sang Dios, pagbulig sa ila sa pagbantala nga hilikuton, kag pagsugid kay Jehova sang ila mga nakita.​—Mat. 18:10; Bug. 14:6