1, 2. (a) Ano ang nalakip sa “indi malaragway kag wala sing bayad nga dulot” sang Dios? (b) Ano nga mga pamangkot ang binagbinagon naton sa sini nga artikulo?

SANG ginpakadto ni Jehova ang iya bugtong nga Anak diri sa duta, ginhatag Niya ang pinakahamili nga regalo bangod sang Iya gugma! (Juan 3:16; 1 Juan 4:9, 10) Gintawag ini ni apostol Pablo nga “indi malaragway kag wala sing bayad nga dulot” sang Dios. (2 Cor. 9:15) Ngaa gingamit niya ini nga ekspresyon?

² Nahibaluan ni Pablo nga ang tanan nga dalayawon nga mga saad sang Dios ginagarantiyahan sang himpit nga halad sang Cristo. (Basaha ang 2 Corinto 1:20.) Gani, ang “indi malaragway kag wala sing bayad nga dulot” nagalakip sa halad ni Jesus kag sa tanan nga kaayo kag mainunungon nga gugma nga ginapakita ni Jehova sa aton. Indi bug-os nga malaragway sang tawo ining dalayawon nga regalo. Ano ang batyagon naton sa sining tumalagsahon nga regalo? Kag paano kita dapat palig-unon sini nga regalo samtang nagahanda kita para sa pagsaulog sang Memoryal  sang kamatayon sang Cristo sa Mierkoles, Marso 23, 2016?

3, 4. (a) Ano ang batyagon mo kon may maghatag sa imo sing regalo? (b) Paano makapabag-o sang imo kabuhi ang isa ka pinasahi nga regalo?

³ Sigurado nga nalipay gid ikaw kon makabaton ka sing regalo. Pero ang pila ka regalo mahimo nga pinasahi ukon bilidhon nga makapabag-o sang aton kabuhi. Halimbawa, imadyina nga palatyon ka bangod sang krimen nga nahimo mo. Pero may isa ka tawo nga indi mo kilala nga kinabubut-on nga nagpalapit kag nagsiling nga sia na lang ang patyon. Handa sia nga mapatay para sa imo! Ano ang batyagon mo sa sining tumalagsahon nga regalo?

⁴ Bangod sining mainayuhon nga pagpakita sing gugma, wala sing duhaduha nga pamensaron mo ang imo ginahimo kag bag-uhon ang imo pagkabuhi. Mahimo nga mapalig-on ka nga mangin maalwan kag mahigugmaon pa gid sa iban kag patawaron ang nakasala sa imo. Samtang buhi ka, magabatyag ka sing utang nga kabalaslan sa tawo nga kinabubut-on nga nagluwas sa imo.

5. Ngaa ang regalo sang Dios nga gawad mas hamili pa sangsa iban nga regalo?

⁵ Pero ang ginhatag sa aton ni Jehova paagi sa Cristo mas hamili pa sangsa regalo nga ginlaragway sa sini nga halimbawa. (1 Ped. 3:18) Binagbinaga kon ngaa. Bangod sang napanubli naton nga sala, tanan kita pagasilutan sing kamatayon. (Roma 5:12) Mahigugmaon nga ginpakadto ni Jehova si Jesus sa duta para “matilawan niya ang kamatayon para sa tagsa ka tawo.” (Heb. 2:9) Wala lamang ginluwas ni Jehova ang aton kabuhi subong kundi naghatag man sia sing basihan para madula sing dayon ang kabangdanan sang kamatayon. (Isa. 25:7, 8; 1 Cor. 15:22, 26) Ang tanan nga nagatuo kay Jesus mabuhi sing wala katapusan nga may paghidait kag kalipay, bilang mga sakop sang Ginharian sang Dios sa duta ukon bilang mga kaupod sang Cristo nga magagahom sa langit. (Roma 6:23; Bug. 5:9, 10) Ano ang iban pa nga pagpakamaayo nga nalakip sa sini nga regalo ni Jehova?

6. (a) Ano nga mga pagpakamaayo nga lakip sa regalo ni Jehova ang ginapaabot mo? (b) Ano ang tatlo ka butang nga ginapalig-on sang regalo sang Dios nga himuon naton?

⁶ Lakip sa regalo ni Jehova ang pag-ayo sa tanan naton nga balatian, paghimo sa duta nga paraiso, kag pagbanhaw sa mga patay. (Isa. 33:24; 35:5, 6; Juan 5:28, 29) Palangga gid naton si Jehova kag ang iya Anak bangod ginhatag nila sa aton ang “indi malaragway kag wala sing bayad nga dulot.” Pero, amo ini ang pamangkot, Ano ang ginapalig-on sang gugma sang Dios nga himuon naton? Binagbinagon naton kon paano kita ginapalig-on sang gugma sang Dios nga (1) sundon sing maayo ang mga tikang ni Cristo Jesus, (2) ipakita ang gugma sa aton mga kauturan, kag (3) patawaron sing tinagipusuon ang iban.

7, 8. Ano ang batyagon naton bangod sang gugma sang Cristo, kag ano ang ginapalig-on sini nga himuon naton?

⁷ Una, dapat kita mapahulag nga magkabuhi para kay Cristo Jesus. Si apostol Pablo nagsiling: “Ang gugma sang Cristo nagapahulag sa amon.” (Basaha ang 2 Corinto 5:14, 15.) Nahibaluan ni Pablo nga kon batunon naton ang tumalagsahon nga gugma sang Cristo, pahulagon, ukon palig-unon, kita sini nga magkabuhi para sa iya. Kon bug-os naton nga mahangpan ang ginhimo ni Jehova sa aton kag kon matandog sang iya gugma ang aton tagipusuon, handumon naton nga magkabuhi sing bug-os kalag para kay Cristo Jesus. Paano naton ini mapakita?

 ⁸ Ang aton gugma kay Jehova ang magapahulag sa aton nga ilugon ang halimbawa sang Cristo kag sundon sing maayo ang iya mga tikang. (1 Ped. 2:21; 1 Juan 2:6) Mapakita naton ang aton gugma sa Dios kag sa Cristo kon tumanon naton sila. Nagsiling si Jesus: “Ang bisan sin-o nga nagabaton sang akon mga sugo kag nagatuman sini amo ang nagahigugma sa akon. Kag ang bisan sin-o nga nagahigugma sa akon higugmaon sang akon Amay. Higugmaon ko sia kag ipakilala ko sing maayo ang akon kaugalingon sa iya.”—Juan 14:21; 1 Juan 5:3.

9. Ano ang mahimo mag-impluwensia sa aton?

⁹ Sa tion sang Memoryal, dapat naton pamalandungan ang aton pagkabuhi. Pamangkuta ang imo kaugalingon: ‘Sa ano nga mga paagi ginasunod ko na ang mga tikang ni Cristo Jesus? Sa ano nga mga paagi nga mahimo pa ako mag-uswag?’ Dapat naton ini ipamangkot kay mabaskog ang impluwensia sang kalibutan nga sundon ang pamaagi sini. (Roma 12:2) Kon indi kita maghalong, mailog naton ang mga pilosopo sini nga kalibutan ukon ang bantog nga mga artista kag atleta. (Col. 2:8; 1 Juan 2:15-17) Paano naton ini malikawan?

10. Ano ang ipamangkot naton sa aton kaugalingon sa sini nga tion sang Memoryal, kag ano ang ginapalig-on sang mga sabat nga himuon naton? (Tan-awa ang piktyur sa umpisa sini nga artikulo.)

¹⁰ Sa tion sang Memoryal, maayo man kon usisaon naton ang aton mga bayo, ginatan-aw nga pelikula kag ginapamatian nga musika, pati ang ginabutang naton sa aton kompyuter, cell phone, kag tablet. Samtang ginatan-aw mo ang imo mga bayo, pamangkuta ang imo kaugalingon: ‘Kon upod ko si Jesus sa isa ka okasyon, mahuya bala ako sa sini nga bayo?’ (Basaha ang 1 Timoteo 2:9, 10.) ‘Kon isuksok ko ini, makilala bala ako nga sumulunod ni Cristo Jesus?’ Mahimo man kita mamangkot parte sa nanamian naton nga mga pelikula kag musika. ‘Malingaw ayhan si Jesus kon tan-awon niya ini nga pelikula ukon pamatian ini nga musika? Kon hulamon niya ang akon cell phone ukon tablet, mahuya bala ako sa makita niya?’ Kon parte naman sa video game, pamangkuta ang imo kaugalingon: ‘Mapaathag ko bala kay Jesus kon ngaa nanamian gid ako maghampang sini?’ Ang aton gugma kay Jehova dapat magpahulag sa aton nga ihaboy ang tanan nga indi nagakaigo para sa isa ka disipulo sang Cristo, ano man ini kamahal. (Binu. 19:19, 20) Sang nagdedikar kita, ginpangako naton nga indi na kita magkabuhi para sa aton kaugalingon kundi para sa Cristo. Gani indi naton paghuptan ang bisan ano nga butang nga magapabudlay sa aton nga masunod sing maayo ang mga tikang sang Cristo.—Mat. 5:29, 30; Fil. 4:8.

11. (a) Paano kita ginapalig-on sang gugma kay Jehova kag kay Jesus sa pagbantala? (b) Paano kita mapalig-on sang aton gugma nga buligan ang iban sa kongregasyon?

¹¹ Ang aton gugma kay Jesus nagapalig-on man sa aton nga mangin bug-os kalag sa aton pagbantala kag pagtudlo sa mga tawo para mangin disipulo niya. (Mat. 28:19, 20; Luc. 4:43) Sa tion sang Memoryal, mahimo kita makaauxiliary payunir sing 30 ukon 50 ka oras. Mabag-o mo bala ang imo kahimtangan para mahimo ini? Abi sang isa ka 84 anyos nga balo nga brother nga indi sia makaauxiliary payunir bangod tigulang na sia kag maluya na. Pero ginbuligan sia sang mga payunir sa ila lugar. Ginpasakay nila sia kag ginpili nila sing maayo ang puede niya mangin teritoryo, para malab-ot niya ang 30 ka oras. Mabuligan mo bala ang isa ka utod sa inyo kongregasyon para makaauxiliary payunir sia sa tion sang Memoryal? Matuod, indi makaauxiliary payunir ang iban sa aton. Pero magamit naton ang aton tion kag kusog para madugangan  ang aton halad sang pagdayaw kay Jehova. Kon himuon naton ini, ginapakita naton nga napahulag kita sang gugma sang Cristo pareho kay Pablo. Ano pa ang ginapalig-on sang gugma sang Dios nga himuon naton?

12. Ano ang ginapalig-on sang gugma sang Dios nga himuon naton?

¹² Ikaduha, ang gugma sang Dios magapalig-on sa aton nga higugmaon ang aton mga kauturan. Nahibaluan ini ni apostol Juan. Nagsulat sia: “Mga hinigugma, kon ang Dios naghigugma sa aton sa sini nga paagi, kita mismo obligado man nga maghigugmaanay.” (1 Juan 4:7-11) Huo, kon batunon naton ang gugma sang Dios, obligado kita nga higugmaon ang aton mga kauturan. (1 Juan 3:16) Paano naton mapakita ang aton gugma?

13. Ano nga halimbawa ang ginpakita ni Jesus sa paghigugma sa iban?

¹³ Binagbinaga ang halimbawa ni Jesus. Sa tion sang iya ministeryo sa duta, gintalupangod gid niya ang mga kubos. Ginbuligan niya ang may kasablagan—mga piang, bulag, bungol, kag apa. (Mat. 11:4, 5) Nalipay sia sa pagtudlo sa mga ginagutom sa espirituwal, nga ginatamod sang mga lider sang relihion sang mga Judiyo nga ‘ginapakamalaut sang Dios.’ (Juan 7:49) Ginhigugma niya ining mga kubos kag nagpangabudlay sia para buligan sila.—Mat. 20:28.

14. Paano mo mapakita ang gugma sa imo mga kauturan?

¹⁴ Sa tion sang Memoryal, mailog mo man si Jesus paagi sa pagtalupangod sa mga kauturan sa inyo kongregasyon. Pat-od gid nga may pila nga mahimo mo pakitaan sing gugma. Basi may tigulang nga mga kauturan nga dapat buligan. Maduaw mo bala sila? Madul-ungan mo bala sila sing pagkaon, mabuligan sa ulubrahon sa ila balay, mapasakay sa imo salakyan pakadto sa miting, ukon maagda nga mag-upod sa imo sa ministeryo? (Basaha ang Lucas 14:12-14.) Dapat kita mapalig-on sang gugma sang Dios nga buligan kag pakitaan sing gugma ang aton mga kauturan.

15. Ano ang dapat naton batunon?

¹⁵ Ikatlo, dapat kita mapahulag sang gugma ni Jehova nga patawaron ang aton mga kauturan. Bangod mga anak kita sang una nga tawo nga si Adan, tanan kita nakapanubli sang sala kag sang silot nga  kamatayon. Indi kita makasiling, “Indi ko kinahanglan ang gawad.” Bisan ang pinakamatutom nga alagad sang Dios nagakinahanglan man sang wala tupong nga kaayo ni Jehova paagi sa Cristo. Dapat naton batunon nga ginpatawad kita sa aton daku gid nga sala. Ngaa importante ini? Makita ang sabat sa isa ka parabola ni Jesus.

16, 17. (a) Ano ang matun-an naton sa ilustrasyon ni Jesus parte sa hari kag sa mga ulipon? (b) Sa tapos mapamalandungan ang ilustrasyon ni Jesus, ano ang determinado mo nga himuon?

¹⁶ Ginsugid ni Jesus nga ginpatawad sang isa ka hari ang iya ulipon nga may daku gid nga utang nga 10,000 ka talanton, ukon 60,000,000 ka denario. Pero ang ginpatawad nga ulipon wala nagpatawad sa pareho man niya nga ulipon nga may gamay nga utang sa iya nga 100 ka denario. Naakig gid ang hari sang mahibaluan niya nga wala sing kaluoy ang ulipon nga ginpatawad niya. Nagsiling ang hari: “Malaut nga ulipon, wala ko ikaw ginpabayad sang imo utang sang nagpakiluoy ka sa akon. Indi bala nga dapat ka man maluoy sa pareho mo nga ulipon subong nga naluoy ako sa imo?” (Mat. 18:23-35, footnote) Huo, dapat napahulag sang daku gid nga kaluoy sang hari ang ulipon nga patawaron ang iya pareho nga ulipon. Sing kaanggid, ano ang dapat naton himuon bangod sang gugma kag kaluoy ni Jehova?

¹⁷ Sa tion sang Memoryal, mahimo naton pamensaron kon may ginalainan kita sang buot nga utod. Kon may ara, tion gid ini nga ilugon si Jehova, nga “handa gid magpatawad.” (Neh. 9:17; Sal. 86:5) Kon ginaapresyar naton nga ginpatawad ni Jehova ang aton daku gid nga sala, patawaron man naton sing tinagipusuon ang iban. Mabaton lamang naton ang gugma kag pagpatawad sang Dios kon ginahigugma kag ginapatawad naton ang iban. (Mat. 6:14, 15) Matuod, indi mabag-o sang pagpatawad ang nagligad, pero mabag-o gid sini ang aton palaabuton sa aton kaayuhan.

18. Paano nabuligan sang gugma sang Dios ang isa ka utod nga batason ang pagkadihimpit sang isa pa ka utod?

¹⁸ Mahimo nga nabudlayan ang madamo sa aton nga ‘batason’ kada adlaw ang aton mga kauturan. (Basaha ang Colosas 3:13, 14; Efeso 4:32.) Halimbawa, ginbuligan sang dalaga nga utod nga si Lily ang isa ka balo nga si Carol. ^[1] Ginapasakay niya sa iya salakyan si Carol, nagapamalaklon para sa iya, kag nagapakita sa iya sing kaayo sa iban pa nga paagi. Wala sapayan sang ginahimo ni Lily, pirme nagareklamo si Carol kag mabudlay sia pakig-angutan. Pero nagkonsentrar si Lily sa maayo nga mga kinaiya ni Carol. Padayon sia nga nagbulig sa malawig nga tion asta nga nagbalatian si Carol kag napatay. “Bisan pa amo sini,” siling ni Lily, “gusto ko gid makita si Carol sa pagkabanhaw. Gusto ko sia makilala kon himpit na sia.” Huo, mapalig-on kita sang gugma sang Dios nga batason ang aton mga kauturan kag paabuton ang tion nga himpit na ang mga tawo.

19. Paano ka mapalig-on sang “indi malaragway kag wala sing bayad nga dulot” sang Dios?

¹⁹ ‘Indi gid malaragway kag wala sing bayad ang dulot’ ni Jehova sa aton. Kabay pa nga indi gid naton pagpasapayanan ining hamili nga regalo. Sa baylo, sa sini nga tion sang Memoryal, pamalandungan naton ang tanan nga ginhimo ni Jehova kag ni Jesus sa aton. Huo, kabay pa nga palig-unon kita sang ila gugma nga sundon sing maayo ang mga tikang ni Jesus, buligan kag pakitaan sing gugma ang aton mga kauturan, kag patawaron sila sing tinagipusuon.