1-2. (a) Ngaa simple lang nga paagi sang pagdumdom sang iya kamatayon ang gintudlo ni Jesus? (b) Ano nga mga kinaiya ni Jesus ang binagbinagon naton?

MALARAGWAY mo bala kon ano ang nagakatabo sa Memoryal sang kamatayon sang Cristo nga ginahiwat kada tuig? Sigurado gid nga madumduman sang kalabanan sa aton kon ano ang mga ginahimo sa Panihapon sang Ginuo. Ngaa? Bangod simple lang ini nga okasyon. Pero, importante gid ini nga okasyon. Gani mahimo mamangkot kita, ‘Ngaa simple lang ini?’

² Sa tion sang ministeryo ni Jesus sa duta, simple, maathag, kag mahapos mahangpan ang iya paagi sang pagtudlo sang kamatuoran. (Mat. 7:28, 29) Sing kaanggid, gintudluan niya kita sing simple pero nagakaigo nga paagi para dumdumon * ang iya kamatayon. Binagbinagon naton sing maayo ang panihapon sa tion sang Memoryal kag ang pila sa ginsiling kag ginhimo ni Jesus. Paagi sini, mas mahangpan naton ang pagkamapainubuson, kaisog, kag gugma ni Jesus, kag matun-an naton kon paano naton sia mailog.

3. Suno sa Mateo 26:26-28, daw ano kasimple ang panihapon sa tion sang Memoryal nga ginsugdan ni Jesus, kag ano ang ginasimbulo sang tinapay kag alak?

³ Kaupod ni Jesus ang iya 11 ka matutom nga apostoles sang ginsugdan niya ang Memoryal sang iya kamatayon. Gingamit niya ang nabilin nga mga pagkaon sa Paskua para hiwaton ining simple nga okasyon. (Basaha ang Mateo 26:26-28.) Gingamit niya ang  nabilin nga tinapay nga wala sing lebadura kag ang nabilin nga alak. Ginsilingan niya ang iya mga apostoles nga ang tinapay nagasimbulo sa iya himpit nga lawas, kag ang alak nagasimbulo sa iya dugo, nga malapit na niya ihalad para sa ila. Mahimo gid nga wala na matingala ang mga apostoles nga simple lang ang paagi sang paghiwat sang sining importante kag bag-o nga okasyon. Ngaa?

4. Paano ang ginlaygay ni Jesus kay Marta makabulig sa aton nga mahangpan kon ngaa ginsigurado ni Jesus nga simple lang ang panihapon sa tion sang Memoryal?

⁴ Binagbinaga ang natabo mga pila ka bulan ang nagligad, sang ikatlo nga tuig sang pagministeryo ni Jesus, sang ginbisitahan niya ang iya suod nga mga abyan nga sanday Lazaro, Marta, kag Maria. Samtang didto si Jesus sa ila balay, nagpanudlo sia sa ila. Ara sadto si Marta, pero masako sia sa paghanda sing madamo nga pagkaon para sa ila dungganon nga bisita. Natalupangdan ini ni Jesus, gani mainayuhon niya nga ginlaygayan si Marta nga indi man kinahanglan nga madamo gid ang iya ihanda. (Luc. 10:40-42) Sang ulihi, sang mga inoras na lang antes sang iya kamatayon, gin-aplikar mismo ni Jesus ang iya ginlaygay. Ginsigurado niya nga simple lang ang panihapon sa tion sang Memoryal. Ano ang ginasugid sini parte kay Jesus?

5. Bangod simple lang ang panihapon antes sang kamatayon ni Jesus, ano ang ginapakita sini parte sa iya, kag paano ini ginasakdag sang Filipos 2:5-8?

⁵ Makita ang pagkamapainubuson ni Jesus sa tanan niya nga ginsiling kag ginhimo. Gani wala na kita natingala nga nangin mapainubuson gid sia sang gab-i antes sang iya kamatayon. (Mat. 11:29) Kabalo sia nga himuon niya ang pinakaimportante nga halad sa kasaysayan sang tawo, kag banhawon sia ni Jehova para mangin hari sa langit. Pero bisan pa nabal-an niya ini, wala sia naghiwat sing magarbo nga selebrasyon para dayawon sia. Sa baylo, ginsilingan niya ang iya mga disipulo nga dapat nila sia dumdumon sing makaisa kada tuig paagi sa simple nga panihapon. (Juan 13:15; 1 Cor. 11:23-25) Ining simple nga panihapon pero nagakaigo sa okasyon nagapakita nga indi bugalon si Jesus. Nalipay gid kita nga mapainubuson ang aton Hari sa langit.—Basaha ang Filipos 2:5-8.

6. Paano naton mailog ang pagkamapainubuson ni Jesus kon makaatubang kita sang mga pagtilaw?

⁶ Paano naton mailog ang pagkamapainubuson ni Jesus? Paagi sa pag-una sa kaayuhan sang iban. (Fil. 2:3, 4) Binagbinaga ang katapusan nga gab-i ni Jesus sa duta. Kabalo si Jesus nga mangin  masakit ang iya kamatayon; pero, nabalaka gid sia sa iya matutom nga mga apostoles nga pat-od gid nga masubuan sa matabo sa iya. Gani gingamit niya ang iya katapusan nga gab-i para tudluan, palig-unon, kag pasaligon sila. (Juan 14:25-31) Ginpakita ni Jesus nga mas nabalaka sia sa kaayuhan sang iban. Maayo gid sia nga halimbawa sang pagkamapainubuson!

7. Paano nagpakita si Jesus sing dalayawon nga kaisog pagkatapos niya masugdan ang Panihapon sang Ginuo?

⁷ Pagkatapos masugdan ni Jesus ang Panihapon sang Ginuo, nagpakita sia dayon sing dalayawon nga kaisog. Paano? Ginbaton ni Jesus ang kabubut-on sang iya Amay para sa iya, bisan pa kabalo sia nga ang paghimo sini nagalakip sang makahuluya nga kamatayon bangod akusahan sia nga manugpasipala. (Mat. 26:65, 66; Luc. 22:41, 42) Nangin matutom gid si Jesus para mapadunggan niya ang ngalan ni Jehova, masakdag ang pagkasoberano sang Dios, kag mangin posible ang kabuhi nga wala sing katapusan para sa mahinulsulon nga katawhan. Sa amo man nga tion, ginbuligan ni Jesus ang iya mga sumulunod nga mangin handa sa mga kabudlayan.

8. (a) Ano ang ginsiling ni Jesus sa iya matutom nga mga apostoles? (b) Pagligad sang pila ka tuig pagkatapos mapatay si Jesus, paano ginpakita sang iya mga disipulo nga gin-ilog nila ang iya halimbawa?

⁸ Nagpakita man si Jesus sing kaisog paagi sa indi pagpamensar sa iya mga kabalaka, kag paagi sa pag-una sa kaayuhan sang iya matutom nga mga apostoles. Ang simple nga okasyon, nga ginsugdan ni Jesus pagkatapos niya ginpalakat si Judas, magapahanumdom sa iya mga sumulunod nga pagahaplasan sa ulihi. Pahanumdumon sila sini kon ano ang mga pagpakamaayo sang ginpatulo nga dugo ni Jesus kag sang bag-o nga katipan. (1 Cor. 10:16, 17) Para buligan sila nga mapamatud-an nga takus sila nga magbaton sang ila padya sa langit, ginsilingan ni Jesus ang iya mga sumulunod kon ano ang ginapaabot niya kag sang iya Amay nga dapat nila himuon.  (Juan 15:12-15) Ginsilingan man ni Jesus ang mga apostoles nga magaatubang sila sang mga pagtilaw. Dayon ginpalig-on niya sila nga ilugon ang iya halimbawa, kag ginsilingan sila nga “magpakabakod!” (Juan 16:1-4a, 33) Pagligad sang madamo nga tuig, padayon nga gin-ilog sang mga disipulo ni Jesus ang iya halimbawa sang pagsakripisyo sang kaugalingon kag kaisog. Bisan pa kinahanglan nila mag-antos, nagabuligay sila para maatubang ang sarisari nga mga pagtilaw.—Heb. 10:33, 34.

9. Paano naton mailog ang kaisog ni Jesus?

⁹ Subong, ginailog man naton ang kaisog ni Jesus. Halimbawa, kinahanglan ang kaisog para buligan ang aton mga kauturan nga ginahingabot bangod sang ila pagtuo. Kon kaisa, ginapriso ang aton mga kauturan bisan wala sing rason. Kon matabo ini, dapat naton himuon ang aton bug-os nga masarangan para buligan sila, lakip na ang pagpangapin sa ila paagi sa aton mga ginahambal. (Fil. 1:14; Heb. 13:19) Ang isa pa ka paagi nga mapakita naton ang kaisog amo ang padayon nga pagbantala “nga may kaisog.” (Binu. 14:3) Pareho kay Jesus, padayon naton nga ibantala ang mensahe sang Ginharian, bisan pa pamatukan kita kag hingabuton sang mga tawo. Pero kon kaisa, nagabatyag kita nga daw wala kita sing kaisog. Ano ang himuon naton?

10. Mga pila ka semana antes sang Memoryal, ano ang dapat naton himuon, kag ngaa?

¹⁰ Mas mangin maisog pa gid kita kon hunahunaon naton ang aton paglaum nga ginpaposible sang halad-gawad sang Cristo. (Juan 3:16; Efe. 1:7) Mga pila ka semana antes sang Memoryal, may kahigayunan kita nga mapakita nga ginapasalamatan gid naton ang gawad. Sa sina nga tion, basaha ang mga teksto nga nakaiskedyul sa tion sang Memoryal kag serioso nga pamalandungi ang mga hitabo sang malapit na patyon si Jesus. Dayon kon magtipon na kita para saulugon ang Panihapon sang Ginuo, mas mahangpan naton sing maayo ang kahulugan sang tinapay kag  alak sa tion sang Memoryal, kag ang indi matupungan nga halad nga ginasimbulo sini. Kon mahangpan naton ang ginhimo ni Jesus kag ni Jehova para sa aton kag kon paano kita kag ang aton mga pinalangga nagabenepisyo sa sini, mas nagaathag sa aton ang paglaum naton sa palaabuton, gani nagaisog pa gid kita nga magbatas asta sa katapusan.—Heb. 12:3.

11-12. Ano na ang natun-an naton?

¹¹ Natun-an naton nga ang Panihapon sang Ginuo nagapahanumdom sa aton parte sa hamili nga gawad kag parte sa dalayawon nga mga kinaiya ni Jesus nga pagkamapainubuson kag kaisog. Nagapasalamat gid kita nga padayon nga ginapakita ni Jesus ini nga mga kinaiya bilang aton Mataas nga Saserdote sa langit, nga nagapangabay sa Dios para sa aton. (Heb. 7:24, 25) Para mapakita ang aton pagpasalamat, dapat naton tumanon ang sugo ni Jesus nga dumdumon ang iya kamatayon. (Luc. 22:19, 20) Himuon naton ini sa petsa nga katumbas sang Nisan 14, nga amo ang pinakaimportante nga adlaw sa bilog nga tuig.

¹² Ang simple nga Panihapon sang Ginuo nagatudlo sa aton sang isa pa ka kinaiya ni Jesus nga bangod sini ginhatag niya ang iya kabuhi para sa aton. Sang diri sia sa duta, kilala sia sa sini nga kinaiya. Ano ini nga kinaiya?

13. Paano ginalaragway sang Juan 15:9 kag 1 Juan 4:8-10 ang gugma nga ginpakita ni Jehova kag ni Jesus, kag sin-o ang nagabenepisyo sa ila gugma?

¹³ Sa tanan nga ginhimo ni Jesus, maathag niya nga napakita ang tumalagsahon nga gugma ni Jehova sa aton. (Basaha ang Juan 15:9; 1 Juan 4:8-10.) Kag ang pinakaimportante sa tanan niya nga ginhimo amo ang kinabubut-on niya nga paghalad sang iya kabuhi para sa aton. Hinaplas man kita ukon bahin sang “iban nga mga karnero,” nagabenepisyo kita sa gugma nga ginpakita ni Jehova kag sang iya Anak paagi sa sini nga halad. (Juan 10:16; 1 Juan 2:2) Hunahunaa man ang tinapay kag alak sa tion sang Memoryal; ginapakita sini ang gugma kag pag-ulikid ni Jesus sa iya mga disipulo. Paano?

14. Paano ginpakita ni Jesus ang iya gugma sa iya mga disipulo?

¹⁴ Ang ginsugdan ni Jesus nga okasyon nagapakita sang iya gugma sa iya hinaplas nga mga sumulunod. Simple lang ini nga panihapon, kag indi mabudlay ang paghiwat sang sini nga okasyon. Dapat saulugon sini nga mga hinaplas ang Memoryal kada tuig, sa sarisari nga mga kahimtangan, lakip na sa prisuhan. (Bug. 2:10) Nahimo bala nila ang ginsugo ni Jesus? Huo!

15-16. Paano nasaulog sang iban ang Panihapon sang Ginuo bisan pa sa tuman kabudlay nga kahimtangan?

¹⁵ Halin sang unang siglo asta subong, ginadumdom gid sang matuod nga mga Cristiano ang kamatayon ni Jesus. Ginatinguhaan gid nila nga sundon ang ginhimo sadto sa Panihapon sang Ginuo, bisan pa sa tuman kabudlay nga mga kahimtangan. Binagbinaga ini nga mga halimbawa. Sang ginbartolina si Utod Harold King sa isa ka prisuhan sa China, nangita sia sing paagi para masaulog ang Memoryal. Sekreto sia nga naghanda sang tinapay kag alak, nga ginagamit kon ano lang ang ara sa iya. Ginpanikasugan gid niya nga mabal-an ang petsa sang Memoryal. Sang tion na sang okasyon, nagaisahanon sia nga nag-amba sa iya selda, dayon nagpangamuyo, kag nagpamulongpulong base sa Biblia.

¹⁶ Ari ang isa pa ka halimbawa. Isa ka grupo sang mga sister nga napriso sang Bug-os Kalibutan nga Inaway II ang nagrisgo sang ila kabuhi para masaulog nila ang Panihapon sang Ginuo. Pero, bangod simple lang ang dapat ihanda para sa sini nga okasyon, sekreto nila nga nasaulog ang Memoryal. Nagsiling sila: “Tuparay kami nga nagatindog kag ginapalibutan namon ang gamay nga pulungkuan. May hapin ini nga puti nga tela kag gintungtong namon diri ang tinapay  kag alak. Kandila lang ang amon suga, kay basi madakpan kami kon pasigahon namon ang bombilya. . . . Ginpabutyag namon liwat ang amon hanuot nga panaad sa aton Amay nga himuon namon ang amon bug-os nga masarangan para mabindikar ang Iya balaan nga ngalan.” Dalayawon gid ang pagtuo sini nga mga utod! Kag tumalagsahon gid ang gugma ni Jesus kay ginpaposible niya nga masaulog naton ang Memoryal bisan pa sa tuman kabudlay nga kahimtangan!

17. Ano ang ipamangkot naton sa aton kaugalingon?

¹⁷ Samtang nagahilapit ang Memoryal, maayo gid nga pamangkuton naton ang aton kaugalingon: ‘Paano ko pa gid mailog si Jesus sa pagpakita sang gugma? Ginauna ko bala ang kaayuhan sang akon mga kauturan sangsa akon kaayuhan? Ginapaabot ko bala nga himuon sang mga kauturan ang sobra sa ila masarangan, ukon ginahangop ko ang ila mga limitasyon?’ Kabay pa nga pirme naton ilugon si Jesus kag magpakita kita sang “simpatiya.”—1 Ped. 3:8.

18-19. (a) Ano ang masigurado naton nga matabo bisan pa indi na naton pagsaulugon ang Memoryal sa ulihi? (b) Ano ang ginapanikasugan mo nga himuon?

¹⁸ Malapit na ang tion nga indi na naton pagsaulugon ang Memoryal sang kamatayon sang Cristo. Kon ‘mag-abot’ na si Jesus sa tion sang dakung kapipit-an, tipunon niya sa langit ang nabilin sa iya “mga pinili,” kag indi na pagsaulugon ang Memoryal.—1 Cor. 11:26; Mat. 24:31.

¹⁹ Bisan pa indi na naton pagsaulugon ang Memoryal sa ulihi, makasigurado kita nga dumdumon sang mga katawhan ni Jehova ining simple nga okasyon bilang simbulo sang pinakadalayawon nga pagkamapainubuson, kaisog, kag gugma nga ginpakita sang isa ka tawo. Pag-abot sang tion nga indi na naton pagsaulugon ang Memoryal, pat-od gid nga malipay ang tanan bangod sugiran sila sang mga nakatambong sa Memoryal parte sa sining pinasahi nga okasyon. Pero para makabenepisyo kita subong sa sini nga okasyon, dapat gid naton panikasugan nga ilugon ang pagkamapainubuson, kaisog, kag gugma ni Jesus. Kon himuon naton ini, makasalig kita nga mabaton gid naton ang padya ni Jehova.—2 Ped. 1:10, 11.