1. Ano ang ginbatyag ni David parte kay Jehova, kag nagpalig-on ini sa iya nga himuon ang ano?

SI Hari David nagsulat: “Si Jehova gamhanan kag takus gid dayawon.” (Sal. 145:3) Palangga ni David si Jehova, kag nagpalig-on ini sa iya nga dayawon ang Dios “sa tunga sang kongregasyon.” (Sal. 22:22; 40:5) Pat-od gid nga palangga mo man si Jehova kag gusto mo man nga matuman ining ginsiling ni David: “Kabay pa nga dayawon ka, O Jehova nga Dios ni Israel nga amon amay, tubtob sa wala sing katubtuban.”—1 Cron. 29:10-13.

2. (a) Paano naton madayaw si Jehova? (b) Ngaa nabudlayan ang iban sa pagkomento, kag ano ang binagbinagon naton?

² Subong, ang isa ka paagi nga madayaw naton si Jehova amo ang pagkomento sa aton Cristiano nga mga miting. Pero, nabudlayan sa sini ang pila sa aton mga kauturan. Gusto nila magkomento, pero ginakulbaan sila. Ano ang puede nila himuon? Kag ano ang makabulig sa aton tanan nga makakomento sing makapalig-on? Antes naton sabton ini nga mga pamangkot, binagbinagon anay naton ang apat ka importante nga rason kon ngaa nagakomento kita sa mga miting.

3-5. (a) Suno sa Hebreo 13:15, ngaa nagakomento kita sa mga miting? (b) Palareho bala dapat ang kalidad sang aton komento? Ipaathag.

³ Ginhatagan kita tanan ni Jehova sang pribilehiyo nga dayawon sia. (Sal. 119:108) Ang pagkomento sa mga miting bahin sang aton “halad sang pagdayaw,” kag indi puede nga iban ang maghimo sini para sa aton. (Basaha ang Hebreo 13:15.) Ginasugo  bala kita ni Jehova nga dapat palareho ang aton halad, ukon komento? Wala.

⁴ Kabalo si Jehova nga indi palareho ang aton mga ikasarang kag kahimtangan, kag ginapabaloran gid niya ang aton mga halad. Hunahunaa ang mga halad nga ginabaton niya halin sa mga Israelinhon. Ang pila ka Israelinhon makasarang maghalad sang karnero ukon kanding. Pero ang pigado nga Israelinhon mahimo maghalad sang “duha ka tukmo ukon duha ka gamay pa nga pating.” Kag kon ang isa ka Israelinhon indi makasarang sang duha ka pispis, ginabaton ni Jehova ang “ikanapulo nga bahin sang isa ka efa nga pino nga harina.” (Lev. 5:7, 11) Mas barato ang harina, pero ginapabaloran ni Jehova ini nga halad, basta “pino [ini] nga harina,” ukon ang pinakamaayo nga klase.

⁵ Pareho gihapon ang pagtamod sang aton mainayuhon nga Dios sa aton mga halad subong. Kon nagakomento kita, wala niya ginapaabot nga mangin maayo kita tanan maghambal pareho kay Apolos ukon mangin pareho kita kay Pablo nga maayo magkumbinsi. (Binu. 18:24; 26:28) Ang gusto lang ni Jehova amo nga magkomento kita suno sa aton masarangan. Dumduma ang balo nga babayi nga nag-amot sing duha ka gamay nga sensilyo. Ginpabaloran sia ni Jehova bangod naghatag sia suno sa iya masarangan.—Luc. 21:1-4.

6. (a) Suno sa Hebreo 10:24, 25, ano ang posible nga epekto sa aton sang mga komento sa mga miting? (b) Paano mo mapakita nga ginapabaloran mo ang mga komento nga nagpalig-on sa imo?

⁶ Ginapalig-on naton ang isa kag isa paagi sa aton mga komento. (Basaha ang Hebreo 10:24, 25.) Ginapabaloran naton tanan ang sarisari nga mga komento sa aton mga miting. Nanamian kita sa simple kag tinagipusuon nga komento sang isa ka bata. Makapalig-on man kon makabati kita sang komento sang isa nga nalipay gid sa kamatuoran nga iya natun-an. Kag nagadayaw kita sa mga ‘nagatipon sang kaisog’ para makakomento, bisan pa mahuluy-on sila ukon nagatuon pa lang sang aton lenguahe. (1 Tes. 2:2) Paano naton mapakita nga ginapabaloran naton ang ila mga panikasog? Ang isa ka paagi amo ang pasalamatan sila sa ila makapalig-on nga komento. Kag ang isa pa ka paagi amo ang pagkomento man naton sa mga miting. Paagi sini, wala lang kita nagabaton sang pagpalig-on sa aton mga miting kundi nagahatag man kita.—Roma 1:11, 12.

7. Ano ang mga benepisyo kon nagakomento kita?

 ⁷ Nagabenepisyo kita kon nagakomento kita. (Isa. 48:17) Paano? Una, kon gusto naton magkomento, mas ginahandaan naton sing maayo ang mga miting. Kon nagahanda kita sing maayo, mas mahangpan naton ang Pulong sang Dios. Kag kon mas nahangpan naton ang Pulong sang Dios, mas madali naton iaplikar ang aton natun-an. Ikaduha, nagadugang ang aton kalipay sa miting bangod nagapakigbahin kita. Ikatlo, bangod kinahanglan ang panikasog para makakomento, masami nga madumduman naton ang mga punto nga ginkomento naton bisan pa madugay na nga natapos ang miting.

8-9. (a) Suno sa Malaquias 3:16, ano sa banta mo ang ginabatyag ni Jehova kon nagakomento kita? (b) Ano ang ginakulbaan nga himuon sang iban?

⁸ Nahamuot sa aton si Jehova kon ginapabutyag naton ang aton pagtuo. Makasalig kita nga ginapamatian kita ni Jehova kag ginapabaloran gid niya ang aton mga panikasog para makakomento. (Basaha ang Malaquias 3:16.) Pakamaayuhon niya kita kon ginapanikasugan gid naton nga pahamut-an sia.—Mal. 3:10.

⁹ Maathag nga madamo sing rason para magkomento kita sa mga miting. Pero may pila nga nakulbaan gihapon magbayaw. Kon amo sini ang imo ginabatyag, indi maluyahan sing buot. Binagbinagon naton ang pila ka prinsipio sa Biblia, pila ka halimbawa, kag pila ka panugda nga makabulig sa aton tanan nga makakomento sa mga miting.

10. (a) Ano ang ginakulbaan sang kalabanan sa aton? (b) Kon nakulbaan ka magkomento, ano nga maayo nga kinaiya ang mahimo ginapakita sini?

¹⁰ Grabe bala ang kubakuba sang imo dughan kon daw gusto mo magbayaw para magkomento? Indi lang ikaw ang nagabatyag sina. Ang matuod, ang kalabanan sa aton nakulbaan magkomento. Pero antes mo madaug ang kakulba, dapat mo anay hibaluon ang rason kon ngaa nakulbaan ka. Nakulbaan ka bala kay basi malipatan mo ang imo ihambal ukon basi sala ang imo  ihambal? Nabalaka ka bala kay basi indi manami ang imo komento kon ikumparar sa komento sang iban? Kon amo sini ang imo ginabatyag, mahimo nagapakita ini nga may maayo ka nga kinaiya. Nagapakita ini nga mapainubuson ka kag ginakabig mo ang iban nga labaw sa imo. Nahamuot si Jehova sa sini nga kinaiya. (Sal. 138:6; Fil. 2:3) Pero gusto man ni Jehova nga dayawon mo sia kag palig-unon ang imo mga kauturan sa mga miting. (1 Tes. 5:11) Palangga ka niya kag hatagan ka niya sing kaisog para mahimo ini.

11. Ano nga mga pahanumdom halin sa Kasulatan ang makabulig sa aton?

¹¹ Binagbinaga ang pila ka pahanumdom halin sa Kasulatan. Ang Biblia nagasiling nga tanan kita makasala sa aton ginahambal kag kon paano naton ini ginahambal. (Sant. 3:2) Wala ginapaabot ni Jehova nga indi kita makasala, kag wala man ini ginapaabot sang aton mga kauturan. (Sal. 103:12-14) Pamilya naton sila, kag palangga nila kita. (Mar. 10:29, 30; Juan 13:35) Nahangpan nila nga daw nagapanglaghap kita kon kaisa sang mga tinaga sa aton pagkomento.

12-13. Ano ang matun-an naton kay Nehemias kag kay Jonas?

¹² Hunahunaa ang pila ka halimbawa sa Biblia nga makabulig sa imo nga madaug ang kakulba. Dumduma si Nehemias nga nag-alagad sa palasyo sang gamhanan nga hari. Nasubuan si Nehemias bangod nabatian niya nga guba ang mga pader kag gawang sang Jerusalem. (Neh. 1:1-4) Imadyina ang iya kakulba sang ginpamangkot sia sang hari kon ngaa nasubuan sia. Nangamuyo dayon si Nehemias kag nagsabat sia sa hari. Bangod sini, ginbuligan sang hari ang katawhan sang Dios. (Neh. 2:1-8) Hunahunaa man si Jonas. Sang ginsugo sia ni Jehova nga paandaman ang mga taga-Ninive, hinadlukan gid si Jonas amo nga nagpalagyo sia. (Jon. 1:1-3) Pero ginbuligan ni Jehova si Jonas sa iya asaynment. Kag bangod sang mensahe ni Jonas, nakabenepisyo ang mga taga-Ninive. (Jon. 3:5-10) Matun-an naton kay Nehemias nga importante ang pangamuyo antes kita magsabat. Kag matun-an naton kay Jonas nga buligan kita ni Jehova nga maalagad sia bisan pa nahadlok gid kita. Indi bala nga mas makahaladlok ang magpaandam sa mga taga-Ninive sangsa magkomento sa mga miting?

¹³ Ano nga mga panugda ang makabulig sa imo nga makakomento sing makapalig-on? Binagbinagon naton ang pila ka panugda.

14. Ngaa dapat naton handaan sing maayo ang mga miting, kag san-o naton ini puede himuon?

¹⁴ Handai ang kada miting. Kon nakahanda ka sing abanse kag maayo, mas may kompiansa ka nga magkomento. (Hulu. 21:5) Siempre, indi palareho ang aton iskedyul sa paghanda. Si Eloise, nga mga 80 anyos kag isa ka balo, nagahanda sa umpisa sang semana para sa Pagtinuon sa Ang Lalantawan. Nagsiling sia, “Mas malipayon ako sa mga miting kon nakatuon ako sing  abanse.” Si Joy, nga may full-time nga obra, nagapain sang tion kon Sabado para magtuon sa Ang Lalantawan. “Gusto ko nga preska pa sa akon hunahuna ang artikulo nga pagatun-an,” siling niya. Si Ike, nga isa ka masako nga gulang kag payunir, nagsiling, “Mas makatuon ako sing maayo kon nagatuon ako sa malip-ot lang nga tion sing pila ka beses sa isa ka semana sangsa tingbon ko ang pagtuon.”

15. Paano mo mahandaan sing maayo ang mga miting?

¹⁵ Ano ang nalakip sa paghanda sing maayo para sa mga miting? Sugdi ang pagtuon paagi sa pagpangabay kay Jehova nga hatagan ka sang balaan nga espiritu. (Luc. 11:13; 1 Juan 5:14) Dayon tan-awa anay sing makadali ang bilog nga artikulo paagi sa pagbinagbinag sang tig-ulo, mga subtitulo, mga ilustrasyon, kag sang mga kahon. Dayon tun-i ang kada parapo, kag basaha ang tanan nga ginkutlo nga teksto kon posible. Pamalandungi ang imo ginatun-an, kag talupangda sing maayo ang mga punto nga gusto mo ikomento. Kon nakahanda ka sing maayo, mas madamo ang imo benepisyo kag mas mahapusan ka magkomento.—2 Cor. 9:6.

16. Ano nga mga gamit ang puede mo gamiton, kag paano mo ini ginagamit?

¹⁶ Kon posible, gamita ang elektroniko nga mga gamit nga matigayon sa lenguahe nga imo nahangpan. Ginhatagan kita ni Jehova, paagi sa iya organisasyon, sang elektroniko nga mga gamit para mabuligan kita nga makahanda para sa mga miting. Paagi sa JW Library^® nga app, ma-download naton ang ginatun-an nga mga publikasyon sa aton gadyet. Dayon puede na naton ini tun-an, basahon, ukon pamatian bisan diin man kita kag bisan ano nga oras. Ginagamit ini sang iban kon nagabiyahe sila ukon sa tion sang tigpalanyaga sa ulubrahan ukon sa eskwelahan. Ang Watchtower Library kag Watchtower ONLINE LIBRARY^™ nagapahapos sang pag-research sang mga punto nga gusto naton tun-an sing maayo.

17. (a) Ngaa mas maayo nga maghanda sing madamo nga komento? (b) Ano ang natun-an mo sa video nga Mangin Abyan ni Jehova—Ihanda ang Imo Komento?

¹⁷ Kon posible, maghanda sing madamo nga komento. Ngaa? Bangod mahimo nga indi ikaw ang pagtuksuon kon magbayaw ka. Mahimo nga may magbayaw man nga iban, kag posible nga isa sa ila ang tuksuon sang nagadumala sang pagtinuon. Kag para indi mag-obertaym ang miting, mahimo nga limitahan sang nagadumala ang mga nagakomento sa pila ka bahin sang pagtinuon. Gani indi magsunggod ukon maluyahan sing buot kon wala ka niya gintukso sa una nga mga bahin sang pagtinuon. Pero kon naghanda ka sing madamo nga komento, mas madamo ka man sing kahigayunan nga makakomento. Puede mo ilakip ang pagbasa sang teksto sa komento nga ginahandaan mo. Pero kon posible, handai ang pagkomento sa imo kaugalingon nga mga tinaga. *

18. Ngaa dapat malip-ot lang ang aton komento?

 ¹⁸ Magkomento sing malip-ot. Sa masami, ang malip-ot kag simple nga mga komento amo ang makapalig-on. Gani panikasugi nga magkomento sing malip-ot. Tinguhai nga indi ini magsobra sa 30 ka segundo. (Hulu. 10:19; 15:23) Kon tinuig ka na nga nagakomento sa mga miting, importante nga mangin maayo ka nga halimbawa sa pagkomento sing malip-ot. Kon madamo nga punto ang imo ginakomento kag nagalawig ini sing pila ka minuto, mahimo nga mahuya ang iban nga magkomento, kay mahimo maghunahuna sila nga indi nila mailog ang imo paagi sang pagkomento. Kag kon malip-ot ang aton komento, mas madamo ang makakomento. Kon ikaw ang una nga gintukso, mas maayo nga magkomento sing simple kag kon ano lang ang sabat sa pamangkot. Indi pagkomentuhi ang tanan nga punto sa parapo. Kon nabinagbinag na ang importante nga mga punto sa parapo, mahimo mo komentuhan ang iban pa nga punto.—Tan-awa ang kahon nga “ Ano ang Puede Ko Ikomento?”

19. Paano ka mabuligan sang nagadumala sang pagtinuon, pero ano ang dapat mo himuon?

¹⁹ Pabal-a ang nagadumala sang pagtinuon kon diin nga parapo gusto mo magkomento. Pero, dapat mo sia pabal-on antes magsugod ang miting. Kon tion na para komentuhan ang parapo nga imo ginhandaan, magbayaw dayon sing mataas para makita ka sang nagadumala.

20. Ngaa ang mga miting sang kongregasyon daw pareho sa isa ka sinalusalo upod ang maayo nga mga abyan?

²⁰ Kabiga ang mga miting sang kongregasyon nga daw pareho sa isa ka sinalusalo upod ang imo maayo nga mga abyan. Kon gin-agda ka sa isa ka sinalusalo upod ang pila ka kauturan kag ginpangabay ka nga maghanda sing simple nga pagkaon, ano ang himuon mo? Mahimo nga mabalaka ka, pero sigurado gid nga himuon mo ang imo bug-os nga masarangan para makadala ka sing pagkaon nga mauyunan sang tanan. Ginaagda man kita ni Jehova, kag nagahanda sia sa aton mga miting sing lamesa nga puno sang maayo nga mga butang. (Sal. 23:5; Mat. 24:45) Kag nalipay sia kon magdala kita sing simple nga regalo suno sa aton masarangan. Gani handai sing maayo ang mga miting kag magpakigbahin sa sini. Kon himuon mo ini, wala ka lang nagakaon sa lamesa ni Jehova kundi nagadala ka man sing regalo para sa kongregasyon.