1-2. (a) Paano nakabulig kay Yoshiko ang Isaias 41:10? (b) Ngaa gintipigan ni Jehova ini nga mensahe?

ANG isa ka matutom nga sister nga si Yoshiko ginsilingan sang doktor nga may pila na lang sia ka bulan nga mabuhi. Ano ang iya reaksion? Ginhunahuna ni Yoshiko ang iya paborito nga teksto nga Isaias 41:10. (Basaha.) Dayon kalmado niya nga ginsilingan ang doktor nga wala sia nahadlok bangod ginauyatan ni Jehova ang iya kamot. * Ining makapalig-on nga teksto nagbulig sa aton pinalangga nga utod nga magsalig sing bug-os kay Jehova. Makabulig man ini sa aton nga mangin kalmado kon makaatubang kita sang mabudlay nga mga pagtilaw. Para mahangpan naton kon paano ini makabulig sa aton, hibaluon naton kon ngaa ginhambal ini sang Dios kay Isaias.

² Ginpasulat ini ni Jehova kay Isaias para sa mga Judiyo nga pagabihagon sa Babilonia sa ulihi. Pero, gintipigan ini ni Jehova indi lang para palig-unon ang ginbihag nga mga Judiyo, kundi para man sa tanan niya nga katawhan halin sadto asta subong. (Isa. 40:8; Roma 15:4) Nagakabuhi kita subong sa “makahalanguyos nga mga tion nga mabudlay atubangon,” gani kinahanglan gid naton ang pagpalig-on sang libro ni Isaias.—2 Tim. 3:1.

3. (a) Ano ang mga ginpromisa sang Isaias 41:10 nga amo ang aton tuigan nga teksto sa 2019? (b) Ngaa kinahanglan naton ini nga mga pasalig?

³ Sa sini nga artikulo, binagbinagon naton ang tatlo ka promisa ni Jehova nga makapalig-on sang aton pagtuo nga mabasa sa Isaias 41:10: (1) Kaupod naton si Jehova, (2) sia ang aton Dios, kag (3) buligan niya kita. Kinahanglan naton ini nga mga pasalig, *  bangod nagaatubang kita sang mga pagtilaw, pareho kay Yoshiko. Nagaeksperiensia man kita sang mga kabudlayan bangod sang indi maayo nga kahimtangan sang kalibutan. Ang pila sa aton ginahingabot pa gani sang gobierno. Binagbinagon naton ining tatlo ka pasalig.

4. (a) Ano ang una nga pasalig sang Dios nga binagbinagon naton? (Tan-awa man ang footnote.) (b) Ano ang ginsiling ni Jehova parte sa iya pagpalangga sa aton? (c) Ano ang masiling mo parte sa gugma sang Dios sa imo?

⁴ Ang una nga pasalig ni Jehova amo ini: “Indi ka mahadlok, kay kaupod mo ako.” * Ginapakita ni Jehova nga kaupod naton sia paagi sa paghatag sa aton sang iya bug-os nga atension kag pagpalangga. Talupangda kon ano ang iya ginsiling parte sa iya pagpalangga sa aton: “Nangin hamili ka sa akon,” siling ni Jehova. “Ginpadunggan ka, kag ginhigugma ko ikaw.” (Isa. 43:4) Wala sing bisan ano sa uniberso nga makadula sang gugma ni Jehova sa mga nagaalagad sa iya; indi gid magbag-o ang iya pagkamainunungon sa aton. (Isa. 54:10) Ang iya gugma kag pagpakig-abyan sa aton nagahatag sa aton sang kaisog. Amligan niya kita, pareho sa pag-amlig niya sa iya abyan nga si Abram (Abraham). Ginsilingan sia ni Jehova: “Indi ka magkahadlok, Abram. Ako ang imo taming.”—Gen. 15:1.

5-6. (a) Ngaa masiling naton nga gusto gid ni Jehova nga buligan kita sa aton mga pagtilaw? (b) Ano ang matun-an naton kay Yoshiko?

⁵ Kabalo kita nga gusto gid ni Jehova nga buligan kita sa aton mga pagtilaw bangod nagpromisa sia sa iya katawhan: “Kon magtabok ka sa katubigan, magaupod ako sa imo, kag kon mag-agi ka sa mga suba, indi ka malumos. Kon maglakat ka sa kalayo, indi ka mapaso, ukon masunog sa dabdab.” (Isa. 43:2) Ano ang buot silingon sini?

⁶ Wala nagpromisa si Jehova nga kuhaon niya ang mga kabudlayan sa aton kabuhi, pero indi niya pagtugutan nga malumos kita sa mga problema nga daw “mga suba” ukon mahalitan kita sang mga pagtilaw nga daw “dabdab” sang kalayo. Nagpromisa sia nga updan niya kita kag  buligan nga ‘makatabok’ sa sini nga mga kabudlayan. Ano ang himuon ni Jehova? Buligan niya kita nga mangin kalmado para mapakita naton ang aton katutom bisan pa mabutang sa katalagman ang aton kabuhi. (Isa. 41:13) Napamatud-an ini ni Yoshiko nga ginsambit kaina. Ang iya anak nga babayi nagsiling: “Dayaw gid kami kay Nanay kay kalmado sia gihapon. Ginhatagan sia ni Jehova sing malinong nga hunahuna. Asta sang adlaw nga napatay sia, ginpanaksihan niya ang mga nars kag mga pasyente parte kay Jehova kag sa iya mga promisa.” Ano ang matun-an naton kay Yoshiko? Kon nagasalig kita sa promisa sang Dios nga “Magaupod ako sa imo,” mangin maisog man kita kag mabakod sa pagbatas sa mga pagtilaw.

7-8. (a) Ano ang ikaduha nga pasalig sang Dios nga binagbinagon naton, kag ano ang buot silingon sini? (b) Ngaa ginsilingan ni Jehova ang ginbihag nga mga Judiyo: “Indi ka magkabalaka”? (c) Ano ang ginsiling sang Isaias 46:3, 4 nga mahimo nagpakalma sa katawhan sang Dios?

⁷ Ang ikaduha nga pasalig nga ginsulat ni Isaias amo ini: “Indi ka magkabalaka, kay ako imo Dios.” Ano ini nga kabalaka? Sa sini nga bersikulo, ang orihinal nga tinaga para sa “magkabalaka” nagakahulugan sing “pirme pagbalikid bangod nakulbaan ka nga daw may nagasunod sa imo nga gusto manghalit” ukon “pagsalasala bangod makatalagam ang sitwasyon.”

⁸ Ngaa ginsilingan ni Jehova ang mga Judiyo nga pagabihagon sa Babilonia nga indi “magkabalaka”? Bangod kabalo sia nga mahadlukan ang mga pumuluyo sini nga pungsod. Ngaa? Sa katapusan sang 70 ka tuig nga pagkabihag sang mga Judiyo, salakayon ang Babilonia sang maisog nga mga soldado sang Medo-Persia. Gamiton sila ni Jehova para hilwayon ang iya katawhan sa pagkabihag sa Babilonia. (Isa. 41:2-4) Sadto nga tion, sang mabal-an sang mga taga-Babilonia kag mga katawhan sa iban nga pungsod nga nagapalapit na ang ila mga kaaway, gintinguhaan nila nga magpakaisog paagi sa pagsiling sa isa kag isa: “Magpakabakod ka.” Naghimo man sila sing madamo nga diosdios kay nagalaum sila nga maamligan sila sini. (Isa. 41:5-7) Pero ginpakalma ni Jehova ang ginbihag nga mga Judiyo kag ginsilingan sila: “Ikaw, O Israel, [indi ka pareho sa imo kaingod nga mga pungsod kay ikaw] akon alagad . . . Indi ka magkabalaka, kay ako imo Dios.” (Isa. 41:8-10) Talupangda nga nagsiling si Jehova: “Ako imo Dios.” Paagi sa pagsiling sini, ginpasalig liwat ni Jehova ang iya matutom nga mga sumilimba nga wala niya sila malipatan. Sia gihapon ang ila Dios, kag katawhan niya gihapon sila. Ginsilingan niya sila: “Dalhon . . . ko kamo kag luwason.” Pat-od gid nga napalig-on sa sini ang ginbihag nga mga Judiyo.—Basaha ang Isaias 46:3, 4.

9-10. Ngaa indi kita dapat mahadlok? Maghatag sing ilustrasyon.

⁹ Sa aton tion subong, nagakabalaka na gid ang mga tawo bangod sang nagalala nga kahimtangan sang kalibutan. Apektado man kita sa sini. Pero indi kita dapat mahadlok. Ginasilingan kita ni Jehova: “Ako imo Dios.” Ngaa isa ini ka mabakod nga rason para mangin kalmado?

¹⁰ Binagbinaga ini nga ilustrasyon: Nagasakay sa eroplano sanday Jim kag Ben. Bangod sang mabaskog nga hangin, ang paglupad sang eroplano daw pareho sang nagaundag nga salakyan. Dayon nabatian sang mga pasahero nga nagsiling ang piloto: “Palihug indi paghuksa ang inyo seatbelt. Makaeksperiensia kita sang turbulence.” Ginkulbaan gid si Jim. Dayon nagsiling pa gid ang piloto: “Indi kamo magkabalaka. Ginapasalig ko sa inyo bilang inyo piloto nga okey lang ang tanan.” Naglungolungo si Jim, kag nagsiling sia, “Ti ano gid kon sia ang piloto?” Pero natalupangdan niya nga kalmado  lang si Ben. Ginpamangkot sia ni Jim: “Ngaa daw wala ka ’ya ginakulbaan haw?” Nagyuhum si Ben kag nagsiling: “Bangod kilala ko gid ang piloto. Amay ko sia.” Dayon nagsiling pa si Ben: “Istoryahan ko ikaw parte sa akon amay. Kon makilala mo sia kag mabal-an mo kon daw ano sia kasagad magpalupad sang eroplano, indi ka man pagkulbaan.”

11. Ano ang matun-an naton sa ilustrasyon parte sa duha ka pasahero sa eroplano?

¹¹ Ano ang matun-an naton sa sini nga ilustrasyon? Pareho kay Ben, kalmado kita bangod kilala gid naton ang aton Amay sa langit, si Jehova. Kabalo kita nga buligan niya kita nga mabatas ang daw bagyo nga mga problema sa sining katapusan nga mga adlaw. (Isa. 35:4) Grabe ang kahadlok sang iban, pero kalmado lang kita bangod nagasalig kita kay Jehova. (Isa. 30:15) Pareho man kita kay Ben kon ginasugid naton sa aton mga isigkatawo ang mga rason sang aton pagsalig sa Dios. Kon himuon naton ini, makasalig man sila nga buligan sila ni Jehova sa bisan ano nga kabudlayan.

12. (a) Ano ang ikatlo nga pasalig sang Dios nga binagbinagon naton? (b) Ano ang ginapahanumdom sa aton sang “butkon” ni Jehova?

¹² Binagbinaga ang ikatlo nga pasalig nga ginsulat ni Isaias: “Pabaskugon ko ikaw, huo, buligan ko ikaw.” Ginlaragway na nga daan ni Isaias kon paano pabaskugon, ukon pabakuron, ni Jehova ang iya katawhan. Nagsiling sia: “Ang Soberanong Ginuong Jehova magakari nga may gahom, kag ang iya butkon magagahom para sa iya.” (Isa. 40:10) Sa Biblia, ang “butkon” masami nga nagapatuhoy sa gahom. Gani ang ekspresyon nga ang “butkon [ni Jehova] magagahom” nagapahanumdom sa aton nga si Jehova isa ka gamhanan nga Hari. Gingamit niya ang iya indi matupungan nga kusog para sakdagon kag luwason ang iya mga alagad sang una, kag padayon niya nga ginapabakod kag  ginaamligan ang mga nagasalig sa iya subong.—Deut. 1:30, 31; Isa. 43:10, footnote.

13. (a) Sa ano nga sitwasyon masaligan gid naton ang promisa ni Jehova nga pabaskugon niya kita? (b) Ano nga promisa ang nagapabakod sa aton?

¹³ Kon ginahingabot kita sang aton mga kaaway, masaligan gid naton ang promisa ni Jehova: “Pabaskugon ko ikaw.” Sa pila ka pungsod subong, ginatinguhaan gid sang aton mga kaaway nga pauntaton ang pagbantala nga hilikuton ukon dumilian ang aton organisasyon. Pero wala kita nagakabalaka sing sobra sa sini nga mga pagsalakay. Ang pasalig ni Jehova nagapabakod sa aton. Nagpromisa sia: “Wala sing ginhimo nga hinganiban nga magmadinalag-on batok sa imo.” (Isa. 54:17) Ini nga promisa nagapahanumdom sa aton sang tatlo ka importante nga kamatuoran.

14. Ngaa wala kita natingala nga ginasalakay kita sang mga kaaway sang Dios?

¹⁴ Una, bilang mga sumulunod sang Cristo, mapaabot naton nga dumtan gid kita. (Mat. 10:22) Nagtagna si Jesus nga ang iya mga disipulo makaeksperiensia sing grabe nga mga paghingabot sa katapusan nga mga adlaw. (Mat. 24:9; Juan 15:20) Ikaduha, ang tagna ni Isaias nagapaandam sa aton nga magluwas sa dumot, gamiton man sang aton mga kaaway ang sarisari nga mga hinganiban batok sa aton. Mahimo nila pagguaon nga daw matuod ang ila mga kabutigan, mahimo magpalapta sila sing kabutigan batok sa aton, ukon mahimo mapintas nila kita nga hingabuton. (Mat. 5:11) Indi pagpunggan ni Jehova ang aton mga kaaway sa paggamit sang sini nga mga hinganiban batok sa aton. (Efe. 6:12; Bug. 12:17) Pero indi kita dapat mahadlok. Ngaa?

15-16. (a) Ano ang ikatlo nga kamatuoran nga dapat naton dumdumon, kag paano ini ginapamatud-an sang Isaias 25:4, 5? (b) Paano ginalaragway sang Isaias 41:11, 12 ang madangatan sang mga nagapamatok sa aton?

¹⁵ Talupangda ang ikatlo nga kamatuoran nga dapat naton dumdumon. Nagsiling si Jehova nga “wala sing ginhimo nga hinganiban nga magmadinalag-on” batok sa aton. Pareho sang pader nga nagaamlig sa aton sa mabaskog nga  unos, ginaamligan man kita ni Jehova sa “kapintas sang mga mapiguson.” (Basaha ang Isaias 25:4, 5.) Ang aton mga kaaway indi gid magmadinalag-on sa paghalit sa aton.—Isa. 65:17.

¹⁶ Ginapabakod pa gid ni Jehova ang aton pagsalig sa iya paagi sa maathag nga paglaragway sang madangatan sang mga “naakig” sa aton. (Basaha ang Isaias 41:11, 12.) Bisan ano pa ang himuon sang aton mga kaaway ukon bisan grabe gid ang ila pagpamatok, pareho lang gihapon ang resulta: Ang tanan nga kaaway sang katawhan sang Dios “malaglag.”

17-18. (a) Paano ang pagbasa sang Biblia makapabakod sang aton pagsalig sa Dios? Maghatag sing halimbawa. (b) Paano ang pagpamalandong sa tuigan nga teksto sa 2019 makabulig sa aton?

¹⁷ Kon kilalahon pa gid naton si Jehova, magabakod ang aton pagsalig sa iya. Kag ang lamang nga paagi para makilala pa gid naton sing maayo ang Dios amo ang serioso nga pagbasa sang Biblia kag pagpamalandong sa aton nabasa. Mabasa sa Biblia ang masaligan nga rekord kon paano gin-amligan ni Jehova ang iya katawhan sang una. Nagapasalig ini sa aton nga atipanon man niya kita subong.

¹⁸ Binagbinaga ang halimbawa sang paglaragway ni Isaias kon paano kita ginaamligan ni Jehova. Makatalandog gid ang iya ilustrasyon. Ginpaanggid niya si Jehova sa isa ka manugbantay kag ang mga alagad sang Dios sa mga karnero. Amo ini ang ginsiling ni Isaias parte kay Jehova: “Paagi sa iya butkon tipunon niya ang mga kordero, kag dalhon niya sila sa iya dughan.” (Isa. 40:11) Ginaamligan kita sang gamhanan nga mga butkon ni Jehova, gani nagabatyag kita nga wala sing makahalit sa aton kag nagapabilin kita nga kalmado. Para mabuligan kita nga mangin kalmado bisan pa sang mga problema, ginpili sang matutom kag mainandamon nga ulipon bilang tuigan nga teksto sa 2019 ang Isaias 41:10, “Indi ka magkabalaka, kay ako imo Dios.” Pamalandungi ining makapalig-on nga promisa. Magapabakod ini sa imo nga batason ang mga kabudlayan.