1-2. Ano nga mga sitwasyon ang naeksperiensiahan sang madamo nga alagad ni Jehova, kag ano ang posible nga epekto sini sa ila?

BINAGBINAGA ining tatlo ka halimbawa: Ginsilingan sang doktor ang isa ka pamatan-on nga utod nga may malala sia nga balatian nga magapaluya sa iya. Ginpahalin sa trabaho ang mapisan nga utod nga sobra na 50 anyos, kag indi sia makakita sang bag-o nga obra bisan ano pa niya nga pagtinguha. Indi na mahimo sang matutom nga tigulang nga utod ang masarangan niya himuon sang una sa pag-alagad kay Jehova.

² Kon may problema ka nga pareho sa sini, mahimo nga batyagon mo nga wala ka na sing mahimo nga maayo. Mahimo nga madula ang imo kalipay, magbatyag ka nga wala sing pulos, kag maapektuhan ang imo kaangtanan sa iban.

3. Paano ginatamod ni Satanas kag sang mga naimpluwensiahan niya ang kabuhi sang tawo?

³ Pareho sa pagtamod ni Satanas ang pagtamod sang kalibutan sa kabuhi sang tawo. Para kay Satanas, daw wala sing pulos ang mga tawo. Mapintas sia kay ginsilingan niya si Eva nga mangin hilway sia kuno kon indi niya pagtumanon ang Dios bisan pa kabalo si Satanas nga magaresulta ini sa kamatayon. Kontrolado gid niya ang komersio, pulitika, kag relihion sa sini nga kalibutan. Gani madamo nga negosyante, pulitiko, kag lider sang relihion ang wala man nagarespeto sa kabuhi kag dignidad sang tawo.

4. Ano ang binagbinagon naton sa sini nga artikulo?

⁴ Gusto ni Jehova nga mabal-an naton nga may pulos gid kita, kag ginabuligan niya kita kon makaeksperiensia kita sang mga sitwasyon nga makapabatyag sa aton nga wala kita sing pulos. (Sal. 136:23; Roma 12:3) Binagbinagon sa sini nga artikulo kon paano kita ginabuligan ni Jehova sa masunod nga mga sitwasyon: (1) Kon nagabalatian kita, (2) kon nagapamigado  kita, kag (3) kon magbatyag kita nga daw wala na kita sing mahimo sa pag-alagad kay Jehova bangod tigulang na kita. Pero tun-an anay naton kon ngaa makasalig kita nga ginapabaloran ni Jehova ang kada isa sa aton.

5. Ngaa masiling mo nga ginapabaloran ni Jehova ang mga tawo?

⁵ Bisan pa gintuga kita halin sa yab-ok sang duta, wala kita ginatamod ni Jehova nga indi importante. (Gen. 2:7) Binagbinaga ang pila sa mga rason kon ngaa masiling naton nga ginapabaloran kita ni Jehova. Gintuga niya ang mga tawo nga may ikasarang nga ilugon ang iya mga kinaiya. (Gen. 1:27) Bangod sini, ginhimo niya kita nga labaw sangsa iban pa niya nga gintuga sa duta, kag gintugyan niya sa aton ang duta kag ang mga kasapatan.—Sal. 8:4-8.

6. Ano ang isa pa ka rason kon ngaa masiling naton nga ginapabaloran ni Jehova ang indi perpekto nga mga tawo?

⁶ Bisan sa tapos magpakasala si Adan, padayon nga ginpabaloran ni Jehova ang mga tawo. Importante gid kita sa iya amo nga ginhatag niya ang iya pinalangga nga Anak nga si Jesus para mangin gawad sa aton mga sala. (1 Juan 4:9, 10) Paagi sa sini nga gawad, banhawon ni Jehova ang “mga matarong kag mga indi matarong” nga napatay bangod sang sala ni Adan. (Binu. 24:15) Ginapakita sang iya Pulong nga hamili kita sa iya bisan pa nagabalatian kita, nagapamigado, ukon tigulang na.—Binu. 10:34, 35.

7. Ano pa ang mga rason kon ngaa nagapati ang mga alagad sang Dios nga ginapabaloran sila ni Jehova?

⁷ May iban pa nga rason kon ngaa nagapati kita nga ginapabaloran kita ni Jehova. Ginbuyok niya kita palapit sa iya kag nakita niya kon paano naton ginbaton ang maayong balita. (Juan 6:44) Samtang nagapalapit kita kay Jehova, nagapalapit pa gid sia sa aton. (Sant. 4:8) Naggamit man si Jehova sang tion kag nagpanikasog sia para tudluan kita, kag pamatuod ini nga importante kita sa iya. Kabalo sia kon ano ang aton mga kinaiya kag kon paano naton ini mapauswag. Kag ginadisiplina niya kita kay palangga niya kita. (Hulu. 3:11, 12) Nagapamatuod gid ini nga ginapabaloran kita ni Jehova!

8. Paano makabulig ang ginasiling sang Salmo 18:27-29 para mangin husto ang pagtamod naton sa aton mga problema?

⁸ Gintamod sang iban si Hari David nga wala sing pulos, pero kabalo sia nga palangga kag ginbuligan sia ni Jehova. Bangod sini, nangin husto ang pagtamod ni David sa iya sitwasyon kag nabatas niya ini. (2 Sam. 16:5-7) Kon nasubuan kita ukon may mga problema, mabuligan kita ni Jehova para mangin husto ang aton pagtamod kag masarangan naton ang bisan ano nga kabudlayan. (Basaha ang Salmo 18:27-29.) Paagi sa bulig ni Jehova, indi madula ang aton kalipay sa pag-alagad sa iya. (Roma 8:31) Binagbinagon naman naton ang tatlo ka sitwasyon nga kinahanglan naton dumdumon nga palangga kag ginapabaloran kita ni Jehova.

9. Paano naton mahimo tamdon ang aton kaugalingon kon nagabalatian kita?

⁹ Bangod sang aton balatian, mahimo kita magbatyag nga wala na kita sing mahimo para sa iban. Mahimo nga mahuya kita kon makita sang mga tawo nga may balatian kita ukon nagasalig na lang kita sa bulig sang iban. Bisan pa kon wala kabalo ang iban nga may balatian kita, basi magbatyag kita gihapon sang kahuya kay indi na naton mahimo ang masarangan naton himuon sang una. Ginapalig-on kita ni Jehova bisan pa amo sini ang aton kahimtangan. Paano?

10. Suno sa Hulubaton 12:25, ano ang makabulig sa aton kon nagabalatian kita?

 ¹⁰ Kon nagabalatian kita, mapalig-on kita sang “maayo nga pulong.” (Basaha ang Hulubaton 12:25.) Paagi sa Biblia, madamo sang ginsiling si Jehova nga nagapahanumdom sa aton nga importante kita sa iya bisan pa nagabalatian kita. (Sal. 31:19; 41:3) Kon basahon naton ang Pulong sang Dios kag sulitsulit naton ini nga himuon, buligan kita ni Jehova nga masarangan ang aton mga ginakabalak-an bangod sang aton balatian.

11. Paano ginbuligan ni Jehova ang isa ka utod?

¹¹ Binagbinaga ang eksperiensia ni Jorge. Nagbalatian sia sang pamatan-on pa sia, kag madasig ini nga naglala amo nga nagbatyag sia nga wala na sia sing pulos. “Nagulpihan gid ako sa nangin resulta sang akon balatian kag sa nabatyagan ko nga kahuya kay ginatulok ako sang mga tawo bangod sini,” siling ni Jorge. “Naglala ang akon balatian kag ginpamensar ko ang epekto sini sa akon kabuhi. Grabe gid ang akon kasubo kag nagpakiluoy ako kay Jehova nga buligan niya ako.” Paano sia ginbuligan ni Jehova? “Bangod indi ako makakonsentrar, nagabasa ako sang pila lang ka bersikulo sa Salmo nga nagapakita sang pag-ulikid ni Jehova sa iya mga alagad. Ginasulitsulit ko ini basa kada adlaw, kag nagapalig-on ini sa akon. Sang ulihi, natalupangdan sang iban nga pirme na ako nagayuhum. Nagsiling pa gani sila nga napalig-on sila bangod malipayon ako. Nakita ko nga ginsabat ni Jehova ang akon mga pangamuyo! Ginbuligan niya ako nga bag-uhon ang akon pagtamod sa akon kaugalingon. Ginhunahuna ko ang ginasiling sang iya Pulong kon paano niya ako ginatamod bisan pa may balatian ako.”

12. Kon nagabalatian ka, paano mo mabaton ang bulig ni Jehova?

¹² Kon nagabalatian ka, makasalig ka nga  kabalo si Jehova sang imo ginabatyag. Mangamuyo sa iya nga buligan ka para mangin husto ang imo pagtamod sa imo sitwasyon. Dayon basaha sa Biblia ang makapalig-on nga mensahe nga ginpasulat ni Jehova para sa imo. Pamalandungi ang mga teksto nga nagapakita nga ginapabaloran gid ni Jehova ang iya mga alagad. Kon himuon mo ini, makita mo nga maayo si Jehova sa tanan nga matutom nga nagaalagad sa iya.—Sal. 84:11.

13. Ano ang mahimo batyagon sang isa ka ulo sang pamilya kon madulaan sia sang trabaho?

¹³ Gusto sang tanan nga ulo sang pamilya nga maaman ang mga kinahanglanon sang ila pamilya. Pero mahimo madulaan sang trabaho ang isa ka utod, bisan pa wala sia sang nahimo nga sala. Kag basi indi gid sia makakita sang bag-o nga obra bisan ano pa niya nga pagtinguha. Bangod sini, mahimo sia magbatyag nga wala sia sing pulos. Paano makabulig sa iya ang paghunahuna sa mga promisa ni Jehova?

14. Ngaa ginatuman ni Jehova ang iya mga promisa?

¹⁴ Ginatuman gid ni Jehova ang iya mga promisa. (Jos. 21:45; 23:14) Ginahimo niya ini bangod sang pila ka rason. Una, may epekto ini sa iya ngalan, ukon reputasyon. Nagpromisa si Jehova nga atipanon niya ang iya matutom nga mga alagad, kag para sa iya obligado sia nga tumanon ini. (Sal. 31:1-3) Isa pa, kabalo si Jehova nga masubuan gid kita kon indi niya pag-atipanon ang mga miembro sang iya pamilya. Nagapromisa sia nga ihatag niya ang aton mga kinahanglanon para padayon kita nga mabuhi kag matutom nga mag-alagad sa iya, kag wala sang makapugong sa iya para tumanon ini nga promisa!—Mat. 6:30-33; 24:45.

15. (a) Ano nga kabudlayan ang naeksperiensiahan sang mga Cristiano sang unang siglo? (b) Ano ang ginapasalig sa aton sang Salmo 37:18, 19?

 ¹⁵ Kon dumdumon naton kon ngaa ginatuman ni Jehova ang iya mga promisa, makasalig kita nga magabulig sia kon nagapamigado kita. Binagbinaga ang natabo sa mga Cristiano sang unang siglo. Sang ginhingabot ang kongregasyon sa Jerusalem, “nag-alaplaag ang tanan nga disipulo . . . luwas sa mga apostoles.” (Binu. 8:1) Hunahunaa ang resulta sini. Namigado gid sila! Posible nga nadulaan sang balay kag palangabuhian ang mga Cristiano. Pero wala sila ginpabay-an ni Jehova, kag wala man nadula ang ila kalipay. (Binu. 8:4; Heb. 13:5, 6; Sant. 1:2, 3) Ginbuligan ni Jehova ining matutom nga mga Cristiano, kag buligan man niya kita.—Basaha ang Salmo 37:18, 19.

16. Ngaa mahimo kita magbatyag nga wala na ginapabaloran ni Jehova ang aton pagsimba sa iya?

¹⁶ Kon tigulang na kita, mahimo kita magbatyag nga diutay na lang ang mahatag naton kay Jehova. Mahimo nga ginkabalak-an man ini ni Hari David sang tigulang na sia. (Sal. 71:9) Paano kita mabuligan ni Jehova?

17. Ano ang matun-an naton sa eksperiensia ni Jheri?

¹⁷ Binagbinaga ang eksperiensia sang sister nga si Jheri. Gin-agda sia sa isa ka paghanas nga himuon sa Kingdom Hall parte sa pagmentinar sa mga bilding nga ginagamit sa pag-alagad kay Jehova. Pero indi niya gusto magkadto. Nagsiling sia: “Tigulang na ako, balo pa, kag wala ako sang ikasarang para magamit ako ni Jehova. Wala ako sing mabulig.” Sang gab-i antes himuon ang paghanas, nangamuyo sia kay Jehova kag ginsugid niya ang iya ginabatyag. Sang nag-abot sia sa Kingdom Hall pagkadason nga adlaw, nagapalibog sia gihapon  kon dapat gid sia mag-upod sa paghanas. Sa tion sang paghanas, ginpaathag sang isa ka humalambal nga ang aton pinakaimportante nga ikasarang amo ang aton kahanda nga magpatudlo kay Jehova. Nagsiling si Jheri: “Napensaran ko, ‘May amo ako sini nga ikasarang!’ Naghibi ako kay nahangpan ko nga ginsabat ni Jehova ang akon pangamuyo. Ginapasalig niya ako nga may mahatag gid ako kag handa sia nga tudluan ako!” Nadumduman pa ni Jheri: “Sang nagkadto ako sa paghanas, ginakulbaan ako, naluyahan sang buot, kag masubo. Pero pagkatapos sang paghanas, may kompiansa na ako, napalig-on, kag nagabatyag nga may mabulig gid ako!”

18. Paano ginapakita sang Biblia nga ginapabaloran gihapon ni Jehova ang aton pagsimba bisan tigulang na kita?

¹⁸ Bisan tigulang na kita, makasalig kita gihapon nga may mahimo pa kita para kay Jehova. (Sal. 92:12-15) Gintudlo ni Jesus nga bisan pa diutay na lang ang mahimo naton kag para sa aton daw indi ini salapakon, ginapabaloran ni Jehova ang bisan ano nga masarangan naton himuon sa pag-alagad sa iya. (Luc. 21:2-4) Gani hunahunaa lang ang masarangan mo himuon. Halimbawa, masugiran mo ang iban parte kay Jehova, makapangamuyo ka para sa imo mga kauturan, kag mapalig-on mo ang iban nga mangin matutom. Ginhatagan ka ni Jehova sang pribilehiyo nga magpangabudlay kaupod niya, indi bangod sang mahimo mo, kundi bangod handa ka sa pagtuman sa iya.—1 Cor. 3:5-9.

19. Ano ang ginapasalig sa aton sang Roma 8:38, 39?

¹⁹ Nagapasalamat gid kita nga nagasimba kita kay Jehova, ang Dios nga nagapabalor gid sa mga nagaalagad sa iya! Gintuga niya kita para himuon ang iya kabubut-on, kag ang pagsimba sa iya amo ang nagapahalipay sa aton. (Bug. 4:11) Bisan pa tamdon kita sang kalibutan nga wala sing pulos, wala kita ginakahuya ni Jehova. (Heb. 11:16, 38) Kon maluyahan kita sang buot bangod sang balatian, kapigaduhon, ukon katigulangon, dumdumon naton nga wala gid sang makapugong para mabaton naton ang gugma sang aton Amay sa langit.—Basaha ang Roma 8:38, 39.