1. Ano nga pagbag-o ang ginhimo sang isa ka pamatan-on sang nabatian niya ang isa ka pamulongpulong sa isa ka kombension sang 1935?

MAY isa ka mag-asawa sadto nga mga Estudyante sang Biblia, nga amo anay ang pagtawag sa mga Saksi ni Jehova. May tatlo sila ka bata nga lalaki kag duha ka bata nga babayi. Gintudluan nila ang ila kabataan nga alagdon si Jehova nga Dios kag ilugon si Jesucristo. Sang 1926, nabawtismuhan ang ila 18 anyos nga bata nga lalaki. Kada tuig sa tion sang Panihapon sang Ginuo, ini nga pamatan-on nagakaon sang tinapay kag nagainom sang alak, nga amo man ang ginahimo sang tanan nga Estudyante sang Biblia sadto. Pero wala na niya ini ginhimo sang nabatian niya ang pamulongpulong nga may tema nga “Ang Daku nga Kadam-an.” Amo ini ang ginpamulongpulong ni J. F. Rutherford sang 1935 sa isa ka kombension sa Washington, D.C., U.S.A. Ano ang natun-an sang mga Estudyante sang Biblia sa sini nga kombension?

2. Ano nga kamatuoran ang ginpaathag ni Brother Rutherford sa iya pamulongpulong?

² Sa pamulongpulong ni Brother Rutherford, ginpaathag niya kon sin-o ang “daku nga kadam-an” nga ginsambit sa Bugna 7:9. Nagapati anay ang mga Estudyante sang Biblia nga ang daku nga kadam-an mapalangit man pero indi sila pareho katutom sa mga hinaplas. Paagi sa Kasulatan, ginpaathag ni Brother Rutherford nga ang daku nga kadam-an wala ginpili  para magkabuhi sa langit. Sila amo ang iban nga mga karnero * sang Cristo nga makalampuwas sa “dakung kapipit-an” kag mabuhi sing wala sing katapusan sa duta. (Bug. 7:14) Nagpromisa si Jesus: “May yara ako iban nga mga karnero, nga indi sa sini nga toril; dapat dalhon ko man sila, kag magapamati sila sa akon tingog, kag sila mangin isa ka panong nga may isa ka manugbantay.” (Juan 10:16) Ang “iban nga mga karnero” amo ang matutom nga mga Saksi ni Jehova nga may paglaum nga mabuhi sing wala sing katapusan sa Paraiso sa duta. (Mat. 25:31-33, 46) Binagbinagon naton kon paano nagbag-o ang kabuhi sang madamo nga alagad ni Jehova, lakip na ang 18 anyos nga brother bangod sining bag-o nga paghangop.—Sal. 97:11; Hulu. 4:18.

3-4. Sa kombension sang 1935, ano ang narealisar sang linibo parte sa ila paglaum, kag ngaa?

³ Nalipay gid ang nagtambong sa sini nga kombension sang ginpamangkot sila sang nagapamulongpulong: “Sin-o sa inyo ang may paglaum nga mabuhi sing wala sing katapusan sa duta? Palihug magtindog kamo.” Suno sa isa ka brother nga ato didto, sa mga 20,000 nga nagtambong, sobra katunga ang nagtindog. Dayon nagsiling si Brother Rutherford: “Tan-awa ninyo! Ang daku nga kadam-an!” Pagkatapos, matunog nga nagpinalakpak kag naghugyaw ang tanan. Nahangpan sang mga nagtindog nga wala sila ginpili ni Jehova para magkabuhi sa langit. Kabalo sila nga wala sila ginhaplasan sang espiritu sang Dios. Pagkasunod nga adlaw sang kombension, ginbawtismuhan ang 840 ka bag-o nga mga Saksi, kag ang kalabanan sa ila iban nga mga karnero.

⁴ Pagkatapos sadto nga pamulongpulong, wala na nagkaon sang tinapay kag nag-inom sang alak sa tion sang Panihapon sang Ginuo ang pamatan-on nga ginsambit kaina kag ang linibo nga iban pa. Ang isa ka brother nagsiling: “Ang Memoryal sang 1935 amo ang katapusan ko nga pagkaon sang tinapay kag pag-inom sang alak. Narealisar ko nga wala ako ginhaplasan ni Jehova sang iya balaan nga espiritu para magkabuhi sa langit. Sa baylo, may paglaum ako nga mabuhi sing wala sing katapusan sa duta kag may pribilehiyo ako sa pagbulig nga himuon ini nga Paraiso.” Madamo nga kauturan ang pareho man sini ang ginbatyag. (Roma 8:16, 17; 2 Cor. 1:21, 22) Sugod sadto, padayon nga nagadamo ang daku nga kadam-an kag nagabulig sila sa hilikuton sang mga hinaplas nga ari pa sa duta.

5. Paano ginatamod ni Jehova ang mga wala na nagakaon sang tinapay kag nagainom sang alak sa tion sang Memoryal?

⁵ Paano ginatamod ni Jehova ang mga wala na nagakaon sang tinapay kag nagainom sang alak sa tion sang Memoryal pagkatapos sang 1935? Kag ano ang pagtamod ni Jehova sa isa ka bawtismado nga Saksi nga nagakaon sang tinapay kag nagainom sang alak sa tion sang Panihapon sang Ginuo pero narealisar niya sang ulihi nga indi gali sia hinaplas? (1 Cor. 11:28) Abi sang iban hinaplas sila, gani nagakaon sila sang tinapay kag nagainom sang alak. Pero kon akuon nila nga nagsala sila sa ila pagpati, dayon indi na sila magkaon sang tinapay kag mag-inom sang alak, kag magpadayon sila sa pag-alagad sing matutom kay Jehova, sigurado gid nga batunon sila ni Jehova bilang iban nga mga karnero. Bisan pa wala na sila nagakaon sang tinapay kag nagainom sang alak, nagatambong  sila gihapon sa Memoryal bangod nagapasalamat gid sila sa ginhimo ni Jehova kag ni Jesus para sa ila.

6. Ano ang ginsugo ni Jesus sa mga anghel?

⁶ Bangod malapit na lang ang dakung kapipit-an, mapalig-on gid kita kon binagbinagon naton kon ano pa gid ang ginasiling sang Bugna kapitulo 7 parte sa hinaplas nga mga Cristiano kag sa daku nga kadam-an sang iban nga mga karnero. Ginsugo ni Jesus ang mga anghel nga punggan ang apat ka hangin sang kalaglagan. Indi nila dapat pagbuy-an ini nga mga hangin sa duta kon wala pa namarkahan ang tanan nga hinaplas. Ang pagmarka sa ila nagapakita nga nangin matutom sila kay Jehova. (Bug. 7:1-4) Bangod nangin matutom ang hinaplas nga mga utod sang Cristo, makaupod nila sia sa langit kag mangin hari sila kag saserdote. (Bug. 20:6) Malipay gid si Jehova, si Jesus, kag ang mga anghel kon mabaton na sang 144,000 ka hinaplas ang ila padya sa langit.

7. Sa Bugna 7:9, 10, sin-o ang nakita ni Juan sa iya palanan-awon, kag ano ang ila ginahimo? (Tan-awa ang piktyur sa kober.)

⁷ Sa tapos ginsugid ni Juan ang parte sa 144,000 ka hari kag saserdote, nakita niya ang “daku nga kadam-an” nga nakalampuwas sa Armageddon. Mas madamo sila sangsa 144,000, kag wala kita kabalo kon ano gid sila kadamo. (Basaha ang Bugna 7:9, 10.) “Nagasuksok sila sang puti kag malaba nga panapton,” buot silingon ‘naglikaw sila sa mahigko nga dalanon’ sang kalibutan ni Satanas kag nangin matutom sila sa Dios kag sa Cristo. (Sant. 1:27) Nagasinggit sila nga naluwas sila bangod sang ginhimo ni Jehova kag ni Jesus nga Kordero sang Dios. May ginauyatan man sila nga mga paklang sang palma. Nagapakita ini nga ginakilala nila nga si Jesus ang Hari nga gintangdo ni Jehova.—Ipaanggid ang Juan 12:12, 13.

8. Ano ang ginasiling sa aton sang Bugna 7:11, 12 parte kay Jehova, kay Jesus, sa mga anghel, kag sa ginbanhaw nga mga hinaplas?

⁸ Basaha ang Bugna 7:11, 12. Ano ang natabo sang nakita sang mga ara sa langit ang daku nga kadam-an? Nakita ni Juan nga malipayon ang tanan nga ara sa langit kag gindayaw nila ang Dios sang nakita nila ang daku nga kadam-an. Malipay gid si Jehova, si Jesus, ang mga anghel, kag ang ginbanhaw nga mga hinaplas kon matuman na ini nga palanan-awon kag makita nila nga naggua halin sa dakung kapipit-an ang daku nga kadam-an.

9. Suno sa Bugna 7:13-15, ano ang ginahimo sang daku nga kadam-an subong?

⁹ Basaha ang Bugna 7:13-15. Nagsiling si Juan nga ‘ginlabhan sang daku nga kadam-an ang ila malaba nga panapton kag ginpaputi ini sa dugo sang Kordero.’ Ginapakita sini nga may matinlo sila nga konsiensia kag nalipay sa ila si Jehova. (Isa. 1:18) Gindedikar na nila ang ila kabuhi sa Dios kag nagpabawtismo. Nagatuo gid sila sa halad-gawad ni Jesus kag may suod sila nga kaangtanan kay Jehova. (Juan 3:36; 1 Ped. 3:21) Gani nalipay gid ang Dios sa ila kag “nagahimo sila sang sagrado nga pag-alagad sa iya sa adlaw kag gab-i” diri sa duta. Subong, mapisan sila nga nagabantala sang Ginharian kag nagatudlo sa iban bangod ang Ginharian sang Dios amo ang pinakaimportante sa ila kabuhi.—Mat. 6:33; 24:14; 28:19, 20.

10. Ano ang himuon sang Dios para sa daku nga kadam-an kag ano nga promisa ang matuman?

¹⁰ Atipanon gid sang Dios ang daku nga kadam-an nga makalampuwas sa dakung kapipit-an, kay “ang Isa nga nagapungko sa trono magahumlad sang iya tolda para sa ila agod amligan sila.” Matuman na ang promisa nga madugay na nga ginalauman sang iban nga mga karnero: “Pahiran [sang Dios] ang tagsa ka luha sa ila mga mata, kag wala na sing kamatayon,  ukon paglalaw ukon paghibi ukon kasakit pa.”—Bug. 21:3, 4.

11-12. (a) Suno sa Bugna 7:16, 17, ano nga mga pagpakamaayo ang mabaton sang daku nga kadam-an? (b) Ano ang puede himuon sang iban nga mga karnero sa tion sang Memoryal, kag ngaa gusto nila ini himuon?

¹¹ Basaha ang Bugna 7:16, 17. Subong, ang pila ka alagad ni Jehova ginagutom bangod wala sila sing inugbakal sang ila pagkaon ukon bangod sang inaway sa ila lugar. Ang iban ginpriso bangod sang ila pagtuo. Pero malipayon gid ang daku nga kadam-an bangod kabalo sila nga pagkatapos malaglag ining malaut nga kalibutan, may madamo na sila nga pagkaon kag tudluan na sila pirme ni Jehova. Kon laglagon na ni Jehova ang malaut nga kalibutan ni Satanas, amligan niya ang daku nga kadam-an kag indi nila maeksperiensiahan ang Iya kaakig sa mga pungsod nga daw pareho sa “makapalaso nga init.” Pagkatapos sang dakung kapipit-an, tuytuyan ni Jesus ang daku nga kadam-an sa “tubig sang kabuhi” nga wala sing katapusan. Pamensara ini: May dalayawon nga paglaum ang daku nga kadam-an. Sa binilyon ka tawo nga nagkabuhi, mahimo nga indi gid sila makaeksperiensia sang kamatayon!—Juan 11:26.

¹² Nagapasalamat gid kay Jehova kag kay Jesus ang iban nga mga karnero bangod sang ila dalayawon nga paglaum. Bisan pa wala sila ginpili ni Jehova para magkabuhi sa langit, palangga niya sila pareho sang pagpalangga niya sa mga hinaplas. Ang mga hinaplas kag ang iban nga mga karnero makadayaw sa Dios kag sa Cristo. Ang isa ka paagi nga ginahimo nila ini amo ang pagtambong sa Panihapon sang Ginuo.

13-14. Ngaa dapat magtambong ang tanan sa Memoryal sang kamatayon sang Cristo?

¹³ Sining nagligad lang nga mga tinuig, sa kada 1,000 nga nagatambong sa Memoryal, halos isa lang ang nagakaon sang tinapay kag nagainom sang alak. Sa kalabanan nga kongregasyon, wala sing may nagakaon sang tinapay kag nagainom sang alak. Ang kalabanan sa nagatambong sa Memoryal may paglaum nga mabuhi sa duta. Pero ngaa nagatambong pa sila sa Panihapon sang Ginuo? Daw pareho sila sa mga tawo nga nagtambong sa kasal sang ila abyan kay gusto nila ipakita nga palangga nila sia kag ginasuportahan nila sia. Gani nagatambong man ang iban nga mga karnero sa  Memoryal bangod gusto nila ipakita nga palangga nila ang Cristo kag ang mga hinaplas kag ginasuportahan nila sila. Nagatambong man sa Memoryal ang iban nga mga karnero para ipakita nga nagapasalamat sila sa halad-gawad ni Jesus, kay bangod sini may paglaum sila nga mabuhi sing wala sing katapusan sa duta.

¹⁴ May isa pa ka importante nga rason kon ngaa nagatambong sa Memoryal ang iban nga mga karnero. Gusto nila tumanon ang ginsugo ni Jesus. Sang ginsugdan ni Jesus ang Panihapon sang Ginuo upod sa iya mga apostoles, ginsilingan niya sila: “Padayon ninyo nga himua ini sa pagdumdom sa akon.” (1 Cor. 11:23-26) Gani padayon nga magatambong sa Panihapon sang Ginuo ang iban nga mga karnero samtang may hinaplas pa sa duta. Kag ginaagda sang iban nga mga karnero ang tanan nga magtambong sa Memoryal.

15. Paano naton madayaw ang Dios kag ang Cristo sa tion sang Memoryal?

¹⁵ Sa tion sang Memoryal, madayaw naton ang Dios kag ang Cristo paagi sa pagkanta kag pagpangamuyo. Ang pamulongpulong sini nga tuig may tema nga “Ipakita ang Apresasyon sa Ginhimo sang Dios kag sang Cristo Para sa Imo!” Palig-unon kita sini nga magpasalamat pa gid kay Jehova kag sa Cristo. Samtang ginapasa ang tinapay kag ang alak, nagapahanumdom ini sa aton sang lawas kag dugo ni Jesus. Kag madumduman naton ang gugma ni Jehova sa aton sang gintugutan niya nga mapatay ang iya Anak para may kabuhi kita nga wala sing katapusan. (Mat. 20:28) Gusto gid sang tanan nga nagapalangga sa aton Amay sa langit kag sa iya Anak nga magtambong sa Memoryal.

16. Ano ang masiling naton nga pareho sa mga hinaplas kag sa iban nga mga karnero?

¹⁶ Ang mga hinaplas kag ang iban nga mga karnero importante sa Dios. Kag pareho niya sila nga palangga. Kay man, ang ginbayad niya para gawaron ang mga hinaplas amo man ang ginbayad niya para gawaron ang iban nga mga karnero. Amo ini ang kabuhi sang iya pinalangga nga Anak. Ang kinalain lang sa ila amo ang ila paglaum. Pero dapat sila mangin matutom sa Dios kag sa Cristo. (Sal. 31:23) Kag dumduma nga ginahatag ni Jehova ang iya balaan nga espiritu sa kada isa nga nagakinahanglan sini, hinaplas man sia ukon nalakip sa iban nga mga karnero.

17. Ano ang ginahandum sang mga hinaplas nga ari pa sa duta?

¹⁷ Wala sing natawo nga hinaplas na dayon ukon may paglaum na dayon nga magkabuhi sa langit. Ang Dios ang nagahatag sini nga paglaum sa mga hinaplas. Ginahunahuna nila ang ila paglaum, ginapangamuyo nila ini, kag gusto nila nga mabaton ang ila padya sa langit. Pero wala sila kabalo kon ano gid nga espirituwal nga  lawas ang ihatag sa ila. (Fil. 3:20, 21; 1 Juan 3:2) Pero ginahandum nila nga makita si Jehova, si Jesus, ang mga anghel, kag ang iban pa nga mga hinaplas. Gusto nila nga makaupod sila sa Ginharian sa langit.

18. Ano ang ginahandum sang iban nga mga karnero?

¹⁸ Ginahandum sang iban nga mga karnero nga mabuhi sing wala sing katapusan diri sa duta. Amo ini ang handum sang tanan nga tawo. (Man. 3:11) Gusto nila nga mag-abot na ang tion nga himuon nga paraiso ang duta kag makabulig sila sa sini. Ginahandum nila ang tion nga magpatindog sila sang ila mga balay, magpananom sa ila mga hardin, kag mangin perpekto na sila kag ang ila pamilya. (Isa. 65:21-23) Ginahandum nila nga magkadto sa madamo nga lugar sa duta, kag makita ang kabukiran, mga kagulangan, kag ang kadagatan, kag tun-an ang tanan nga tinuga ni Jehova. Labaw sa tanan, malipay gid sila kay mangin suod pa gid sila kay Jehova.

19. Ngaa pinasahi gid nga tion ang Memoryal para sa kada isa sa aton, kag san-o saulugon ang Memoryal sa sini nga tuig?

¹⁹ Ginhatagan ni Jehova sang dalayawon nga paglaum ang tanan niya nga alagad nga nagdedikar sa iya. (Jer. 29:11) Isa gid ka pinasahi nga tion ang Memoryal sang kamatayon sang Cristo para sa kada isa sa aton. Tion ini nga madayaw naton ang Dios kag ang Cristo bangod sang ginhimo nila para sa aton para may kabuhi kita nga wala sing katapusan. Ang Memoryal amo ang pinakaimportante nga miting para sa matuod nga mga Cristiano kada tuig. Saulugon ini pagtunod sang adlaw sa Sabado, Marso 27, 2021. Madamo ang makatambong sa sining importante nga okasyon sa mga lugar nga wala sing pagpamatok. Ang iban magatambong bisan pa pamatukan sila. Ang iban magasaulog sang Memoryal sa prisuhan. Saulugon man naton ang Memoryal bilang kongregasyon, grupo, ukon nagaisahanon, kabay pa nga mangin malipayon kita, kay kabalo kita nga ginatan-aw kita ni Jehova, ni Jesus, sang mga anghel, kag sang ginbanhaw nga mga hinaplas.