1. Ngaa masiling naton nga wala nagapalanggaanay ang madamo nga pamilya subong?

GINTAGNA sang Biblia nga sa katapusan nga mga adlaw, ang mga tawo mangin indi “mapinalanggaon.” (2 Tim. 3:1, 3) Matuod gid ini subong. Halimbawa, madamo nga ginikanan ang nagbulagay kag akig gid sila sa isa kag isa, gani ang ila kabataan nagabatyag nga wala sila ginapalangga. Bisan ang mga pamilya nga nagaupdanay sa isa lang ka balay mahimo nga indi suod sa isa kag isa. Ang isa ka propesyonal nga nagalaygay sa mga pamilya nagsiling: “Ang iloy, ang amay, kag ang kabataan wala nagaistoryahanay, kag laban pa ang oras nga ginagamit nila sa ila kompyuter, tablet, cell phone, ukon video game. Bisan pa ini nga mga pamilya nagaupdanay sa isa ka balay, daw indi sila kilalahay.”

2-3. (a) Suno sa Roma 12:10, kay sin-o kita dapat magpakita sang pagpalangga? (b) Ano ang binagbinagon naton sa sini nga artikulo?

² Indi naton gusto nga mangin pareho sa mga tawo sa kalibutan nga wala sing gugma. (Roma 12:2) Sa baylo, dapat pa gid naton palanggaon ang aton pamilya kag ang aton mga kauturan sa kongregasyon. (Basaha ang Roma 12:10.) Ano ang pagpalangga? Amo ini ang gugma nga ginapakita sang mga miembro sang pamilya sa kada isa. Dapat man naton ipakita ini nga gugma sa aton mga kauturan sa kongregasyon. Kon ipakita naton ang pagpalangga, makabulig kita para mangin malipayon kag nahiusa ang tanan sa pag-alagad kay Jehova.—Miq. 2:12.

³ Para mapakita naton ang pagpalangga, binagbinagon naton ang mga halimbawa sa Biblia.

4. Ano ang ginasugid sa aton sang Santiago 5:11 parte sa pagpalangga ni Jehova?

⁴ Ginasugiran kita sang Biblia sang dalayawon nga mga kinaiya ni Jehova. Halimbawa, nagasiling ini nga “ang Dios gugma.” (1 Juan 4:8) Bangod sini, gusto naton sia mangin abyan. Nagasiling man ang Biblia nga si Jehova “mapinalanggaon gid.” (Basaha ang Santiago 5:11.) Ginapakita sini nga palangga gid kita ni Jehova.

5. Paano ginapakita ni Jehova ang kaluoy, kag paano naton sia mailog?

⁵ Talupangda nga ginsambit sang Santiago 5:11 nga si Jehova mapinalanggaon kag maluluy-on. (Ex. 34:6) Ang isa ka paagi nga ginapakita ni Jehova nga maluluy-on sia sa aton amo ang pagpatawad sa aton mga sala. (Sal. 51:1) Suno sa Biblia, indi lang paagi sa pagpatawad mapakita ang kaluoy. Mabatyagan man ini sang isa kon makita niya ang iban nga ginabudlayan kag gusto gid niya sila buligan. Nagabatyag gid sing kaluoy ang isa ka iloy para sa iya anak. Pero nagsiling si Jehova nga mas labaw pa sa sini ang iya ginabatyag para sa aton kag gusto gid niya kita buligan. (Isa. 49:15) Bangod maluluy-on si Jehova, gusto niya kita buligan kon nabudlayan kita. (Sal. 37:39; 1 Cor. 10:13) Mapakita naton ang kaluoy sa aton mga kauturan kon patawaron naton sila kag indi kita maghinakit sa ila. (Efe. 4:32) Pero mapakita pa gid naton ang kaluoy sa aton mga kauturan paagi sa pagbulig sa ila kon may mga problema sila. Kon magpakita kita sang kaluoy sa iban bangod palangga naton sila, ginailog naton si Jehova, ang pinakamaayo nga halimbawa nga nagpakita sang pagpalangga.—Efe. 5:1.

6. Paano ginpakita ni Jonatan kag ni David nga palangga nila ang isa kag isa?

⁶ Mabasa naton sa Biblia ang parte sa indi perpekto nga mga tawo nga nagpakita sang pagpalangga. Binagbinaga ang halimbawa ni Jonatan kag ni David. Ang Biblia nagasiling: “Nangin suod nga mag-abyanay si Jonatan kag  si David, kag ginhigugma ni Jonatan si David subong sang iya kaugalingon.” (1 Sam. 18:1) Ginpili ni Jehova si David nga mangin hari nga magabulos kay Saul. Bangod sini, naakig gid si Saul kay David kag gusto niya sia patyon. Pero wala gid magkomporme si Jonatan nga anak ni Saul sa mga ginhimo sang iya amay para patyon si David. Nagpanumpa si Jonatan kag si David nga magapabilin sila nga mag-abyanay kag pirme nila buligan ang isa kag isa.—1 Sam. 20:42.

7. Ano kuntani ang puede nga rason nga indi mangin suod si Jonatan kag si David?

⁷ Dalayawon gid nga nangin suod si Jonatan kag si David bisan pa mas magulang si Jonatan sing mga 30 ka tuig kay David. Puede kuntani nga rason ang diperensia sang ila edad nga indi sila mangin suod. Mahimo pensaron ni Jonatan nga imposible nga mangin suod sia sa mas manghod sa iya kag wala pa masyado nabal-an sa kabuhi. Pero wala gid ini ginpensar ni Jonatan. Sa baylo, gintahod gid niya si David.

8. Ngaa masiling mo nga isa gid ka maayo nga abyan ni David si Jonatan?

⁸ May rason si Jonatan nga mahisa kay David. Si Jonatan ang anak ni Hari Saul, gani puede niya kuntani ipakigbato nga sia dapat ang masunod nga hari. (1 Sam. 20:31) Pero mapainubuson si Jonatan, kag matutom sia kay Jehova. Gani ginsuportahan gid niya si David nga amo ang ginpili ni Jehova nga masunod nga hari. Nag-unong sia kay David bisan pa naakig si Saul sa iya.—1 Sam. 20:32-34.

9. Ngaa masiling naton nga wala nahisa si Jonatan kay David?

⁹ Wala gid nahisa si Jonatan kay David bangod palangga niya sia. Maisog nga soldado si Jonatan kag tanda nga manugpana. Ang mga tawo nagsiling nga sia kag ang iya amay nga si Saul ‘mas madasig pa sa mga agila’ kag “mas makusog pa sila sa mga leon.” (2 Sam. 1:22, 23) Gani puede kuntani magpabugal si Jonatan. Pero wala niya gintinguhaan nga labawan si David kag wala sia nahisa sa maayo nga mga ginhimo ni David. Sa baylo, gindayaw niya ang kaisog ni David kag ang iya pagsalig kay Jehova. Ang matuod, ginpalangga ni Jonatan si David pagkatapos ginpatay ni David si Goliat. Paano naton mapakita ini nga pagpalangga sa aton mga kauturan?

10. Paano naton mapakita nga ‘nagahigugmaanay kita sing hanuot halin sa tagipusuon’?

¹⁰ Ginapalig-on kita sang Biblia nga ‘maghigugmaanay sing hanuot halin sa tagipusuon.’ (1 Ped. 1:22) Nagpakita si Jehova sang halimbawa parte sa sini. Hanuot gid ang iya gugma sa aton, kag padayon naton ini nga mabatyagan kon padayon kita nga mangin matutom sa iya. (Roma 8:38, 39) Ang tinaga nga “hanuot” nagapahangop sang grabe nga pagtinguha sang isa para ipakita ang gugma. Kon kaisa, mahimo nga indi mahapos nga magpakita sang gugma sa aton mga kauturan. Kon may ginsiling ukon ginhimo ang iban nga nagpalain sang aton buot, dapat padayon naton nga ‘batason ang isa kag isa sa gugma, magpakighidait kita sa isa kag isa, kag tinguhaan naton nga tipigan ang paghiusa nga nabaton naton paagi sa balaan nga espiritu.’ (Efe. 4:1-3) Kon tinguhaan naton nga ‘magpakighidait’ sa aton mga kauturan, makabulig ini sa aton nga indi magpokus sa ila mga sala. Dapat naton tamdon ang aton mga kauturan pareho sa pagtamod ni Jehova sa ila.—1 Sam. 16:7; Sal. 130:3.

11. Ngaa mabudlay ipakita ang pagpalangga kon kaisa?

¹¹ Kon kaisa, indi mahapos magpakita sang pagpalangga sa aton mga kauturan, ilabi na kon may makita kita nga indi maayo sa ila. Amo ini ang natabo sa pila ka Cristiano sang  unang siglo. Halimbawa, mahimo nga nalipay gid si Eudias kag si Sintique nga ‘magpangabudlay upod kay Pablo para sa maayong balita.’ Pero wala sila nagasahuay nga duha. Gani ginpalig-on sila ni Pablo nga “mangin isa sing panghunahuna may kaangtanan sa Ginuo.”—Fil. 4:2, 3.

12. Paano naton mapakita ang pagpalangga sa aton mga kauturan?

¹² Paano naton mapakita ang pagpalangga sa aton mga kauturan subong? Kon kilalahon gid naton sing maayo ang aton mga kauturan, mas madali naton sila maintiendihan kag palanggaon. Puede naton sila mangin abyan bisan pa mas magulang sila sa aton, ukon mas manghod, ukon lain ang ila gindak-an. Dumduma nga mas magulang si Jonatan sing mga 30 ka tuig kay David, pero nangin suod sila nga mag-abyanay. May utod bala sa inyo kongregasyon nga mas magulang sa imo ukon mas manghod sa imo nga puede mo mangin abyan? Kon magpakig-abyan ka sa iya, mapakita mo nga may ‘gugma ka sa tanan nga kauturan.’—1 Ped. 2:17.

13. Ngaa posible nga mangin mas suod kita sa iban nga kauturan sa kongregasyon?

¹³ Bangod kinahanglan naton palanggaon ang aton mga kauturan, nagapahangop bala ini nga mangin suod gid kita sa tanan? Indi ini posible. Normal lang nga mangin mas suod kita sa iban nga kauturan bangod pareho kita sa ila sing nanamian. Gintawag ni Jesus nga “mga abyan” ang tanan niya nga apostoles, pero mas suod sia kay Juan. (Juan 13:23; 15:15; 20:2) Pero wala niya ginhatagan sing pinasahi nga pabor si Juan. Halimbawa, sang nangabay si Juan kag ang iya utod nga si Santiago nga hatagan sila sang importante nga katungdanan sa Ginharian sang Dios, ginsilingan sila ni Jesus: “Indi ako ang magapili kon sin-o ang magapungko sa akon tuo ukon sa akon wala.” (Mar. 10:35-40) Pareho kay Jesus, indi man naton dapat paghatagan sing pinasahi nga pabor ang aton suod nga mga abyan. (Sant. 2:3, 4) Kay man, posible ini magdula sang paghidait kag paghiusa sang kongregasyon.—Jud. 17-19.

14. Suno sa Filipos 2:3, ano ang makabulig sa aton para indi kita magtinguha nga labawan ang iban?

 ¹⁴ Kon palangga naton ang aton mga kauturan, wala kita nagatinguha nga labawan sila. Dumduma nga wala nahisa si Jonatan kay David, kag wala man niya ginpamensar nga sia ang dapat nga mangin hari. Mailog naton tanan ang halimbawa ni Jonatan. Indi kita dapat mahisa sa aton mga kauturan bangod sang ila mga ikasarang, ‘kundi mapainubuson naton nga kabigon ang iban nga labaw sa aton.’ (Basaha ang Filipos 2:3.) Tandaan naton nga ang kada isa sa aton may mabulig gid sa kongregasyon. Kon mapainubuson kita, makita naton ang maayo nga mga kinaiya sang aton mga kauturan kag makatuon kita sa ila katutom.—1 Cor. 12:21-25.

15. Ano ang natun-an mo sa natabo kay Tanya kag sa iya tatlo ka bata?

¹⁵ Kon may malain nga matabo sa aton, ginapaumpawan kita ni Jehova paagi sa aton mga kauturan nga nagapalangga kag nagabulig sa aton. Amo ini ang naeksperiensiahan ni Tanya kag sang iya tatlo ka bata. Nagtambong sila sa “Ang Gugma Wala sing Katapusan”! nga Internasyonal nga Kombension sa United States sang 2019. Binagbinaga ang natabo sa ila pagkatapos nila magtambong sa programa sa Sabado. Si Tanya nagsiling: “Sang nagabiyahe kami pabalik sa hotel, nabungguan ang amon salakyan sang isa pa ka salakyan. Wala man kami naano. Naggua kami sa amon salakyan kag nagtindog sa dalan, pero naurungan gid kami. May nagtawag sa amon nga magkadto sa iya salakyan nga ara sa higad sang dalan. Brother gali ’to nga bag-o lang man naghalin sa kombension. Kag indi lang sia ang nagpundo. Nagpundo man ang lima ka utod nga taga-Sweden nga naghalin man sa kombension. Ginhakos ako sang mga sister kag  ginhakos man nila ang akon bata nga babayi. Bangod sini, nagkalma kami. Ginsilingan ko sila nga OK na kami, pero wala nila kami ginbayaan. Gin-updan nila kami bisan pa nag-abot na ang ambulansia, kag ginsigurado nila nga maatipan kami. Nabatyagan gid namon ang pagpalangga ni Jehova bisan pa sa sining mabudlay nga sitwasyon. Bangod sini nga eksperiensia, mas ginpalangga pa gid namon ang amon mga kauturan. Mas ginpalangga man namon si Jehova kag ginpasalamatan.” Nakaeksperiensia ka man bala nga ginpakitaan ka sang pagpalangga sang isa ka utod sang tion nga nagakinahanglan ka sing bulig?

16. Ngaa dapat kita magpakita sang pagpalangga sa isa kag isa?

¹⁶ Binagbinaga ang resulta kon magpakita kita sang pagpalangga sa isa kag isa. Ginapaumpawan naton ang aton mga kauturan kon may problema sila. Nagabulig kita para mangin malipayon kag nahiusa ang aton mga kauturan sa pag-alagad kay Jehova. Ginapakita naton nga mga disipulo kita ni Jesus, kag paagi sa sini mapalig-on ang sinsero nga mga tawo nga mag-alagad man kay Jehova. Labaw sa tanan, ginapadunggan naton si Jehova, “ang Amay nga may mapinalanggaon nga kaluoy kag ang Dios nga nagahatag sang tanan nga sahi sang lugpay.” (2 Cor. 1:3) Kabay pa nga padayon naton nga ipakita ang pagpalangga!