1-3. Ano ang pila ka rason kon ngaa nagahibi ang katawhan ni Jehova?

SAN-O ang pinakaulihi nga tion nga nakahibi ka? Kon kaisa, nagahibi kita bangod sa kalipay. Pero sa masami, nagahibi kita bangod nasubuan kita. Halimbawa, nagahibi kita bangod napatyan kita sang pinalangga. Si Lorilei, nga isa ka sister sa United States, nagsiling: “Kon kaisa, grabe gid ang akon kasubo sa pagkapatay sang akon bata nga babayi. Pamatyag ko daw indi na ako maumpawan. Sa amo sini nga mga tion, grabe gid kasakit sang akon dughan nga pamatyag ko daw ginakumos ang akon tagipusuon.” *

² May iban pa nga mga rason kon ngaa nagahibi kita. Si Hiromi, nga isa ka payunir sa Japan, nagsiling: “Nasubuan ako kon kaisa bangod indi interesado ang mga tawo nga akon ginabantalaan. May mga tion nga nagahibi ako samtang nagapangabay ako kay Jehova nga buligan ako nga makakita sang interesado sa kamatuoran.”

³ Naeksperiensiahan mo na bala ang nabatyagan sini nga mga sister? Madamo sa aton ang nakaeksperiensia sini. (1 Ped. 5:9) Gusto naton nga ‘mag-alagad kay Jehova nga may kasadya,’ pero posible nga nagaalagad kita sa iya nga may mga luha bangod nasubuan kita, naluyahan sang buot, ukon may problema kita nga nagatilaw sang aton katutom sa Dios. (Sal. 6:6; 100:2) Ano ang puede naton himuon kon mabatyagan naton ini?

4. Ano ang binagbinagon naton sa sini nga artikulo?

⁴ Makatuon kita sa halimbawa ni Jesus. May mga tion nga ‘nagtulo man ang luha’ ni Jesus bangod sang iya nabatyagan. (Juan 11:35; Luc. 19:41; 22:44; Heb. 5:7) Binagbinagon naton ini nga mga tion kag ang matun-an naton sa sini. Binagbinagon  man naton kon ano ang aton himuon kon makaeksperiensia kita sang mga kabudlayan nga makapahibi sa aton.

5. Ano ang matun-an naton parte kay Jesus sa kasaysayan sa Juan 11:32-36?

⁵ Sang tigtulugnaw sang 32 C.E., nagmasakit ang suod nga abyan ni Jesus nga si Lazaro kag napatay sia. (Juan 11:3, 14) Palangga gid ni Jesus si Lazaro kag ang iya mga utod nga sanday Maria kag Marta. Grabe gid ang kasubo sini nga mga babayi sang napatay ang ila utod. Sang napatay si Lazaro, naglakbay si Jesus sa lugar nga ginaistaran nanday Maria kag Marta nga amo ang Betania. Sang nabatian ni Marta nga nagapakadto si Jesus sa ila, nagdalidali sia sa pagsugata sa iya. Imadyina ang iya grabe nga kasubo sang nagsiling sia: “Ginuo, kon diri ka lang, wala kuntani mapatay ang akon utod.” (Juan 11:21) Dayon sang nakita ni Jesus nga nagahibi si Maria kag ang iban pa, ‘nagtulo ang iya luha.’—Basaha ang Juan 11:32-36.

6. Ngaa naghibi si Jesus sadto nga tion?

⁶ Ngaa naghibi si Jesus sadto nga tion? Ang Insight on the Scriptures nagasiling: “Bangod sang pagkapatay sang abyan ni Jesus nga si Lazaro kag sang kasubo sang mga utod nga babayi ni Lazaro, ‘natandog gid ang tagipusuon ni Jesus kag nagtulo ang iya luha.’” * Posible nga ginahunahuna ni Jesus ang kasakit nga nabatyagan sang iya pinalangga nga abyan nga si Lazaro bangod sang iya balatian, kag ang ginbatyag ni Lazaro sang narealisar niya nga indi na sia mag-ayo kag mapatay gid sia. Sigurado man nga naghibi si Jesus bangod nakita niya nga nasubuan gid sanday Maria kag Marta sa pagkapatay sang ila utod. Kon may suod ka nga abyan ukon miembro sang imo pamilya nga napatay, sigurado gid nga amo man sini ang imo nabatyagan. Binagbinaga ang tatlo ka leksion nga matun-an mo sa sini nga kasaysayan.

7. Ano ang matun-an naton parte kay Jehova sang naghibi si Jesus bangod nabalaka sia sa iya mga abyan?

⁷Nahangpan ni Jehova ang imo ginabatyag. Si Jesus “ang sibu nga larawan” sang iya Amay. (Heb. 1:3) Sang naghibi si Jesus, ginpakita niya ang ginabatyag sang iya Amay. (Juan 14:9) Kon napatyan ka sang pinalangga, makasalig ka nga nakita ni Jehova nga nasubuan ka kag nasubuan man sia. Gusto niya paumpawan ang imo nasubuan nga tagipusuon.—Sal. 34:18; 147:3.

8. Ngaa makasalig kita nga banhawon gid ni Jesus ang aton mga pinalangga?

 ⁸Gusto ni Jesus nga banhawon ang imo mga pinalangga. Antes maghibi si Jesus, ginsilingan niya si Marta: “Ang imo utod mabanhaw.” Nagpati si Marta kay Jesus. (Juan 11:23-27) Bangod matutom nga alagad ni Jehova si Marta, kabalo sia nga may ginbanhaw sadto ang mga manalagna nga sanday Elias kag Eliseo. (1 Hari 17:17-24; 2 Hari 4:32-37) Kag posible gid nga nabatian niya ang mga pagbanhaw nga ginhimo ni Jesus. (Luc. 7:11-15; 8:41, 42, 49-56) Makasalig ka man nga makita mo liwat ang imo mga pinalangga nga napatay. Ang paghibi ni Jesus samtang ginapaumpawan niya ang iya nasubuan nga mga abyan isa ka pamatuod nga gusto gid niya banhawon ang mga napatay.

9. Pareho kay Jesus, paano mo mabuligan ang mga nagapangasubo? Maghatag sing halimbawa.

⁹Buligi ang mga nagapangasubo. Magluwas nga gin-updan ni Jesus sa paghibi sanday Marta kag Maria, ginpamatian man niya sila kag ginpaumpawan. Puede man naton ini himuon sa mga nagapangasubo. Si Dan, nga isa ka gulang sa Australia, nagsiling: “Sang napatay ang akon asawa, kinahanglan ko ang bulig. Madamo nga mag-asawa ang handa sa pagpamati sa akon bisan ano nga oras. Wala sila nasaw-ahan nga nagahibi ako, kag wala nila ako ginapunggan. Ginabuligan man nila ako sa mga tion nga indi ko mahimo ang pila ka hilikuton, pareho sang pagtinlo sang akon salakyan, pagpanindahan, kag pagluto. Kag pirme sila nagapangamuyo upod sa akon. Matuod gid sila nga mga abyan kag mga utod nga ‘masaligan sa tion sang kalisdanan.’”—Hulu. 17:17.

10. Ano ang natabo suno sa Lucas 19:36-40?

¹⁰ Nag-abot si Jesus sa Jerusalem sang Nisan 9, 33 C.E. Sang malapit na sia sa siudad, nagtipon ang madamo nga tawo kag ginhumlad nila ang ila mga kunop sa dalan nga iya agyan. Ginhimo nila ini para ipakita sa iya nga ginakilala nila sia nga ila Hari. Malipayon gid ang mga tawo. (Basaha ang Lucas 19:36-40.) Gani posible nga nakibot gid ang iya mga disipulo sa masunod nga natabo. “Sang malapit na [si Jesus] sa Jerusalem, gintan-aw niya ang siudad kag ginhibian ini.” Samtang nagahibi si Jesus, gintagna niya ang malain nga matabo sa mga pumuluyo sang Jerusalem.—Luc. 19:41-44.

11. Ngaa ginhibian ni Jesus ang mga pumuluyo sang Jerusalem?

¹¹ Bisan pa madamo nga tawo ang nalipay sa pag-abot ni Jesus, nasubuan sia bangod kabalo sia nga indi pagbatunon sang kalabanan nga Judiyo ang mensahe sang Ginharian. Bangod sini, laglagon ang Jerusalem kag bihagon ang makalampuwas sa sini. (Luc. 21:20-24) Makapasubo gid kay ginsikway si Jesus sang madamo nga tawo suno gid sa ginsiling niya. Ano ang reaksion sang kalabanan nga tawo sa inyo lugar sa mensahe sang Ginharian? Kon diutay lang ang interesado sa kamatuoran, ano ang matun-an mo sa paghibi ni Jesus bangod nabalaka sia sa iya mga ginabantalaan? Binagbinaga ang tatlo pa ka leksion.

12. Ano ang matun-an naton parte kay Jehova sang naghibi si Jesus bangod nabalaka sia sa iya mga ginabantalaan?

¹²Nagaulikid si Jehova sa mga tawo. Ginapahanumdom sa aton sang paghibi ni Jesus nga nagaulikid gid si Jehova sa mga tawo. “Indi niya luyag nga ang bisan sin-o malaglag kundi  luyag niya nga ang tanan mahatagan sang kahigayunan nga maghinulsol.” (2 Ped. 3:9) Subong, mapakita naton nga palangga naton ang aton mga ginabantalaan paagi sa padayon nga pagbulig sa ila nga matun-an ang parte sa maayong balita.—Mat. 22:39.

13-14. Paano ginpakita ni Jesus nga naluoy sia sa mga tawo, kag paano naton mapakita ini nga kinaiya?

¹³Ginhimo ni Jesus ang iya bug-os nga masarangan sa pagbantala. Ginpakita ni Jesus nga palangga niya ang mga tawo paagi sa pagtudlo sa ila sa tanan nga kahigayunan. (Luc. 19:47, 48) Ano ang nagpalig-on sa iya nga himuon ini? Naluoy si Jesus sa mga tawo. May mga tion nga ‘wala na sing kahigayunan nga magkaon’ si Jesus kag ang iya mga disipulo kay madamo nga tawo ang gusto mamati sa iya. (Mar. 3:20) Kag sang gusto sang isa ka tawo nga istoryahon si Jesus sa gab-i, nagsugot si Jesus. (Juan 3:1, 2) Ang kalabanan nga tawo nga namati kay Jesus wala niya nangin disipulo. Pero tanan sila napanaksihan sing maayo. Subong, gusto naton mahatagan sing kahigayunan ang tanan nga mabatian ang maayong balita. (Binu. 10:42) Para mahimo naton ini, posible nga dapat naton bag-uhon ang aton mga paagi sa pagbantala.

¹⁴Mangin handa nga bag-uhon ang imo mga paagi sa pagbantala. Kon indi naton paglainlainon ang aton oras sa pagbantala, posible nga indi naton mabantalaan ang mga tawo nga interesado sa maayong balita. Ang isa ka payunir nga si Matilda nagsiling: “Ginatinguhaan namon sang akon bana nga lainlainon ang amon oras sa pagbantala. Kon aga pa, nagabantala kami sa mga balaligyaan. Kon udto, nagapanaksi kami paagi sa cart kay madamo nga tawo ang ara sa gua. Pagkahapon, nagapamalaybalay kami kay natalupangdan namon nga madamo nga tawo ang ara sa ila balay.” Sa baylo nga pirme lang magbantala sa oras nga kombeniente sa aton, dapat nga handa kita nga bag-uhon ang aton iskedyul para makabantala kita sa tion nga mas madamo kita nga maistorya nga mga tawo. Kon himuon naton ini, malipay gid sa aton si Jehova.

15. Suno sa Lucas 22:39-44, ano ang natabo sang gab-i antes napatay si Jesus?

¹⁵ Sang gab-i sang Nisan 14, 33 C.E., nagkadto si Jesus sa hardin sang Getsemane. Sang  didto na sia, ginsugid niya kay Jehova ang tanan niya nga ginabatyag. (Basaha ang Lucas 22:39-44.) Sadto nga tion, ‘nag-ampo si Jesus nga may mabaskog nga paghibi kag mga luha.’ (Heb. 5:7) Ano ang ginpangamuyo ni Jesus sang gab-i antes sia napatay? Nangamuyo sia nga hatagan sia sang kusog nga makapabilin sia nga matutom kay Jehova kag mahimo niya ang Iya kabubut-on. Ginpamatian ni Jehova ang tinagipusuon nga pangamuyo sang iya Anak kag nagpadala Sia sang anghel para pabakuron sia.

16. Ngaa nasubuan gid si Jesus samtang nagapangamuyo sia sa hardin sang Getsemane?

¹⁶ Ngaa naghibi si Jesus samtang nagapangamuyo sia sa hardin sang Getsemane? Sigurado gid nga nasubuan sia kay hunahunaon sang mga tawo nga ginpasipalahan niya ang ngalan sang Dios. Kabalo man sia nga importante gid nga magpabilin sia nga matutom para mapakabalaan niya ang ngalan sang iya Amay. Kon makaeksperiensia ka sang problema nga magatilaw sang imo katutom kay Jehova, ano ang matun-an mo sa paghibi ni Jesus? Binagbinaga ang tatlo pa ka leksion.

17. Ano ang matun-an naton parte kay Jehova bangod ginsabat niya ang tinagipusuon nga mga pangamuyo ni Jesus?

¹⁷Ginapamatian ni Jehova ang imo mga pangamuyo. Ginpamatian ni Jehova ang tinagipusuon nga mga pangamuyo ni Jesus. Ngaa? Bangod ang pinakaimportante kay Jesus amo ang pagpabilin nga matutom sa iya Amay kag ang pagpakabalaan sa Iya ngalan. Kon ang pinakaimportante sa aton amo ang pagpabilin nga matutom kay Jehova kag ang pagpakabalaan sa iya ngalan, sabton niya ang aton mga pangamuyo nga buligan kita.—Sal. 145:18, 19.

18. Ngaa masiling naton nga pareho si Jesus sa isa ka abyan nga nakahangop gid sa aton?

¹⁸Nahangpan ni Jesus ang imo ginabatyag. Kon nabalaka kita, nalipay gid kita kon may abyan kita nga nakahangop sang aton ginabatyag, ilabi na kon naeksperiensiahan man niya ang aton mga problema. Amo gid sina nga abyan si Jesus. Kabalo sia kon ano ang ginabatyag sang isa nga daw indi kabalo sang iya himuon kag nagakinahanglan sang bulig. Nahangpan niya ang aton mga kaluyahon, kag siguraduhon niya nga mabuligan kita ‘sa tion nga kinahanglan naton ini.’ (Heb. 4:15, 16) Sang ginbuligan si Jesus  sang isa ka anghel sa hardin sang Getsemane, ginbaton niya ang bulig. Dapat batunon man naton ang bulig ni Jehova. Posible nga paagi ini sa isa ka publikasyon, video, pamulongpulong, ukon pagbisita sang gulang ukon hamtong nga utod.

19. Paano ka mangin mabakod kon makaeksperiensia ka sang problema nga nagatilaw sang imo katutom sa Dios? Maghatag sing halimbawa.

¹⁹Hatagan ka ni Jehova sang “paghidait sang Dios.” Paano kita pabakuron ni Jehova? Kon mangamuyo kita, mabaton naton “ang paghidait sang Dios nga labaw sa tanan nga paghangop.” (Fil. 4:6, 7) Ang paghidait nga ginahatag ni Jehova magabulig sa aton nga magkalma kag makahunahuna sing maayo. Naeksperiensiahan ini sang isa ka sister nga si Luz. Nagsiling sia: “Pirme ako nasubuan kag pamatyag ko nagaisahanon lang ako. Gani nagabatyag ako kon kaisa nga indi ako palangga ni Jehova. Pero kon mabatyagan ko ini, ginasugid ko ini dayon kay Jehova. Nagamag-an ang akon pamatyag kon nagapangamuyo ako.” Ginapakita sini nga eksperiensia nga mangin matawhay ang aton panghunahuna paagi sa pagpangamuyo.

20. Ano nga mga leksion ang aton natun-an sa paghibi ni Jesus?

²⁰ Madamo gid kita sang natun-an sa paghibi ni Jesus, kag makapaumpaw gid ini. Ginpahanumdom kita sini nga dapat naton buligan ang aton mga abyan nga nagapangasubo, kag dapat kita magsalig kay Jehova kag kay Jesus nga buligan nila kita kon napatyan kita sang pinalangga. Natun-an naton nga ginpakita ni Jehova nga Dios kag ni Jesucristo ang kaluoy, nga isa ka dalayawon nga kinaiya. Gani napalig-on kita nga ipakita man ang kaluoy kon nagabantala kita kag nagatudlo sa iban. Kag napaumpawan kita kay natun-an naton nga kabalo si Jehova kag ang iya pinalangga nga Anak sang aton ginabatyag, nahangpan nila ang aton mga kaluyahon, kag gusto nila kita buligan nga makabatas. Kabay pa nga padayon naton nga iaplikar ang aton natun-an asta sa tion nga tumanon na ni Jehova ang iya matahom nga promisa nga “pahiran niya ang tagsa ka luha sa [aton] mga mata.”—Bug. 21:4.