1. Sa ano nga mga tion makaupod naton si Jehova?

NALIPAY kita kon kaupod naton ang mga tawo nga palangga naton. Halimbawa, gusto gid sang nagapalanggaanay nga mag-asawa ang mga tion nga magkaupod sila nga duha. Nalipay ang mga pamatan-on kon kaupod nila ang ila mga abyan. Kag nalipay kita tanan kon kaupod naton ang aton mga kauturan. Pero ang pinakaimportante sa aton amo ang tion nga kaupod naton ang aton Dios. Kaupod naton sia kon nagapangamuyo kita sa iya, nagabasa kita sang iya Pulong, kag nagapamalandong kita sang iya katuyuan kag dalayawon nga mga kinaiya. Hamili gid ang tion nga kaupod naton si Jehova.—Sal. 139:17.

2. Ngaa indi mahapos nga makakita sang tion nga makaupod si Jehova?

² Gusto gid naton nga may tion kita nga makaupod si Jehova, pero indi ini pirme mahapos himuon. Masako kita, gani nabudlayan kita nga mahatagan sang tion ang aton pagsimba kay Jehova. Daku nga tion ang ginagamit naton sa aton obra, pamilya, kag iban pa nga hilikuton, gani posible nga nagabatyag kita nga wala na kita sang tion sa pagpangamuyo, pagtuon, ukon pagpamalandong.

3. Ano ang isa pa ka rason nga posible nga mag-ubos sang aton tion?

³ May isa pa ka rason nga posible nga mag-ubos sang aton tion nga indi naton matalupangdan. Kon indi kita maghalong, posible nga maubos ang aton tion sa mga hilikuton nga indi man malain, gani wala na kita sang tion nga magamit para mangin suod pa gid kay Jehova. Halimbawa, makabulig sa aton ang paglingawlingaw para makarelaks kita. Posible nga maayo man ang aton kalingawan, pero kon madamo nga tion ang ginagamit naton sa sini, diutay na lang nga tion ang mabilin para sa pagsimba  kay Jehova. Gani indi naton dapat paghimuon nga pinakaimportante sa aton kabuhi ang kalingawan.—Hulu. 25:27; 1 Tim. 4:8.

4. Ano ang binagbinagon naton?

⁴ Sa sini nga artikulo, binagbinagon naton kon ngaa dapat kabalo kita kon ano ang pinakaimportante sa aton kabuhi. Binagbinagon man naton kon paano naton magamit sa pinakamaayo nga paagi ang tion nga kaupod naton si Jehova, kag ang mga benepisyo kon ginahimo naton ini.

5. Kon nagadesisyon ang isa ka pamatan-on kon ano ang pinakamaayo niya nga himuon sa iya kabuhi, paano makabulig ang laygay sa Efeso 5:15-17?

⁵Pilia ang pinakamaayo nga kabuhi. Sa masami, nabalaka ang mga pamatan-on kon ano ang pinakamaayo nila nga himuon samtang pamatan-on pa sila. Mahimo palig-unon sila sang ila mga maestro kag maestra kag sang mga miembro sang ila pamilya nga indi Saksi nga mag-eskwela sa kolehiyo para makakita sila sang maayo nga obra nga daku ang sueldo. Kon himuon ini sang mga pamatan-on, posible nga ubuson sini ang ila tion. Pero mahimo man sila palig-unon sang ila mga ginikanan kag sang ila mga abyan sa kongregasyon nga gamiton ang ila kabuhi sa pag-alagad kay Jehova. Ano ang makabulig sa isa ka pamatan-on nga nagapalangga kay Jehova nga makahimo sang pinakamaayo nga desisyon? Makabulig sa iya ang pagbasa sa Efeso 5:15-17 kag ang pagpamalandong sa sini. (Basaha.) Pagkatapos niya ini mabasa, mahimo niya pamangkuton ang iya kaugalingon: ‘Ano “ang kabubut-on ni Jehova”? Ano nga desisyon ang makapahalipay sa iya? Ano nga desisyon ang makabulig sa akon para magamit ko sing maayo ang akon tion?’ Tandai nga “ang mga adlaw malaut,” kag malapit na ang katapusan sang kalibutan nga ginagamhan ni Satanas. Gani maalamon gid nga gamiton naton ang aton kabuhi sa mga hilikuton nga makapahalipay kay Jehova.

6. Ano ang ginpili ni Maria, kag ngaa maayo gid ang iya ginpili?

⁶Hibalua kon ano ang pinakaimportante. Kon kaisa, para magamit naton sing maayo ang aton tion, posible nga kinahanglan naton magpili sa duha ka hilikuton nga pareho man nga maayo. Mahangpan naton ini sa ginhimo ni Jesus sang nagbisita sia kanday Maria kag Marta. Nalipay gid ang maabiabihon nga si Marta nga nagbisita sa ila si Jesus, gani naghanda sia sang madamo nga pagkaon. Pero nagpungko ang iya utod nga si Maria malapit kay Jesus kag namati sia sa iya mga ginatudlo. Indi sala ang ginhimo ni Marta, pero nagsiling si Jesus nga “ginpili ni Maria ang pinakamaayo nga bahin.” (Luc. 10:38-42, footnote) Sang ulihi, posible nga nalipatan na ni Maria ang ila mga ginkaon sadto nga tion, pero sigurado kita nga wala gid niya nalipatan ang mga natun-an niya kay Jesus. Ginpabaloran gid ni Maria ang malip-ot nga tion nga nakaupod niya si Jesus, gani dapat man naton pabaloran ang tion nga kaupod naton si Jehova. Paano naton magamit sing maayo ini nga tion?

7. Ngaa importante gid ang pagpangamuyo, pagtuon, kag pagpamalandong?

⁷Dapat naton tandaan nga bahin sang aton pagsimba ang pagpangamuyo, pagtuon, kag pagpamalandong. Kon nagapangamuyo kita, nagapakig-istorya kita sa aton Amay sa langit, nga nagapalangga gid sa aton. (Sal. 5:7) Kon nagatuon kita sang Biblia, ginadugangan naton ang aton “ihibalo tuhoy sa Dios,” nga amo ang pinakamaalam sa tanan. (Hulu. 2:1-5) Kon nagapamalandong kita, ginahunahuna naton sing maayo ang dalayawon nga mga kinaiya ni  Jehova kag ang iya dalayawon nga mga promisa para sa aton kag para sa tanan nga tawo. Amo ini ang pinakamaayo nga paagi sang paggamit sang aton tion. Pero ano ang himuon naton para magamit naton sing maayo ang aton limitado nga tion?

8. Ano ang matun-an naton sa paggamit ni Jesus sang iya tion sang ara sia sa kamingawan?

⁸Mangita sang malinong nga lugar. Binagbinaga ang halimbawa ni Jesus. Antes ginsugdan ni Jesus ang iya pagministeryo sa duta, nagkadto sia sa kamingawan kag nagtener sia didto sing 40 ka adlaw. (Luc. 4:1, 2) Sa sining malinong nga lugar, makapangamuyo si Jesus kay Jehova kag mapamalandungan niya ang kabubut-on sang iya Amay. Nakabulig ini kay Jesus nga mangin handa sa mga pagtilaw nga iya maeksperiensiahan. Ano ang matun-an mo sa halimbawa ni Jesus? Kon daku ang inyo pamilya, posible nga mabudlay makakita sang malinong nga lugar sa inyo balay. Gani mas maayo nga magkadto ka sa iban nga lugar nga malinong. Amo ini ang ginahimo ni Julie kon gusto niya makaupod si Jehova paagi sa pagpangamuyo. Nagaistar sila sang iya bana sa gamay nga apartment sa France, kag mabudlay makakita sang tion nga mag-isahanon kag wala sing isturbo. “Gani nagalakat ako pakadto sa park kada adlaw,” siling ni Julie. “Puede ako didto mag-isahanon, kag makapokus ako kon ano gid ang gusto ko iistorya kay Jehova.”

9. Bisan pa masako si Jesus, paano niya ginpakita nga ginpabaloran niya ang iya kaangtanan kay Jehova?

⁹ Masako gid ang kabuhi ni Jesus. Sa tion sang iya pagministeryo sa duta, ginasundan sia sang madamo nga tawo sa kada lugar nga ginakadtuan niya. Gusto sang kada isa sa ila nga hatagan niya sila sang tion. Isa ka bes, “ang tanan nga tawo sa siudad nagtipon sa atubangan sang balay” para makita sia. Bisan pa masako si Jesus, ginsigurado niya nga may tion sia nga makapangamuyo kay Jehova. Antes magbutlak ang adlaw, nagkadto sia sa “isa ka lugar agod mag-isahanon” para mangamuyo sa iya Amay.—Mar. 1:32-35.

10-11. Suno sa Mateo 26:40, 41, ano ang importante gid nga ginlaygay ni Jesus sa iya mga disipulo sang ara sila sa hardin sang Getsemane, pero ano ang ginhimo nila?

¹⁰ Sang gab-i antes napatay si Jesus, kag natapos na ang iya pagministeryo, nangita sia liwat sang isa ka malinong nga lugar para magpamalandong kag mangamuyo. Gani nagkadto sia sa hardin sang Getsemane. (Mat. 26:36) Sadto nga tion, may importante gid nga ginlaygay si Jesus sa iya mga disipulo parte sa pagpangamuyo.

¹¹ Binagbinaga ang natabo. Posible nga pasado na alas dose sang gab-i sang nag-abot sila sa hardin sang Getsemane. Ginsilingan ni Jesus ang mga apostoles nga “padayon nga magbantay.” Dayon nagkadto sia sa uluunhan para mangamuyo. (Mat. 26:37-39) Pero samtang  nagapangamuyo sia, natulugan sila. Sang naabtan niya sila nga nagakatulog, ginpalig-on niya sila liwat nga ‘magpadayon sa pagbantay kag sa pagpangamuyo.’ (Basaha ang Mateo 26:40, 41.) Nahangpan ni Jesus nga na-stress gid sila sa ila mga naeksperiensiahan kag kapoy gid sila. Naluoy si Jesus sa ila kag nagsiling sia nga “ang unod maluya.” Duha ka beses pa nga naglakat si Jesus sa uluunhan para mangamuyo. Pero sa kada tion nga magbalik sia, naabtan niya ang iya mga disipulo nga nagakatulog kag wala nagapangamuyo.—Mat. 26:42-45.

12. Ano ang puede naton himuon kon grabe gid ang aton stress ukon kakapoy nga daw indi na kita makapangamuyo?

¹²Magpili sang husto nga tion. Kon kaisa, posible nga grabe gid ang imo stress ukon kakapoy nga daw indi ka na makapangamuyo. Indi lang ikaw ang nakaeksperiensia sini. Ano ang puede mo himuon? Natalupangdan sang iban nga makapangamuyo sila sing malawig kay Jehova kon indi pa sila kapoy gid. Gani ginahimo nila ini sa mas temprano nga oras imbes nga gab-i na gid katama. Natalupangdan naman sang iban nga may mga posisyon nga makapangamuyo sila sing maayo. Halimbawa, nagapungko sila ukon nagaluhod samtang nagapangamuyo. Pero ano abi kon indi ka kabalo kon ano ang imo ipangamuyo kay grabe gid ang imo kabalaka, ukon wala ka gana mangamuyo kay grabe gid ang pagluya sang imo buot? Isugid kay Jehova kon ano gid ang imo ginabatyag. Makasalig ka nga mahangpan ka sang aton maluluy-on nga Amay.—Sal. 139:4.

13. Paano posible nga makaisturbo ang aton mga gadyet kon nagapangamuyo kita, nagatuon, ukon naga-attend sa mga miting?

¹³Panikasugi nga indi ka maisturbo. Indi lang pangamuyo ang paagi para mapabakod naton ang aton kaangtanan kay Jehova. Makabulig man ang pagtuon sa Pulong sang Dios kag ang pag-attend sa mga miting sang kongregasyon para mangin suod pa gid kita sa Dios. Ano ang puede mo himuon para magamit mo sing maayo ang imo tion kon nagatuon ka kag kon naga-attend ka sa mga miting sang kongregasyon? Pamangkuta ang imo kaugalingon, ‘Ano sa masami ang nagaisturbo sa akon sa tion sang miting ukon sa akon pagtuon?’ Posible nga maisturbo ka sang mga tawag, email, ukon text sa imo cell phone ukon iban pa nga gadyet. Subong, binilyon ka tawo ang may mga gadyet. Ang pila ka researcher nagasiling nga bisan ang cell phone  lang makaisturbo na sa aton pagpokus. Ang isa ka propesor sang psychology nagsiling: “Indi ka makapokus sa imo ginahimo, kay may iban ka nga ginapamensar.” Antes magsugod ang mga asembleya kag kombension, masami nga ginapangabay kita nga i-adjust ang aton mga gadyet para indi ini makaisturbo sa iban. Puede man naton ini himuon sa aton mga gadyet bisan nagaisahanon kita para indi kita sini maisturbo sa tion nga kaupod naton si Jehova.

14. Suno sa Filipos 4:6, 7, paano kita buligan ni Jehova nga makapokus?

¹⁴Pangabaya si Jehova nga buligan ka nga makapokus. Kon natalupangdan mo nga nagalagaw ang imo hunahuna sa tion sang imo pagtuon ukon sang miting sang kongregasyon, pangabaya si Jehova nga buligan ka. Kon may ginakabalak-an ka, posible nga nabudlayan ka nga indi ini pagpamensaron kag magpokus sa Pulong sang Dios. Pero importante gid nga magpokus ka. Mangamuyo nga hatagan ka sang paghidait nga magabantay sang imo tagipusuon kag “ikasarang sa paghunahuna.”—Basaha ang Filipos 4:6, 7.

15. Ano ang isa ka benepisyo kon nagahatag kita sang tion nga makaupod si Jehova?

¹⁵ Makabenepisyo ka gid kon hatagan mo sang tion ang pagpakig-istorya kay Jehova, pagpamati sa iya, kag pagpamalandong parte sa iya. Ano ini nga mga benepisyo? Una, makahimo ka sang mas maayo nga mga desisyon. Ang Biblia nagapasalig sa aton nga “ang tawo nga nagaupod sa maalamon mangin maalamon man.” (Hulu. 13:20) Gani magaalam ka pa gid kon kaupod mo si Jehova kay sia ang pinakamaalam sa tanan. Mas mahangpan mo pa gid kon ano ang dapat mo himuon para malipay sia sa imo kag kon ano ang indi mo dapat himuon para indi sia masubuan.

16. Ngaa magauswag ang aton ikasarang sa pagtudlo sa iban kon nagahatag kita sang tion nga makaupod si Jehova?

¹⁶ Ikaduha, magauswag pa gid ang imo ikasarang sa pagtudlo sa iban. Kon gina-Bible study naton ang isa ka tawo, gusto gid naton sia buligan nga mangin suod kay Jehova. Kon pirme kita nagapangamuyo sa aton Amay sa langit kag nagatuon parte sa iya, mas palanggaon pa gid naton sia. Gani mabuligan pa gid naton ang aton Bible study nga palanggaon man sia. Binagbinaga ang halimbawa ni Jesus. Kon ginalaragway niya ang iya Amay, mabatyagan gid sang iya matutom nga mga disipulo nga palangga niya ang iya Amay. Gani ginpalangga man nila si Jehova.—Juan 17:25, 26.

17. Paano makabulig ang pagpangamuyo kag pagtuon para magbakod ang aton pagtuo?

¹⁷ Ikatlo, magabakod pa gid ang imo pagtuo. Binagbinaga ang epekto sa imo kon ginapangabay mo ang Dios nga giyahan ka, paumpawan, ukon buligan. Sa kada tion nga ginasabat ni Jehova  ang imo mga pangamuyo, mas nagabakod pa gid ang imo pagtuo sa iya. (1 Juan 5:15) Ano pa ang makabulig para magbakod ang imo pagtuo? Ang personal nga pagtuon. Kay man, “ang tawo nagatuo lang pagkatapos niya mabatian ang pulong.” (Roma 10:17) Pero para magbakod ang aton pagtuo, indi bastante nga magtuon lang kita. Ano pa ang dapat naton himuon?

18. Maghatag sing halimbawa kon ngaa dapat kita magpamalandong.

¹⁸ Dapat naton pamalandungan ang aton natun-an. Binagbinaga ang eksperiensia sang nagsulat sang Salmo 77. Nasubuan gid sia kay pamatyag niya naakig si Jehova sa iya kag sa pareho niya nga mga Israelinhon. Bangod sini, indi sia makatulog. (Bersikulo 2-8) Ano ang iya ginhimo? Nagsiling sia kay Jehova: “Pamalandungan ko ang tanan mo nga binuhatan kag binagbinagon ko ang imo hinimuan.” (Bersikulo 12) Nabal-an sang salmista ang mga ginhimo ni Jehova sang una para sa Iya katawhan. Pero bangod nabalaka sia, nagpalibog sia: “Nalipat na bala ang Dios sa pagpakita sing kaayo, ukon indi na bala sia magpakita sing kaluoy bangod sang iya kaakig?” (Bersikulo 9) Ginpamalandungan niya ang mga ginhimo ni Jehova kag ang kaluoy nga ginpakita sang Dios sang una. (Bersikulo 11) Ano ang resulta? Nakumbinsi ang salmista nga indi gid pagpabay-an ni Jehova ang Iya katawhan. (Bersikulo 15) Kon pamalandungan mo man ang mga ginhimo ni Jehova para sa iya katawhan kag ang mga ginhimo niya para sa imo, magabakod pa gid ang imo pagtuo.

19. Ano pa ang benepisyo kon nagahatag kita sang tion nga makaupod si Jehova?

¹⁹ Ikap-at, kag ang pinakaimportante, mas palanggaon mo pa gid si Jehova. Mapalig-on kita sang gugma nga tumanon si Jehova, magsakripisyo para malipay sia sa aton, kag batason ang bisan ano nga pagtilaw. Mapalig-on man kita sang iban nga kinaiya nga himuon ini, pero ang gugma amo gid ang nagabulig sa aton. (Mat. 22:37-39; 1 Cor. 13:4, 7; 1 Juan 5:3) Wala na sang mas hamili pa sangsa mangin suod naton nga abyan si Jehova nga nagapalangga sa aton kag palangga man naton.—Sal. 63:1-8.

20. Ano ang plano mo nga himuon para masigurado mo nga may tion ka gid para kay Jehova?

²⁰ Tandai nga bahin sang aton pagsimba ang pagpangamuyo, pagtuon, kag pagpamalandong. Pareho kay Jesus, mangita sang malinong nga lugar para makaupod si Jehova, kag himua ini sa husto nga tion. Panikasugi nga indi ka maisturbo. Pangabaya si Jehova nga buligan ka nga makapokus kon nagapangamuyo ka, nagatuon, ukon naga-attend sa mga miting. Kon gamiton mo sing maayo ang imo tion subong, padyaan ka ni Jehova sing kabuhi nga wala sing katapusan sa bag-o nga kalibutan sang Dios.—Mar. 4:24.