1-2. (a) San-o naton mas labi nga madumduman ang aton pinalangga nga napatay? (b) Ano ang ginsugdan ni Jesus sang gab-i antes sia napatay?

BISAN pa madugay na nga napatay ang aton mga pinalangga, madumduman gihapon naton sila. Madamo kita sing madumduman parte sa ila, ilabi na gid kon petsa sang ila kamatayon.

² Kada tuig, nalakip kita sa minilyon nga nagatipon sa bilog nga kalibutan para saulugon ang anibersaryo sang kamatayon ni Jesucristo nga palangga gid naton. (1 Ped. 1:8) Nagatipon kita para dumdumon ang paghatag ni Jesus sang iya kabuhi bilang gawad para luwason kita sa sala kag kamatayon. (Mat. 20:28) Ang matuod, gusto ni Jesus nga dumdumon sang iya mga sumulunod ang iya kamatayon. Sang gab-i antes sia napatay, ginsugdan niya ang isa ka okasyon, nga isa ka pinasahi nga panihapon. Dayon nagsugo sia: “Padayon ninyo nga himua ini sa pagdumdom sa akon.”—Luc. 22:19.

3. Ano ang binagbinagon naton sa sini nga artikulo?

³ Sa mga naga-attend sa Memoryal sang kamatayon sang Cristo, pila lang ang may paglaum nga magkabuhi sa langit. Pero ara man ang minilyon nga may paglaum nga magkabuhi sa duta. Sa sini nga artikulo, binagbinagon naton kon ngaa excited sa pag-attend sa Memoryal kada tuig ining duha ka grupo. Binagbinagon man naton ang mga benepisyo kon naga-attend kita. Una naton nga binagbinagon ang pila ka rason kon ngaa naga-attend ang mga hinaplas.

4. Ngaa nagakaon sang tinapay kag nagainom sang alak ang mga hinaplas sa tion sang Memoryal?

⁴ Kada tuig, ang mga hinaplas nga naga-attend sa Memoryal nagakaon sang tinapay kag nagainom sang alak. Ngaa? Para masabat  ini, binagbinaga ang natabo sang gab-i antes napatay si Jesus. Pagkatapos masaulog ang Paskua, ginsugdan ni Jesus ang isa ka okasyon nga gintawag sang ulihi nga Panihapon sang Ginuo. Ginpasa niya ang tinapay kag ang alak sa iya 11 ka matutom nga mga apostoles kag ginsilingan sila nga magkaon kag mag-inom. Ginsambit sa ila ni Jesus ang parte sa duha ka katipan, ukon kasugtanan, nga amo ang bag-o nga katipan kag ang katipan para sa Ginharian. * (Luc. 22:19, 20, 28-30) Paagi sa sini nga mga katipan, posible na nga mangin mga hari kag saserdote sa langit ang mga apostoles kag ang iban pa nga limitado lang ang kadamuon. (Bug. 5:10; 14:1) Ang mga hinaplas nga ari pa sa duta, nga bahin sining duha ka katipan, amo lang ang puede magkaon sang tinapay kag mag-inom sang alak sa tion sang Memoryal.

5. Ano ang nabal-an sang mga hinaplas parte sa paglaum nga ginhatag sa ila?

⁵ Ari ang isa pa ka rason kon ngaa excited sa pag-attend sa Memoryal ang mga hinaplas: Nagahatag ini sa ila sang kahigayunan nga pamalandungan ang ila paglaum. Dalayawon gid ang paglaum nga ginhatag ni Jehova sa ila. Magakabuhi sila sa langit bilang imortal kag indi madinulunton. Magagahom sila upod sa ginbanhaw nga si Jesucristo kag upod sa iban pa nga miembro sang 144,000. Kag labaw sa tanan, makita nila si Jehova nga Dios. (1 Cor. 15:51-53; 1 Juan 3:2) Kabalo ang mga hinaplas nga may paglaum sila nga mabaton ini nga mga pribilehiyo sa langit. Pero para makapalangit sila, dapat sila mangin matutom asta sa ila kamatayon. (2 Tim. 4:7, 8) Nalipay gid ang mga hinaplas kon ginapamalandungan nila ang ila paglaum nga magkabuhi sa langit. (Tito 2:13) Kamusta naman ang “iban nga mga karnero”? (Juan 10:16) Ano ang pila ka rason kon ngaa naga-attend sila sa Memoryal?

6. Ngaa naga-attend sa Memoryal kada tuig ang iban nga mga karnero?

⁶ Nalipay gid mag-attend sa Memoryal ang iban nga mga karnero, pero wala sila nagakaon sang tinapay kag nagainom sang alak. Sang 1938, gin-agda sa pinakauna nga tion ang mga may paglaum nga magkabuhi sa duta nga mag-attend sa Memoryal. Ang Marso 1, 1938, nga The Watchtower nagsiling: “Nagakadapat lang kag nagakaigo nga mag-attend sa sini nga okasyon ang [iban nga mga karnero] . . . May rason man sila nga malipay sa sini nga tion.” Nalipay ang iban nga mga karnero nga mag-attend sa Memoryal. Daw pareho sila sang mga bisita nga gin-imbitar sa isa ka kasal nga nalipay gid sa pag-attend.

7. Ngaa excited ang iban nga mga karnero nga mabatian ang pamulongpulong sa Memoryal?

⁷Ginapamalandungan man sang iban nga mga karnero ang ila paglaum. Excited sila nga mabatian ang pamulongpulong sa Memoryal. Nagapokus ini sa pagahimuon sang Cristo kag sang 144,000 para sa matutom nga mga tawo sa tion sang Isa ka Libo ka Tuig nga Paggahom. Si Jesucristo ang Hari sining 144,000 nga kaupod niya nga mga manuggahom sa langit, kag magabulig sila para mangin paraiso ang duta kag para mangin perpekto ang matinumanon nga mga tawo. Nalipay gid ang minilyon nga iban nga mga karnero nga naga-attend sa Memoryal nga imadyinon ang katumanan sang mga tagna sa Biblia, pareho sang mga tagna sa Isaias 35:5, 6; 65:21-23; kag Bugna 21:3, 4. Paagi sa pag-imadyin nga ara na sila sa bag-o nga kalibutan kaupod sang ila mga pinalangga,  nagabakod ang ila pagsalig nga matuman gid ang ila ginalauman sa palaabuton kag nagapalig-on ini sa ila nga indi gid mag-untat sa pag-alagad kay Jehova.—Mat. 24:13; Gal. 6:9.

8. Ano ang isa pa ka rason kon ngaa naga-attend sa Memoryal ang iban nga mga karnero?

⁸ Binagbinaga ang isa pa ka rason kon ngaa naga-attend sa Memoryal ang iban nga mga karnero. Gusto nila ipakita nga palangga nila ang mga hinaplas kag ginasuportahan nila sila. Gintagna sang Pulong sang Dios nga magabuligay ang mga hinaplas kag ang mga may paglaum nga magkabuhi sa duta. Binagbinagon naton ang pila ka tagna parte sa sini kag kon paano ini natuman.

9. Paano ginalaragway sang tagna sa Zacarias 8:23 ang ginabatyag sang iban nga mga karnero sa mga hinaplas?

⁹ Basaha ang Zacarias 8:23. Kanami gid sang paglaragway sini nga tagna parte sa ginabatyag sang iban nga mga karnero sa ila mga kauturan nga hinaplas. Ang “isa ka Judiyo” kag ang tinaga nga “ninyo” pareho nga nagapatuhoy sa mga hinaplas nga ari pa sa duta. (Roma 2:28, 29) Ang “napulo ka tawo halin sa tanan nga lenguahe sang mga pungsod” nagapatuhoy sa iban nga mga karnero. ‘Nagauyat’ sila sa mga hinaplas. Buot silingon, nagaunong sila sa mga hinaplas kag nagaupod sa ila sa pagsimba sa Dios sa husto nga paagi. Gani sa gab-i nga saulugon ang Memoryal, ginapakita sang iban nga mga karnero nga palangga nila ang mga hinaplas paagi sa pag-upod sa ila sa sini nga okasyon.

10. Paano gintuman ni Jehova ang tagna sa Ezequiel 37:15-19, 24, 25?

¹⁰ Basaha ang Ezequiel 37:15-19, 24, 25. Gintuman ni Jehova ini nga tagna paagi sa paghiusa sa mga hinaplas kag sa iban nga mga karnero, kag indi gid maguba ini nga paghiusa. Ginsambit sa tagna ang parte sa duha ka lipak. Ang mga may paglaum nga magkabuhi sa langit pareho sa lipak “para kay Juda” (sa sini nga tribo ginpili ang mga hari sang Israel), kag ang mga may paglaum nga magkabuhi sa duta pareho sa lipak “ni Efraim.” * Tingbon ni Jehova ining duha ka grupo para mangin “isa na lang sila ka lipak.” Buot silingon, mahiusa sila sa pag-alagad sa isa nila ka Hari, nga amo si Cristo Jesus. Kada tuig, naga-attend sa Memoryal ang mga hinaplas kag ang iban nga mga karnero, indi bilang duha ka grupo, kundi bilang “isa ka panong nga may isa ka manugbantay.”—Juan 10:16.

11. Ano ang panguna nga paagi nga ginasuportahan sang “mga karnero” nga ginsambit sa Mateo 25:31-36, 40 ang mga utod sang Cristo?

¹¹ Basaha ang Mateo 25:31-36, 40. Ang “mga karnero” nga ginsambit ni Jesus nagapatuhoy sa matarong nga mga tawo sa tion sang katapusan nga may paglaum nga magkabuhi sa duta. Sila man ang iban nga mga karnero. Mainunungon nila nga ginasuportahan ang hinaplas nga mga utod sang Cristo nga ari pa sa duta. Ang panguna nga paagi nga ginahimo nila ini amo ang pagbulig sa mga hinaplas nga matuman ang ila mabug-at nga responsibilidad, nga amo ang pagbantala kag pagtudlo sa mga tawo sa bilog nga kalibutan para mangin disipulo sila.—Mat. 24:14; 28:19, 20.

12-13. Ano pa ang pila ka paagi nga ginasuportahan sang iban nga mga karnero ang mga utod sang Cristo?

¹² Kada tuig, ginapakita sang iban nga mga karnero nga ginasuportahan nila ang mga utod sang Cristo paagi sa paghimo sang ila bug-os nga masarangan sa pag-agda sa mga interesado sa pag-attend sa Memoryal sa bilog nga kalibutan. Ginaumpisahan nila ang pag-agda pila ka semana antes sang Memoryal. (Tan-awa ang kahon nga “ Maghanda Para sa Tion sang Memoryal.”) Nagabulig man sila sa paghanda para  masigurado nga masaulog ang Memoryal sa tanan nga kongregasyon sa bilog nga kalibutan. Ginahimo nila ini bisan pa wala sing hinaplas ang kalabanan nga kongregasyon. Nalipay gid ang iban nga mga karnero sa pagbulig sa mga utod sang Cristo sa sini nga mga paagi. Kabalo ini nga mga karnero kon paano ginatamod ni Jesus ang ila ginahimo para sa iya mga utod nga hinaplas. Para kay Jesus, ginahimo nila ini sa iya.—Mat. 25:37-40.

¹³ Sa langit man ukon sa duta ang aton paglaum, ano pa ang iban nga rason kon ngaa naga-attend kita tanan sa Memoryal?

14. Paano ginpakita ni Jehova kag ni Jesus nga palangga gid nila kita?

¹⁴Nagapasalamat gid kita sa gugma nga ginpakita ni Jehova kag ni Jesus sa aton. Madamo sing ginhimo si Jehova para ipakita nga palangga niya kita. Pero ang pinakadalayawon gid sa sini amo ang pagpadala niya sang iya pinalangga nga Anak para mag-antos kag mapatay para sa aton. (Juan 3:16) Kag ginpakita man ni Jesus nga palangga gid niya kita paagi sa kinabubut-on nga paghatag sang iya kabuhi para sa aton. (Juan 15:13) Indi gid naton mabalusan ang gugma nga ginpakita ni Jehova kag ni Jesus sa aton. Pero mapakita naton nga ginapasalamatan naton sila paagi sa aton mga ginahimo kada adlaw. (Col. 3:15) Kag naga-attend kita sa Memoryal kay gusto naton pamalandungan ang ila gugma sa aton kag gusto man naton ipakita ang aton gugma sa ila.

15. Ngaa ginapabaloran gid sang mga hinaplas kag sang iban nga mga karnero ang regalo nga gawad?

¹⁵Ginapabaloran gid naton ang regalo nga gawad. (Mat. 20:28) Ginapabaloran gid sang mga hinaplas ang gawad bangod nangin posible ang ila dalayawon nga paglaum paagi sa sini. Bangod nagatuo sila sa halad sang Cristo, ginkabig sila ni Jehova nga matarong kag gin-adoptar niya sila bilang iya mga anak. (Roma 5:1; 8:15-17, 23) Nagapasalamat man ang iban nga mga karnero sa gawad. Bangod nagatuo sila sa halad sang Cristo, matinlo sila sa panulok sang Dios, makahimo sila sang sagrado nga pag-alagad sa iya, kag may paglaum sila nga ‘makagua sa dakung kapipit-an.’ (Bug. 7:13-15) Ang pag-attend sa Memoryal kada tuig amo ang isa ka paagi nga ginapakita sang mga hinaplas kag sang iban nga mga karnero nga nagapasalamat sila sa gawad.

16. Ano ang isa pa ka rason kon ngaa naga-attend kita sa Memoryal?

¹⁶ May isa pa ka rason kon ngaa naga-attend kita sa Memoryal. Gusto naton tumanon si Jesus. Ano man ang aton paglaum sa palaabuton, gusto gid sang kada isa sa aton nga tumanon ang ginsugo ni Jesus sang gab-i nga ginsugdan niya ang Memoryal. Nagsiling sia: “Padayon ninyo nga himua ini sa pagdumdom sa akon.”—1 Cor. 11:23, 24.

17. Paano kita ginabuligan sang Memoryal nga mangin suod pa gid kay Jehova?

¹⁷Nagasuod pa gid kita kay Jehova. (Sant. 4:8) Natun-an naton nga ang Memoryal nagahatag sa aton sang kahigayunan nga pamalandungan ang paglaum nga ginhatag sa aton ni Jehova kag ang tumalagsahon nga gugma nga ginpakita niya sa aton. (Jer. 29:11; 1 Juan 4:8-10) Kon ginapamalandungan naton nga sigurado gid ang aton paglaum sa palaabuton kag indi gid mag-untat ang Dios sa pagpalangga sa aton, mas higugmaon pa gid naton si Jehova kag magabakod ang aton kaangtanan sa iya.—Roma 8:38, 39.

18. Kon pamalandungan naton ang halimbawa ni Jesus, mapalig-on kita sini nga himuon ang ano?

¹⁸Nagapalig-on ini sa aton nga ilugon ang halimbawa ni Jesus. (1 Ped. 2:21) Mga pila ka  adlaw antes sang Memoryal, nagapokus kita sa mga kasaysayan sa Biblia parte sa katapusan nga semana ni Jesus sa duta, parte sa iya kamatayon, kag parte sa iya pagkabanhaw. Dayon sa gab-i nga saulugon naton ang Memoryal, ipahanumdom sa aton sang pamulongpulong ang parte sa gugma ni Jesus sa aton. (Efe. 5:2; 1 Juan 3:16) Kon basahon naton ang parte sa ginhimo nga sakripisyo ni Jesus kag kon pamalandungan naton ini, mapalig-on kita sini nga “magpadayon sa paglakat subong sang paglakat sinang isa.”—1 Juan 2:6.

19. Paano kita makapabilin sa gugma sang Dios?

¹⁹Ginapalig-on kita sini nga magpabilin sa gugma sang Dios. (Jud. 20, 21) Makapabilin kita sa gugma sang Dios kon himuon naton ang aton bug-os nga masarangan nga tumanon sia, pakabalaanon ang iya ngalan, kag pahalipayon sia. (Hulu. 27:11; Mat. 6:9; 1 Juan 5:3) Gusto naton ipakita sa aton mga ginahimo kada adlaw nga daw nagasiling kita kay Jehova, ‘Gusto ko magpabilin sa imo gugma asta sa wala sing katapusan.’ Ginapalig-on kita sa tion sang Memoryal nga himuon ini sa bug-os naton nga masarangan.

20. Ano ang mga rason kon ngaa naga-attend kita sa Memoryal?

²⁰ Sa langit man ukon sa duta ang aton paglaum nga mabuhi sing wala sing katapusan, may maayo kita nga mga rason sa pag-attend sa Memoryal. Kada tuig, kon nagatipon kita sa sini nga okasyon, ginadumdom naton ang kamatayon ni Jesucristo nga palangga naton. Labaw sa tanan, ginadumdom naton nga palangga gid kita ni Jehova kay ginhatag niya ang iya Anak bilang gawad, kag wala na sing makalabaw sa iya ginhimo. Sa sini nga tuig, saulugon naton ang Memoryal sa gab-i sang Biernes, Abril 15, 2022. Palangga naton si Jehova kag ang iya Anak. Gani sa anibersaryo sang kamatayon ni Jesus, wala na sing mas importante pa nga himuon sangsa mag-attend sa Memoryal.