1-2. (a) Ano ang posible nga mabatyagan naton kon pamalandungan naton ang kabuhi kag ministeryo ni Jesus? (b) Ano ang binagbinagon naton sa sini nga artikulo?

 KON napatay ang isa naton ka pinalangga, nahidlaw gid kita sa iya. Sa primero, posible nga nasakitan gid kita kon madumduman naton ang mga adlaw antes sia napatay, ilabi na kon nag-antos sia. Pero pagligad sang tion, nalipay kita kon may madumduman kita parte sa mga gintudlo niya sa aton, ukon parte sa iya mga ginhimo ukon ginsiling para palig-unon kita ukon pakadlawon.

² Sing kaanggid, nasubuan kita kon ginabasa naton ang parte sa pag-antos kag kamatayon ni Jesus. Mga pila ka semana antes kag pagkatapos sang Memoryal, nagapain gid kita sang tion para pamalandungan ang importansia sang iya halad-gawad. (1 Cor. 11:24, 25) Ang matuod, nalipay gid kita nga pamalandungan ang tanan nga ginsiling kag ginhimo ni Jesus sang ari sia sa duta. Makapalig-on man ang pagpamalandong parte sa ginahimo niya subong kag sa pagahimuon niya para sa aton sa palaabuton. Kon pamalandungan naton ini nga mga kamatuoran kag ang iya gugma sa aton, mapalig-on kita nga ipakita ang aton pagpasalamat. Binagbinagon naton ini sa sini nga artikulo.

3. Ngaa nagapasalamat gid kita sa gawad?

³ Kon ginapamalandungan naton ang kabuhi kag kamatayon ni Jesus, nagapasalamat gid kita. Sang ari si Jesus sa duta, gintudluan niya ang mga tawo parte sa mga pagpakamaayo nga ihatag sang Ginharian sang Dios. Ginapabaloran gid naton ang ginatudlo sang Biblia parte sa gawad kag ang mga benepisyo sini. Nagapasalamat gid kita sa gawad bangod ginpaposible sini nga mangin suod kita kay Jehova kag kay Jesus. Ang mga nagatuo kay Jesus  may paglaum man nga mabuhi sing wala sing katapusan kag makita nila liwat ang ila mga pinalangga nga napatay. (Juan 5:28, 29; Roma 6:23) Wala kita sing may ginhimo nga takus sa sini nga mga pagpakamaayo, kag indi man naton mabayaran ang Dios kag ang Cristo sa ginhimo nila para sa aton. (Roma 5:8, 20, 21) Pero mapakita naton nga nagapasalamat gid kita sa ila. Paano?

4. Paano ginpakita ni Maria Magdalena nga nagapasalamat sia sa ginhimo ni Jesus para sa iya? (Tan-awa ang piktyur.)

⁴ Binagbinaga ang halimbawa sang isa ka Judiyo nga si Maria Magdalena. Grabe gid kabudlay sang iya sitwasyon bangod ginapaantos sia sang pito ka demonyo. Posible nagbatyag sia nga wala sing may makasarang magbulig sa iya. Gani sang ginhilway sia ni Jesus sa mga demonyo, posible nga grabe gid ang iya pagpasalamat. Gani napalig-on sia nga mangin sumulunod ni Jesus kag gamiton ang iya tion, kusog, kag mga pagkabutang para suportahan si Jesus sa iya ministeryo. (Luc. 8:1-3) Nagapasalamat gid si Maria sa ginhimo ni Jesus para sa iya, pero posible nga wala kabalo si Maria nga may himuon pa si Jesus sa ulihi nga mas labaw pa sa sini. Ihatag ni Jesus ang iya kabuhi para sa katawhan “agod ang tanan nga nagatuo sa iya” makatigayon sing kabuhi nga wala sing katapusan. (Juan 3:16) Pero, ginpakita ni Maria nga nagapasalamat gid sia kay Jesus paagi sa pag-unong sa iya. Sang nagaantos si Jesus sa usok, ara si Maria kay gusto niya ipakita nga palangga niya si Jesus kag gusto niya paumpawan ang iban. (Juan 19:25) Sang mapatay si Jesus, nagdala si Maria kag ang duha pa ka babayi sing mahamot nga mga tanom sa lulubngan ni Jesus para gamiton sa iya lubong. (Mar. 16:1, 2) Bangod mainunungon si Maria, daku ang nabaton niya nga padya. Sang ginbanhaw si Jesus, nagpakita sia kay Maria kag nag-istoryahanay sila. Pila lang sa mga disipulo ni Jesus ang ginhatagan sini nga pribilehiyo.—Juan 20:11-18.

5. Paano naton mapakita nga nagapasalamat kita sa tanan nga ginhimo ni Jehova kag ni Jesus para sa aton?

⁵ Mapakita man naton nga nagapasalamat  kita sa tanan nga ginhimo ni Jehova kag ni Jesus para sa aton paagi sa paggamit sang aton tion, kusog, kag kuarta sa pag-alagad kay Jehova. Halimbawa, puede kita makabulig sa pagpatindog kag pagmentinar sang mga pasilidad nga ginagamit naton sa pagsimba kay Jehova.

6. Ngaa masiling naton nga ang gawad isa ka regalo para sa kada isa sa aton?

⁶ Kon pamalandungan naton kon daw ano kadaku sang gugma ni Jehova kag ni Jesus sa aton, mapalig-on kita nga higugmaon man sila. (1 Juan 4:10, 19) Mas higugmaon pa gid naton sila kon marealisar naton nga napatay si Jesus para sa kada isa sa aton. Narealisar ini ni apostol Pablo, kag ginpasalamatan niya ini sang nagsulat sia sa mga taga-Galacia. Nagsiling sia: “[Ang Anak sang Dios] naghigugma sa akon kag nagtugyan sang iya kaugalingon para sa akon.” (Gal. 2:20) Paagi sa gawad, ginbuyok ka ni Jehova para mangin abyan ka niya. (Juan 6:44) Sigurado gid nga nalipay ka nga may nakita si Jehova nga maayo sa imo, kag pinakadaku gid nga balor ang iya ginbayad para makabig ka niya nga iya abyan. Bangod sini, mas ginhigugma mo pa gid si Jehova kag si Jesus. Gani pamangkuton naton ang aton kaugalingon, ‘Bangod sang akon gugma sa ila, ano ang dapat ko himuon?’

7. Base sa piktyur, paano naton tanan mapakita ang aton gugma kay Jehova kag kay Jesus? (2 Corinto 5:14, 15; 6:1, 2)

⁷ Ang aton gugma sa Dios kag sa Cristo nagapalig-on sa aton nga higugmaon man ang iban. (Basaha ang 2 Corinto 5:14, 15; 6:1, 2.) Ang isa ka paagi para mapakita naton ang aton gugma amo ang pagbantala sing mapisan. Gani dapat naton bantalaan ang tanan nga maistorya naton. Indi kita dapat magpili sang aton bantalaan ano man ang ila rasa ukon tribo, manggaranon man sila kag may ineskwelahan, ukon imol  kag wala sing ineskwelahan. Kon himuon naton ini, ginahimo naton ang kabubut-on ni Jehova kay gusto niya nga “ang tanan nga sahi sang tawo maluwas kag makadangat sa sibu nga ihibalo tuhoy sa kamatuoran.”—1 Tim. 2:4.

8. Paano naton mapakita nga ginahigugma naton ang aton mga kauturan?

⁸ Mapakita man naton ang aton gugma sa Dios kag sa Cristo paagi sa paghigugma sa aton mga kauturan. (1 Juan 4:21) Nagaulikid kita sa ila kag ginabuligan naton sila kon may mga problema sila. Ginapaumpawan naton sila kon napatyan sila sang pinalangga, ginabisitahan naton sila kon nagamasakit sila, kag ginahimo naton ang aton bug-os nga masarangan para palig-unon sila kon nagaluya ang ila buot. (2 Cor. 1:3-7; 1 Tes. 5:11, 14) Pirme naton sila ginapangamuyo bangod kabalo kita nga “ang pag-ampo sang matarong nga tawo may gamhanan nga epekto.”—Sant. 5:16.

9. Ano ang isa pa ka paagi nga mapakita naton nga ginahigugma naton ang aton mga kauturan?

⁹ Mapakita man naton nga ginahigugma naton ang aton mga kauturan paagi sa pagtinguha nga indi maguba ang aton kaangtanan sa ila. Gani panikasugan naton nga ilugon kon paano nagapatawad si Jehova. Gintugutan ni Jehova nga mapatay ang iya Anak para sa aton mga sala, gani dapat handa kita nga patawaron ang aton mga kauturan kon makasala sila sa aton. Indi naton gusto nga mangin pareho sa malaut nga ulipon nga ginsambit ni Jesus sa isa niya ka ilustrasyon. Wala na sia ginpabayad sang iya agalon sang iya daku gid nga utang, pero gusto gid niya nga bayaran sang pareho niya nga ulipon ang gamay sini nga utang sa iya. (Mat. 18:23-35) Kon wala kamo nag-intiendihanay sang isa ka utod, puede bala nga ikaw ang una nga magpalapit sa iya para mag-ayuhay kamo liwat antes ang Memoryal? (Mat. 5:23, 24) Kon himuon mo ini, ginapakita mo nga ginahigugma mo gid si Jehova kag si Jesus.

10-11. Paano mapakita sang mga gulang nga ginahigugma nila si Jehova kag si Jesus? (1 Pedro 5:1, 2)

¹⁰ Paano mapakita sang mga gulang nga ginahigugma nila si Jehova kag si Jesus? Ang isa ka importante nga paagi amo ang pag-atipan sa mga karnero ni Jesus. (Basaha ang 1 Pedro 5:1, 2.) Maathag ini sa ginsiling ni Jesus kay apostol Pedro. Pagkatapos mapanghiwala ni Pedro si Jesus sing tatlo ka beses, posible nga gusto gid ni Pedro nga hatagan sia sang tsansa nga ipakita nga ginahigugma niya si Jesus. Wala madugay pagkatapos mabanhaw si Jesus, ginpamangkot niya si Pedro: “Simon nga anak ni Juan, ginahigugma mo bala ako?” Sigurado kita nga handa si Pedro nga himuon ang tanan para ipakita nga ginahigugma niya ang iya Agalon. Ginsilingan ni Jesus si Pedro: “Bantayi ang akon magagmay nga mga karnero.” (Juan 21:15-17) Amo gid ini ang ginhimo ni Pedro sa bilog niya nga kabuhi. Gin-atipan niya sing maayo ang mga karnero sang iya Ginuo nga nagapakita nga ginahigugma niya si Jesus.

¹¹ Mga gulang, mga pila ka semana antes kag pagkatapos sang Memoryal, paano ninyo mapakita nga ginatuman ninyo ang ginsiling ni Jesus kay Pedro? Mapakita ninyo nga ginahigugma gid ninyo si Jehova kag si Jesus paagi sa pag-shepherding pirme sa mga kauturan kag paagi sa pagbulig sa mga indi aktibo nga magbalik kay Jehova. (Ezeq. 34:11, 12) Puede man ninyo palig-unon ang mga Bible study kag ang mga interesado nga maga-attend sa Memoryal. Gusto naton nga mabatyagan nila nga nalipay kita nga kaupod naton sila kay nagalaum kita nga mangin disipulo man sila ni Jesus.

12. Kon pamalandungan naton ang ginsiling ni Jesus sang gab-i antes sia napatay, ngaa nagahatag ini sa aton sang kaisog? (Juan 16:32, 33)

¹² Sang gab-i antes napatay si Jesus, ginsilingan niya ang iya mga disipulo: “Sa kalibutan  may kapipit-an kamo, apang magpakabakod kamo! Nadaug ko ang kalibutan.” (Basaha ang Juan 16:32, 33.) Sang ginpahog si Jesus sang iya mga kaaway, ano ang nakabulig sa iya nga mangin maisog kag matutom asta sa iya kamatayon? Nagsalig sia kay Jehova. Kabalo si Jesus nga maeksperiensiahan man sang iya mga sumulunod ang pareho sa sini nga mga pagtilaw, gani nangabay sia kay Jehova nga bantayan sila. (Juan 17:11) Ngaa nagahatag ini sa aton sang kaisog? Bangod mas gamhanan si Jehova sangsa aton mga kaaway. (1 Juan 4:4) Makita ni Jehova ang tanan. Gani kumbinsido kita nga kon magsalig kita kay Jehova, buligan niya kita nga indi mahadlok kag mangin maisog.

13. Paano ginpakita ni Jose nga taga-Arimatea ang iya kaisog?

¹³ Binagbinaga ang halimbawa ni Jose nga taga-Arimatea. Ginarespeto gid sia sang mga Judiyo. Miembro sia sang Sanhedrin ukon sang pinakamataas nga hukmanan sang mga Judiyo. Pero sa tion sang pagministeryo ni Jesus sa duta, wala mapakita ni Jose ang kaisog. Nagsiling si Juan nga “disipulo sia ni Jesus, apang sa tago lang, kay nahadlok sia sa mga Judiyo.” (Juan 19:38) Interesado si Jose sa mensahe sang Ginharian, pero wala niya ginsugid sa iban nga nagatuo sia kay Jesus. Posible gid nga nahadlok sia nga basi indi na sia pagrespetuhon sang mga tawo kon mabal-an nila nga disipulo sia ni Jesus. Pero sang mapatay si Jesus, ang Biblia nagasiling nga “nangisog [si Jose] sa pagkadto kay Pilato kag nagpangayo sing pahanugot nga sia na ang malubong kay Jesus.” (Mar. 15:42, 43) Wala na gintago ni Jose nga isa sia ka disipulo ni Jesus.

14. Ano ang dapat mo himuon kon may kahadlok ka sa mga tawo?

¹⁴ Pareho kay Jose, may kahadlok ka man bala sa mga tawo? Sa eskwelahan ukon sa ulubrahan, nahuya ka bala kon kaisa magsugid sa iban nga isa ka sa mga Saksi ni Jehova? Daw nagaalang-alang ka bala nga mangin manugbantala ukon magpabawtismo bangod nabalaka ka sa posible nga hunahunaon sang iban parte sa imo? Indi pagtuguti ini nga balatyagon nga punggan ka nga himuon ang husto. Hanuot nga mangamuyo kay Jehova. Pangabaya sia nga hatagan ka sang kaisog nga himuon ang iya kabubut-on. Sabton ni Jehova ang imo mga pangamuyo, gani mas magabakod ka pa gid kag mangin mas maisog.—Isa. 41:10, 13.

15. Pagkatapos magpakita ni Jesus sa iya mga disipulo, ano ang ginhimo nila bangod sa ila kalipay? (Lucas 24:52, 53)

¹⁵ Nasubuan gid ang mga disipulo ni Jesus sang napatay sia. Imadyina nga ara ka sa ila sitwasyon.  Magluwas nga wala na ang ila pinalangga nga abyan, daw nadulaan man sila sang paglaum. (Luc. 24:17-21) Pero sang nagpakita sa ila si Jesus, ginbuligan niya sila nga mahangpan kon paano niya gintuman ang tagna sa Biblia. Ginhatagan man niya sila sang importante nga hilikuton. (Luc. 24:26, 27, 45-48) Sang nagkayab si Jesus sa langit pagligad sang 40 ka adlaw, wala na sila nasubuan. Sa baylo, grabe gid ang ila kalipay. Nalipay gid sila bangod kabalo sila nga buhi ang ila Agalon kag buligan niya sila nga matuman ang ginsugo niya sa ila. Bangod sa ila kalipay, napalig-on sila nga indi mag-untat sa pagdayaw kay Jehova.—Basaha ang Lucas 24:52, 53; Binu. 5:42.

16. Paano naton mailog ang mga disipulo ni Jesus?

¹⁶ Paano naton mailog ang mga disipulo ni Jesus? Puede kita mangin malipayon sa aton pagsimba kay Jehova, indi lang mga pila ka semana antes kag pagkatapos sang Memoryal, kundi sa bilog gid nga tuig. Para mabatyagan naton ini, dapat naton unahon ang Ginharian sang Dios sa aton kabuhi. Halimbawa, madamo ang nag-adjust sang ila oras sa obra para regular sila nga makabantala, maka-attend sa mga miting, kag maka-family worship. May iban gani nga nagdesisyon nga indi magbakal sang mga butang nga ginakabig sang iban nga importante. Ginhimo nila ini para mas makabulig sila sa kongregasyon ukon para makaalagad sila sa lugar nga kinahanglan ang dugang nga manugbantala. Kinahanglan naton ang pagbatas para padayon kita nga makaalagad kay Jehova, pero nagapromisa sia nga pakamaayuhon gid niya kita kon unahon naton ang Ginharian sa aton kabuhi.—Hulu. 10:22; Mat. 6:32, 33.

17. Ano ang gusto mo nga himuon mga pila ka semana antes kag pagkatapos sang Memoryal? (Tan-awa ang piktyur.)

¹⁷ Excited na kita nga saulugon ang Memoryal sa Martes, Abril 4. Pero, indi na paghulata ini nga okasyon antes mo pamalandungan ang parte sa kabuhi kag kamatayon ni Jesus kag ang parte sa gugma nga ginpakita niya kag ni Jehova sa aton. Pamalandungi ini pirme mga pila ka semana antes kag pagkatapos sang Memoryal. Halimbawa, magpain sang tion para basahon kag pamalandungan ang mga hitabo nga makita sa tsart nga “Katapusan nga Semana ni Jesus sa Duta” sa Apendise B12 sang Bag-ong Kalibutan nga Badbad. Samtang ginahimo mo ini, binagbinaga ang mga teksto nga nagapalig-on sa imo nga magpasalamat, nagapabakod sang imo gugma, nagabulig sa imo nga mangin maisog, kag nagahatag sa imo sang kalipay. Dayon hunahunaa kon paano mo mapakita ang imo tinagipusuon nga pagpasalamat. Makasalig ka nga ginapabaloran ni Jesus ang tanan mo nga ginahimo para dumdumon sia mga pila ka semana antes kag pagkatapos sang Memoryal.—Bug. 2:19.