1-2. Ngaa naga-attend kita sa Memoryal kada tuig?

 HALOS 2,000 ka tuig na ang nagligad, ginhatag ni Jesus ang iya kabuhi para sa aton, gani may paglaum kita nga mabuhi sing wala sing katapusan. Sang gab-i antes napatay si Jesus, ginsugo niya ang iya mga sumulunod nga dumdumon ang iya ginpakita nga gugma kag sakripisyo. Himuon nila ini paagi sa isa ka simple nga okasyon nga nagagamit sing tinapay kag alak.—1 Cor. 11:23-26.

² Ginatuman naton ang sugo ni Jesus bangod palangga gid naton sia. (Juan 14:15) Kada tuig, ginapakita naton nga nagapasalamat kita sa iya ginhimo. Mga pila ka semana antes kag pagkatapos sang Memoryal, nagapain kita sang tion para pamalandungan ang parte sa iya kamatayon. Nalipay man kita nga dugangan ang aton tion sa pagbantala para mas madamo ang aton maagda nga mag-attend sa sining pinasahi nga okasyon. Kag wala gid sang makapugong sa aton nga mag-attend sa Memoryal.

3. Ano ang binagbinagon naton sa sini nga artikulo?

³ Ginahimo sang katawhan ni Jehova ang ila bug-os nga masarangan para dumdumon ang kamatayon ni Jesus. Sa sini nga artikulo, binagbinagon naton ang tatlo ka paagi nga ginapakita nila ini: (1) paagi sa pagsunod sa gintudlo ni Jesus kon paano saulugon ang Memoryal, (2) paagi sa pag-agda sa iban sa Memoryal, kag (3) paagi sa pagsaulog sang Memoryal bisan sa mabudlay nga mga sitwasyon.

4. Ano nga mga kamatuoran ang ginapahanumdom sa aton kada tuig sa tion sang Memoryal, kag ngaa indi naton dapat pagpakadiutayon ini nga mga kamatuoran? (Lucas 22:19, 20)

⁴ Kada tuig sa tion sang Memoryal, nagapamati kita sa pamulongpulong nga nabase sa Biblia nga maathag nga nagasabat sa  madamo nga pamangkot. Ginatudluan kita sini kon ngaa kinahanglan sang katawhan ang gawad kag kon paano matumbasan sang kamatayon sang isa ka tawo ang mga sala sang madamo. Ginapahanumdom man kita kon ano ang ginarepresentar sang tinapay kag sang alak kag kon sin-o ang dapat magkaon kag mag-inom sini. (Basaha ang Lucas 22:19, 20.) Kag ginapamalandungan naton ang matahom nga palaabuton nga ihatag sa mga may paglaum nga mabuhi sing wala sing katapusan sa duta. (Isa. 35:5, 6; 65:17, 21-23) Indi naton dapat pagpakadiutayon ini nga mga kamatuoran. Binilyon ka tawo ang wala nakabalo sini, kag wala nila nahangpan kon daw ano ka importante ang halad ni Jesus. Wala man nila ginasunod ang gintudlo ni Jesus kon paano saulugon ang Memoryal. Ngaa?

5. Pagkatapos mapatay ang kalabanan nga apostoles ni Jesus, paano gindumdom sang mga tawo ang iya kamatayon?

⁵ Wala madugay pagkatapos mapatay ang kalabanan nga apostoles ni Jesus, nakasulod sa kongregasyon ang indi matuod nga mga Cristiano. (Mat. 13:24-27, 37-39) Naghambal sila sing “tiko nga mga panudlo agod ipahilayo ang mga disipulo kag pasundon sa ila.” (Binu. 20:29, 30) Ang isa ka ‘tiko nga panudlo’ nga gintudlo nila amo nga dapat kuno sulitsuliton ang paghalad ni Jesus sang iya lawas, kag indi kuno matuod ang ginasiling sang Biblia nga ginhalad ni Jesus ang iya lawas “sing makaisa gid lang agod dalhon ang mga sala sang madamo.” (Heb. 9:27, 28) Subong, madamo nga sinsero nga mga tawo ang nagapati sa sining butig nga panudlo. Nagakadto sila sa simbahan kada semana para magpangalawat. b Kag kon kaisa, kada adlaw nila ini nga ginahimo. May iban naman nga relihion nga indi amo sini kasunson ang ila pagdumdom sa kamatayon ni Jesus, pero wala nahangpan sang kalabanan nila nga mga miembro kon ngaa dapat mapatay si Jesus. Mahimo nga nagapalibog ang iban, ‘Posible gid bala nga mapatawad ang akon mga sala paagi sa kamatayon ni Jesus?’ Ngaa ginapamangkot nila ini? Bangod naimpluwensiahan sila sa ginasiling sang iban nga indi kuno mapatawad ang aton mga sala paagi sa kamatayon ni Jesus. Ano ang ginhimo sang matuod nga mga sumulunod ni Jesus bangod sa sini nga mga pagpati?

6. Sang 1872, ano ang nahangpan sang isa ka grupo sang mga estudyante sang Biblia?

⁶ Sang 1870, ginsugdan sang isa ka grupo sang mga estudyante sang Biblia nga ginapangunahan ni Charles Taze Russell ang maid-id nga pagtuon sa Kasulatan. Gusto nila mabal-an ang kamatuoran parte sa halad ni Jesus kag kon paano dapat saulugon ang Memoryal sang iya kamatayon. Sang 1872, nahangpan nila nga ginatudlo sang Biblia nga gingawad ni Jesus ang tanan nga katawhan. Wala nila gintago ang ila mga natun-an. Sa baylo, ginpabalo nila ini sa iban paagi sa mga libro, mga newspaper, kag mga magasin. Wala madugay pagkatapos sini, ginsunod nila ang ginhimo sang mga Cristiano sang unang siglo paagi sa pagtipon sing isa ka beses kada tuig para saulugon ang Memoryal.

7. Paano kita nagabenepisyo sa research nga ginhimo sang mga estudyante sang Biblia sang una?

⁷ Subong, nagabenepisyo kita sa research nga ginhimo sang sinsero nga mga Cristiano madamo nga tinuig na ang nagligad. Ngaa masiling naton ini? Kay man, ginbuligan kita ni Jehova nga mahangpan ang kamatuoran parte sa halad ni Jesus kag kon ano ang himuon sini para sa tanan nga katawhan. (1 Juan 2:1, 2) Natun-an man naton nga duha ang paglaum sang mga tawo nga nahamut-an sang Dios. Ginatudlo sang Biblia nga may pila nga hatagan sang imortal nga kabuhi sa langit, kag may minilyon nga hatagan sang kabuhi nga wala sing katapusan sa  duta. Nagasuod pa gid kita kay Jehova samtang ginabinagbinag naton kon daw ano niya kita ka palangga kag kon paano kita nagabenepisyo sa halad ni Jesus. (1 Ped. 3:18; 1 Juan 4:9) Gani pareho sa aton matutom nga mga kauturan sang una, ginaagda man naton ang iban nga updan kita sa pagsaulog sang Memoryal sa paagi nga gintudlo ni Jesus.

8. Ano na ang nahimo sang katawhan ni Jehova parte sa pag-agda sa iban sa Memoryal? (Tan-awa ang piktyur.)

⁸ Madamo na nga tinuig nga ginaagda sang katawhan ni Jehova ang mga tawo sa Memoryal. Sang 1881, gin-agda ang mga kauturan sa United States nga magtipon sa isa ka balay sa Allegheny, Pennsylvania para saulugon ining pinasahi nga okasyon. Sang ulihi, ginasaulog na sang kada kongregasyon ang Memoryal. Sang Marso 1940, ginsilingan ang mga manugbantala nga puede nila agdahon ang mga interesado sa ila teritoryo. Sang 1960, sa pinakauna nga tion, ginhatagan sang Bethel ang mga kongregasyon sing naimprinta nga mga imbitasyon. Sugod sadto, binilyon na ka imbitasyon sa Memoryal ang aton napanagtag. Ngaa ginapanikasugan gid naton nga agdahon ang iban?

9-10. Sin-o ang nagabenepisyo sa aton pagpanikasog nga agdahon ang mga tawo sa Memoryal? (Juan 3:16)

⁹ Ngaa ginaagda naton ang iban nga updan kita sa pagsaulog sang Memoryal? Amo ini ang isa ka rason: Gusto naton nga matun-an sang mga ma-attend sa pinakauna nga tion ang kamatuoran parte sa ginhimo ni Jehova kag ni Jesus para sa aton tanan. (Basaha ang Juan 3:16.) Nagalaum kita nga mapalig-on sila sa ila makita kag mabatian sa Memoryal nga magtuon sing dugang pa kag mangin alagad man sila ni Jehova. Pero may ara pa gid iban nga nagabenepisyo man sa sini nga okasyon.

 ¹⁰ Ginaagda man naton ang mga nag-untat sa pag-alagad kay Jehova. Ginahimo naton ini para pahanumdumon sila nga palangga sila gihapon sang Dios. Madamo ang nagabaton sang aton imbitasyon, kag nalipay gid kita nga makita sila. Paagi sa pag-attend sa Memoryal, madumduman nila kon daw ano sila ka malipayon sang nagaalagad sila kay Jehova sang una. Binagbinaga ang eksperiensia ni Monica. c Sa tion sang COVID-19 nga pandemic, na-reactivate sia ukon nangin aktibo sia liwat nga manugbantala. Pagkatapos niya mag-attend sa Memoryal sang 2021, nagsiling sia: “Espesyal gid sa akon ini nga Memoryal. Pagligad sang 20 ka tuig, nakabantala ako liwat sa mga tawo kag naagda ko sila sa Memoryal. Nagapasalamat gid ako sa ginhimo ni Jehova kag ni Jesus para sa akon, gani ginpanikasugan ko gid nga maagda ang mga tawo sa sini nga okasyon.” (Sal. 103:1-4) Batunon man sang mga tawo ang aton pangagda ukon indi, ginahimo gihapon naton ang aton bug-os nga masarangan bangod kabalo kita nga ginapabaloran ni Jehova ang aton pagpanikasog.

11. Paano ginpakamaayo ni Jehova ang aton pagpanikasog nga agdahon ang mga tawo sa Memoryal? (Hageo 2:7)

¹¹ Ginpakamaayo gid ni Jehova ang aton pagpanikasog nga agdahon ang mga tawo sa Memoryal. Sang 2021, bisan pa may mga restriksion bangod sang COVID-19 nga pandemic, 21,367,603 ang nag-attend sa Memoryal. Amo ini ang pinakamadamo nga nag-attend sa sini nga okasyon, kag sobra ini sa duha ka pilo sang kadamuon sang mga Saksi ni Jehova sa bilog nga kalibutan. Interesado si Jehova indi lang sa kadamuon sang naga-attend, kundi interesado man sia sa kada isa sa ila. (Luc. 15:7; 1 Tim. 2:3, 4) Gani makasalig kita nga kon nagapanagtag kita sang mga imbitasyon sa iban, ginabuligan kita ni Jehova nga makita ang sinsero nga mga tawo.—Basaha ang Hageo 2:7.

12. Ano nga mga kabudlayan ang posible mangin rason nga mabudlayan kita nga saulugon ang Memoryal? (Tan-awa ang piktyur.)

¹² Gintagna ni Jesus nga sa katapusan nga mga adlaw, madamo nga mga kabudlayan ang aton maeksperiensiahan pareho sang pagpamatok sang pamilya, paghingabot, inaway, balatian, kag iban pa. (Mat. 10:36; Mar. 13:9; Luc. 21:10, 11) Bangod sini, may mga tion nga nabudlayan kita nga saulugon ang Memoryal sang kamatayon ni Jesus. Ano ang ginhimo sang aton mga kauturan para masaulog nila gihapon ang Memoryal, kag paano sila ginbuligan ni Jehova?

13. Paano ginpakamaayo ni Jehova ang kaisog kag pagpanikasog ni Artem nga saulugon ang Memoryal sang ara sia sa prisuhan?

¹³ Pagkapriso. May mga kauturan kita nga napriso bangod sa ila pagtuo. Pero ginahimo nila ang ila bug-os nga masarangan para masaulog nila ang Memoryal sang kamatayon ni Jesus. Binagbinaga ang eksperiensia ni Artem. Sang 2020, ginpriso sia mga pila ka semana antes sang Memoryal. Napriso sia sa selda nga 17 ka metro kuadrado ang kadakuon, kag may mga tion nga lima sila nga priso ang ara sa sini nga selda. Bisan pa napriso sia, nakakuha sia sang pila ka butang nga puede niya gamiton bilang tinapay kag alak sa Memoryal, kag plano niya nga magpamulongpulong para sa Memoryal para mapalig-on sia. Pero nagapanigarilyo kag pirme nagapamuyayaw ang mga upod niya sa selda. Ano ang ginhimo niya? Ginpangabay niya sila nga kon puede indi sila anay magpamuyayaw kag magpanigarilyo sing isa lang ka oras. Daw indi makapati si Artem kay nagsugot sila nga indi magpanigarilyo ukon magpamuyayaw sa tion sang Memoryal. Nagsiling si Artem, “Ginsilingan ko sila nga sugiran ko sila parte sa  Memoryal.” Nagsiling sila nga indi sila interesado sa sini. Pero pagkatapos nila makita kag mabatian ang pagsaulog ni Artem sang Memoryal, ginpamangkot nila sia parte sa sini.

14. Ano ang ginhimo sang katawhan ni Jehova para masaulog nila ang Memoryal bisan pa may COVID-19 nga pandemic?

¹⁴ COVID-19 nga pandemic. Bangod sa sini nga pandemic, indi makatipon ang katawhan ni Jehova para saulugon ang Memoryal. Pero ginsaulog gihapon nila ini. d Ang mga kongregasyon nga may Internet nagsaulog sang Memoryal paagi sa videoconference. Pero kamusta naman ang minilyon nga wala sang Internet? Sa pila ka pungsod, may ginhimo nga mga kahimusan para matan-aw sa TV ukon mapamatian sa radyo ang pamulongpulong sa Memoryal. Ginrekord man sang mga branch office ini nga pamulongpulong sa sobra 500 ka lenguahe para masaulog sang mga kauturan ang Memoryal bisan pa ara sila sa malayo gid nga mga lugar. Ginadul-ong sang matutom nga mga utod ining narekord nga pamulongpulong sa mga kauturan nga nagaistar sa sini nga mga lugar.

15. Ano ang natun-an mo sa eksperiensia sang isa ka Bible study nga si Sue?

 ¹⁵ Pagpamatok sang pamilya. Para sa pila, ang pagpamatok sang pamilya amo ang pinakamabudlay nga sitwasyon nga posible makapugong sa ila nga saulugon ang Memoryal. Binagbinaga ang eksperiensia sang isa ka Bible study nga si Sue. Sang 2021, isa ka adlaw antes sang Memoryal, ginsilingan ni Sue ang sister nga naga-study sa iya nga indi sia maka-attend sa Memoryal bangod ginapamatukan sia sang pila ka miembro sang iya pamilya. Ginbasa sang sister ang Lucas 22:44. Dayon ginpaathag sang sister sa iya nga kon makaeksperiensia kita sang mga kabudlayan, dapat naton sundon ang halimbawa ni Jesus paagi sa pagpangamuyo kay Jehova kag paagi sa pagsalig sing bug-os sa Iya. Pagkasunod nga adlaw, ginpreparar ni Sue ang tinapay kag ang alak kag gintan-aw niya ang pinasahi nga Morning Worship sa jw.org. Pagkagab-i, nagaisahanon lang sia sa iya kuarto, kag nagkonek sia sa programa sa Memoryal paagi sa iya cell phone. Pagkatapos sang programa, ginsulatan ni Sue ang sister nga naga-study sa iya: “Napalig-on mo gid ako kahapon. Ginhimo ko ang akon bug-os nga masarangan para maka-attend sa Memoryal, kag ginbuligan ako ni Jehova. Grabe gid ang akon kalipay kag nagapasalamat gid ako kay Jehova.” Sa banta mo, mabuligan ka man bala ni Jehova kon pareho sa sini ang imo sitwasyon?

16. Ngaa makasalig kita nga pakamaayuhon ni Jehova ang aton pagpanikasog nga mag-attend sa Memoryal? (Roma 8:31, 32)

¹⁶ Ginapabaloran gid ni Jehova ang aton pagpanikasog nga saulugon ang Memoryal sang kamatayon ni Jesus. Makasalig kita nga pakamaayuhon niya kita kon ginapasalamatan naton ang ginhimo niya para sa aton. (Basaha ang Roma 8:31, 32.) Gani, panikasugan gid naton nga mag-attend sa Memoryal sa sini nga tuig. Kag mga pila ka semana antes kag pagkatapos sang Memoryal, panikasugan naton nga madugangan ang aton mga ginahimo sa pag-alagad kay Jehova.