1-2. Ano nga mga kabudlayan ang posible maeksperiensiahan sang matutom nga mga alagad ni Jehova?

 KON may indi maayo nga matabo, posible nga gulpi lang magbag-o ang aton kabuhi. Binagbinaga ini nga mga halimbawa. May malala nga klase sang kanser ang isa ka matutom nga brother nga si Luis, a kag ginsilingan sia sang doktor nga pila na lang ka bulan ang iya kabuhi. Masako sa pag-alagad kay Jehova si Monika kag ang iya bana nga isa ka gulang. Pero isa ka adlaw, nabal-an ni Monika nga tinuig na nga sekreto nga nagahimo sang serioso nga sala ang iya bana. Nagbakwit ang isa ka dalaga nga sister nga si Olivia bangod sang mabaskog nga bagyo nga nagapakadto sa ila lugar. Pagbalik niya sa iya balay pagkatapos sang bagyo, guba na ini. Gani gulpi lang nagbag-o ang kabuhi ni Luis, ni Monika, kag ni Olivia. May natabo man bala sa imo nga gulpi lang nagpabag-o sa imo kabuhi?

² Bisan pa matutom kita nga nagaalagad kay Jehova, makaeksperiensia kita gihapon sang mga kabudlayan kag nagamasakit man kita pareho sa tanan nga tawo. Magluwas sa sini, kinahanglan man naton batason ang mga pagpamatok ukon paghingabot sang mga tawo nga akig sa katawhan sang Dios. Bisan pa ginatugutan ni Jehova nga maeksperiensiahan naton ini nga mga kabudlayan, nagpromisa sia nga buligan niya kita. (Isa. 41:10) Sa bulig ni Jehova, makapabilin kita nga malipayon, makahimo kita sang maayo nga mga desisyon, kag makapabilin kita nga matutom sa iya bisan sa pinakamabudlay nga mga sitwasyon. Sa sini nga artikulo, binagbinagon naton ang apat ka paagi nga ginagamit ni Jehova para buligan kita kon makaeksperiensia kita sang mabudlay nga problema. Binagbinagon man naton kon ano ang dapat naton himuon para mabaton naton ang iya bulig.

 BANTAYAN KA NI JEHOVA

3. Kon gulpi lang nagbag-o ang aton kabuhi bangod sang trahedya, ano ang posible nga nabudlayan naton nga himuon?

³ Ang mabudlay himuon kon may problema kita. Kon gulpi lang nagbag-o ang aton kabuhi bangod sang trahedya, posible nga nabudlayan kita magpamensar sing maayo kag maghimo sang desisyon. Ngaa? Bangod posible grabe gid ang aton kasubo kag kabalaka. Posible nga daw indi kita kabalo sang aton himuon. Talupangda ang nabatyagan sang duha ka sister nga ginsambit kaina. Si Olivia nagsiling: “Sang ginguba sang bagyo ang akon balay, daw nadulaan ako sang paglaum kag grabe ang akon kabalaka.” Si Monika nga ginluiban sang iya bana nagsiling: “Grabe kasakit sang akon nabatyagan nga daw ginakumos ang akon tagipusuon. Bisan ang simple nga mga ulubrahon, daw indi na ako kabalo kon paano himuon. Daw indi ako makapati nga natabo ini sa akon.” Ano nga bulig ang ginpromisa ni Jehova kon may problema kita kag daw indi kita kabalo sang aton himuon?

4. Suno sa Filipos 4:​6, 7, ano ang ginapromisa sa aton ni Jehova?

⁴ Kon ano ang ginahimo ni Jehova. Nagapromisa sia nga hatagan niya kita sang ginatawag sa Biblia nga “paghidait sang Dios.” (Basaha ang Filipos 4:​6, 7.) Ini nga paghidait amo ang ginabatyag naton nga kakalma kag kalinong sa hunahuna bangod may suod kita nga kaangtanan sa iya. Ini nga paghidait “labaw sa tanan nga paghangop,” ukon mas maayo ini sangsa mahunahuna naton. Naeksperiensiahan mo na bala nga pagkatapos mo mangamuyo sing hanuot kay Jehova, nangin kalmado ka? Amo ini ang “paghidait sang Dios.”

5. Paano ginabantayan sang paghidait sang Dios ang aton hunahuna kag tagipusuon?

⁵ Ang Filipos 4:7 nagasiling man nga ‘bantayan,’ ukon amligan, sang paghidait sang Dios ang ‘imo tagipusuon kag ikasarang sa paghunahuna.’ Ang orihinal nga tinaga para sa ‘bantay’ nagapatuhoy sa mga soldado nga nagabantay sa isa ka siudad nga handa magpakig-away sa mga magasalakay sa sini. Mahamuok ang tulog sang mga tawo nga nagaistar sa sini nga siudad kag kalmado sila bangod kabalo sila nga may mga soldado nga nagaamlig sa ila. Sing kaanggid, bangod ginabantayan sang paghidait sang Dios ang aton tagipusuon kag hunahuna, kalmado kita bangod kabalo kita nga may nagaamlig sa aton. (Sal. 4:8) Pareho sa naeksperiensiahan ni Hana, bisan pa indi dayon magbag-o ang aton sitwasyon, malinong gihapon ang aton hunahuna. (1 Sam. 1:​16-18) Kag kon kalmado kita, makahunahuna kita sang maayo kag mas mahapos maghimo sang maayo nga mga desisyon.

6. Ano ang himuon naton para mabaton naton ang paghidait sang Dios? (Tan-awa man ang piktyur.)

⁶ Kon ano ang dapat naton himuon. Kon ara sa peligro ang mga tawo nga nagaistar sa siudad,  ginatawag nila ang mga bantay. Puede man naton ini himuon. Paano? Mangamuyo kita kay Jehova asta nga mabatyagan naton ang paghidait sang Dios. (Luc. 11:9; 1 Tes. 5:17) Binagbinaga si Luis nga ginsambit kaina. Sang nabal-an niya nga pila na lang ka bulan ang iya kabuhi, amo ini ang ginsiling niya nga nakabulig sa iya kag sa iya asawa nga si Ana: “Kabudlay gid maghimo sang desisyon parte sa pagpabulong kag sa iban pa nga mga butang. Pero nakabulig sa amon ang pagpangamuyo para makabatyag kami sang kalinong sa hunahuna.” Nagsiling si Luis kag ang iya asawa nga hanuot kag sulitsulit sila nga nangamuyo kay Jehova nga hatagan sila sang malinong nga hunahuna, kalmado nga tagipusuon, kag kaalam para makahimo sila sang maayo nga mga desisyon. Kag nabatyagan nila nga ginbuligan gid sila ni Jehova. Kon may problema ka, indi mag-untat sa pagpangamuyo kay Jehova. Makasalig ka nga bantayan sang iya paghidait ang imo tagipusuon kag hunahuna.​—Roma 12:12.

PALIG-UNON KA NI JEHOVA

7. Kon mabudlay ang aton problema, ano ang posible nga mabatyagan naton?

⁷ Ang mabudlay himuon kon may problema kita. Kon makaeksperiensia kita sang mabudlay nga problema, posible nga daw indi naton mahangpan ang aton ginabatyag, ginahunahuna, kag reaksion. Posible nga gulpi lang nagabag-o ang aton emosyon, kag daw pareho kita sa isa ka barko nga ginalinggilinggi sang mga balod. Binagbinaga si Ana nga ginsambit kaina. Nagsiling sia nga sang napatay si Luis, gulpi lang nagabag-o ang iya ginabatyag nga daw indi niya mahangpan. Nagsiling sia: “Kon kaisa, grabe gid ang akon kasubo. Kag kon kaisa naman, naakig ako kay wala na sia.” May mga tion man nga naugot si Ana kag pamatyag niya nagaisahanon lang sia. Kay man, sia na subong ang kinahanglan magdesisyon parte sa mga butang nga ginaasikaso sadto ni Luis. Kon kaisa, pamatyag niya nagabiyahe sia sa dagat samtang nagabagyo. Ti, paano kita ginabuligan ni Jehova kon daw indi naton mahangpan ang aton ginabatyag?

8. Suno sa Isaias 33:​6, ano ang ginapasalig sa aton ni Jehova?

⁸ Kon ano ang ginahimo ni Jehova. Nagapasalig sia nga palig-unon niya kita. (Basaha ang Isaias 33:6.) Kon may bagyo, delikado gid ini sa barko kay posible ini magtakilid bangod sang mga balod. Bangod sini, madamo nga barko ang may ginatawag nga stabilizer. Ginabutang ini sa idalom sang barko sa magtimbang nga kilid sini. Makabulig ini para magbalanse ang barko, gani malikawan ang aksidente kag mangin komportable ang mga pasahero sa ila pagbiyahe. Pero, mas makabulig ini nga mga stabilizer kon nagalakat ang barko. Sing kaanggid, palig-unon kita ni Jehova kon padayon man kita nga maglakat, ukon padayon kita nga mag-alagad sing matutom sa iya, bisan pa may problema kita.

9. Paano makabulig ang aton mga gamit sa pag-research para makontrol naton ang aton emosyon? (Tan-awa man ang piktyur.)

 ⁹ Kon ano ang dapat naton himuon. Kon daw indi mo mahangpan ang imo ginabatyag bangod sang imo problema, padayon nga magpangamuyo, mag-attend sa mga miting, kag magbantala. Posible nga limitado na lang ang imo mahimo, pero dumduma nga makatarunganon si Jehova. (Ipaanggid ang Lucas 21:​1-4.) Dapat magpain ka man sang tion para sa imo personal nga pagtuon kag pagpamalandong. Ngaa? Bangod paagi sa organisasyon ni Jehova, ginahatagan niya kita sang manami nga mga artikulo kag mga video nga makabulig sa aton nga makontrol ang aton emosyon kon may problema kita. Para makita mo ang impormasyon nga makabulig sa imo, puede mo gamiton ang mga gamit sa pag-research, pareho sang JW Library^® nga app kag Giya sa Pagtuon Para sa mga Saksi ni Jehova. Si Monika, nga ginsambit kaina, nagsiling nga ginagamit niya ini nga mga gamit sa pag-research kon mabatyagan niya nga daw indi niya makontrol ang iya emosyon. Halimbawa, may tion nga gin-search niya ang tinaga nga “kaakig.” Kag may mga tion man nga gin-search niya ang mga tinaga nga “pagluib” kag “pagkamainunungon.” Dayon ginabasa niya ang makita niya nga mga impormasyon asta nga maghaganhagan ang iya ginabatyag. Nagsiling sia: “Kada mag-research ako, daw indi ko mahangpan ang akon emosyon. Pero samtang ginabasa ko ang akon mga na-research, pamatyag ko daw ginahakos ako ni Jehova. Nagabulig ini sa akon nga marealisar nga nahangpan ni Jehova ang tanan ko nga ginabatyag, kag ginabuligan niya ako.” Gani paagi sa bulig ni Jehova, makontrol mo ang imo emosyon asta nga mangin kalmado ka.​—Sal. 119:​143, 144.

BULIGAN KA NI JEHOVA

10. Kon nakaeksperiensia kita sang mabudlay gid nga problema, ano ang posible nga mabatyagan naton?

¹⁰ Ang mabudlay himuon kon may problema kita. Kon nakaeksperiensia kita sang mabudlay gid nga problema, posible may mga adlaw nga pamatyag naton grabe sa aton kakapoy kag kasubo. Daw pareho kita sa isa ka atleta nga madasig magdalagan sadto, pero nagakiangkiang na maglakat subong bangod natipalo sia. Posible nga nabudlayan na kita nga himuon ang mga hilikuton nga wala man kita nabudlayan nga himuon sang una, ukon posible nga daw wala na kita sang gana nga himuon ang mga hilikuton nga nanamian naton. Pareho kay Elias, posible nga daw wala kita kusog nga magbangon kag gusto naton nga magsige na lang tulog. (1 Hari 19:​5-7) Ti, ano ang ginpromisa ni Jehova nga himuon niya kon naluyahan kita?

11. Suno sa Salmo 94:​18, ano ang himuon ni Jehova para sa aton?

 ¹¹ Kon ano ang ginahimo ni Jehova. Nagapromisa sia nga buligan niya kita. (Basaha ang Salmo 94:18.) Kinahanglan buligan ang atleta nga natipalo para makalakatlakat sia, gani posible nga kinahanglan man naton ang bulig para makapabilin kita nga aktibo sa aton pag-alagad kay Jehova. Sa sini nga mga sitwasyon, amo ini ang ginapasalig sa aton ni Jehova: “Ako si Jehova nga imo Dios nagauyat sang imo tuo nga kamot, ang Isa nga nagasiling sa imo, ‘Indi ka mahadlok. Buligan ko ikaw.’” (Isa. 41:13) Naeksperiensiahan ni Hari David ini nga bulig. Sa mga tion nga may problema sia kag mga kaaway, nagsiling sia kay Jehova: “Ginabuligan mo ako sang imo tuo nga kamot.” (Sal. 18:35) Pero paano kita ginabuligan ni Jehova?

12. Kon naluyahan kita, sin-o ang posible gamiton ni Jehova para buligan kita?

¹² Sa masami, ginapalig-on ni Jehova ang iban para buligan kita. Halimbawa, sang naluyahan si David, ginkadtuan sia sang iya abyan nga si Jonatan para pabakuron sia kag palig-unon. (1 Sam. 23:​16, 17) Gingamit man ni Jehova si Eliseo para buligan si Elias. (1 Hari 19:​16, 21; 2 Hari 2:2) Subong, puede gamiton ni Jehova ang aton pamilya, mga abyan, ukon mga gulang para buligan kita. Pero kon na-depress kita, posible nga gusto naton nga mag-isahanon lang. Normal lang ini nga reaksion. Ti, ano ang puede naton himuon para mabuligan kita ni Jehova?

13. Ano ang dapat naton himuon para mabaton naton ang bulig ni Jehova? (Tan-awa man ang piktyur.)

¹³ Kon ano ang dapat naton himuon. Panikasugan gid naton nga indi pag-ipain ang aton kaugalingon. Kon magpalayo kita sa iban, posible nga ang aton lang kaugalingon kag mga problema ang aton pirme pamensaron. Bangod sini, indi kita makahimo sang maayo nga mga desisyon. (Hulu. 18:1) Siempre, may mga tion man nga kinahanglan naton mag-isahanon, ilabi na kon makaeksperiensia kita sang masubo gid nga sitwasyon. Pero, kon ipain naton ang aton kaugalingon sa sulod sang malawig nga tion, posible nga daw ginapangindian naton ang mga tawo nga ginagamit ni Jehova sa pagbulig sa aton. Gani bisan pa daw nabudlayan ka, batuna ang bulig sang imo pamilya, mga abyan, kag mga gulang. Dumduma nga ginagamit sila ni Jehova para buligan ka.​—Hulu. 17:17; Isa. 32:​1, 2.

LUGPAYAN KA NI JEHOVA

14. Sa ano nga mga sitwasyon posible makabatyag kita sang kahadlok?

¹⁴ Ang mabudlay himuon kon may problema kita. Posible may mga tion nga nahadlok kita. Sa Biblia, may mga tion nga nagsiling ang matutom  nga mga alagad sang Dios nga nakulbaan sila kag nahadlukan bangod sa ila mga kaaway ukon sa iban pa nga mga rason. (Sal. 18:4; 55:​1, 5) Posible nga nahadlok kita bangod ginapamatukan kita sa eskwelahan, sa ulubrahan, sang aton pamilya, ukon sang gobierno. Mahimo nahadlok man kita kay may balatian kita nga posible ikamatay naton. Sa sini nga mga sitwasyon, posible pamatyag naton daw pareho kita sa isa ka gamay nga bata nga indi kabalo sang iya himuon. Ti, paano kita ginabuligan ni Jehova sa sini nga mga sitwasyon?

15. Suno sa Salmo 94:​19, ano ang himuon ni Jehova para sa aton?

¹⁵ Kon ano ang ginahimo ni Jehova. Ginalugpayan niya kita kag ginapaumpawan. (Basaha ang Salmo 94:19.) Posible mahunahuna naton sa sini nga salmo ang isa ka bata nga babayi nga indi makatulog bangod nahadlok sia sa mabaskog nga bagyo kag daguob. Gani ginkadtuan sia sang iya amay kag ginhakos sia sang iya amay asta nga natulugan sia. Bisan sige pa ang bagyo, nalugpayan sia sa hakos sang iya amay kay nabatyagan niya nga may nagaamlig sa iya. Kon nahadlok kita bangod sa aton mga problema, posible nga kinahanglan man naton ang hakos sang aton Amay sa langit asta nga magkalma kita. Ti, paano kita ginalugpayan ni Jehova?

16. Ano ang dapat naton himuon para malugpayan kita ni Jehova? (Tan-awa man ang piktyur.)

¹⁶ Kon ano ang dapat naton himuon. Regular nga magpain sang tion para kay Jehova paagi sa pagpangamuyo sa iya kag pagbasa sang iya Pulong. (Sal. 77:​1, 12-14) Kon maanad ka na nga ginahimo ini pirme, makabulig gid ini sa imo. Kay man, ang pinakauna mo gid nga himuon kon na-stress ka amo ang pagdangop sa imo Amay sa langit. Gani, isugid kay Jehova ang imo mga ginakahadlukan kag ginakabalak-an. Dayon pamatii sia paagi sa pagbasa sang iya Pulong kay paumpawan ka niya. (Sal. 119:28) Kon nahadlok ka, may mga libro sa Biblia nga makalugpay gid sa imo. Halimbawa, mapalig-on ka gid sang Job, Salmo, kag Hulubaton. Mapalig-on ka man sang mga ginsiling ni Jesus nga mabasa sa Mateo kapitulo 6. Kon mangamuyo ka kay Jehova kag basahon mo ang iya Pulong, mabatyagan mo nga ginalugpayan ka niya.

17. Ano ang masaligan naton nga himuon ni Jehova?

¹⁷ Makasalig kita nga buligan gid kita ni Jehova kon makaeksperiensia kita sang mabudlay nga mga sitwasyon. Indi gid kita mag-isahanon. (Sal. 23:4; 94:14) Nagapromisa si Jehova nga bantayan niya kita, palig-unon, buligan, kag lugpayan. Amo ini ang ginasiling sang Isaias 26:3 parte kay Jehova: “Amligan mo ang mga nagasalig sa imo sing bug-os; hatagan mo sila sing dayon nga paghidait, bangod nagasalig sila sa imo.” Gani magsalig kay Jehova, kag gamita ang iya mga ginaaman para buligan ka. Kon himuon mo ini, mangin mabakod ka bisan pa makaeksperiensia ka sang mabudlay nga mga sitwasyon.