Ginapakanubo sang madamo nga lalaki ang mga babayi bangod amo ini ang nadak-an nila nga kultura. Halimbawa, si Hans, nga isa ka circuit overseer sa Bolivia, nagsiling: “May pila ka lalaki nga nagdaku sa kultura nga dapat macho ang mga lalaki, gani nagapati sila nga mas labaw sila sangsa mga babayi.” a Si Shengxian, nga isa ka gulang sa Taiwan, nagsiling: “Sa amon lugar, madamo nga lalaki ang nagasiling nga indi dapat maghatag sang opinyon ang mga babayi sa mga lalaki. Kon isugid sang isa ka lalaki sa iya mga kaupod ang opinyon sang isa ka babayi, posible nga hikayan sia sang iya mga kaupod.” May mga lalaki man nga daw indi hilmunon ang ila paagi para pakanubuon ang mga babayi. Halimbawa, nagalahog sila nga nagapakanubo sa mga babayi.

Maayo lang kay puede gid magbag-o ang isa ka lalaki bisan ano man ang iya gindak-an nga kultura. Puede niya mabag-o ang iya pagpati nga mas labaw ang mga lalaki sangsa mga babayi. (Efe. 4:​22-24) Mahimo niya ini paagi sa pag-ilog sa halimbawa ni Jehova. Sa sini nga artikulo, binagbinagon naton kon paano ginatratar ni Jehova ang mga babayi, kon paano mailog sang mga brother ang pagtratar ni Jehova sa mga babayi, kag kon paano mangin halimbawa ang mga gulang sa pagrespeto sa mga babayi.

PAANO GINATRATAR NI JEHOVA ANG MGA BABAYI?

Kon parte sa pagtratar sa mga babayi, si Jehova ang pinakamaayo nga halimbawa. Isa sia ka maluluy-on nga Amay, kag palangga niya ang tanan nga tawo. (Juan 3:16) Ginakabig niya nga mga anak ang mga babayi nga matutom nga nagaalagad sa iya. Binagbinagon naton kon paano ginpakita ni Jehova nga palangga niya ang mga babayi kag ginarespeto niya sila.

Wala sia sing may ginapasulabi. Gintuga ni Jehova ang mga lalaki kag mga babayi suno sa iya larawan. (Gen. 1:27) Wala niya ginhimo ang mga lalaki nga  mas maalam ukon mas madamo sing ikasarang sangsa mga babayi, kag wala man niya ginapasulabi ang mga lalaki sangsa mga babayi. (2 Cron. 19:7) Sang gintuga niya ang mga lalaki kag mga babayi, pareho niya sila nga ginhatagan sing ikasarang nga mahangpan ang mga kamatuoran sa Biblia kag mailog ang iya dalayawon nga mga kinaiya. Pareho nga ginapabaloran ni Jehova ang mga lalaki kag mga babayi nga matutom sa iya bangod pareho ang ila paglaum. May ara sila paglaum nga mabuhi sing wala sing katapusan sa duta ukon mangin hari kag saserdote sa langit. (2 Ped. 1:1) Maathag nga wala ginapakanubo ni Jehova ang mga babayi.

Ginapamatian niya sila. Interesado si Jehova sa ginabatyag kag ginakabalak-an sang mga babayi. Halimbawa, ginpamatian niya kag ginsabat ang mga pangamuyo ni Raquel kag ni Hana. (Gen. 30:22; 1 Sam. 1:​10, 11, 19, 20) Gintuytuyan man niya ang mga manunulat sang Biblia nga ilakip ang mga kasaysayan sang mga lalaki nga namati sa mga babayi. Halimbawa, gintuman ni Abraham ang ginsiling sa iya ni Jehova nga pamatian niya ang iya asawa nga si Sara. (Gen. 21:​12-14) Sa bahin ni Hari David, ginpamatian niya si Abigail. Kag para kay David, ginpadala ni Jehova si Abigail para istoryahon sia. (1 Sam. 25:​32-35) Sa bahin naman ni Jesus, perpekto niya nga gin-ilog ang mga kinaiya sang iya Amay, kag ginpamatian niya ang iya iloy nga si Maria. (Juan 2:​3-10) Ginapakita sini nga mga halimbawa nga ginarespeto ni Jehova ang mga babayi paagi sa pagpamati sa ila.

Ginahatagan niya sila sing asaynment. Halimbawa, ginhatagan ni Jehova si Eva sing asaynment nga magbulig sa pag-atipan sa bilog nga duta. (Gen. 1:28) Gani indi manubo ang pagtan-aw ni Jehova kay Eva kon ikumparar sa iya bana. Para kay Jehova, isa sia ka importante nga kaupod sang iya bana. Ginhatagan man ni Jehova sing asaynment ang mga manalagna nga babayi nga sanday Debora kag Hulda nga laygayan ang iya katawhan, lakip na ang isa ka hukom kag isa ka hari. (Huk. 4:​4-9; 2 Hari 22:​14-20) Subong, ginahatagan ni Jehova sing asaynment ang matutom nga mga sister para himuon ang iya hilikuton. Nagaalagad sila bilang mga manugbantala, payunir, kag misyonero. Nagabulig sila sa pagdesinyo, pagpatindog, kag pagmentinar sang mga Kingdom Hall kag mga pasilidad sang branch office. Ang pila sa ila nagaalagad sa Bethel, kag may ara man sa mga remote translation office. Daw isa sila ka daku nga kasuldadusan nga ginagamit ni Jehova para himuon ang iya katuyuan. (Sal. 68:11) Sigurado nga wala ginahunahuna ni Jehova nga maluya ang mga babayi ukon wala sila sing ikasarang.

PAANO MAILOG SANG MGA BROTHER ANG PAGTRATAR NI JEHOVA SA MGA BABAYI?

Mga brother, para mabal-an naton kon bala ginailog naton ang pagtratar ni Jehova sa aton mga sister, dapat kita mangin honest sa pag-usisa sa aton mga ginahunahuna kag ginahimo. Para mahimo naton ini, kinahanglan naton ang bulig. Binagbinaga ini nga ilustrasyon. Makabulig ang X-ray para mabal-an sang doktor kon bala may diperensia ang tagipusuon sang isa ka tawo ukon wala. Sing kaanggid, mabuligan kita sang aton maayo nga mga abyan kag sang Pulong sang Dios para mabal-an naton kon bala may dapat kita bag-uhon sa aton pagtamod sa mga babayi. Ano ang himuon naton para mabuligan kita?

Pamangkuton naton ang aton maayo nga mga abyan. (Hulu. 18:17) Ari ang mga puede naton ipamangkot sa aton abyan nga ginasaligan naton kag kilala naton nga makatarunganon: “Maayo bala ang pagtratar ko sa mga sister? Mabatyagan ayhan nila nga ginarespeto ko sila? Ano ang mga puede ko himuon para mangin mas maayo pa gid ang pagtratar ko sa ila?” Kon may ginsiling ang imo abyan nga dapat mo bag-uhon, likawi nga magrason kag indi dapat maglain ang imo buot. Sa baylo, mangin handa sa paghimo sang mga pagbag-o.

Tun-an naton ang Pulong sang Dios. Ang pinakamaayo nga paagi para mabal-an naton kon bala ginatratar naton sing maayo ang mga sister amo ang paggamit sang Pulong sang Dios para usisaon ang aton mga ginahunahuna kag ginahimo. (Heb. 4:12) Matun-an naton sa Biblia ang parte sa mga lalaki nga maayo nga mga halimbawa kay maayo ang pagtratar nila sa mga babayi, kag may ara man indi maayo nga mga halimbawa kay indi maayo ang pagtratar nila sa mga babayi. Puede naton makumparar sa sini nga mga halimbawa ang aton pagtratar sa mga babayi. Kag para indi naton mailog ang mga tawo nga nagagamit sang pila ka teksto para suportahan ang sala nga pagtratar sa mga babayi, dapat naton ikumparar ini nga mga teksto sa iban pa nga mga teksto sa Biblia. Halimbawa, suno sa 1 Pedro 3:​7, dapat padunggan sang bana ang iya asawa bangod “mas maluya [sia] nga suludlan.” b  Buot silingon bala sini nga mas maalam ukon mas madamo sing ikasarang ang mga lalaki sangsa mga babayi? Indi. Kon ikumparar naton ang ginsiling ni Pedro sa ginasiling sang Galacia 3:​26-29, makita naton nga nagpili si Jehova sang mga babayi kag mga lalaki para mangin kaupod ni Jesus nga mga manuggahom sa langit. Gani kon tun-an naton ang Pulong sang Dios kag kon pamangkuton naton ang aton maayo nga abyan parte sa aton pagtratar sa mga babayi, matun-an naton kon paano respetuhon ang aton mga sister.

PAANO GINAPAKITA SANG MGA GULANG NGA GINARESPETO NILA ANG MGA SISTER?

Makatuon ang mga brother sa kongregasyon kon paano respetuhon ang mga sister paagi sa pagsunod sa halimbawa sang mahigugmaon nga mga gulang. Paano ginapakita sang mga gulang nga ginarespeto nila ang mga sister? Ari ang pila sa ila mga ginahimo.

Ginakomendahan nila ang mga sister. Puede ilugon sang mga gulang ang maayo nga halimbawa ni apostol Pablo. Sa iya sulat sa kongregasyon sa Roma, ginkomendahan niya ang pila ka sister. (Roma 16:12) Sigurado nga nalipay gid ini nga mga sister sang ginbasa sa ila kongregasyon ang sulat ni Pablo. Pirme man ginakomendahan sang mga gulang ang mga sister bangod sa ila maayo nga mga kinaiya kag bangod sa ila mga ginahimo para kay Jehova. Paagi sa sini, mabatyagan sang mga sister nga ginarespeto sila kag importante sila sa kongregasyon. Daku gid ang mabulig sang pagpalig-on sang mga gulang sa mga sister para padayon sila nga mag-alagad sing matutom kay Jehova.​—Hulu. 15:23.

Dapat sinsero kag espesipiko ang komendasyon sang mga gulang sa mga sister. Ngaa? Ang isa ka sister nga si Jessica nagsiling: “Kanami pamatian kon ginasilingan sang mga brother ang mga sister sing ‘maayo gid.’ Pero mas naapresyar namon kon espesipiko ang komendasyon sang mga brother. Halimbawa, puede nila komendahan ang amon pagpanikasog nga tudluan ang amon kabataan nga magpahimunong sa tion sang miting ukon ang amon pagsugat sa Bible study para maka-attend sia sa miting.” Kon espesipiko ang komendasyon sang mga gulang sa mga sister, mabatyagan sang mga sister nga ginapabaloran sila kag importante sila sa kongregasyon.

 Ginapamatian nila ang mga sister. Kabalo ang mapainubuson nga mga gulang nga indi lang sila ang may maayo nga mga ideya. Gani ginapangabay nila ang mga sister nga maghatag sang mga panugda, kag ginapamatian nila sing maayo ang mga sister. Paagi sa sini, mapalig-on sang mga gulang ang mga sister kag nagabenepisyo man ang mga gulang. Paano? Ang isa ka gulang nga si Gerardo, nga nagaalagad sa Bethel, nagsiling: “Ginapamangkot ko ang mga sister kon ano ang ila mapanugda parte sa akon ginaobra kay kabalo ako nga makabulig ini sa akon nga mahimo ini sing mas maayo. Sa masami, mas madugay na nila ini nga ginahimo sangsa kalabanan nga mga brother.” Sa mga kongregasyon, madamo nga sister ang mga payunir, gani madamo sila sing nabal-an parte sa mga tawo sa ila teritoryo. Ang isa ka gulang nga si Bryan nagsiling: “Madamo sang maayo nga mga kinaiya kag mga ikasarang ang aton mga sister nga makabulig gid sa organisasyon. Gani may matun-an ka gid sa ila mga eksperiensia.”

Kon may panugda ang mga sister, indi ini dapat pagbalewalaon dayon sang mahigugmaon nga mga gulang. Ngaa? Ang isa ka gulang nga si Edward nagsiling: “Ang opinyon kag eksperiensia sang isa ka sister makabulig sa isa ka brother nga mas mahangpan sing maayo ang isa ka sitwasyon, kag makabulig ini sa iya nga mas mahangpan ang ginabatyag sang iban.” (Hulu. 1:5) Kon indi puede iaplikar sang gulang ang panugda sang sister, dapat niya gihapon pasalamatan ang sister sa iya panugda kag ideya.

Ginahanas nila ang mga sister. Nagapangita sang kahigayunan ang mga gulang kon paano nila mahanas ang mga sister. Halimbawa, puede nila tudluan ang mga sister kon paano magdumala sang miting para sa pag-alagad sa latagon engkaso wala sing bawtismado nga brother nga magapanguna sa pagbantala. Puede nila sila hanason kon paano mag-operate sang mga gamit ukon mga makina. Paagi sa sini, makabulig sila sa mga proyekto sang aton organisasyon parte sa pagpatindog kag pagmentinar sang mga pasilidad. Sa Bethel, ginahanas sang mga overseer ang mga sister kon paano himuon ang lainlain nga mga asaynment, pareho sang maintenance, purchasing, accounting, computer programming, kag iban pa. Kon ginahanas sang mga gulang ang mga sister, ginapakita nila nga may salig sila sa ikasarang sang mga sister.

Ginagamit sang madamo nga sister ang paghanas nga nabaton nila sa mga gulang para buligan ang iban. Halimbawa, ginagamit sang pila ka sister ang natun-an nila sa konstruksion para magbulig sa pagkay-o sang mga balay sang mga utod nga naguba sa kalamidad. Ginagamit naman sang pila ka sister ang gintudlo sa ila kon paano himuon ang pagpanaksi sa publiko para hanason ang iban pa nga mga sister sa sini nga hilikuton. Ano ang ginsiling sang mga sister parte sa mga gulang nga naghanas sa ila? Ang isa ka sister nga si Jennifer nagsiling: “Sang nagboluntaryo ako sa konstruksion sang isa ka Kingdom Hall, ginhanas ako sang amon overseer. Ginakomendahan gid niya ang akon mga ginahimo. Nanamian gid ako mag-obra kay nabatyagan ko nga importante ako kag may salig sia sa akon.”

ANG MGA BENEPISYO KON GINAKABIG NATON NGA PAMILYA ANG ATON MGA SISTER

Palangga ni Jehova ang aton matutom nga mga sister, kag palangga man naton sila. Gani ginakabig naton sila nga pamilya. (1 Tim. 5:​1, 2) Isa gid ka kadungganan nga makaupod sila sa pag-alagad kay Jehova, gani ginapabaloran naton sila. Kag nalipay gid kita kon mabatyagan nila nga palangga naton sila kag ginasuportahan. Ang isa ka sister nga si Vanessa nagsiling: “Nagapasalamat gid ako kay Jehova kay bahin ako sang iya organisasyon, kag madamo nga brother ang nagapalig-on sa akon.” Ang isa ka sister sa Taiwan nagsiling: “Nagapasalamat gid ako kay Jehova kag sa iya organisasyon bangod ginapabaloran gid nila kami nga mga babayi kag ang amon ginabatyag. Nagapabakod ini sang akon pagtuo. Nagabulig man ini sa akon nga apresyahon pa gid ang akon pribilehiyo nga mangin bahin sang organisasyon ni Jehova.”

Sigurado nga nalipay gid si Jehova kon makita niya nga ginapanikasugan sang matutom nga mga brother nga ilugon ang pagtratar niya sa mga babayi. (Hulu. 27:11) Ang isa ka gulang sa Scotland nga si Benjamin nagsiling: “Madamo nga lalaki subong ang wala nagarespeto sa mga babayi. Gani kon ara sa Kingdom Hall ang aton mga sister, gusto naton nga mabatyagan nila nga ginarespeto sila kag ginapalangga.” Dapat gid naton palanggaon kag respetuhon ang aton pinalangga nga mga sister. Gani himuon naton ang aton bug-os nga masarangan para mailog naton ang pagtratar ni Jehova sa aton mga sister.​—Roma 12:10.