1. Ano ang ginaimadyin mo nga hitsura ni Jehova?

 KON nagapangamuyo ka kay Jehova, ano ang ginaimadyin mo nga hitsura niya? Indi naton makita si Jehova, pero ginalaragway sia sa Biblia sa sarisari nga paagi. Halimbawa, gintawag si Jehova nga “adlaw kag taming” kag “isa ka kalayo nga nagapang-upos.” (Sal. 84:11; Heb. 12:29) Ginlaragway ang iya presensia nga daw pareho sa bato nga sapiro, daw nagainggat nga metal, kag daw masanag nga balangaw. (Ezeq. 1:​26-28) Ang pila sa sini nga mga paglaragway kay Jehova nagapalig-on sa aton nga dayawon sia. Pero posible man nga bangod sa sini nga mga paglaragway, matahap kita sa iya.

2. Ngaa nabudlayan ang iban nga mangin suod kay Jehova?

² Bangod indi naton makita si Jehova, posible nga nabudlayan kita nga magpati nga palangga niya kita. Para sa iban nga nakaeksperiensia sang grabe nga mga kabudlayan, indi gid sila pagpalanggaon ni Jehova. Posible amo ini ang ila ginahunahuna kay wala sila nakabatyag sang pagpalangga sang isa ka amay. Nahangpan ni Jehova ini nga balatyagon kag kabalo sia sang epekto sini sa aton. Para buligan kita, ginlaragway ni Jehova ang iya kaugalingon sa Biblia bilang isa ka mapinalanggaon gid nga Dios.

3. Ngaa dapat naton tun-an sing maayo ang gugma ni Jehova?

³ Ang isa ka tinaga nga makalaragway gid kay Jehova amo ang gugma. Ang Biblia nagasiling nga “ang Dios gugma.” (1 Juan 4:8) Ang gugma amo ang nagapalig-on sa iya sa tanan niya nga ginahimo. Ginahigugma pa gani sang Dios bisan ang mga wala nagapalangga sa iya, gani maalwan gid sia sa pagpakita sang gugma kag mabakod gid ang iya gugma. (Mat. 5:​44, 45) Sa sini nga artikulo, binagbinagon naton ang parte kay Jehova kag sa iya gugma. Kon mas makilala pa gid naton sing maayo ang aton Dios, mas higugmaon pa gid naton sia.

PALANGGA GID KITA NI JEHOVA

4. Ano ang masiling mo parte sa gugma ni Jehova? (Tan-awa man ang piktyur.)

⁴ “Si Jehova mapinalanggaon gid.” (Sant. 5:11) Sa Biblia, ginkumparar  niya ang iya kaugalingon sa isa ka mapinalanggaon nga iloy. (Isa. 66:​12, 13) Imadyina ang isa ka iloy nga may gamay pa nga bata. Palangga gid niya ang iya bata, gani ginaatipan niya sia sing maayo. Ginadalodalo niya ang iya bata sa iya mga tuhod, kag makapakalma ang iya tingog kon ginaistorya niya ang iya bata. Kon maghibi ukon nasakitan ang iya bata, ginasigurado niya nga mahatag niya ang mga kinahanglanon sang iya bata. Gani kon nabudlayan kita bangod sa aton problema, makasalig kita sa gugma ni Jehova. Ang salmista nagsulat: “Sang nagdamo ang akon kabalaka, ginlugpayan kag ginpaumpawan mo ako.”​—Sal. 94:19.

5. Ano ang masaligan mo nga himuon ni Jehova bangod sang iya mainunungon nga gugma?

⁵ Mainunungon si Jehova. (Sal. 103:8) Bisan pa makahimo kita sang sala, indi gid sia mag-untat sa paghigugma sa aton. Halimbawa, madamo nga beses nga nasubuan gid si Jehova bangod sa ginahimo sang pungsod sang Israel. Pero sang naghinulsol sila kag gin-untatan nila ang ginahimo nila nga malain, ginsilingan niya sila nga palangga niya gihapon sila. Nagsiling sia: “Nangin hamili ka sa akon, ginpadunggan ka, kag ginhigugma ko ikaw.” (Isa. 43:​4, 5) Makasalig kita nga amo ini gihapon nga klase sang gugma ang ginapakita sa aton sang Dios subong. Bisan pa makahimo kita sang serioso nga mga sala, indi kita pagbiyaan ni Jehova. Kon maghinulsol kita kag magbalik kita kay Jehova, makita naton nga palangga niya gihapon kita. Nagapromisa sia nga ‘nagapatawad sia sing bugana.’ (Isa. 55:7) Dayon, maeksperiensiahan naton ang ginasiling sang Biblia nga “tion sang kaumpawan halin kay Jehova.”​—Binu. 3:19.

6. Ano ang ginatudlo sa aton sang Zacarias 2:8 parte kay Jehova?

⁶ Basaha ang Zacarias 2:8. Bangod palangga kita ni Jehova, nahangpan ni Jehova ang aton ginabatyag kag gusto gid niya nga amligan kita. Kon nasakitan kita, nasakitan man sia. Gani puede gid naton isiling sa aton pangamuyo ang pareho sa sini: “Amligi ako kaangay sang tawotawo sang imo mata.” (Sal. 17:8) Sensitibo kag hamili nga bahin sang lawas ang mga mata. Gani sang ginkumparar kita ni Jehova sa tawotawo sang iya mata, daw pareho lang nga nagsiling sia sing, ‘Kon may maghalit sa inyo, hamili gid sa akon ang ginahalitan nila.’

7. Ngaa dapat naton pabakuron ang aton pagsalig sa gugma ni Jehova?

⁷ Gusto ni Jehova nga mangin kumbinsido kita nga palangga niya ang kada isa sa aton. Pero  kabalo sia nga posible daw indi kita makapati nga palangga niya kita bangod sang mga naeksperiensiahan naton sang una. Ukon posible nga may problema kita subong nga nagatilaw sang aton pagsalig sa gugma ni Jehova. Ano ang makabulig sa aton para magbakod ang aton pagsalig? Dapat naton tun-an kon paano ginapakita ni Jehova ang iya gugma para kay Jesus, sa mga hinaplas, kag sa aton tanan.

KON PAANO GINAPAKITA NI JEHOVA ANG IYA GUGMA

8. Ngaa sigurado si Jesus sa gugma sang iya Amay sa iya?

⁸ Si Jehova kag ang iya Anak ang pinakadugay nga nag-updanay sa bilog nga uniberso. Sa sulod sang binilyon ka tuig nga magkaupod sila sa langit, nangin suod gid sila kag mabakod gid ang ila gugma sa isa kag isa. Mabasa naton sa Mateo 17:5 nga ginpabutyag ni Jehova ang iya gugma para kay Jesus. Puede kuntani nga nagsiling lang si Jehova sing, ‘Ini ang isa nga ginakahamut-an ko.’ Pero, gusto niya nga mabal-an naton nga palangga gid niya si Jesus, gani gintawag niya sia nga “akon Anak, ang hinigugma.” Ginapabugal gid ni Jehova si Jesus, ilabi na kay handa sia nga ihatag ang iya kabuhi. (Efe. 1:7) Kag wala gid nagduhaduha si Jesus nga palangga sia sang iya Amay. Sigurado sia sa gugma sang iya Amay sa iya. Pila ka beses pa gani sia nga nagsiling nga ginahigugma sia sang iya Amay.​—Juan 3:35; 10:17; 17:24.

9. Ano nga ilustrasyon ang nagalaragway sang gugma ni Jehova para sa mga hinaplas? Ipaathag. (Roma 5:5)

⁹ Ginapakita man ni Jehova ang iya gugma para sa mga hinaplas. (Basaha ang Roma 5:5.) Sa orihinal nga lenguahe, ginapakita sini nga teksto nga daw pareho sa tubig ang gugma ni Jehova para sa mga hinaplas. Mabakod gid ang iya gugma para sa ila kay makumparar ini sa sapa nga madamo sing tubig. Ginapakita sini nga ilustrasyon nga palangga gid sila ni Jehova. Kag kabalo ang mga hinaplas nga “ginahigugma [sila] sang Dios.” (Jud. 1) Ginpabutyag ni apostol Juan ang ila ginabatyag bilang mga hinaplas. Nagsiling sia: “Hunahunaa kon daw ano kadaku ang gugma sang Amay sa aton. Gintugutan niya kita nga tawgon nga mga anak sang Dios!” (1 Juan 3:1) Pero, ang mga hinaplas lang bala ang ginahigugma ni Jehova? Indi. Ginpamatud-an ni Jehova nga ginahigugma niya kita tanan.

10. Ano ang pinakamabakod nga pamatuod nga ginahigugma ka ni Jehova?

¹⁰ Ano ang pinakamabakod nga pamatuod nga ginahigugma kita ni Jehova? Ang halad-gawad. Kay man, amo ini ang pinakadaku nga ekspresyon sang gugma sa bilog nga uniberso. (Juan 3:16; Roma 5:8) Ginhatag ni Jehova ang iya pinalangga nga Anak, kag gintugutan niya nga mapatay ang iya Anak para sa tanan nga tawo. Paagi sa sini, mapatawad ang aton mga sala kag mangin abyan naton si Jehova. (1 Juan 4:10) Kon pamalandungan naton pirme ang sakripisyo nga ginhimo ni Jehova kag ni Jesus para magawad kita, marealisar pa gid naton kon daw ano nila ka palangga ang kada isa sa aton. (Gal. 2:20) Gin-aman bala ang gawad bangod amo ini ang ginapatuman sang hustisya? Indi. Gin-aman ang gawad bangod palangga kita ni Jehova. Ginpamatud-an ni Jehova ang iya gugma para sa aton paagi sa paghatag kay Jesus nga pinakapalangga gid niya. Gintugutan ni Jehova nga mag-antos kag mapatay ang iya Anak para sa aton.

11. Ano ang natun-an naton sa Jeremias 31:3?

¹¹ Natun-an naton nga ginahigugma kita ni Jehova kag ginahambal gid niya kon daw ano niya kita ka palangga. (Basaha ang Jeremias 31:3.) Ginbuyok kita ni Jehova bangod palangga niya kita. (Ipaanggid ang Deuteronomio 7:​7, 8.) Mabaton gid naton ang gugma sang Dios kay wala gid sing makapugong sa sini. (Roma 8:​38, 39) Ano ang epekto sa imo sang gugma ni Jehova? Basahon naton ang Salmo 23, kag tan-awon naton kon ano ang epekto kay David sang gugma ni Jehova kag kon ano ang posible nga epekto sini sa aton.

 ANO ANG EPEKTO SA IMO SANG GUGMA NI JEHOVA?

12. Parte sa ano ang Salmo 23?

¹² Basaha ang Salmo 23:​1-6. Ang Salmo 23 isa ka ambahanon nga ginsulat ni David. Ginpabutyag ni David nga kumbinsido gid sia nga palangga sia ni Jehova. Ginlaragway ni David ang ila suod nga kaangtanan ni Jehova, kag gintawag niya si Jehova nga iya Manugbantay. Nagpatuytoy sia kay Jehova kag bug-os gid ang pagsalig niya sa Iya. Kabalo si David nga pakitaan sia ni Jehova sang gugma sa bilog niya nga kabuhi. Ngaa kumbinsido gid si David sa sini?

13. Ngaa sigurado si David nga buligan sia ni Jehova?

¹³ “Indi ako pagkulangon.” Pirme ginaamanan ni Jehova si David sang tanan niya nga kinahanglanon, gani nabatyagan ni David nga ginaatipan gid sia ni Jehova. Kabalo man si David nga abyan niya si Jehova kag nalipay sa iya si Jehova. Gani sigurado sia nga bisan ano man ang matabo sa palaabuton, padayon sia nga buligan ni Jehova. Bangod kumbinsido si David nga palangga sia ni Jehova kag indi Niya sia pagpabay-an, nakabulig ini sa iya nga mangin malipayon kag kontento kag indi magkabalaka.​—Sal. 16:11.

14. Paano kita buligan ni Jehova?

¹⁴ Kon may indi maayo nga matabo sa aton kabuhi, buligan gid kita ni Jehova bangod palangga niya kita. Binagbinaga ang halimbawa ni Claire a nga nakaalagad sa Bethel sing sobra 20 ka tuig. Sunodsunod ang mabudlay nga mga problema nga naeksperiensiahan sang ila pamilya, kag daw indi sia kabalo kon paano niya sila buligan. Na-stroke ang iya amay, na-disfellowship ang isa niya ka utod nga babayi, naputo ang gamay nga negosyo sang ila pamilya, kag gin-imbargo sang bangko ang ila balay. Paano ginpakita ni Jehova nga palangga niya sila kag paano niya sila ginbuligan? Nagsiling si Claire: “Gin-amanan ni Jehova  ang akon pamilya sang ila mga kinahanglanon kada adlaw. Madamo nga beses nga sobra pa sa amon mga kinahanglanon ang ginahatag niya. Pirme ko ginapamalandungan ang mga tion nga ginbuligan kami ni Jehova, kag indi ko gid malipatan kon paano niya ginpakita nga palangga niya kami. Ini nga mga eksperiensia nakabulig sa akon nga padayon nga mag-alagad kay Jehova bisan pa may mga problema.”

15. Ano ang nakabulig kay David nga magpagsik? (Tan-awa man ang piktyur.)

¹⁵ “Ginapapagsik niya ako.” May mga tion nga nasubuan gid si David bangod sang tanan niya nga mga problema kag mga pagtilaw. (Sal. 18:​4-6) Pero, ginpapagsik sia sang gugma ni Jehova. Gindala ni Jehova ang iya kapoy nga abyan sa “madabong nga halalban” kag sa “mga palahuwayan sa higad sang linaw.” Gani, nagpagsik liwat si David kag nakapadayon sia sa pag-alagad kay Jehova sing malipayon.​—Sal. 18:​28-32.

16. Paano ka napapagsik sang gugma ni Jehova?

¹⁶ Subong, bisan pa may mga problema kita kag mga kabudlayan, mabatas naton ini “bangod sa mainunungon nga gugma ni Jehova.” (Pan. 3:22; Col. 1:11) Binagbinaga ang halimbawa ni Rachel. Sa tion sang COVID-19 nga pandemic, ginbiyaan sia sang iya bana kag nag-untat sa pag-alagad kay Jehova ang iya bana, gani grabe gid kasakit sang iya nabatyagan. Paano sia ginbuligan ni Jehova? Nagsiling sia: “Ginsigurado ni Jehova nga mabatyagan ko nga palangga niya ako. Ginhatagan niya ako sang mga abyan nga nagaupod sa akon, nagadala sa akon sang pagkaon, nagapadala sa akon sang mga mensahe kag makapalig-on nga mga teksto, nagayuhum sa akon, kag pirme nagapahanumdom sa akon nga ginabuligan ako ni Jehova. Pirme ko ginapasalamatan si Jehova kay ginhatagan niya ako sang isa ka daku kag mahigugmaon nga pamilya.”

17. Ngaa ‘wala mahadlok’ si David?

¹⁷ “Wala ako mahadlok, kay kaupod ko ikaw.” Ara pirme sa peligro ang kabuhi ni David, kag madamo sia sang gamhanan nga mga kaaway. Pero bangod sang gugma ni Jehova, nabatyagan ni David nga indi sia pagpabay-an ni Jehova kag amligan Niya sia. Kumbinsido gid sia sa sini bangod nabatyagan niya nga kaupod niya si Jehova sa tanan nga sitwasyon sa iya kabuhi. Gani, nakaamba sia: “Ginluwas [ako ni Jehova] sa tanan nga ginakahadlukan ko.” (Sal. 34:4) Bisan pa may mga tion nga hinadlukan si David, nadaug niya ini bangod kabalo sia nga palangga sia ni Jehova.

18. Bangod kabalo ka nga palangga ka ni Jehova, paano ini makapabakod sa imo kon nahadlok ka?

¹⁸ Bangod kabalo kita nga palangga kita ni Jehova,  paano ini makapabakod sa aton kon mabudlay gid ang aton sitwasyon kag nahadlok kita? Binagbinaga ang halimbawa sang isa ka payunir nga si Susi. Amo ini ang ginsiling niya nga nabatyagan niya kag sang iya bana sang naghikog ang ila bata nga lalaki: “Kon gulpi lang may matabo sa imo kabuhi nga grabe kasubo, daw madulaan ka sing paglaum kag daw indi ka kabalo sang imo himuon. Pero bangod kabalo kami nga palangga kami ni Jehova, kumbinsido kami nga indi niya kami pagpabay-an kag amligan niya kami.” Si Rachel, nga ginsambit kaina, nagsiling: “Isa ka gab-i, nasubuan gid ako. Grabe man ang akon kabalaka kag kahadlok. Gani nangamuyo ako sing matunog kay Jehova. Sadto mismo nga tion, nabatyagan ko nga ginapakalma ako ni Jehova nga daw pareho sa isa ka iloy nga nagauloulo sa iya bata, gani natulugan ako. Indi ko gid ’to malipatan.” Binagbinaga man ang halimbawa sang isa ka gulang nga si Tasos. Napriso sia sing apat ka tuig bangod nangindi sia nga magsoldado. Paano sia ginbuligan ni Jehova? Nagsiling sia: “Sobra pa sa mga kinahanglanon ko ang gin-aman ni Jehova sa akon. Bangod sini, nangin kumbinsido pa gid ako nga masaligan ko gid sia. Paagi man sa espiritu ni Jehova, ginbuligan niya ako nga mangin malipayon bisan pa grabe kabudlay sang sitwasyon sa prisuhan. Nakabulig ini sa akon nga marealisar nga kon pabakuron ko pa gid ang akon pagsalig kay Jehova, mas mabatyagan ko pa gid ang iya gugma. Gani nagregular payunir ako samtang ara ako sa prisuhan.”

PANIKASUGI NGA MANGIN SUOD PA GID SA IMO MAPINALANGGAON NGA DIOS

19. (a) Bangod kabalo kita nga palangga kita sang Dios, ano ang puede naton ipangamuyo sa iya? (b) Kon parte sa paglaragway sa gugma ni Jehova, diin sa sini ang nanamian mo gid? (Tan-awa ang kahon nga “ Mga Ekspresyon nga Nagabulig sa Aton nga Mabatyagan ang Gugma ni Jehova.”)

¹⁹ Ang mga eksperiensia nga ginbinagbinag naton nagapamatuod nga kaupod naton “ang Dios sang gugma” nga si Jehova. (2 Cor. 13:11) Interesado sia sa kada isa sa aton. Kag kumbinsido kita nga “ginapalibutan [kita] sang iya mainunungon nga gugma.” (Sal. 32:10) Kon pirme naton pamalandungan ang iya gugma nga ginapakita sa aton, mangin mas maathag sa aton nga nagaulikid gid sia sa aton kag mas magasuod kita sa iya. Gani, indi kita matahap nga mangamuyo sa iya kag ihambal naton sa iya nga kinahanglan gid naton ang iya gugma. Puede naton isugid sa iya ang tanan naton nga kabalaka, kag makasalig kita nga nahangpan niya kita kag gusto gid niya nga buligan kita.​—Sal. 145:​18, 19.

20. Ngaa mapalig-on kita sang gugma ni Jehova nga magpalapit sa iya?

²⁰ Kon matugnaw ang tiempo, gusto naton magpalapit sa kalayo para magpainit-init. Sing kaanggid, gusto naton magpalapit kay Jehova para mabatyagan naton ang iya gugma. Mabakod gid kag makapaumpaw ang gugma ni Jehova. Gani batuna ang iya gugma. Kag kabay pa nga balusan naton ang iya gugma paagi sa pagsiling sing: “Ginahigugma ko si Jehova.”​—Sal. 116:1.