1. Ano ang mga rason kon ngaa makabatyag kita sang kahadlok kon kaisa?

 MAY mga tion nga makabatyag kita sang kahadlok. Pero bangod nagtuon kita sang Biblia, wala na kita nahadlok sa mga patay, sa mga demonyo, kag sa matabo sa palaabuton. Pero nagakabuhi kita sa tion nga nagakatabo ang “makahaladlok nga mga talan-awon,” pareho sang inaway, krimen, kag balatian. (Luc. 21:11) Posible nga nahadlok man kita sa mga tawo, pareho sang mga opisyal sang gobierno ukon mga miembro sang aton pamilya nga nagapamatok sa aton pag-alagad kay Jehova. Nabalaka naman ang iban kay basi indi nila masarangan nga batason ang ila problema subong ukon ang posible mangin problema nila sa ulihi.

2. Ilaragway ang sitwasyon ni David sang ara sia sa Gat.

² May mga tion nga nakabatyag si David sang kahadlok. Halimbawa, sang tion nga ginalagas sia ni Hari Saul kay gusto sia patyon ni Saul, nagpalagyo sia sa Gat nga isa ka siudad sang mga Filistinhon. Sang ulihi, nabal-an ni Hari Akis sang Gat nga si David amo ang maisog nga soldado nga ginhimuan sang ambahanon nga nakapatay sing “tignapulo ka libo” ka mga Filistinhon. Bangod sini, “hinadlukan gid” si David sa posible himuon ni Akis sa iya. (1 Sam. 21:10-12) Ano ang nakabulig kay David nga mangin kalmado?

3. Suno sa Salmo 56:1-3, 11, ano ang nakabulig kay David sang hinadlukan sia?

³ Mabasa sa Salmo 56 kon ano ang ginbatyag ni David sang ara sia sa Gat. Sa sini nga salmo, ginpaathag ni David kon ngaa hinadlukan sia kag kon ano ang nakabulig sa iya. Sang hinadlukan si David, nagsalig sia kay Jehova. (Basaha ang Salmo 56:1-3, 11.) May rason gid si David nga magsalig kay Jehova. Sa bulig ni Jehova, nagdesisyon si David nga magpakunokuno nga isa sia ka buang. Daw indi mapatihan ang ginhimo ni David, pero nagmadinalag-on  ang iya plano. Kay man, imbes nga patyon kuntani si David, gintabog sia ni Akis. Bangod sini, nakapalagyo si David.​—1 Sam. 21:13–22:1.

4. Paano naton mapabakod ang aton pagsalig kay Jehova? Maghatag sing ilustrasyon.

⁴ Kon magsalig kita kay Jehova, masarangan man naton nga mangin kalmado bisan pa nahadlok kita. Pero paano naton mapabakod ang aton pagsalig kay Jehova ilabi na kon nahadlok kita? Binagbinaga ini nga ilustrasyon. Kon ginsilingan ka sang imo doktor nga may balatian ka, posible nga makabatyag ka sang kahadlok. Pero kon may salig ka sa imo doktor, makabulig ini sa imo nga mangin kalmado. Posible nga madamo na sia sing nangin pasyente nga pareho sa imo ang balatian, kag nabuligan niya sila nga mag-ayo. Ginapamatian ka niya sing maayo, kag ginapabatyag niya sa imo nga nahangpan ka gid niya. Kag posible nga isugid niya sa imo kon paano niya nabuligan nga mag-ayo ang iban niya nga mga pasyente. Sing kaanggid, mapabakod naton ang aton pagsalig kay Jehova kon binagbinagon naton ang mga nahimo na niya para sa aton, ang iya mga ginahimo subong, kag ang mga himuon niya sa palaabuton. Amo ini ang ginhimo ni David. Gani samtang ginabinagbinag naton ang pila sa iya mga ginsulat sa Salmo 56, hunahunaa kon paano mo man mapabakod ang imo pagsalig kay Jehova para makapabilin ka nga kalmado.

ANO ANG MGA NAHIMO NA NI JEHOVA?

5. Sang hinadlukan si David, ano ang ginpamalandungan niya? (Salmo 56:12, 13)

⁵ Sang ara sa peligro ang kabuhi ni David, nagpokus sia sa mga nahimo na ni Jehova. (Basaha ang Salmo 56:12, 13.) Pirme ini ginahimo ni David sa bilog niya nga kabuhi. Halimbawa, may mga tion nga ginpamalandungan niya ang mga gintuga ni Jehova. Nagpahanumdom ini sa iya kon daw ano ka gamhanan si Jehova kag palangga gid Niya ang mga tawo. (Sal. 65:6-9) Ginpamalandungan man ni David ang mga ginhimo ni Jehova para sa iban. (Sal. 31:19; 37:25, 26) Kag ginpamalandungan niya ang mga ginhimo ni Jehova para sa iya. Halimbawa, ginbuligan sia ni Jehova kag gin-amligan halin sang bata pa sia. (Sal. 22:9, 10) Sigurado gid nga nakabulig kay David ini nga mga pagpamalandong para magbakod ang iya pagsalig kay Jehova.

6. Kon nahadlok kita, ano ang makabulig sa aton para magsalig kita kay Jehova?

 ⁶ Kon nahadlok ka, pamangkuta ang imo kaugalingon, ‘Ano ang mga nahimo na ni Jehova?’ Pamalandungi ang iya mga gintuga. Halimbawa, “tan-awa” kon paano ginaatipan ni Jehova ang mga pispis kag ang mga bulak bisan pa nga wala niya sila gintuga suno sa iya larawan kag indi sila makasimba sa iya. Kon pamalandungan mo ini, magabakod ang imo pagsalig sa iya nga atipanon ka man niya. (Mat. 6:25-32) Binagbinaga man ang mga ginhimo ni Jehova para sa iya mga alagad. Puede mo tun-an ang parte sa isa ka karakter sa Biblia nga may tumalagsahon nga pagtuo, ukon puede mo basahon ang isa ka eksperiensia sang alagad ni Jehova sa aton tion subong. a Pamalandungi man kon paano ginpakita ni Jehova nga palangga ka niya. Paano ka niya ginbuligan nga matun-an ang kamatuoran? (Juan 6:44) Paano niya ginsabat ang imo mga pangamuyo? (1 Juan 5:14) Paano ka nagabenepisyo adlaw-adlaw sa halad-gawad sang iya pinalangga nga Anak?​—Efe. 1:7; Heb. 4:14-16.

7. Paano nakabulig kay Vanessa ang eksperiensia ni manalagna Daniel para madula ang iya kahadlok?

⁷ Binagbinaga ang makahaladlok nga sitwasyon ni Vanessa b nga isa ka sister sa Haiti. May isa ka lalaki sa ila lugar nga nagatawag kag naga-text sa iya adlaw-adlaw, kag ginapilit sia sang lalaki nga makig-sex sa iya. Prangka nga ginpangindian ni Vanessa ang lalaki. Pero mas nangin pursigido pa gid ang lalaki kag ginpahog pa gani niya si Vanessa nga may malain sia nga himuon sa iya. “Hinadlukan ako,” siling ni Vanessa. Ti, ano ang iya ginhimo? Ginhimo niya ang iya bug-os nga masarangan para maamligan niya ang iya kaugalingon. Ginbuligan man sia sang isa ka gulang nga magreport sa awtoridad. Pero ginpamalandungan man niya kon paano gin-amligan ni Jehova ang iya mga alagad sang una. Nagsiling si Vanessa: “Ang una ko gid nga napensaran amo si manalagna Daniel. Gintagbong sia sa lungib sang gutom nga mga leon bisan pa nga wala sia sing sala. Pero, gin-amligan sia ni Jehova. Gani gintugyan ko kay Jehova ang akon sitwasyon kay kabalo ako nga solbaron niya ini. Sang ginhimo ko ini, nadula ang akon kahadlok.”​—Dan. 6:12-22.

ANO ANG MGA GINAHIMO NI JEHOVA SUBONG?

8. Sa ano kumbinsido si David? (Salmo 56:8)

⁸ Delikado gid ang sitwasyon ni David sang ara sia sa Gat, pero wala sia nagpaapekto sa iya kahadlok. Sa baylo, ginpamalandungan niya kon ano ang ginahimo ni Jehova para sa iya sadto nga tion. Narealisar ni David nga ginagiyahan sia ni Jehova, ginaamligan Niya sia, kag nahangpan Niya ang iya ginabatyag. (Basaha ang Salmo 56:8.) May mga abyan man si David, pareho kay Jonatan kag kay Ahimelec nga mataas nga saserdote, nga nagpalig-on kag nagbulig sa iya. (1 Sam. 20:41, 42; 21:6, 8, 9) Kag bisan pa nga gusto sia patyon ni Hari Saul, nakapalagyo si David. Kumbinsido si David nga kabalo si Jehova kon ano ang iya problema kag kon ano ang epekto sini sa iya.

9. Ano ang nakita ni Jehova sa kada isa sa aton?

⁹ Kon nahadlok ka bangod sang imo problema, dumduma nga kabalo si Jehova kon ano ang imo problema kag kon ano ang imo ginabatyag bangod sini. Halimbawa, nakita ni Jehova kon paano ginpabudlayan ang mga Israelinhon sa Egipto kag nabal-an niya “ang ila pag-antos.” (Ex. 3:7) Sa isa ka ambahanon ni David, nagsiling sia nga nakita ni Jehova ang iya “kalisdanan” kag ang iya “tuman nga kasakit.” (Sal. 31:7) Kag kon nagaantos ang katawhan sang Dios, ‘nagaantos man sia.’ May mga  tion nga ang iya katawhan amo ang balasulon sa ila pag-antos, pero nasakitan gihapon sia. (Isa. 63:9) Gani kon nahadlok ka, nahangpan ni Jehova ang imo ginabatyag kag gusto gid niya nga buligan ka para madula ang imo kahadlok.

10. Ngaa kumbinsido ka nga palangga ka ni Jehova kag buligan ka niya nga masarangan ang bisan ano nga problema?

¹⁰ Kon nahadlok ka bangod sang imo problema, posible indi mo makita kon paano ka ginabuligan ni Jehova. Ano ang puede mo himuon? Pangabaya sia nga buligan ka nga makita ang iya bulig. (2 Hari 6:15-17) Dayon binagbinaga ini: May pamulongpulong bala ukon komento nga nabatian mo sa miting sang kongregasyon nga nagpabakod sa imo? May publikasyon bala, video, ukon orihinal nga kanta nga nagpalig-on sa imo? May utod bala nga nag-share sa imo sang teksto ukon makapaumpaw nga punto? Posible nga nagakalipatan naton kon paano kita napabakod sang gugma sang aton mga kauturan kag kon paano kita napalig-on sang Biblia. Pero, dalayawon gid ini nga mga regalo halin kay Jehova. (Isa. 65:13; Mar. 10:29, 30) Mga pamatuod ini nga palangga ka niya. (Isa. 49:14-16) Kag mga pamatuod ini nga masaligan mo gid sia.

11. Ano ang nakabulig kay Aida nga madula ang iya kahadlok?

¹¹ Binagbinaga si Aida nga taga-Senegal. Sang may problema sia, ginpamalandungan niya kon paano sia ginbuligan ni Jehova. Bangod sia ang kamagulangan, gusto sang iya mga ginikanan nga maghimakas sia para madamo sia sang kuarta nga isuporta sa ila kag sa iya kaugalingon. Pero gamay lang ang kuarta ni Aida kay ginpasimple niya ang iya kabuhi para makapayunir sia. Bangod sini, naakig sa iya ang iya pamilya kag ginpakalain nila sia. Nagsiling si Aida: “Nahadlok ako kay basi indi ko mabuligan ang akon mga ginikanan kag pakalainon ako sang tanan. Ginbasol ko pa gani si Jehova kay nagbudlay pa gid ang akon sitwasyon.” Sang ulihi, nakabati sia sang isa ka pamulongpulong sa miting. “Ginpahanumdom sa amon sang speaker nga kabalo si Jehova sang rason kon ngaa nahadlok kita ukon nabalaka. Paagi sa laygay sang mga gulang kag sang iban, amat-amat nga nagbakod liwat ang akon pagsalig nga palangga ako ni Jehova. Kon nagapangamuyo ako subong kay Jehova, kumbinsido gid ako nga buligan niya ako. Kag sa kada tion nga makita ko kon paano niya  ginasabat ang akon mga pangamuyo, nagatawhay ang akon hunahuna.” Sang ulihi, nakakita si Aida sang obra. Nakabulig ini sa iya nga masuportahan ang iya pagpayunir, ang iya mga ginikanan, kag ang iban. Nagsiling sia: “Natun-an ko nga dapat ako magsalig kay Jehova sing bug-os. Subong, kada tapos ko pangamuyo, nagakadula ang akon nabatyagan nga kahadlok.”

ANO ANG MGA HIMUON NI JEHOVA SA PALAABUTON?

12. Suno sa Salmo 56:9, sa ano sigurado si David?

¹² Basaha ang Salmo 56:9. Ginapakita sini nga teksto kon ano pa ang nakabulig kay David sang hinadlukan sia. Bisan pa ara sa peligro ang iya kabuhi, ginpamalandungan niya kon ano ang mga himuon ni Jehova para sa iya sa palaabuton. Kabalo si David nga luwason sia ni Jehova sa husto gid nga tion. Kay man, nagsiling si Jehova nga si David amo ang masunod nga hari sang Israel. (1 Sam. 16:1, 13) Para kay David, kon may ginpromisa si Jehova, matuman gid ini.

13. Ano ang masigurado naton nga himuon ni Jehova?

¹³ Ano ang ginpromisa ni Jehova nga himuon niya para sa imo? Wala naton ginapaabot nga amligan niya kita sa tanan nga problema. c Pero tandai nga bisan ano man nga problema ang imo maeksperiensiahan sa sining daan nga kalibutan, dulaon ini ni Jehova sa bag-o nga kalibutan. (Isa. 25:7-9) Gamhanan gid ang aton Manunuga kag masarangan niya nga banhawon ang mga patay, ayuhon ang aton mga balatian, kag dulaon ang tanan nga nagapamatok sa aton.​—1 Juan 4:4.

14. Ano ang puede naton pamalandungan?

¹⁴ Sa kada tion nga nahadlok ka, pamalandungi ang mga himuon ni Jehova sa palaabuton. Hunahunaa ang imo mabatyagan kon wala na si Satanas, kon wala na ang malain nga mga tawo kag puro matarong nga mga tawo na lang ang nabilin, kag kon mangin perpekto ka na. May isa ka demonstrasyon sang 2014 nga rehiyonal nga kombension nga nagapakita kon paano naton pamalandungan ang aton paglaum. Sa demonstrasyon, ginbinagbinag sang isa ka amay sa iya pamilya ang 2 Timoteo 3:1-5, kag nagsiling sia nga basahon niya ini sa paagi nga daw nagatagna ini sang kahimtangan sa Paraiso. Nagsiling sia: “Sa bag-o nga kalibutan, maeksperiensiahan naton ang pinakamalipayon nga mga tion. Kay ang mga tawo mangin mahigugmaon sa isigkatawo, mahigugmaon sa kamatuoran, maugdang, mapainubuson, nagadayaw sa Dios, matinumanon sa mga ginikanan, mapinasalamaton, mainunungon, mapinalanggaon sa ila pamilya, nagasugot sa kasugtanan, pirme nagahambal sing maayo sa iban, may pagpugong sa kaugalingon, malulo, mahigugmaon sa kon ano ang maayo, masaligan, nagapasakop, mapainubuson sing hunahuna, mahigugmaon sa Dios sa baylo nga mahigugmaon sa kinasadya, naimpluwensiahan sang matuod nga diosnon nga mga kinaiya; kag panikasugi nga mangin suod sa sini nga mga tawo.” Ginabinagbinag mo bala upod sa imo pamilya ukon sa imo mga kauturan ang parte sa kabuhi sa bag-o nga kalibutan?

15. Bisan pa nahadlok si Tanja, ano ang nakabulig sa iya nga magpabilin nga matutom?

¹⁵ Binagbinaga ang eksperiensia sang isa ka sister sa North Macedonia nga si Tanja. Sang nag-Bible study sia, grabe ang pagpamatok sang iya mga ginikanan. Nagsiling sia: “Nahadlok ako sa mga posible matabo, kag naeksperiensiahan ko gid ang pila sa sini. Ginasakit ako ni Nanay kada tapos sang miting. Ginpahog ako sang akon mga ginikanan nga patyon nila ako kon mangin isa ako ka Saksi ni Jehova.” Sang ulihi, ginpalayas si Tanja sa ila balay. Ano ang iya ginhimo? Nagsiling sia: “Ginpamalandungan ko nga mangin malipayon gid ako asta sa wala sing katapusan kon magpabilin ako nga matutom. Ginpamalandungan ko man ang padya nga ihatag sa akon ni Jehova  sa bag-o nga kalibutan nga sobra pa sa bisan ano nga posible isakripisyo ko sa sini nga sistema, kag ang tion nga malipatan ko na ang tanan nga indi maayo nga natabo sa akon.” Nagpabilin nga matutom si Tanja. Kag sa bulig ni Jehova, nakakita sia sang ilistaran. Nakapamana si Tanja sang isa ka matutom nga brother, kag malipayon sila subong nga nagapayunir.

PABAKURA ANG IMO PAGSALIG KAY JEHOVA SUBONG

16. Kon matabo na ang gintagna sa Lucas 21:26-28, ano ang makabulig sa aton nga mangin maisog?

¹⁶ Sa tion sang dakung kapipit-an, ang kalabanan nga tawo “magakapunaw sa kahadlok.” Pero magapabilin nga malig-on kag maisog ang katawhan sang Dios. (Basaha ang Lucas 21:26-28.) Ngaa indi kita mahadlok? Bangod natun-an na naton nga magsalig kay Jehova. Si Tanja, nga ginsambit kaina, nagsiling nga nakabulig sa iya ang mga eksperiensia niya sang una para masarangan niya ang mabudlay nga mga sitwasyon. Nagsiling sia: “Natun-an ko nga mabuligan kita ni Jehova sa bisan ano nga sitwasyon. Kon kaisa, pamatyag naton kontrolado sang iban ang nagakatabo, pero mas gamhanan sa ila si Jehova. Kag bisan pa mabudlay ang aton problema, matapos gid ini.”

17. Paano makabulig sa aton ang aton tuigan nga teksto sa 2024? (Tan-awa ang piktyur sa kober.)

¹⁷ Subong, madamo nga butang ang posible makapahadlok sa aton. Pero pareho kay David, masarangan naton nga indi magpaapekto sa kahadlok. Ang aton tuigan nga teksto sa 2024 amo ang isa sa mga pangamuyo ni David kay Jehova: “Sa tion nga nahadlok ako, nagasalig ako sa imo.” (Sal. 56:3) Amo ini ang ginsiling sang isa ka reperensia sa Biblia parte sa sini nga teksto: “Ginpanikasugan ni David nga indi pirme pagpamensaron ang mga ginakahadlukan niya ukon ang iya mga problema. Sa baylo, nagdangop sia sa iya Manluluwas nga amo ang magabulig sa iya.” Sa masunod nga mga binulan, pamalandungi ang aton tuigan nga teksto ilabi na kon makaeksperiensia ka sang mabudlay nga mga sitwasyon. Magpain sang tion para pamalandungan ang mga ginhimo ni Jehova sang una, ang mga ginahimo niya subong, kag ang mga himuon niya sa palaabuton. Kon himuon mo ini, masiling mo man ang ginsiling ni David: “Sa Dios ako nagasalig; wala ako mahadlok.”​—Sal. 56:4.