1. Ano ang benepisyo kon naga-attend kita sa Memoryal sang kamatayon sang Cristo kada tuig?

 SIGURADO gid nga magakomporme ka nga isa ka hamili nga regalo ang gawad. (2 Cor. 9:15) Bangod ginhalad ni Jesus ang iya kabuhi, puede ka mangin abyan ni Jehova nga Dios. May paglaum ka man nga mabuhi sing wala sing katapusan. Gani, dapat gid naton pasalamatan si Jehova nga amo ang nag-aman sang gawad bangod palangga gid niya kita. (Roma 5:8) Para indi kita malipat nga magpasalamat kag para indi naton pagbalewalaon ang gawad, ginsugo kita ni Jesus nga saulugon ang Memoryal sang iya kamatayon kada tuig.​—Luc. 22:​19, 20.

2. Ano ang binagbinagon naton sa sini nga artikulo?

² Sa sini nga tuig, saulugon naton ang Memoryal sa Sabado, Abril 12, 2025. Sigurado gid nga gusto naton tanan mag-attend sa sini. Daku gid ang mabenepisyo naton kon pamalandungan a naton ang ginhimo ni Jehova kag sang iya Anak para sa aton. Gani, mga pila ka semana antes kag pagkatapos sang Memoryal, magpain kita sang tion para pamalandungan ini. Sa sini nga artikulo, binagbinagon naton kon ano ang ginatudlo sa aton sang gawad parte kay Jehova kag sa iya Anak. Sa masunod nga artikulo, binagbinagon naton kon ano nga mga pagpakamaayo ang ginpaposible sang gawad kag kon paano naton mapakita ang aton pagpasalamat sa sini.

KON ANO ANG GINATUDLO SA ATON SANG GAWAD PARTE KAY JEHOVA

3. Paano maluwas ang minilyon ka tawo paagi sa kamatayon sang isa ka tawo? (Tan-awa man ang piktyur.)

³ Ginatudluan kita sang gawad parte sa katarungan ni Jehova. (Deut. 32:4) Ngaa masiling naton ini? Binagbinaga ini: Bangod wala nagtuman si Adan, napanubli naton ang sala nga nagaresulta  sa kamatayon. (Roma 5:12) Para mahilway kita sa sala kag kamatayon, ginpadala ni Jehova si Jesus para gawaron kita. Pero, paano maluwas ang minilyon ka tawo paagi sa kamatayon sang isa ka perpekto nga tawo? Ari ang paathag ni apostol Pablo: “Subong nga paagi sa pagkadimatinumanon sang isa ka tawo [si Adan] madamo ang nangin makasasala, paagi man sa pagkamatinumanon sang isa ka tawo [si Jesus] madamo ang mangin matarong.” (Roma 5:19; 1 Tim. 2:6) Buot silingon, naulipon sa sala kag kamatayon ang tanan nga tawo bangod wala nagtuman ang isa ka perpekto nga tawo. Gani, para mahilway kita sa sala kag kamatayon, dapat mangin matinumanon ang isa ka perpekto nga tawo.

4. Ngaa wala na lang gintugutan ni Jehova nga magkabuhi sing wala sing katapusan ang matinumanon nga mga kaliwatan ni Adan?

⁴ Dapat gid bala mapatay si Jesus para maluwas kita? Ano abi kon gintugutan na lang ni Jehova nga magkabuhi sing wala sing katapusan ang matinumanon nga mga kaliwatan ni Adan? Bilang indi perpekto nga mga tawo, posible mahunahuna naton nga daw maayo kag makatarunganon ini nga himuon. Pero para kay Jehova, indi ini makatarunganon. Bangod matarong si Jehova, indi puede nga balewalaon lang niya ang serioso nga sala nga ginhimo ni Adan.

5. Ngaa makasalig kita nga himuon gid pirme ni Jehova ang husto?

⁵ Kon wala nag-aman si Jehova sang gawad kag kon gintugutan lang niya nga magkabuhi sing wala sing katapusan ang indi perpekto nga mga kaanakan ni Adan, daw pareho lang nga ginbalewala Niya ang Iya matarong nga mga kasuguan parte sa husto kag sala. Kag posible hunahunaon sang mga tawo nga basi balewalaon liwat sang Dios ang iya matarong nga mga kasuguan. Kag posible pamensaron man sang mga tawo nga basi indi pagtumanon sang Dios ang iban niya nga mga promisa. Pero, indi gid kita dapat mabalaka nga basi himuon niya ini. Ngaa? Kay man, ginhimo gid ni Jehova kon ano ang matarong bisan pa nga kinahanglan niya ihalad ang iya pinalangga nga Anak. Gani, makasalig kita nga himuon gid niya pirme ang husto.

6. Paano ginpakita ni Jehova ang iya gugma paagi sa gawad? (1 Juan 4:​9, 10)

⁶ Paagi sa gawad, nahangpan naton nga matarong si Jehova. Pero, mas labi naton nga mahangpan sa sini kon daw ano kadaku ang gugma niya para sa aton. (Juan 3:16; basaha ang 1 Juan 4:​9, 10.) Gin-aman ni Jehova ang gawad bangod gusto niya nga mabuhi kita sing wala sing katapusan kag gusto niya nga mangin bahin kita sang iya pamilya. Binagbinaga ini: Sang nagpakasala si Adan, ginpagua sia ni Jehova sa Iya pamilya. Bangod sini, indi kita bahin sang pamilya sang Dios sang ginbun-ag kita. Pero paagi sa gawad, mapatawad ni Jehova ang aton mga sala. Kag sa ulihi, mangin bahin sang iya pamilya ang tanan nga tawo nga nagatuo kag nagatuman sa  iya. Pero bisan subong pa lang, puede kita mangin suod kay Jehova kag sa aton mga kauturan. Ginapakita sini nga palangga gid kita ni Jehova.​—Roma 5:​10, 11.

7. Paano ginapakita sang pag-antos ni Jesus nga palangga gid kita ni Jehova?

⁷ Kon binagbinagon naton ang ginsakripisyo ni Jehova para maaman ang gawad, mas mahangpan pa gid naton kon daw ano niya kita ka palangga. Nagsiling si Satanas nga kon makaeksperiensia sang mga kabudlayan ang mga alagad sang Dios, wala sing bisan isa sa ila ang magapabilin nga matutom sa Iya. Para pamatud-an nga butigon si Satanas, gintugutan ni Jehova nga mag-antos si Jesus antes sia mapatay. (Job 2:​1-5; 1 Ped. 2:21) Nagatan-aw si Jehova sang ginyaguta si Jesus sang mga lider sang relihion nga nagapamatok sa iya, sang ginlatigo sia sang mga soldado, kag sang ginlansang sia sa usok. Kag ginatan-aw ni Jehova ang iya pinalangga nga Anak samtang nagaantos sia sang masakit nga kamatayon. (Mat. 27:​28-31, 39) May gahom si Jehova nga punggan ini tanan. Halimbawa, nagsiling ang mga tawo: “Kon nahamuot ang Dios sa iya, luwason sia sang Dios.” (Mat. 27:​42, 43) Sadto mismo nga tion, puede gid kuntani luwason ni Jehova si Jesus. Pero, kon nagpasilabot si Jehova, wala kuntani kita magawad kag wala kita sing paglaum. Gani, gintugutan ni Jehova nga mag-antos ang iya Anak asta nga napatay sia.

8. Ngaa masiling naton nga nasakitan si Jehova sang nakita niya nga nagaantos ang iya Anak? (Tan-awa man ang piktyur.)

⁸ Indi naton dapat paghunahunaon nga bangod ang Dios amo ang labing gamhanan, wala sia sing balatyagon. Sa aton bahin, may balatyagon kita bangod gintuga niya kita suno sa iya larawan. Gani, ginapahangop sini nga may balatyagon man sia. Suno sa Biblia, ‘nasakitan’ sia kag ‘nasubuan.’ (Sal. 78:​40, 41) Binagbinaga man ang kasaysayan ni Abraham kag ni Isaac. Ginsugo ni Jehova si Abraham nga ihalad niya ang iya bugtong nga anak. (Gen. 22:​9-12; Heb. 11:​17-19) Hunahunaa ang sarisari nga balatyagon nga nabatyagan ni Abraham sang patyon na niya si Isaac. Sigurado nga nasubuan gid si Abraham. Gani, makasiling kita nga mas nasubuan si Jehova sang nakita niya nga ginkastigo kag ginpatay ang iya Anak sang malain nga mga tawo.​—Tan-awa sa jw.org/hil ang video nga Iluga ang Ila Pagtuo—Abraham, Bahin 2.

9. Ano ang matun-an mo sa Roma 8:​32, 38, 39 parte sa gugma ni Jehova para sa imo kag para sa imo mga kauturan?

⁹ Ginatudluan kita sang gawad nga wala gid sing makalabaw sa gugma ni Jehova para sa aton. Indi ini malabawan bisan sang gugma sang aton pinakasuod nga paryente ukon abyan. (Basaha ang Roma 8:​32, 38, 39.) Sigurado gid nga mas labaw ang gugma ni Jehova sa aton sangsa gugma naton sa aton kaugalingon. Gusto mo bala mabuhi sing wala sing katapusan? Mas gusto ni Jehova nga mabuhi ka sing wala sing katapusan.  Gusto mo bala nga patawaron ka sa imo mga sala? Mas gusto ni Jehova nga patawaron ka. Ari lang ang ginapatuman niya sa aton: Gusto niya nga batunon naton ang iya hamili nga regalo, magtuo kita sa iya, kag tumanon naton sia. Isa ka hamili nga regalo ang gawad, kag ginapakita sini nga palangga gid kita sang Dios. Kag sa bag-ong kalibutan, madamo pa kita sing matun-an parte sa gugma ni Jehova.​—Man. 3:11.

KON ANO ANG GINATUDLO SA ATON SANG GAWAD PARTE KAY JESUS

10. (a) Ngaa nasubuan gid si Jesus parte sa iya kamatayon? (b) Paano ginbindikar ni Jesus ang ngalan ni Jehova? (Tan-awa man ang kahon nga “ Ginbindikar ni Jesus ang Ngalan ni Jehova Paagi sa Pagpabilin nga Matutom.”)

¹⁰ Importante gid kay Jesus ang reputasyon sang iya Amay. (Juan 14:31) Bangod gin-akusahan si Jesus nga ginpasipalahan niya kuno ang Dios kag isa sia kuno ka kriminal, nasubuan gid sia kay basi mapakahuy-an niya ang ngalan sang iya Amay. Gani, nangamuyo sia: “Amay ko, kon mahimo, kuhaa sa akon ini nga kopa.” (Mat. 26:39) Bangod nangin matutom si Jesus kay Jehova asta sa iya kamatayon, ginbindikar ni Jesus ang ngalan sang iya Amay.

11. Paano ginpakita ni Jesus nga palangga gid niya ang mga tawo? (Juan 13:1)

¹¹ Ginatudluan man kita sang gawad nga palangga gid ni Jesus ang mga tawo, ilabi na ang iya mga disipulo. (Hulu. 8:31; basaha ang Juan 13:1.) Halimbawa, kabalo si Jesus nga mangin mabudlay ang pila ka butang nga dapat niya himuon sa duta, ilabi na ang parte sa masakit nga kamatayon nga maeksperiensiahan niya. Pero ginhimo ini tanan ni Jesus, indi lang bangod ginsugo sia ni Jehova nga himuon ini, kundi bangod palangga niya ang mga tawo. Ginpakita ni Jesus ang iya gugma paagi sa pagbantala sa ila, pagtudlo sa ila, kag pagbulig sa ila. Bisan pa gani sang gab-i antes sia patyon, ginhinawan niya ang mga tiil sang iya mga apostoles, gintudluan niya sila, ginpalig-on, kag ginpaumpawan. (Juan 13:​12-15)  Kag bisan pa nagaantos si Jesus sa usok kag lapit na lang sia mapatay, ginhatagan niya sang paglaum ang isa ka kriminal nga nagatagumatayon sa iya tupad, kag ginsigurado niya nga may maatipan sa iya iloy. (Luc. 23:​42, 43; Juan 19:​26, 27) Ginpakita ni Jesus nga palangga gid niya ang mga tawo, indi lang paagi sa paghatag sang iya kabuhi para sa ila, kundi paagi man sa pagtratar niya sa ila.

12. Ngaa masiling naton nga padayon gihapon nga nagasakripisyo si Jesus para sa aton asta subong?

¹² Napatay ang Cristo “sing makaisa gid lang,” pero padayon gihapon sia nga nagasakripisyo para sa aton. (Roma 6:10) Ano ang mga ginahimo niya para sa aton? Padayon sia nga nagapangabudlay para ihatag sa aton ang madamo nga maayo nga mga butang nga nangin posible bangod sa gawad. Binagbinaga ang mga ginahimo ni Jesus subong. Nagaalagad sia bilang aton Hari, Mataas nga Saserdote, kag ulo sang kongregasyon. (1 Cor. 15:25; Efe. 5:23; Heb. 2:17) Sia ang nagapanguna sa pagtipon sa mga hinaplas kag sa daku nga kadam-an, kag tapuson niya ini nga pagtipon antes matapos ang dakung kapipit-an. b (Mat. 25:32; Mar. 13:27) Ginasigurado man niya nga padayon kita nga nagabaton sang espirituwal nga pagkaon sa sining katapusan nga mga adlaw. (Mat. 24:45) Kag sa tion sang iya Isa ka Libo ka Tuig nga Paggahom, padayon sia nga magapangabudlay para sa aton. Gani ginhatag ni Jehova ang iya Anak, indi lang para mapatay para sa aton, kundi para himuon man ang madamo nga mga butang para sa aton.

INDI GID MAG-UNTAT SA PAGTUON

13. Paano makabulig ang pagpamalandong para padayon ka nga makatuon parte sa gugma sang Dios kag sang Cristo para sa aton?

¹³ Para padayon ka nga makatuon parte sa gugma ni Jehova nga Dios kag ni Cristo Jesus para sa aton, padayon ini nga pamalandungi. Mga pila ka semana antes kag pagkatapos sang Memoryal, basaha sing maayo ang mga Ebanghelyo. Indi pagtinguhai nga basahon ang madamo nga kapitulo sa isa lang ka pagbasa. Sa baylo, indi magdali sa imo pagbasa kag panikasugi nga makakita sang dugang nga mga rason kon ngaa dapat naton palanggaon si Jehova kag si Jesus. Dayon, isugid sa iban ang imo mga natun-an.

14. Base sa Salmo 119:97 kag sa footnote sini, paano makabulig ang pag-research para padayon kita nga makatuon parte sa gawad kag sa iban pa nga mga topiko? (Tan-awa man ang piktyur.)

¹⁴ Kon madugay ka na nga Saksi, posible ginahunahuna mo kon bala may matun-an ka gihapon nga bag-o nga mga butang parte sa pamilyar  nga mga topiko pareho sa katarungan sang Dios, sa iya gugma, kag sa gawad. Pero ang matuod, may bag-o gid kita pirme nga matun-an parte sa sini nga mga topiko kag sa iban pa nga mga topiko. Ano ang puede mo himuon? Basaha kag tun-i ang madamo nga impormasyon sa aton mga publikasyon. Kon may nabasa ka sa Biblia nga daw indi mo mahangpan, puede mo ini i-research. Dayon pamalandungi sa bilog nga adlaw ang imo mga natun-an parte kay Jehova, sa iya Anak, kag sa ila gugma para sa imo.​—Basaha ang Salmo 119:97 kag ang footnote sini.

15. Ngaa dapat padayon naton nga panikasugan nga makatuon sang bag-o nga mga butang sa Biblia?

¹⁵ Kon wala ka sing natun-an nga bag-o ukon tumalagsahon nga butang sa kada tion nga magbasa ka sang Biblia ukon mag-research, indi ka dapat maluyahan sang buot. Kay man, daw pareho ka sa isa ka tawo nga nagapangita sang bulawan. Sa masami, antes makakita ini nga tawo sang bisan gamay lang nga bulawan, dapat sia mangita sa sulod sang madamo nga inoras ukon inadlaw. Pero, wala sia nagauntat sa pagpangita bangod hamili gid sa iya bisan ang gamay lang nga bulawan. Indi bala nga mas hamili pa sa bulawan ang bag-o nga mga butang nga matun-an naton sa Biblia? (Sal. 119:127; Hulu. 8:10) Gani, mangin mapinasensiahon kag padayon nga sunda ang imo iskedyul sa pagbasa sang Biblia.​—Sal. 1:2.

16. Paano naton mailog si Jehova kag si Jesus?

¹⁶ Samtang nagatuon ka, hunahunaa kon paano mo maaplikar ang imo natun-an. Halimbawa, iluga ang katarungan ni Jehova paagi sa pagtratar sa iban nga wala sing pagpasulabi. Paano mo naman mailog ang gugma ni Jesus para sa iya Amay kag para sa iban? Mangin handa nga mag-antos para sa ngalan ni Jehova, kag buligi ang imo mga kauturan bisan sa mga tion nga mabudlay ini himuon. Kag iluga si Jesus paagi sa pagbantala sa iban para may kahigayunan man sila nga batunon ang hamili nga regalo ni Jehova.

17. Ano ang binagbinagon naton sa masunod nga artikulo?

¹⁷ Samtang nagadamo ang aton natun-an parte sa gawad, mas palanggaon pa gid naton si Jehova kag ang iya Anak. Bangod sini, mas palanggaon pa gid nila kita. (Juan 14:21; Sant. 4:8) Gani, gamiton naton ang Biblia kag ang aton mga publikasyon para padayon kita nga makatuon parte sa gawad. Sa masunod nga artikulo, binagbinagon naton ang iban pa nga mga pagpakamaayo sang gawad kag kon paano naton mapakita kay Jehova nga ginapasalamatan naton ang iya gugma.