1. Ano ang ginahimo naton tanan nga mabudlay himuon kon kaisa?

 NAGAHIMO kita sang mga desisyon adlaw-adlaw. May mga butang nga mahapos lang desisyunan. Halimbawa, nagadesisyon kita kon ano ang aton kaunon ukon kon ano oras kita matulog. Pero, may mga butang nga mabudlay desisyunan. Kay man, posible may epekto ini sa aton panglawas, kalipay, pinalangga, kag pagsimba. Gusto naton nga makabenepisyo kita kag ang aton pamilya sa aton mga desisyon. Kag ang pinakaimportante, gusto naton nga malipay si Jehova sa aton mga desisyon.​—Roma 12:​1, 2.

2. Ano ang mga puede mo himuon para makahimo ka sang maayo nga mga desisyon?

² Makahimo ka sang maayo nga mga desisyon kon (1) hibaluon mo ang mga impormasyon nga kinahanglan mo, (2) binagbinagon mo ang panghunahuna ni Jehova sa butang nga imo desisyunan, kag (3) hunahunaon mo sing maayo ang mangin resulta sang imo mga pililian. Binagbinagon sa sini nga artikulo ining tatlo ka paagi, kag buligan kita sini kon paano naton mahanas ang aton ikasarang sa paghantop.​—Hulu. 2:11.

HIBALUA ANG MGA IMPORMASYON NGA KINAHANGLAN MO

3. Ngaa dapat mo anay hibaluon ang mga impormasyon nga kinahanglan mo antes ka maghimo sang desisyon? Maghatag sing ilustrasyon.

³ Ang una nga dapat mo himuon para makahimo ka sang maayo nga desisyon amo ang paghibalo sang mga impormasyon nga kinahanglan mo. Ngaa importante nga himuon mo ini? Binagbinaga ini nga ilustrasyon: Ibutang ta nga nagpakonsulta sa doktor ang isa ka tawo bangod may ginabatyag sia sa iya lawas. Madesisyon lang bala dayon ang doktor kon ano nga bulong ang ireseta niya sa iya pasyente bisan pa wala niya sia na-check-up ukon wala niya sia napamangkot? Indi gid ina paghimuon sang doktor. Makahimo ka man sang mas maayo  nga mga desisyon kon hibaluon mo anay ang mga impormasyon nga kinahanglan mo. Paano mo ini mahimo?

4. Base sa Hulubaton 18:​13, paano mo mabal-an ang mga impormasyon nga kinahanglan mo? (Tan-awa man ang piktyur.)

⁴ Sa masami, mabal-an mo ang mga impormasyon nga kinahanglan mo paagi sa pagpamangkot. Ibutang ta nga gin-agda ka sa isa ka tipontipon. Ma-attend ka bala? Kon indi mo kilala ang host ukon wala ka sing ideya kon ano ang mga himuon sa tipontipon, kinahanglan mo sia pamangkuton sang sini nga mga pamangkot: “Diin kag san-o ini nga tipontipon? Pila ka bilog ang imbitado? Sin-o ang magadumala sa sini? Sin-o ang mga ma-attend? Ano ang mga himuon sa tipontipon? May iserbe bala nga makahulubog nga mga ilimnon?” Ang sabat sa sini nga mga pamangkot makabulig sa imo nga makahimo sang maayo nga desisyon.​—Basaha ang Hulubaton 18:13.

5. Ano dayon ang himuon mo kon nabal-an mo na ang mga impormasyon nga kinahanglan mo?

⁵ Kon nabal-an mo na ang mga impormasyon nga kinahanglan mo, binagbinaga dayon sing maayo ang kabilugan nga sitwasyon. Halimbawa, ano abi kon may ma-attend nga mga tawo nga nagabalewala sang mga prinsipio sa Biblia ukon makapagusto lang ang mga bisita sa pag-inom sang makahulubog nga ilimnon? Kon amo sini ang sitwasyon, posible ginapamensar mo na nga mangin magalong gid ini nga tipontipon. (1 Ped. 4:3) Ukon, ano abi kon dungan sa miting sang inyo kongregasyon ukon sa inyo pagbantala ang tipontipon? Kon makita mo ang kabilugan nga sitwasyon, makahimo ka sang  maayo nga desisyon. Pero, may dapat ka pa gid himuon. Bisan pa may ginapamensar ka na nga desisyon sa isa ka sitwasyon, dapat mo gihapon hibaluon kon ano ang panghunahuna ni Jehova sa sini.​—Hulu. 2:6.

BINAGBINAGA KON ANO ANG PANGHUNAHUNA NI JEHOVA

6. Suno sa Santiago 1:​5, ngaa dapat kita mangamuyo kay Jehova nga buligan niya kita?

⁶ Pangabaya si Jehova nga buligan ka nga mahangpan ang iya panghunahuna sa isa ka sitwasyon. Nagapromisa si Jehova nga hatagan niya kita sing kaalam para mahantop naton kon ano nga desisyon ang makapahalipay sa iya. ‘Maalwan niya nga ginahatag sa tanan ini nga kaalam nga wala nagapangtamay.’—Basaha ang Santiago 1:5.

7. Paano mo mabal-an ang panghunahuna ni Jehova? Maghatag sing ilustrasyon.

⁷ Kon nakapangamuyo ka na kay Jehova nga buligan ka niya, hantupa dayon sing maayo kon ano ang iya sabat. Binagbinaga ini nga ilustrasyon: Kon nagabiyahe ka sa isa ka lugar kag nagtalang ka, posible nga mamangkot ka sa tawo nga nagaistar sa sina nga lugar sang husto nga direksion. Malakat ka lang bala dayon antes pa sia makasabat? Siempre indi. Sa baylo, pamatian mo gid sing maayo ang iya ginahatag nga direksion. Sing kaanggid, pagkatapos mo magpangayo kay Jehova sing kaalam, panikasugi nga hantupa ang iya sabat paagi sa pagpangita sang mga kasuguan kag mga prinsipio sa Biblia nga maaplikar mo sa imo sitwasyon. Halimbawa, kon nagadesisyon ka kon bala ma-attend ka sa tipontipon nga ginsambit kaina, puede mo binagbinagon  ang ginasiling sang Biblia parte sa magansal nga kinalipay, parte sa malain nga kaupdanan, kag ang parte sa pag-una sa Ginharian imbes nga sa gusto mo himuon.​—Mat. 6:33; Roma 13:13; 1 Cor. 15:33.

8. Ano ang puede mo himuon kon kinahanglan mo sang bulig para makita mo ang impormasyon nga ginapangita mo? (Tan-awa man ang piktyur.)

⁸ Pero kon kaisa, posible nga kinahanglan mo sang bulig para makita mo ang impormasyon nga ginapangita mo. Puede ka mangayo sing laygay sa isa ka hamtong nga utod. Pero, makabenepisyo ka man kon mag-research ka. Madamo nga impormasyon ang makita mo kon gamiton mo ang aton mga gamit sa pag-research, pareho sang Giya sa Pagtuon Para sa mga Saksi ni Jehova kag Mga Teksto Para sa Aton Cristianong Pagkabuhi. Dumduma nga ang imo goal ukon tulumuron amo ang paghimo sang desisyon nga makapahalipay kay Jehova.

9. Paano naton masigurado nga malipay si Jehova sa aton desisyon? (Efeso 5:17)

⁹ Paano naton masigurado nga malipay si Jehova sa aton desisyon? Una, dapat naton sia kilalahon sing maayo. Ang Biblia nagasiling: “Ang ihibalo tuhoy sa Isa nga Labing Balaan nagahatag sing paghangop.” (Hulu. 9:10) Gani, may matuod kita nga paghangop kon kabalo kita sang mga kinaiya ni Jehova, sang iya katuyuan, kag sang iya mga ginahigugma ukon ginadumtan. Pamangkuta ang imo kaugalingon, ‘Base sa akon nabal-an parte kay Jehova, ano nga desisyon ang himuon ko nga makapahalipay sa iya?’—Basaha ang Efeso 5:17.

10. Ngaa mas importante ang mga prinsipio sa Biblia sangsa tradisyon sang pamilya ukon kultura sang isa ka lugar?

¹⁰ Para malipay sa aton si Jehova, may mga tion nga dapat kita maghimo sang desisyon nga posible indi magustuhan sang mga suod sa aton. Halimbawa, may pila ka ginikanan nga ginapilit nila ang ila anak nga magpamana sing isa ka manggaranon nga brother bisan pa nga indi maayo ang espirituwalidad sang brother. Maayo man ang intension sang mga ginikanan kay gusto nila nga mangin komportable ang kabuhi sang ila anak. Pero sa bahin sang sister, mabuligan bala sia sang sini nga brother nga mangin suod pa gid kay Jehova? Ano ang pagtan-aw ni Jehova sa sini nga sitwasyon? Makita naton ang sabat sa Mateo 6:33. Suno sa sini nga teksto, ginpalig-on ni Jesus ang mga Cristiano nga dapat nila “unahon ang pagpangita sa Ginharian.” Gani, bisan pa ginarespeto naton ang aton mga ginikanan kag ang mga tawo sa aton lugar, ang pinakaimportante sa aton amo ang paghimo sang desisyon nga makapahalipay kay Jehova.

HUNAHUNAA SING MAAYO ANG MANGIN RESULTA SANG IMO MGA PILILIAN

11. Ano nga kinaiya ang ginbinagbinag sa Filipos 1:​9, 10 nga makabulig sa imo nga mahunahuna sing maayo ang mangin resulta sang imo mga pililian?

¹¹ Kon nabinagbinag mo na ang mga prinsipio sa Biblia nga maaplikar mo sa imo sitwasyon, dapat mo usisaon ang imo mga pililian. (Basaha ang Filipos 1:​9, 10.) Makabulig sa imo ang kinaiya nga paghantop para maimadyin mo ang posible mangin resulta sang imo mga pililian. May mga tion nga mahapos lang maghimo sang isa ka desisyon. Pero may mga tion nga mabudlay ini himuon. Makabulig sa imo ang paghantop para makahimo ka sang maayo nga mga desisyon bisan sa mga sitwasyon nga mabudlay desisyunan.

12-13. Paano makabulig ang paghantop para makahimo ka sang maayo nga desisyon kon nagapangita ka sang obra?

¹² Binagbinaga ini nga sitwasyon. Ibutang ta nga nagapangita ka sang obra para masuportahan mo ang imo pamilya. May nakita ka nga duha ka obra nga puede mo sudlan. Ginbinagbinag mo ang tanan nga impormasyon nga kinahanglan mo, pareho sang kon ano ini nga klase sang obra, ang iskedyul sang obra, ang kalayuon sini sa imo ginaistaran, kag iban pa. Ibutang ta nga puede sa mga Cristiano ining duha ka obra. Posible nga mas gusto mo ang isa ka obra kay nanamian ka sini ukon mas daku ang sueldo sini. Pero, may mga dapat ka pa binagbinagon antes ka maghimo sang desisyon.

¹³ Halimbawa, kamusta ang iskedyul sang sini nga mga obra? Makasablag bala ini sa imo pag-attend sa miting sang kongregasyon? Mabuhinan  bala sini ang tion nga ginagamit mo para sa pag-aman sang emosyonal kag espirituwal nga kinahanglanon sang imo pamilya? Makabulig ini nga mga pamangkot para mauna mo “ang mas importante nga mga butang,” nga amo ang imo pagsimba kag ang mga kinahanglanon sang imo pamilya, imbes nga ang materyal nga kaayuhan. Paagi sa sini, makahimo ka sang desisyon nga pakamaayuhon ni Jehova.

14. Paano makabulig ang paghantop kag ang gugma para malikawan naton nga mapasandad ang iban?

¹⁴ Kon may paghantop kita, mapalig-on man kita sini nga binagbinagon ang posible mangin epekto sang aton desisyon sa iban nga tawo. Makabulig ini para malikawan naton nga ‘mapasandad ang iban.’ (Fil. 1:10) Importante ini kon nagahimo kita sang personal nga mga desisyon pareho sang aton pamayo kag estilo sang buhok. Halimbawa, posible nga may nanamian kita nga pamayo kag estilo sang buhok. Pero, ano abi kon masaklaw sa sini ang iban nga kauturan ukon ang iban nga tawo? Kon may paghantop kita, respetuhon naton ang ila balatyagon. Kag kon may gugma kita, mapalig-on kita sini nga unahon ang kaayuhan “sang iban” kag mangin maugdang. (1 Cor. 10:​23, 24, 32; 1 Tim. 2:​9, 10) Paagi  sa sini, makahimo kita sang desisyon nga nagapakita sang aton gugma kag respeto sa iban.

15. Ano ang dapat mo binagbinagon antes mo himuon ang isa ka importante nga desisyon?

¹⁵ Kon may himuon ka nga isa ka importante nga desisyon, hunahunaa kon ano ang dapat mo himuon sa ulihi para mahimo mo ang imo madesisyunan. Gintudluan kita ni Jesus nga dapat naton ‘sumahon ang gasto.’ (Luc. 14:28) Gani, binagbinaga kon daw ano kadamo nga tion, kuarta, kag kusog ang imo gamiton para mangin madinalag-on ang imo desisyon. Sa pila ka sitwasyon, puede mo istoryahon ang mga miembro sang imo pamilya para ipabalo sa ila kon paano ka nila mabuligan. Ngaa importante ini nga pagbinagbinag? Makabulig ini para makita mo kon bala may dapat ka i-adjust sa imo desisyon ukon basi may iban pa nga pililian nga mas maayo nga himuon. Kag kon ilakip mo ang mga miembro sang imo pamilya kag kon pamatian mo ang ila mga opinyon, mas mangin handa sila nga buligan ka nga magmadinalag-on ang imo desisyon.​—Hulu. 15:22.

MAGHIMO SANG DESISYON NGA MAGAMADINALAG-ON

16. Ano ang mga dapat mo himuon para makahimo ka sang desisyon nga magamadinalag-on? (Tan-awa man ang kahon nga “ Kon Paano Ka Makahimo sang Maayo nga mga Desisyon.”)

¹⁶ Kon himuon mo ang tanan nga ginbinagbinag naton, makahimo ka sang maayo nga desisyon nga makapahalipay kay Jehova. Kay man, kon nabal-an mo na ang mga impormasyon nga kinahanglan mo kag kon nabinagbinag mo na ang mga prinsipio nga maaplikar mo sa imo sitwasyon, puede mo na dayon pangabayon si Jehova nga buligan ka nga mangin madinalag-on ang imo desisyon.

17. Ano ang pinakapanguna nga butang nga makabulig sa imo nga makahimo sang maayo nga mga desisyon?

¹⁷ Bisan pa nangin madinalag-on ang madamo mo nga desisyon sang una, dumduma nga ang pinakapanguna nga butang nga makabulig sa imo nga makahimo sang maayo nga mga desisyon amo ang pagsalig sa kaalam nga halin kay Jehova, indi ang pagsalig sa imo kaalam ukon eksperiensia. Sia lang ang makahatag sa imo sang matuod nga ihibalo, paghangop, kag paghantop. Importante gid ining tatlo ka kinaiya para mapakita mo ang kaalam. (Hulu. 2:​1-5) Gani, mabuligan ka ni Jehova nga makahimo sang mga desisyon nga makapahalipay sa iya.​—Sal. 23:​2, 3.