1. Ano ang puede naton himuon para malipay sa aton si Jehova?

 IBUTANG ta nga ginhatagan mo ang imo pinalangga sing isa ka espesyal nga regalo. Kanami gid sini kag magamit gid niya ini. Sigurado nga masubuan ka gid kon gintago lang niya ang imo regalo sa kabinet kag ginbalewala ini. Pero, sigurado nga malipay ka gid kon gingamit niya ini kag ginpasalamatan ka niya. Ano ang matun-an naton sa sini? Ginhatag ni Jehova ang iya Anak para sa aton bangod palangga niya kita. Gani, sigurado nga nalipay gid sia kon ginapakita naton nga ginapasalamatan naton ang iya hamili nga regalo kag ang iya gugma sa aton.​—Juan 3:16; Roma 5:​7, 8.

2. Ano ang binagbinagon naton sa sini nga artikulo?

² Samtang nagaligad ang tion, posible nga amat-amat nga madula ang aton apresasyon sa gawad. Kon matabo ini, daw pareho lang nga gintago naton sa kabinet ang regalo sang Dios para indi naton ini makita kag madumduman. Para indi ini matabo, dapat regular naton nga pamalandungan ang tanan nga ginhimo sang Dios kag sang Cristo para sa aton. Buligan kita sang sini nga artikulo nga himuon ini. Gani, binagbinagon naton ang mga pagpakamaayo subong kag sa palaabuton nga ginpaposible sang gawad. Binagbinagon man naton kon paano naton mapakita nga ginapasalamatan naton ang gugma ni Jehova, ilabi na sa mga semana antes kag pagkatapos sang Memoryal.

ANG MGA PAGPAKAMAAYO SUBONG

3. Ano ang isa ka pagpakamaayo subong nga ginpaposible sang gawad?

³ Bisan subong pa lang, nagabenepisyo kita sa madamo nga pagpakamaayo nga ginpaposible sang halad-gawad sang Cristo. Halimbawa, paagi sa gawad, ginapatawad ni Jehova ang aton mga sala. Indi obligado si Jehova nga patawaron kita. Pero, gusto gid niya ini  himuon. Nagpasalamat gid ang isa ka salmista sa pagpatawad ni Jehova, gani nagsiling sia: “Kay ikaw, O Jehova, maayo kag handa sa pagpatawad.”​—Sal. 86:5; 103:​3, 10-13.

4. Para kay sin-o gin-aman ni Jehova ang gawad? (Lucas 5:32; 1 Timoteo 1:15)

⁴ May pila nga nagabatyag nga indi sila takus patawaron ni Jehova. Ang matuod, indi kita tanan takus patawaron. Sa bahin ni apostol Pablo, nagsiling sia nga “indi [sia] takus tawgon nga apostol.” Pero, nagsiling man sia: “Paagi sa wala tupong nga kaayo sang Dios may yara ako sini nga katungdanan.” (1 Cor. 15:​9, 10) Kon ginahinulsulan naton ang aton mga sala, ginapatawad kita ni Jehova. Ngaa? Indi bangod takus kita sa sini, kundi bangod palangga niya kita. Gani, kon nagabatyag ka nga indi ka takus patawaron ni Jehova, dumduma nga wala niya gin-aman ang gawad para sa mga tawo nga wala sing sala. Sa baylo, gin-aman niya ini para sa indi perpekto nga mga tawo nga nagahinulsol sa ila mga sala.​—Basaha ang Lucas 5:32; 1 Timoteo 1:15.

5. Ngaa indi kita dapat maghunahuna nga obligado si Jehova nga pakitaan kita sing kaluoy?

⁵ Indi kita dapat maghunahuna nga obligado si Jehova nga pakitaan kita sing kaluoy bangod madugay na kita nga nagaalagad sa iya. Siempre, ginadumdom ni Jehova ang tanan naton nga ginhimo para sa iya. (Heb. 6:10) Pero ginhatag niya sa aton ang iya Anak, indi bilang bayad sa aton pag-alagad sa iya, kundi bilang isa ka libre nga regalo. Gani, indi husto nga hunahunaon naton nga dapat kita patawaron ni Jehova bangod madamo na kita sing ginhimo para sa iya. Kay man, kon amo sini ang aton panghunahuna, daw pareho lang nga nagapati kita nga wala sing pulos ang paghatag ni Jesus sang iya kabuhi para sa aton.​—Ipaanggid ang Galacia 2:21.

6. Ngaa nagpangabudlay gid si Pablo sa pag-alagad kay Jehova?

⁶ Kabalo si Pablo nga bisan ano pa ang himuon niya, indi sia gihapon takus patawaron ni Jehova. Ti, ngaa nagpangabudlay gid sia sa pag-alagad kay Jehova? Ginhimo niya ini indi para ipakita nga takus sia patawaron, kundi para ipakita nga nagapasalamat sia sa wala tupong nga kaayo ni Jehova. (Efe. 3:7) Pareho kay Pablo, padayon kita nga nagaalagad sing mapisan indi para ipakita nga takus kita kaluuyan ni Jehova, kundi para pasalamatan sia sa iya kaluoy.

7. Ano ang isa pa ka pagpakamaayo subong nga ginpaposible sang gawad? (Roma 5:1; Santiago 2:23)

⁷ Ari ang isa pa ka pagpakamaayo sa aton subong nga ginpaposible sang gawad: Puede kita mangin suod kay Jehova. a Ginsambit sa nagligad nga artikulo nga sang ginbun-ag kita, wala kita sing kaangtanan sa Dios. Pero bangod sa gawad, puede kita ‘magpakighidait sa Dios’ kag mangin suod sa iya.​—Basaha ang Roma 5:1; Santiago 2:23.

8. Ngaa dapat naton pasalamatan si Jehova sa pribilehiyo nga makapangamuyo sa iya?

⁸ Bangod may suod kita nga kaangtanan kay Jehova, may pribilehiyo kita nga makapangamuyo sa iya. Indi lang ang mga pangamuyo sa tion sang aton mga miting ang ginapamatian ni Jehova, kundi pati man ang personal nga mga pangamuyo sang kada isa sa aton. Makabulig ang pangamuyo para mangin kalmado kita kag mangin malinong ang aton hunahuna. Pero, indi lang ini ang benepisyo sang pangamuyo. Makabulig man ini para magbakod pa gid ang aton kaangtanan sa Dios. (Sal. 65:2; Sant. 4:8; 1 Juan 5:14) Sang ari si Jesus sa duta, pirme sia nagapangamuyo bangod kabalo sia nga nagapamati si Jehova. Kabalo man sia nga makabulig ini para magpabilin nga mabakod ang iya kaangtanan sa iya Amay. (Luc. 5:16) Nagapasalamat gid kita sa halad-gawad ni Jesus. Kay man, paagi sa sini, puede naton mangin abyan si Jehova kag makapangamuyo kita sa iya.

 ANG MGA PAGPAKAMAAYO SA PALAABUTON

9. Ano nga pagpakamaayo nga ginpaposible sang gawad ang mabaton sang matutom nga mga alagad ni Jehova sa palaabuton?

⁹ Ano nga pagpakamaayo nga ginpaposible sang gawad ang mabaton sang matutom nga mga alagad ni Jehova sa palaabuton? Hatagan sila ni Jehova sing kabuhi nga wala sing katapusan. Madamo nga tawo ang nagahunahuna nga imposible ini bangod nagakapatay gid ang mga tawo halin pa sang una. Pero, ang orihinal nga katuyuan ni Jehova para sa mga tawo amo ang mabuhi sila sing wala sing katapusan. Kon wala nagpakasala si Adan, wala gid sing magasiling subong nga imposible ang kabuhi nga wala sing katapusan. Kay man, wala kuntani kita subong nagakapatay. Pero bisan pa daw indi naton maimadyin subong ang parte sa kabuhi nga wala sing katapusan, makasalig kita nga mabaton gid naton ini. Ngaa? Bangod mahal gid katama ang ginbayad ni Jehova para mangin posible ini, nga amo ang kabuhi sang iya pinalangga nga Anak.​—Roma 8:32.

10. Sa ano excited ang mga hinaplas kag ang iban nga mga karnero?

¹⁰ Gusto ni Jehova nga imadyinon na naton ang kabuhi nga wala sing katapusan bisan pa nga sa palaabuton pa niya ini ihatag sa aton. Excited ang mga hinaplas sa mangin kabuhi nila sa langit bilang mga manuggahom sang duta kaupod ang Cristo. (Bug. 20:6) Kag excited ang iban nga mga karnero sa mangin kabuhi nila sa Paraiso sa duta nga wala na sing kasakit kag kasubo. (Bug. 21:​3, 4) Isa ka bala sa iban nga mga karnero nga may paglaum nga mabuhi sing wala sing katapusan sa duta? Ti, masiling bala naton nga mas manubo ang balor sini nga padya sangsa kabuhi sa langit? Indi. Kay man, gintuga kita ni Jehova para mabuhi sa duta. Gani, mangin malipayon gid kita kon nagakabuhi na kita sing wala sing katapusan sa duta.

11-12. Ano ang pila ka butang nga puede naton tun-an sa Paraiso? (Tan-awa man ang mga piktyur.)

¹¹ Imadyina ang imo kabuhi sa Paraiso sa duta. Indi ka na gid mabalaka nga basi magmasakit ka ukon mapatay. (Isa. 25:8; 33:24) Ihatag sa imo ni Jehova ang tanan nga maayo nga butang nga gusto  mo. Ano ang gusto mo tun-an? Gusto mo bala tun-an ang parte sa mga sapat? Gusto mo bala magtuon kon paano magtokar sang mga instrumento sa musika? Ukon gusto mo bala magtuon kon paano magdrowing? Sa Paraiso, sigurado gid nga kinahanglan naton sang mga tawo nga kabalo magdesinyo kag magpatindog sang mga balay. Kag kinahanglan man naton sang mga mangunguma, sang mapreparar sang pagkaon, sang manughimo sang mga gamit, kag sang mamentinar sang matahom nga palibot. (Isa. 35:1; 65:21) Kon nagakabuhi ka na sing wala sing katapusan, may tion ka nga tun-an ang bisan ano nga gusto mo.

¹² Sigurado nga mangin makalilipay gid ang tion nga abiabihon na naton ang mga banhawon. (Binu. 24:15) Kag mas makilala pa gid naton si Jehova paagi sa pagtuon sa madamo niya nga mga tinuga. (Sal. 104:24; Isa. 11:9) Labaw sa tanan, indi na kita makahimo sang sala. Gani, indi na naton kinahanglan mangayo sing kapatawaran kay Jehova. Ibaylo mo bala ini nga mga pagpakamaayo sa “umalagi nga pagpangalipay sa sala”? (Heb. 11:25) Siempre indi. Mas labaw ini nga mga pagpakamaayo sangsa bisan ano nga mahatag sang kalibutan. Tandai nga indi lang isa ka paglaum ang Paraiso sa duta. Kay man, matuman gid ini kag magaistar kita sa sini. Palangga gid kita ni Jehova, gani ginhatag niya ang iya Anak para mabaton naton ini tanan nga pagpakamaayo.

PASALAMATI SI JEHOVA BANGOD SA IYA GUGMA

13. Paano naton mapakita nga ginapasalamatan naton ang gugma ni Jehova? (2 Corinto 6:1)

¹³ Paano naton mapakita nga ginapasalamatan naton si Jehova bangod gin-aman niya ang gawad? Mapakita naton ini kon ginahimo naton nga prioridad sa aton kabuhi ang pag-alagad sa iya. (Mat. 6:33) Kay man, napatay si Jesus “agod ang mga nagakabuhi indi na magkabuhi para sa ila kaugalingon, kundi para sa iya nga napatay para sa ila kag ginbanhaw.” (2 Cor. 5:15) Kag ginapakitaan kita ni Jehova sing kaluoy kag ginapatawad niya kita. Gani kon ginahimo naton ang aton bug-os nga masarangan para alagaron sia, ginapakita man naton nga nagapasalamat kita sa iya wala tupong nga kaayo.​—Basaha ang 2 Corinto 6:1.

14. Paano naton mapakita nga nagasalig kita sa mga instruksion ni Jehova?

¹⁴ Mapakita man naton nga ginapasalamatan naton si Jehova kon nagasalig kita sa iya mga instruksion. Paano naton ini mapakita? Paagi sa ginahimo naton nga mga desisyon. Halimbawa, kon nagadesisyon kita kon bala maeskwela kita sa unibersidad ukon kon bala batunon naton ang isa ka klase sang obra, dapat binagbinagon naton kon ano ang gusto ni Jehova nga himuon naton. (1 Cor. 10:31; 2 Cor. 5:7) Kon nagasalig kita kay Jehova sa kada tion nga nagahimo kita sang mga desisyon, mas nagabakod ang aton pagtuo sa iya kag mangin suod pa gid kita sa iya. Gani, nagabakod ang aton pagsalig nga matuman gid ang aton paglaum nga mabuhi sing wala sing katapusan.​—Roma 5:​3-5; Sant. 2:​21, 22.

15. Paano naton mapakita nga ginapasalamatan naton ang gugma ni Jehova sa mga semana antes kag pagkatapos sang Memoryal?

¹⁵ May isa pa ka paagi nga mapakita naton nga  ginapasalamatan naton ang gugma ni Jehova. Himuon naton ang aton bug-os nga masarangan sa mga semana antes kag pagkatapos sang Memoryal para ipakita kay Jehova nga nagapasalamat gid kita sa gawad. Magluwas sa pag-attend sa Memoryal, puede man naton agdahon ang iban nga mag-attend sa sini. (1 Tim. 2:4) Ipaathag sa imo mga ginaagda kon ano ang ginahimo sa Memoryal. Ipakita sa ila ang mga video sa jw.org/hil nga Ngaa Napatay si Jesus? kag Dumduma ang Kamatayon ni Jesus. Dapat siguraduhon sang mga gulang nga maagda nila ang mga inactive. Imadyina ang kalipay sa langit kag sa duta kon magdesisyon ang pila sa nadula nga mga karnero ni Jehova nga magbalik sa iya panong. (Luc. 15:​4-7) Sa tion sang Memoryal, panikasugan gid naton nga abiabihon indi lang ang mga kauturan, kundi ilabi na gid ang mga bisita ukon ang mga madugay na nga wala naka-attend. Gusto gid naton nga mabatyagan nila nga ginaabiabi naton sila.​—Roma 12:13.

16. Ngaa dapat naton panikasugan nga dugangan ang aton mga ginahimo sa pag-alagad sa mga semana antes kag pagkatapos sang Memoryal?

¹⁶ Puede mo bala dugangan ang imo mga ginahimo sa pag-alagad sa mga semana antes kag pagkatapos sang Memoryal? Kon himuon naton ini, isa ini ka maayo nga paagi para mapakita naton ang aton pagpasalamat sa tanan nga ginhimo sang Dios kag sang Cristo para sa aton. Kon pirme kita nagabantala, mas makita naton kon paano kita ginabuligan ni Jehova kag magabakod pa gid ang aton pagsalig sa iya. (1 Cor. 3:9) Dugang pa, siguraduha nga mabasa mo ang mga teksto nga nakaiskedyul sa tion sang Memoryal. Makita ini sa Pag-usisa sa Kasulatan Adlaw-adlaw ukon sa tsart sa workbook para sa midweek miting. Puede mo man gamiton ini nga mga teksto sa Biblia sa imo personal nga pagtuon.

17. Sa ano nalipay si Jehova? (Tan-awa man ang kahon nga “ Mga Paagi nga Mapakita Naton nga Ginapasalamatan Naton ang Gugma ni Jehova.”)

¹⁷ Bangod sa imo kahimtangan, posible indi mo mahimo ang tanan nga panugda sa sini nga artikulo. Pero, dumduma nga wala ginakumparar ni Jehova ang imo mahimo sa mahimo sang iban. Kabalo sia kon ano ang ara sa imo tagipusuon. Nalipay sia kon makita niya nga ginapasalamatan mo gid ang iya gin-aman nga gawad nga isa ka hamili nga regalo.​—1 Sam. 16:7; Mar. 12:​41-44.

18. Ngaa nagapasalamat gid kita kay Jehova nga Dios kag kay Jesucristo?

¹⁸ Ari ang mga pagpakamaayo nga ginpaposible sang gawad: Ginapatawad ni Jehova ang aton mga sala, puede kita mangin suod sa iya, kag may paglaum kita nga mabuhi sing wala sing katapusan. Ginhatag niya sa aton ini tanan nga mga pagpakamaayo bangod palangga niya kita. Gani, dapat pirme naton ipakita nga nagapasalamat kita sa gugma ni Jehova. (1 Juan 4:19) Kag dapat man naton ipakita nga nagapasalamat kita kay Jesus. Kay man, palangga gid kita ni Jesus, gani ginhatag niya ang iya kabuhi para sa aton.​—Juan 15:13.