1. Sa ano nagapokus ang madamo nga tawo subong?

 POSIBLE natalupangdan mo nga madamo nga tawo subong ang mas nagapokus sa ila kaugalingon. Halimbawa, ginagamit sang iban ang social media para magpadayaw kag para ipakita ang ila mga nahimo. Pero, diutay lang gid ang gusto magdayaw kay Jehova nga Dios. Sa sini nga artikulo, binagbinagon naton kon ano ang buot silingon sang paghatag kay Jehova sang himaya kag kon ngaa dapat naton ini himuon. Tun-an man naton kon paano naton mahatag sa Dios ang himaya nga nagakadapat sa iya kag kon paano niya himayaon ang iya ngalan sa indi na lang gid madugay.

ANO ANG BUOT SILINGON SANG PAGHATAG KAY JEHOVA SANG HIMAYA?

2. Paano ginpakita ni Jehova ang iya himaya sa Bukid Sinai? (Tan-awa man ang piktyur.)

² Ano ang himaya? Sa Biblia, ang tinaga nga “himaya” puede magpatuhoy sa bisan ano nga butang nga nagahimo sa isa nga dalayawon. Ginpakita ni Jehova ang iya himaya sa pungsod sang Israel pagkatapos niya sila ginhilway sa pagkaulipon sa Egipto. Imadyina ini: Minilyon ka Israelinhon ang nagtipon sa tiilan sang Bukid Sinai para pamatian ang isiling sa ila sang ila Dios. Dayon, may madamol nga panganod nga nagtabon sa bukid. Kag gulpi lang nagtay-ug sing mabaskog ang duta, nagpangilat, nagpanaguob, kag nabatian ang grabe kabaskog nga tunog sang budyong. (Ex. 19:​16-18; 24:17; Sal. 68:8) Sigurado nga nagdayaw gid ang mga Israelinhon sa ginhimo ni Jehova para ipakita sa ila ang iya himaya sa tumalagsahon nga paagi.

3. Paano naton mahatag kay Jehova ang himaya?

³ Pero, may mahimo bala ang mga tawo para mahatag nila kay  Jehova ang himaya? Huo. Ang isa ka paagi para mahatag naton kay Jehova ang himaya amo ang pagsugid sa iban parte sa iya dalayawon nga gahom kag mga kinaiya. Mahimaya man naton ang Dios kon sia ang ginapadunggan naton sa tanan nga nahimo naton paagi sa iya bulig. (Isa. 26:12) Maayo gid nga halimbawa si Hari David sa paghatag kay Jehova sang himaya. Sang nangamuyo si David sa Dios sa atubangan sang mga Israelinhon, nagsiling sia: “O Jehova, dalayawon ka kag gamhanan kag mahimayaon kag halangdon kag dungganon; kay imo ang tanan nga butang sa langit kag sa duta.” Pagkatapos niya pangamuyo, “gindayaw sang bug-os nga katilingban si Jehova.”​—1 Cron. 29:​11, 20.

4. Paano ginhimaya ni Jesus si Jehova?

⁴ Sang ari si Jesus sa duta, ginhimaya niya ang iya Amay paagi sa pagsugid sa mga tawo nga si Jehova ang naghatag sa iya sang gahom nga makahimo sang mga milagro. (Mar. 5:​18-20) Ginhimaya man ni Jesus si Jehova paagi sa iya mga ginsiling parte sa iya Amay kag paagi sa iya pagtratar sa iban. Isa ka bes, nagpanudlo si Jesus sa sinagoga. May isa ka babayi didto nga ginsudlan sang demonyo sa sulod sang 18 ka tuig. Gani, nagasiuktot ang babayi kag indi sia makatindog sing tadlong. Grabe gid kabudlay sang iya sitwasyon. Naluoy si Jesus sa babayi, gani ginpalapitan niya sia kag mainayuhon nga ginsilingan: “Babayi, hilway ka na sa imo balatian.” Dayon, gintungtong ni Jesus ang iya mga kamot sa babayi. Sa gilayon, nagtindog sia sing tadlong kag ‘ginhimaya niya ang Dios.’ Grabe gid ang iya pagpasalamat kay Jehova kay gin-ayo Niya sia. (Luc. 13:​10-13) May rason gid ang babayi nga himayaon si Jehova, kag may rason man kita nga himuon ini.

NGAA DAPAT NATON HIMAYAON SI JEHOVA?

5. Ngaa dapat naton tahuron si Jehova?

⁵ Ginahimaya naton si Jehova bangod sang aton tudok nga pagtahod sa iya. Madamo sang rason kon ngaa dapat naton tahuron si Jehova. Sia ang labing gamhanan, kag indi gid maubos ang iya gahom. (Sal. 96:​4-7) Maathag man nga makita sa iya mga tinuga ang parte sa iya wala tupong nga kaalam. Sia ang naghatag sa aton sang kabuhi kag sang tanan nga kinahanglan naton para mabuhi. (Bug. 4:11) Mainunungon man sia. (Bug. 15:4) Nagamadinalag-on ang tanan niya nga ginahimo, kag ginatuman gid niya ang iya mga promisa. (Jos. 23:14) Gani, may rason si manalagna Jeremias nga isiling ini parte kay Jehova: “Wala gid sing pareho sa imo sa tanan nga maalam nga tawo kag sa tanan nga hari sang mga pungsod.” (Jer. 10:​6, 7) Madamo gid kita sang rason para tahuron ang aton Amay sa langit. Pero magluwas nga ginatahod naton si Jehova, palangga man naton sia.

6. Ngaa palangga naton si Jehova?

⁶ Ginahimaya naton si Jehova bangod palangga gid naton sia. Palangga naton si Jehova bangod sa iya madamo nga dalayawon nga mga kinaiya. Maluluy-on gid sia. (Sal. 103:13; Isa. 49:15) Nagapakita sia sang empatiya, gani nasakitan man sia kon nasakitan kita. (Zac. 2:8) Ginabuligan niya kita para mangin suod kita sa iya bilang iya Abyan. (Sal. 25:14; Binu. 17:27) Kag mapainubuson sia. Kay man, “nagaduko sia sa pagtan-aw sa langit kag duta, ginapabangon niya ang kubos halin sa yab-ok.” (Sal. 113:​6, 7) Bangod sa sini nga mga rason, gusto gid naton himayaon ang aton halangdon nga Dios.​—Sal. 86:12.

7. Ano ang aton pinasahi nga kahigayunan?

⁷ Ginahimaya naton si Jehova bangod gusto naton nga makilala sia sang iban. Madamo ang wala kabalo sang kamatuoran parte kay Jehova. Ngaa? Bangod ginbulag ni Satanas ang ila mga hunahuna paagi sa pagpalapta sang mga kabutigan parte kay Jehova. (2 Cor. 4:4) Napapati ni Satanas ang mga tawo nga nagadumot kuno si Jehova, wala kuno Sia nagaulikid, kag Sia kuno ang balasulon sa aton mga pag-antos. Pero, kabalo kita sang kamatuoran parte sa aton Dios.  Gani, may kahigayunan kita nga isugid sa iban ang kamatuoran parte sa iya kag buligan sila nga dayawon man sia. (Isa. 43:10) Ang Salmo 96 nagapokus sa paghatag kay Jehova sang himaya. Samtang ginabinagbinag naton ang mga ekspresyon sa sini nga salmo, hunahunaa kon paano mo mahatag kay Jehova ang himaya nga nagakadapat sa iya.

PAANO NATON MAHATAG KAY JEHOVA ANG HIMAYA NGA NAGAKADAPAT SA IYA?

8. Ano ang isa ka paagi nga mahimaya naton si Jehova? (Salmo 96:​1-3)

⁸ Basaha ang Salmo 96:​1-3. Mahimaya naton si Jehova paagi sa aton mga ginasiling parte sa iya. Suno sa sini nga mga bersikulo, dapat kita ‘mag-amba kay Jehova,’ ‘dayawon naton ang iya ngalan,’ ‘ibantala naton sa adlaw-adlaw ang maayong balita tuhoy sa iya pagluwas,’ kag ‘ipahayag naton ang iya himaya sa mga pungsod.’ Kon himuon naton ini, mahimaya naton ang aton Amay sa langit paagi sa aton mga ginasiling. Nalipay gid ang matutom nga mga Judiyo kag ang mga Cristiano sang unang siglo nga isugid sa iban ang parte sa mga ginhimo ni Jehova para sa ila, kag gusto gid nila pangapinan ang iya reputasyon. (Dan. 3:​16-18; Binu. 4:29) Paano naton mailog ang ila ginhimo?

9-10. Ano ang natun-an mo sa eksperiensia ni Angelena? (Tan-awa man ang piktyur.)

⁹ Binagbinaga ang eksperiensia sang isa ka sister sa United States nga si Angelena. a Nangin maisog sia sa pagpangapin sa reputasyon ni Jehova sa kompanya nga iya ginaubrahan. Bag-o pa lang sia sa sini nga kompanya, gani ginpa-attend sia sa isa ka miting para sa bag-uhan nga mga empleyado. Sa sini nga miting, puede nila masugid sa iban ang parte sa ila kaugalingon. Gani, nagpili si Angelena sang mga piktyur nga ipakita niya sa miting. Makita sa sini nga mga piktyur ang iya kalipay bilang isa ka Saksi ni Jehova. Pero, antes gid sang iya turno nga maghambal, mauna anay hambal ang isa ka lalaki nga kaupod niya sa obra. Nagpakilala ang lalaki nga nagdaku kuno sia sa pamilya sang mga Saksi ni Jehova. Dayon, ginpakalain sang lalaki ang aton mga ginapatihan. Nagsiling si Angelena: “Grabe ang kubakuba sang akon dughan. Pero kabalo ko nga indi matuod ang mga ginasiling niya parte kay Jehova. Ginpamensar ko: ‘Indi puede nga maghipos lang ako. Dapat ko pangapinan si Jehova.’”

¹⁰ Sang nakatapos na hambal ang lalaki, nangamuyo si Angelena sing malip-ot kag sing hipos lang. Dayon, mainayuhon niya nga ginsilingan  ang lalaki: “Pareho gali kita sang background. Nagdaku man ako sa pamilya sang mga Saksi ni Jehova, kag Saksi ako asta subong.” Bisan pa grabe ang tension sadto nga tion, kalmado lang si Angelena. Ginpakita niya dayon ang iya mga piktyur upod ang mga kauturan. Makita sa sini nga mga piktyur nga nalipay gid sia sa iya pag-alagad kay Jehova. Dayon, matinahuron niya nga ginpangapinan ang iya mga ginapatihan. (1 Ped. 3:15) Ano ang resulta? Pagkatapos hambal ni Angelena, nagkalma ang lalaki. Nagsiling pa gani ang lalaki nga sang nagapakig-upod pa sia sa mga Saksi ni Jehova, may masadya sia nga mga eksperiensia. Nagsiling si Angelena: “Nagakadapat gid pangapinan si Jehova. Isa gid ka kadungganan nga isugid ang kamatuoran parte sa iya.” May kadungganan man kita nga dayawon si Jehova kag himayaon sia kon ginapakalain sia sang iban.

11. Paano ginasunod sang mga alagad ni Jehova ang prinsipio sa Salmo 96:8 halin pa sang una?

¹¹ Basaha ang Salmo 96:8. Mahimaya naton si Jehova paagi sa aton materyal nga mga butang. Halin pa sang una, ginahimo na ini sang mga alagad ni Jehova. (Hulu. 3:9) Halimbawa, naghatag ang mga Israelinhon sang kuarta kag materyal nga mga butang para sa pagpatindog kag pagmentinar sang templo. (2 Hari 12:​4, 5; 1 Cron. 29:​3-9) Sa bahin sang mga disipulo sang Cristo, ‘gingamit sang pila sa ila ang ila mga pagkabutang’ para buligan sia kag ang iya mga apostoles sa ila mga kinahanglanon. (Luc. 8:​1-3) Nagpadala man sang bulig ang mga Cristiano sang unang siglo para sa ila mga kauturan nga naapektuhan sang tiggulutom. (Binu. 11:​27-29) Subong, mahimaya man naton si Jehova paagi sa aton boluntaryo nga mga donasyon.

12. Paano mahimaya sang aton mga donasyon si Jehova? (Tan-awa man ang piktyur.)

¹² Binagbinaga ining isa ka eksperiensia nga nagapakita kon paano mahimaya sang aton mga donasyon si Jehova. Sang 2020, naapektuhan sang malawig nga tig-ilinit ang Zimbabwe. Bangod sini, minilyon ka tawo ang posible mapatay bangod sa gutom, lakip na ang isa ka sister nga si Prisca. Pero bisan pa amo sini ang sitwasyon, padayon nga nagabantala si Prisca kada Mierkoles kag Biernes. Nagabantala pa gani sia bisan pa nga tion na para mag-arado. Gin-insulto sia sang iya mga kaingod bangod nagabantala sia imbes nga mag-obra sa iya uma. Ginsilingan nila sia, “Magutman ka gid.” Pero sigurado si Prisca nga indi sia pagpabay-an ni Jehova. Gani ginsilingan niya sila, “Wala gid ginapabay-an ni Jehova ang iya mga alagad.” Wala madugay  pagkatapos sini, nakabaton sia sang suplay halin sa aton organisasyon. Ngaa may ikasarang nga magbulig ang aton organisasyon? Bangod ini sa aton mga donasyon. Nagbilib gid ang mga kaingod ni Prisca, kag ginsilingan nila sia, “Wala ka gid tuod ginpabay-an sang Dios, gani gusto namon nga makatuon man parte sa iya.” Subong, pito sa iya mga kaingod ang naga-attend na sa mga miting sang kongregasyon.

13. Paano mahimaya si Jehova sang aton paggawi? (Salmo 96:9)

¹³ Basaha ang Salmo 96:9. Mahimaya naton si Jehova paagi sa aton paggawi. Dapat mangin matinlo sa pisikal ang mga saserdote nga nag-alagad sadto sa tabernakulo kag sa templo sang ulihi. (Ex. 40:​30-32) Pero, mas importante sa pisikal nga katinlo ang matinlo nga paggawi. (Sal. 24:​3, 4; 1 Ped. 1:​15, 16) Dapat gid naton panikasugan nga ubahon “ang daan nga personalidad,” ukon ang indi maayo nga mga pamatasan kag malain nga mga buhat. Kag isuksok naton “ang bag-o nga personalidad,” ukon dapat makita sa aton ginahunahuna kag ginahimo nga ginailog naton ang dalayawon nga mga kinaiya ni Jehova. (Col. 3:​9, 10) Sa bulig ni Jehova, puede magbag-o bisan ang grabe ka imoral kag bayolente nga mga tawo kag masuksok nila ang bag-o nga personalidad.

14. Ano ang natun-an mo sa eksperiensia ni Jack? (Tan-awa man ang piktyur.)

¹⁴ Binagbinaga ang eksperiensia ni Jack. Isa sia ka bayolente nga kriminal, kag gintawag pa gani sia nga Demonyo. Bangod sang nahimo niya nga mga krimen, ginsentensiahan sia sing kamatayon. Pero, samtang ginahulat niya kon san-o sia patyon, nagpasugot sia nga magpa-Bible study sa isa ka brother nga nagakadto sa prisuhan. Nakahimo si Jack sang madamo nga malain nga mga butang, pero gin-uba niya ang iya daan nga personalidad. Sang ulihi, nabawtismuhan sia. Sang adlaw nga patyon na sia, daku na ang ginbag-o ni Jack. Naghibi pa gani ang iban nga mga guardia samtang ginaistorya nila sia antes sia patyon. Ang isa ka soldado sa prisuhan nagsiling: “Sang una, si Jack ang pinakabayolente nga priso. Pero subong, isa na sia sa pinakamabuot.” Kada semana, may mga brother nga nagakadto sa prisuhan para maghiwat sang miting. Pagbalik nila sa prisuhan pagligad sang isa ka semana pagkatapos ginpatay si Jack, may nakilala sila nga isa ka priso nga nag-attend sa pinakauna nga tion. Ano ang nagpalig-on sa iya nga mag-attend? Nagdayaw gid sia sa pagbag-o ni Jack, kag gusto niya mabal-an kon ano ang dapat niya himuon para masimba niya si Jehova. Ginapakita sini nga mahimaya naton  ang aton Amay sa langit paagi sa aton paggawi.​—1 Ped. 2:12.

PAANO HIMAYAON NI JEHOVA ANG IYA NGALAN SA INDI NA LANG GID MADUGAY?

15. Sa indi na lang gid madugay, paano ipakita ni Jehova nga nagakadapat gid himayaon ang iya ngalan? (Salmo 96:​10-13)

¹⁵ Basaha ang Salmo 96:​10-13. Sa sining katapusan nga mga bersikulo sang Salmo 96, ginlaragway si Jehova bilang isa ka matarong nga Hukom kag Hari. Paano himayaon ni Jehova ang iya ngalan sa indi na lang gid madugay? Paagi sa himuon niya nga mga paghukom. Sa indi na lang gid madugay, laglagon niya ang Babilonia nga Daku bangod ginpakahuy-an sini ang iya balaan nga ngalan. (Bug. 17:​5, 16; 19:​1, 2) Kon malaglag na ang Babilonia nga Daku, posible nga may pila ka tawo nga magadesisyon nga mag-upod sa aton sa pagsimba kay Jehova. Kag sa Armageddon, laglagon ni Jehova ang bug-os nga sistema ni Satanas. Gani, madula na ang tanan nga nagapamatok kay Jehova kag nagapasipala sa iya ngalan. Pero, luwason ni Jehova ang tanan nga nagapalangga sa iya, nagatuman sa iya, kag nagahimaya sa iya. (Mar. 8:38; 2 Tes. 1:​6-10) Sa tapos sang katapusan nga pagtilaw pagkatapos sang Isa ka Libo ka Tuig nga Paggahom sang Cristo, mapakabalaan na ni Jehova ang iya ngalan sing bug-os. (Bug. 20:​7-10) Sa sina nga tion, “ang duta mapuno sang ihibalo tuhoy sa himaya ni Jehova pareho sang tubig nga nagatabon sang dagat.”​—Hab. 2:14.

16. Ano ang dapat mo himuon? (Tan-awa man ang piktyur.)

¹⁶ Magaabot ang tion nga ihatag sang tanan kay Jehova ang himaya nga nagakadapat sa iya ngalan. Mangin makalilipay gid ina nga tion. Pero samtang wala pa ina nga tion, himuon naton ang aton bug-os nga masarangan para mahimaya naton ang aton Dios sa tanan nga kahigayunan. Para buligan kita nga magpokus sa sining importante nga responsibilidad, ginpili sang Nagadumala nga Hubon ang Salmo 96:8 bilang aton tuigan nga teksto sa 2025. Nagasiling ini: “Ihatag ninyo kay Jehova ang himaya nga nagakadapat sa iya ngalan.”