1. Ano ang isa ka rason kon ngaa ginhatagan kita ni Jehova sang regalo nga pag-asawahay?

 SI Jehova isa ka “malipayon nga Dios,” kag gusto niya nga mangin malipayon man kita. (1 Tim. 1:11) Ginhatagan niya kita sang madamo nga regalo para buligan kita nga mangin malipayon sa aton kabuhi. (Sant. 1:17) Kag ang isa sa sini nga mga regalo amo ang pag-asawahay. Kon magpakasal ang isa ka lalaki kag isa ka babayi, nagapromisa sila nga palanggaon kag respetuhon nila ang isa kag isa. Kon padayon nga pabakuron sang bana kag asawa ang ila gugma sa isa kag isa, mangin malipayon gid sila.​—Hulu. 5:18.

2. Paano ginatratar sang madamo nga bana ang ila asawa sa aton tion subong?

² Makapasubo nga wala ginatuman sang madamo nga mag-asawa subong ang ila ginpromisa sa isa kag isa sang ginkasal sila. Bangod sini, indi sila malipayon. Suno sa isa ka report sang World Health Organization sining karon lang, ginasakit sang madamo nga bana ang ila asawa, ginainsulto nila ang ila asawa, ukon ginasakit nila ang balatyagon sang ila asawa. Posible nga ipakita sini nga klase sang bana nga ginarespeto niya ang iya asawa kon may iban nga tawo, pero ginamaltrato niya ang iya asawa sa ila balay. Madamo nga bana ang nagatan-aw sang pornograpiya, kag nagaresulta man ini sa problema sa pag-asawahay.

3. Ano ang posible nga mga rason kon ngaa ginamaltrato sang isa ka bana ang iya asawa?

³ Ano ang posible nga mga rason kon ngaa ginamaltrato sang pila ka bana ang ila asawa? Posible nga nakita nila nga ginamaltrato sang ila amay ang ila iloy, gani abi nila indi sala kon himuon man nila ini sa ila asawa. May iban naman nga naimpluwensiahan sang kultura sa ila lugar. Posible nga sa ila kultura, nagapati sila nga dapat gamiton sang bana ang iya kusog para ipakita nga sia ang dapat masunod. May pila naman ka lalaki nga wala gintudluan nga dapat nila kontrolon ang ila emosyon, lakip na ang ila kaakig. Kag may pila ka lalaki nga pirme nagatan-aw sang pornograpiya, gani sala ang ila pagtamod sa mga babayi kag sa pagpakig-sex. Kag suno sa mga report, nagdamo pa gid ang mga bana nga nagamaltrato sa ila asawa sa tion sang COVID-19  nga pandemic. Pero ano man ang rason, indi gid dapat pagmaltratuhon sang isa ka bana ang iya asawa.

4. Sa ano dapat maghalong ang Cristiano nga mga bana, kag ngaa?

⁴ Dapat maghalong ang Cristiano nga mga bana para indi sila maimpluwensiahan sang sala nga pagtamod sang kalibutan sa mga babayi. a Ngaa? Bangod ang ginahunahuna sang isa ka tawo amo ang nagaimpluwensia sa iya nga himuon ang isa ka butang. Ginpaandaman ni apostol Pablo ang hinaplas nga mga Cristiano sa Roma nga ‘untatan na nila ang pagpadihon sa mga dalanon sang katawhan sini nga sistema sang mga butang.’ (Roma 12:​1, 2) Sang ginsulatan ni Pablo ang mga taga-Roma, madugay na nga nangin Cristiano ang mga kauturan didto. Pero, ginapahangop sang ginsiling ni Pablo nga may pila ka kauturan didto nga naimpluwensiahan gihapon sang mga kustombre kag panghunahuna sang kalibutan. Gani, ginlaygayan niya sila nga bag-uhon nila ang ila panghunahuna kag panimuot. Dapat man iaplikar sang Cristiano nga mga bana subong ini nga laygay. Makapasubo, naimpluwensiahan ang pila sa ila sang panghunahuna sang kalibutan kag ginamaltrato nila ang ila asawa. b Ti, ano ang gusto ni Jehova nga pagtrato sang isa ka bana sa iya asawa? Makita man sa teksto nga ginbasihan sini nga artikulo ang sabat sa sini.

5. Suno sa 1 Pedro 3:​7, paano dapat trataron sang isa ka bana ang iya asawa?

⁵ Basaha ang 1 Pedro 3:7. Ginasugo ni Jehova ang mga bana nga dapat nila padunggan ang ila asawa. Ang pagpadungog nagapatuhoy sa pagpakita sang respeto sa isa ka tawo. Kon ginapadunggan sang isa ka bana ang iya asawa, ginatratar niya sia sa mainayuhon kag mahigugmaon nga paagi. Sa sini nga artikulo, binagbinagon naton kon paano padunggan sang isa ka bana ang iya asawa. Pero, binagbinagon anay naton ang mga buhat nga indi dapat paghimuon sang isa ka bana sa iya asawa.

INDI PAGHIMUA ANG MGA BUHAT NGA MAKASAKIT SA IMO ASAWA

6. Ano ang pagtan-aw ni Jehova sa mga bana nga nagasakit sa ila asawa? (Colosas 3:19)

⁶ Indi dapat pagsakiton sang isa ka bana ang iya asawa. Ginadumtan ni Jehova ang masingki nga mga tawo. (Sal. 11:5) Kag ginadumtan gid ni Jehova ang mga bana nga nagasakit sa ila asawa. (Mal. 2:16; basaha ang Colosas 3:19.) Suno sa 1 Pedro 3:7 nga ginbasihan sini nga artikulo, kon wala ginatratar sing maayo sang isa ka bana ang iya asawa, maapektuhan ang iya kaangtanan sa Dios. Kag posible nga indi pagpamatian ni Jehova ang iya mga pangamuyo.

7. Suno sa Efeso 4:​31, 32, ano nga klase sang paghambal ang dapat likawan sang mga bana? (Tan-awa man ang “Dugang nga Paathag.”)

⁷ Indi dapat pagsakiton sang isa ka bana ang iya asawa paagi sa iya mga ginahambal. Ginamaltrato sang pila ka bana ang ila asawa paagi sa pagsing-al sa ila kag paghambal sang masakit nga mga tinaga. Pero, ginadumtan ni Jehova ang “kaakig, kasingkal, sininggitanay, [kag] masakit nga hambal.” c (Basaha ang Efeso 4:​31, 32.) Mabatian ni Jehova ang tanan. Gani, importante kay Jehova kon paano nagapakighambal ang isa ka bana sa iya asawa, bisan sa mga sitwasyon nga wala sing iban nga tawo. Kon masakit maghambal ang isa ka bana sa iya asawa, posible maguba ang iya relasyon sa iya asawa kag ang iya kaangtanan sa Dios.​—Sant. 1:26.

8. Ano ang pagtamod ni Jehova sa pornograpiya, kag ngaa?

⁸ Indi dapat magtan-aw sang pornograpiya ang isa ka bana. Ano ang pagtamod ni Jehova sa pornograpiya? Ginadumtan niya ini. Gani, kon nagatan-aw sang pornograpiya ang isa ka bana,  ginaguba niya ang iya kaangtanan kay Jehova kag wala niya ginarespeto ang iya asawa. d Gusto ni Jehova nga mangin mainunungon ang isa ka bana sa iya asawa, indi lang paagi sa iya mga ginahimo kundi paagi man sa iya mga ginahunahuna. Nagsiling si Jesus nga ang isa ka lalaki nga nagatulok sa isa ka babayi kag nagahandum sa pagpakighilahi sa iya nagapakighilahi na “sa iya tagipusuon.” e—Mat. 5:​28, 29.

9. Ngaa naakig si Jehova kon ginapilit sang isa ka bana ang iya asawa nga himuon ang isa ka butang nga indi niya gusto kon naga-sex sila?

⁹ Indi dapat pagpiliton sang isa ka bana ang iya asawa nga himuon ang isa ka butang nga indi niya gusto kon naga-sex sila. Ginapilit sang pila ka bana ang ila asawa nga himuon ang seksuwal nga mga buhat nga nagatublag sa konsiensia sang ila asawa. Bangod sini, nagabatyag ang mga asawa nga indi sila palangga sang ila bana. Kon ginahimo ini sang isa ka bana, wala niya ginapamensar ang kaayuhan sang iya asawa. Naakig gid si Jehova sa sini. Kay man, gusto ni Jehova nga palanggaon kag pabaloran sang bana ang iya asawa. Kag gusto niya nga respetuhon sang bana ang balatyagon sang iya asawa. (Efe. 5:​28, 29) Ano abi kon ginahimo sang isa ka bana ang ginbinagbinag naton nga mga buhat nga makasakit sa iya asawa? Paano niya mabag-o ang iya panghunahuna kag mga ginahimo?

KON PAANO MAUNTAT SANG ISA KA BANA ANG IYA MALAIN NGA GINAHIMO

10. Paano makatuon ang mga bana sa halimbawa ni Jesus?

¹⁰ Ano ang makabulig sa isa ka bana para mauntat niya ang iya pagmaltrato sa iya asawa? Dapat niya panikasugan nga ilugon si Jesus. Wala nagpangasawa si Jesus, pero makatuon ang mga bana sa iya maayo nga halimbawa. Kon parte sa pagtratar sa ila asawa, dapat ilugon sang mga bana ang paagi ni Jesus sa pagtratar sa iya mga disipulo. (Efe. 5:25) Gani, binagbinagon naton kon ano ang matun-an sang mga bana sa paagi ni Jesus sa pagtratar sa iya mga apostoles kag sa iya paagi sa pag-istorya sa ila.

11. Paano gintratar ni Jesus ang iya mga apostoles?

¹¹ Pirme ginapakitaan ni Jesus sing kaayo ang iya mga apostoles kag ginarespeto niya sila. Wala gid niya sila ginpintasan ukon gintinguhaan nga kontrolon. Bisan pa nga si Jesus ang ila Ginuo kag Agalon, wala niya gingamit ang iya gahom para ipakita sa ila nga sia ang dapat masunod. Sa baylo, mapainubuson sia nga nag-alagad sa ila. (Juan 13:​12-17) Ginsilingan niya ang iya mga disipulo: “Magtuon kamo sa akon, kay ako malulo kag mapainubuson sing tagipusuon, kag makakita kamo sing kapahuwayan para sa inyo kaugalingon.” (Mat. 11:​28-30) Talupangda nga malulo si Jesus. Kon malulo ang isa ka tawo, indi buot silingon sini nga maluya sia. Sa baylo, mabakod sia kay mapunggan niya ang iya kaugalingon. Sa mga sitwasyon nga posible maakig sia, kalmado lang sia gihapon kag masarangan niya nga kontrolon ang iya emosyon.

12. Paano gin-istorya ni Jesus ang iban?

¹² Makapaumpaw kag makapalig-on ang mga tinaga ni Jesus. Indi sia masakit maghambal sa iya mga disipulo. (Luc. 8:​47, 48) Bisan pa nga gin-insulto sia sang iya mga kaaway kag gintinguhaan nila nga maakig sia, “wala sia magbalos.” (1 Ped. 2:​21-23) May mga tion pa gani nga naghipos lang si Jesus imbes nga maghambal sang masakit nga mga tinaga. (Mat. 27:​12-14) Maayo gid sia nga halimbawa para sa Cristiano nga mga bana.

13. Suno sa Mateo 19:​4-6, paano mapakita sang isa ka bana nga ‘nagahiusa sia sa iya asawa’? (Tan-awa man ang piktyur.)

¹³ Ginsugo ni Jesus ang mga bana nga dapat mangin mainunungon sila sa ila asawa. Ginsulit niya ang ginsiling sang iya Amay nga dapat ‘maghiusa ang bana sa iya asawa.’ (Basaha ang Mateo 19:​4-6.) Ang Griego nga verb para sa “maghiusa” literal nga nagakahulugan sing “magtapik.” Gani, dapat mabakod gid katama ang gugma sang bana kag asawa sa isa kag isa. Daw pareho sila sa duha ka butang  nga gintapik paagi sa glue. Indi sila puede bulagon nga indi sila mahalitan. Kon mabakod gid katama ang gugma sang isa ka bana sa iya asawa, isikway gid niya ang tanan nga sahi sang pornograpiya. Ilikaw niya dayon ang iya mga mata “sa pagtan-aw sa wala sing pulos nga mga butang.” (Sal. 119:37) Pareho kay Job, indi gid sia magtulok nga may seksuwal nga handum sa iban nga babayi.​—Job 31:1.

14. Kon ginamaltrato sang isa ka bana ang iya asawa, ano ang mga dapat niya himuon para makay-o niya ang iya kaangtanan kay Jehova kag sa iya asawa?

¹⁴ Kon ginasakit sang isa ka bana ang iya asawa, sa pisikal man ukon paagi sa iya mga ginahambal, may mga dapat sia himuon para makay-o niya ang iya kaangtanan kay Jehova kag sa iya asawa. Ano ang mga dapat niya himuon? Una, dapat niya batunon nga may serioso sia nga problema. Makita ni Jehova ang tanan niya nga ginahimo, kag mabatian ni Jehova ang tanan niya nga ginahambal. (Sal. 44:21; Man. 12:14; Heb. 4:13) Ikaduha, dapat niya untatan ang pagmaltrato sa iya asawa kag dapat niya bag-uhon ang iya pamatasan. (Hulu. 28:13) Ikatlo, dapat niya akuon sa iya asawa kag kay Jehova ang iya sala kag mangayo sia sing pasaylo sa ila. (Binu. 3:19) Dapat man sia makitluoy kay Jehova nga buligan sia nga magbag-o kag makontrol ang iya panghunahuna, mga ginahambal, kag mga ginahimo. (Sal. 51:​10-12; 2 Cor. 10:5; Fil. 2:13) Ikap-at, dapat niya panikasugan nga himuon ang iya ginpangamuyo paagi sa pagdumot sa tanan nga klase sang kasingki kag masakit nga hambal. (Sal. 97:10) Ikalima, dapat magpabulig sia dayon sa mahigugmaon nga mga gulang sa kongregasyon. (Sant. 5:​14-16) Ikan-om, dapat sia maghimo sang plano nga makabulig sa iya nga malikawan ang paghimo liwat sining malain nga mga buhat. Kon nagatan-aw sang pornograpiya ang isa ka bana, dapat man niya himuon ining anom ka butang nga ginbinagbinag naton. Pakamaayuhon gid ni Jehova ang ginahimo nga mga pagpanikasog sang isa ka bana para bag-uhon ang iya pamatasan. (Sal. 37:5) Pero, indi bastante nga untatan lang sang bana ang iya malain nga mga ginahimo. Dapat tun-an man niya kon paano niya padunggan ang iya asawa. Paano niya ini mahimo?

KON PAANO MO PADUNGGAN ANG IMO ASAWA

15. Paano mapakita sang isa ka bana nga palangga niya ang iya asawa?

¹⁵ Ipakita sa imo asawa nga palangga mo sia. Ginasigurado sang pila ka brother nga may ginahimo  gid sila kada adlaw para ipakita nga palangga gid nila ang ila asawa. Gani, malipayon gid sila sa ila pag-asawahay. (1 Juan 3:18) Mapakita sang isa ka bana nga palangga niya ang iya asawa bisan sa simple lang nga mga paagi, pareho sang pag-uyat sang iya kamot ukon paghakos sa iya. Puede niya i-text ang iya asawa sing “I miss you, Ga” ukon sing “Kamusta ang imo adlaw, Ga?” Puede man sia maghimo sang card kag isulat niya diri kon daw ano niya ka palangga ang iya asawa. Kon himuon sang isa ka bana ini nga mga paagi, ginapadunggan niya ang iya asawa kag magabakod pa gid ang ila pag-asawahay.

16. Ngaa dapat dayawon sang isa ka bana ang iya asawa?

¹⁶ Pasalamati ang imo asawa. Kon ginapadunggan sang isa ka bana ang iya asawa, ginasilingan niya ang iya asawa kon daw ano sia ka importante sa iya kag ginapalig-on niya sia. Ang isa ka paagi para mahimo niya ini amo ang pagpasalamat sa iya asawa sa tanan niya nga ginahimo para suportahan sia. (Col. 3:15) Kon sinsero nga ginadayaw sang isa ka bana ang iya asawa, malipay gid ang iya asawa. Mabatyagan sang iya asawa nga ginaamligan sia, ginapalangga, kag ginapadunggan.​—Hulu. 31:28.

17. Paano mapakita sang isa ka bana nga ginarespeto niya ang iya asawa?

¹⁷ Pakitai sing kaayo ang imo asawa kag respetuha sia. Kon palangga sang isa ka bana ang iya asawa, ginahalungan niya sia kag ginapabaloran. Para sa iya, isa ka hamili nga regalo ni Jehova ang iya asawa. (Hulu. 18:22; 31:10) Bangod sini, ginapakitaan niya sing kaayo ang iya asawa kag ginarespeto niya sia. Ginapakita niya ini bisan sa mga tion nga naga-sex sila. Gani, indi niya pagpiliton ang iya asawa nga himuon ang isa ka butang nga indi niya gusto ukon makatublag sang iya konsiensia kon naga-sex sila. f Kag indi gid dapat paghimuon sang isa ka bana ang bisan ano nga butang nga makatublag sang iya mismo konsiensia.​—Binu. 24:16.

18. Mga bana, ano ang dapat panikasugan ninyo nga himuon? (Tan-awa man ang kahon nga “ Apat ka Paagi nga Mapakita sang Bana nga Ginarespeto Niya ang Iya Asawa.”)

¹⁸ Mga bana, makasalig kamo nga nalipay si Jehova kon ginapadunggan ninyo ang inyo asawa sa tanan nga bahin sang inyo kabuhi. Gani, panikasugi ninyo nga padunggan ang inyo asawa paagi sa paglikaw sa mga buhat nga makasakit sa iya, paagi sa pagpakita sing kaayo sa iya, paagi sa pagrespeto sa iya, kag paagi sa pagpalangga sa iya. Kon himuon ninyo ini, ginapakita ninyo nga palangga gid ninyo ang inyo asawa kag importante sia sa inyo. Kon ginapadunggan ninyo ang inyo asawa, ginaamligan ninyo ang inyo pinakaimportante nga kaangtanan nga amo ang inyo kaangtanan kay Jehova.​—Sal. 25:14.