1, 2. Ano ang buot silingon sang pagtulok kay Jehova?

NAGAKABUHI kita sa “makahalanguyos nga mga tion nga mabudlay atubangon,” kag magabudlay pa gid ang kahimtangan samtang wala pa ginalaglag ni Jehova ining malaut nga kalibutan kag wala pa sing paghidait. (2 Tim. 3:1) Gani maayo gid nga mamangkot kita, ‘Kay sin-o ako nagapangayo sing bulig kag panuytoy?’ Mahimo magsabat kita dayon nga, “Kay Jehova,” kag amo ina ang pinakamaayo nga sabat.

² Ano ang buot silingon sang pagtulok kay Jehova? Kag paano naton masigurado nga pirme kita nagatulok sa iya kon may mga problema kita? Pila ka gatos ka tuig na ang nagligad, nagsiling ang salmista nga dapat kita magtulok kay Jehova kon nagakinahanglan kita sing bulig. (Basaha ang Salmo 123:1-4.) Ginpaanggid niya ini sa pagtulok sang alagad sa iya agalon. Ano ang buot silingon sang salmista? Ang alagad nagatulok sa iya agalon kay ang iya agalon amo ang nagahatag sa iya sing pagkaon kag proteksion. Pero dapat man niya pirme tulukon ang iya agalon para mabal-an niya kon ano ang ipahimo sang  iya agalon, kag dapat niya ini himuon. Sing kaanggid, dapat man naton tun-an sing maayo ang Pulong sang Dios adlaw-adlaw para mahangpan naton kon ano ang gusto ni Jehova nga himuon naton, kag dapat naton ini himuon. Amo lang ini ang paagi para masigurado naton nga buligan kita ni Jehova sa tion nga kinahanglan naton ini.—Efe. 5:17.

3. Ano ang mahimo magtublag sa aton pagtulok kay Jehova?

³ Bisan pa nahibaluan naton nga importante ang pagtulok pirme kay Jehova, mahimo nga matublag kita kon kaisa. Natabo ini kay Marta, nga suod nga abyan ni Jesus. Nangin “masako si Marta sa pag-atipan sa madamo nga hilikuton.” (Luc. 10:40-42) Kon natabo ini sa isa ka matutom nga tawo bisan pa kaupod niya si Jesus, mahimo man ini matabo sa aton. Ano ang mahimo magtublag sa aton pagtulok kay Jehova? Sa sini nga artikulo, binagbinagon naton kon paano ang mga ginahimo sang iban mahimo magtublag sa aton. Tun-an man naton kon paano kita pirme makatulok kay Jehova.

4. Ngaa mahimo matingala kita nga wala makasulod si Moises sa Ginsaad nga Duta?

⁴ Nagtulok si Moises kay Jehova para tuytuyan sia. Ang matuod, “nagpabilin sia nga malig-on sa pagtuo subong nga nakakita sa Isa nga indi makita.” (Basaha ang Hebreo 11:24-27.) Ang Biblia nagasiling nga “wala na sing manalagna sa Israel nga pareho kay Moises, nga nakilala gid ni Jehova.” (Deut. 34:10) Pero bisan pa suod gid si Moises kay Jehova, wala sia makasulod sa Ginsaad nga Duta. (Num. 20:12) Ngaa?

5-7. Ano ang natabo wala madugay pagkatapos makagua sa Egipto ang mga Israelinhon, kag ano ang ginhimo ni Moises?

⁵ Wala pa duha ka bulan pagkatapos makagua sa Egipto ang mga Israelinhon, kag antes sila makalab-ot sa Bukid Sinai, may natabo nga serioso nga problema. Nagreklamo ang mga tawo kay wala sing tubig. Nagkumod sila kag naakig kay Moises amo nga nagpanawag si Moises kay Jehova: “Ano ang himuon ko sa sini nga katawhan? Sa indi madugay batuhon na nila ako!” (Ex. 17:4) Ginhatagan ni Jehova si Moises sing maathag nga instruksion. Dalhon niya ang iya sungkod kag hampakon niya ang igang sa Horeb, kag magagua ang tubig. Ang Biblia nagasiling: “Ginhimo ini ni Moises sa atubangan sang mga gulang sang Israel.” Dayon nag-inom ang mga Israelinhon, kag nasolbar ang problema.—Ex. 17:5, 6.

⁶ Ang Biblia nagasiling nga “ginhingalanan [ni Moises] ang lugar nga Masa kag Meriba, bangod sang pagpakigbais sang mga Israelinhon kag bangod ginbutang nila si Jehova sa pagtilaw, kay nagsiling sila: ‘Yara bala si Jehova sa tunga naton ukon wala?’” (Ex. 17:7) Bagay gid ini nga mga ngalan kay nagakahulugan ini sing “Pagtilaw” kag “Pagpakigbais.”

⁷ Ano ang ginbatyag ni Jehova sa natabo sa Meriba? Para sa iya, indi lang kay Moises nagrebelde ang mga Israelinhon, kundi sa iya mismo bilang ila Dios. (Basaha ang Salmo 95:8, 9.) Indi gid husto ang ginhimo sang mga Israelinhon. Pero husto ang ginhimo ni Moises, kay nagtulok sia kay Jehova kag ginsunod gid niya ang iya instruksion.

8. Ano ang natabo sang malapit na matapos sang mga Israelinhon ang ila paglakbay sa kamingawan?

⁸ Pero, ano ang natabo sang may pareho  gihapon nga problema pagligad sang mga 40 ka tuig? Malapit na sadto matapos sang mga Israelinhon ang ila paglakbay sa kamingawan. Nakalab-ot sila sa lugar nga gintawag man sang ulihi nga Meriba. Pero lain ini nga Meriba, kay malapit ini sa Kades kag sa dulunan sang Ginsaad nga Duta. * Nagreklamo liwat ang mga Israelinhon kay wala sing tubig. (Num. 20:1-5) Pero sa sini nga tion, indi husto ang ginhimo ni Moises.

9. Ano ang ginsugo kay Moises, pero ano ang iya ginhimo? (Tan-awa ang piktyur sa umpisa sini nga artikulo.)

⁹ Ano ang ginhimo ni Moises sa sini nga pagrebelde? Nagtulok sia liwat kay Jehova para tuytuyan sia. Pero sa sini nga tion, wala sia ginsugo ni Jehova nga hampakon ang igang. Ginsugo niya si Moises nga dalhon ang iya sungkod, tipunon ang katawhan sa atubangan sang daku nga bato, kag maghambal sa bato. (Num. 20:6-8) Pero wala maghambal si Moises sa daku nga bato ukon igang. Sa baylo, ginsinggitan niya ang katawhan bangod sang iya kaugot sa ila: “Pamati kamo nga mga rebelde! Dapat bala kami magpagua sing tubig para sa inyo halin sa sining daku nga bato?” Dayon ginhampak niya ang daku nga bato sing duha gid ka beses.—Num. 20:10, 11.

10. Ano ang reaksion ni Jehova sa ginhimo ni Moises?

¹⁰ Naakig gid si Jehova kay Moises. (Deut. 1:37; 3:26) Ngaa? Madamo sing posible nga rason. Ang isa mahimo bangod wala gintuman ni Moises ang bag-o nga instruksion ni Jehova.

11. Bangod ginhampak ni Moises ang bato, ngaa mahimo naghunahuna ang mga Israelinhon nga wala sing ginhimo nga milagro si Jehova?

¹¹ Ari ang posible isa pa ka rason. Matig-a ang mga bato sa una nga Meriba. Gani bisan hampakon ini sing makusog, indi magua ang tubig diri. Pero, lain nga klase sang mga bato ang sa ikaduha nga Meriba. Mahumok ini nga mga bato nga kalabanan apog. Nagasalupsop sa sini ang tubig gani nagasupot ang tubig sa idalom. Gani sang ginhampak ni Moises ang bato sing duha ka beses, indi ayhan naghunahuna ang mga Israelinhon nga naggua ang tubig, indi bangod kay Jehova, kundi bangod may maggua gid man nga tubig kon hampakon ini? Bangod ginhampak ni Moises ang bato imbes nga hambalon ini, indi ayhan daw gusto niya nga dayawon man sia? * Indi kita sigurado.

12. Ano ang posible isa pa ka rason kon ngaa naakig si Jehova kay Moises kag kay Aaron?

¹² Posible may isa pa ka rason kon ngaa naakig si Jehova kay Moises kag kay Aaron. Talupangda ang ginsiling ni Moises sa mga tawo: “Dapat bala kami magpagua sing tubig para sa inyo halin sa sining daku nga bato?” Paagi sa pagsiling nga “kami,” mahimo ginpatuhuyan niya ang iya kaugalingon kag si Aaron. Ginapakita sang ginsiling ni Moises nga wala niya ginpadunggan si Jehova nga amo ang naghimo sang milagro. Ang Salmo 106:32, 33 nagasiling: “Ginpaakig nila Sia sa tubig sang Meriba, kag bangod sa ila indi maayo ang nadangatan ni  Moises. Ginpaakig nila sia, naghambal sia sing padasudaso.” * (Num. 27:14) Bangod sang ginhimo ni Moises, wala napadunggan si Jehova. Ginsilingan ni Jehova sanday Moises kag Aaron: “Ginsupak ninyo ang akon sugo.” (Num. 20:24) Serioso gid ini nga sala!

13. Ngaa nagakaigo kag husto ang desisyon ni Jehova sa ginhimo ni Moises?

¹³ Bangod sanday Moises kag Aaron ang lider sang katawhan ni Jehova, mas daku ang ila salabton. (Luc. 12:48) Wala sadto ginpasulod ni Jehova sa Canaan ang isa ka kaliwatan sang mga Israelinhon bangod sang ila pagrebelde. (Num. 14:26-30, 34) Gani nagakaigo kag husto ang desisyon ni Jehova sa ginhimo ni Moises nga pagrebelde. Pareho sang iban nga rebelde, wala sia ginpasulod sa Ginsaad nga Duta.

14, 15. Ngaa nagrebelde si Moises?

¹⁴ Ngaa nagrebelde si Moises? Talupangda liwat ang ginasiling sang Salmo 106:32, 33: “Ginpaakig nila Sia sa tubig sang Meriba, kag bangod sa ila indi maayo ang nadangatan ni Moises. Ginpaakig nila sia, naghambal sia sing padasudaso.” Kay Jehova nagrebelde ang mga Israelinhon, pero si Moises ang naakig. Bangod wala niya ginpunggan ang iya kaugalingon, naghambal sia sing padasudaso nga wala ginapamensar ang resulta.

¹⁵ Nagpaapekto si Moises sa ginhimo sang iban gani wala na sia magtulok kay Jehova. Husto ang ginhimo ni Moises sa una nga problema. (Ex. 7:6) Pero, bangod sang tinuig nga pagrebelde sang mga Israelinhon, posible nga kinapoy kag naugot si Moises. Indi ayhan nga bangod sa kaugot ni Moises, wala na niya mapensaran nga himayaon si Jehova?

16. Ngaa dapat naton binagbinagon ang natabo kay Moises?

¹⁶ Kon si Moises nga isa ka matutom nga manalagna natublag kag nasandad, mahimo man ini matabo sa aton. Pareho ni Moises, malapit na kita magsulod sa bag-ong kalibutan nga ginpromisa ni Jehova. (2 Ped. 3:13) Indi gid naton gusto nga mawasi ini. Pero para makasulod kita sa bag-ong kalibutan, dapat kita pirme magtulok kay Jehova, kag himuon ang iya kabubut-on. (1 Juan 2:17) Ano ang matun-an naton sa sala ni Moises?

17. Ano ang makabulig sa aton nga indi maapektuhan sang kaugot?

¹⁷ Indi magpaapekto sa kaugot. Bisan pa daw amo lang gihapon nga mga problema ang aton ginaatubang, “indi kita magpangampo sa paghimo sing maayo, kay sa nagakaigo nga tion magaani kita kon indi kita paglapyuon.” (Gal. 6:9; 2 Tes. 3:13) Kon ang isa ka sitwasyon ukon tawo sulitsulit nga nagapaugot sa aton, ginakontrol bala naton ang aton paghambal kag kaakig? (Hulu. 10:19; 17:27; Mat. 5:22) Kon ginapaakig kita sang iban, dapat naton ‘pabay-an si Jehova nga Dios nga magpakita sang iya kaakig.’ (Basaha ang Roma 12:17-21.) Kon pirme kita nagatulok kay Jehova, padunggan naton sia paagi sa paghulat kon san-o niya ipakita ang iya kaakig. Kon magbalos kita, daw pareho lang nga wala naton ginarespeto si Jehova.

18. Ano ang dapat naton dumdumon parte sa pagsunod sang mga panuytoy?

¹⁸ Sunda sing maayo ang bag-o nga  mga panuytoy. Ginasunod bala naton sing maayo ang bag-o nga mga panuytoy halin kay Jehova? Likawan naton nga himuon ang mga butang suno sa mga pamaagi nga naandan naton sang una. Sa baylo, dapat tumanon naton dayon ang bag-o nga mga panuytoy nga ginahatag ni Jehova paagi sa iya organisasyon. (Heb. 13:17) Pero, dapat man kita maghalong nga indi “magsobra sa mga butang nga nasulat na.” (1 Cor. 4:6) Kon himuon naton ini, pirme kita nagatulok kay Jehova.

19. Ano ang himuon naton para indi maguba ang aton kaangtanan kay Jehova bangod sa sala sang iban?

¹⁹ Indi pagtuguti nga maguba ang imo kaangtanan kay Jehova bangod sa sala sang iban. Kon pirme kita nagatulok kay Jehova, indi naton pagtugutan ang ginahimo sang iban nga magpaakig sa aton ukon mangin kabangdanan nga maguba ang aton kaangtanan sa iya. Importante gid ini kon may katungdanan kita sa organisasyon sang Dios, pareho ni Moises. Matuod, ang kada isa sa aton dapat ‘padayon nga magpanikasog sa iya kaugalingon nga kaluwasan nga may kahadlok kag pagkurog,’ pero dapat naton dumdumon nga wala kita ginahukman ni Jehova paagi sa isa lang ka indi makatarunganon nga talaksan. (Fil. 2:12) Sa baylo, kon mas madamo ang aton responsibilidad, mas daku ang aton salabton. (Luc. 12:48) Pero kon ginahigugma gid naton si Jehova, wala sing makapasandad sa aton ukon makapugong nga mabaton naton ang iya gugma.—Sal. 119:165; Roma 8:37-39.

20. Ano ang dapat naton panikasugan?

²⁰ Sa sining mabudlay nga tion, kabay pa nga pirme kita magtulok sa Isa nga “nagapungko sa trono sa langit,” para mahantop naton ang iya kabubut-on. Indi gid naton pagtugutan nga maguba ang aton kaangtanan kay Jehova bangod sa ginahimo sang iban. Dapat mangin leksion sa aton ang natabo kay Moises. Sa baylo nga maakig sa sala sang iban, panikasugan naton nga ‘magtulok sa aton Dios nga si Jehova tubtob nga kaluy-an niya kita.’—Sal. 123:1, 2.