1. Ngaa masiling naton nga si Jehova ang nagapanag-iya sang tanan? (Tan-awa ang piktyur sa umpisa sini nga artikulo.)

ANG tanan iya ni Jehova! Ginapanag-iyahan niya “ang mga langit, bisan ang pinakamataas nga langit, kag ang duta kag ang tanan nga yara sa sini.” (Deut. 10:14; Bug. 4:11) Gani, bangod gintuga ni Jehova ang mga tawo, tanan kita iya ni Jehova. (Sal. 100:3) Pero, sa bilog nga kasaysayan sang tawo, may ginpili ang Dios nga mangin iya pinasahi nga katawhan.

2. Sin-o ang ginlaragway sa Biblia nga mga hamili nga katawhan ni Jehova?

² Halimbawa, sa Salmo 135, ang matutom nga mga sumilimba ni Jehova sa Israel sang una gintawag nga “iya hamili nga katawhan.” (Sal. 135:4) Sa libro naman sang Oseas, gintagna nga ang pila ka indi Israelinhon mangin katawhan ni Jehova. (Os. 2:23) Natuman ini sang ginlakip ni Jehova ang mga indi Judiyo nga mangin kaupod sang Cristo bilang manuggahom. (Binu. 10:45; Roma 9:23-26) Ining “balaan nga pungsod” amo ang katawhan ni Jehova nga “ginkuha [niya] para panag-iyahan.” Ginhaplasan sila sang balaan nga espiritu kag magakabuhi sila sa langit. (1 Ped. 2:9, 10) Kamusta naman ang kalabanan nga matutom nga mga Cristiano subong nga may paglaum nga mabuhi sing dayon sa duta? Ginatawag man sila ni Jehova nga iya “katawhan” kag iya “mga pinili.”—Isa. 65:22.

3. (a) Sin-o subong ang may pinasahi nga kaangtanan kay Jehova? (b) Ano ang binagbinagon sa sini nga artikulo?

 ³ Subong, ang “diutay nga panong,” nga may paglaum nga mabuhi sing dayon sa langit, kag ang “iban nga mga karnero,” nga may paglaum nga mabuhi sing dayon sa duta, amo ang “isa ka panong” nga ginapabaloran gid ni Jehova bilang iya katawhan. (Luc. 12:32; Juan 10:16) Ginapasalamatan gid naton si Jehova bangod ginhatagan niya kita sang pinasahi nga kadungganan nga mangin suod sa iya. Binagbinagon sa sini nga artikulo ang madamo nga paagi nga mapakita naton ang aton pagpasalamat kay Jehova.

4. Ano ang isa ka paagi nga mapasalamatan naton si Jehova bangod may maayo kita nga kaangtanan sa iya, kag ano ang ginhimo ni Jesus nga kaanggid man sa sini?

⁴ Mapasalamatan naton si Jehova kon idedikar naton ang aton kabuhi sa iya. Paagi sa pagpabawtismo sa tubig, mapakita naton sa publiko nga ginabaton naton nga si Jehova ang nagapanag-iya sa aton kag kinabubut-on kita nga magapasakop sa iya. (Heb. 12:9) Kaanggid man sa sini ang ginhimo ni Jesus. Sang ginbawtismuhan sia, daw pareho lang nga nagsiling sia kay Jehova: “Ang paghimo sang imo kabubut-on, O Dios ko, amo ang akon handum.” (Sal. 40:7, 8, footnote) Ginpakita ni Jesus nga gusto niya nga himuon ang kabubut-on ni Jehova, bisan pa ginbun-ag sia sa isa ka pungsod nga nadedikar sa Dios.

5, 6. (a) Ano ang ginbatyag ni Jehova sang nagpabawtismo si Jesus? (b) Ngaa nalipay si Jehova sa aton dedikasyon bisan pa ginapanag-iyahan na niya kita? Iilustrar.

⁵ Ano ang ginbatyag ni Jehova sang nagpabawtismo si Jesus? Ang Biblia nagasiling: “Pagkatapos mabawtismuhan si Jesus, nagtakas sia gilayon sa tubig; kag ang langit nabuksan, kag nakita niya ang espiritu sang Dios nga nagapanaug kaangay sang salampati kag nagkunsad sa iya. Kag may nabatian nga tingog halin sa langit nga nagasiling: ‘Ini ang akon Anak, ang hinigugma, nga ginakahamut-an ko.’” (Mat. 3:16, 17) Si Jehova ang nagapanag-iya kay Jesus. Pero nalipay si Jehova sang makita niya ang kahanda sang iya Anak nga himuon ang Iya gid lang kabubut-on. Nalipay man si Jehova sa pagbaton sang aton dedikasyon, kag pakamaayuhon niya kita.—Sal. 149:4.

⁶ Sa pag-ilustrar, imadyina ang isa ka tawo nga nagtanom sing madamo nga bulak sa iya hardin. Isa ka adlaw, ang iya gamay nga bata nagpuksi sing isa ka bulak kag ginhatag ini sa iya. Indi bala nga ang amay amo ang tag-iya sang bulak? Paano mahatag sang bata sa iya amay ang isa ka butang nga ginapanag-iyahan man sang iya amay? Indi gid paghunahunaon sang isa ka mahigugmaon nga amay ini nga mga pamangkot. Sa baylo, nalipay gid sia sa regalo sang iya bata bangod ginapakita sini nga palangga sia sang iya bata. Mas pabaloran gid niya ang isa ka bulak nga ginhatag sang iya bata sangsa iban pa nga bulak sa hardin. Sing kaanggid, nalipay gid si Jehova sang nagdedikar kita sa iya.—Ex. 34:14.

7. Ano ang ginsiling ni Malaquias parte sa ginabatyag ni Jehova sa mga handa mag-alagad sa iya?

⁷ Basaha ang Malaquias 3:16. Kon wala ka pa nakadedikar kag nakapabawtismo, binagbinaga ang importansia sini. Matuod, si Jehova na ang nagapanag-iya sa imo sugod sang nagluntad ka. Pero, hunahunaa ang kalipay ni Jehova kon batunon mo sia bilang imo Manuggahom, kag idedikar mo ang imo kabuhi sa iya kag himuon ang iya kabubut-on. (Hulu. 23:15) Ginakilala ni Jehova ang mga handa mag-alagad sa iya, kag ginasulat niya sa ‘isa ka libro ang mga ngalan sang iya ginadumdom.’

8, 9. Ano ang ginapatuman ni Jehova sa iya katawhan nga ang mga ngalan nakasulat sa libro sang mga ginadumdom niya?

 ⁸ Kon gusto naton nga magpabilin ang aton ngalan sa libro sang mga ginadumdom ni Jehova, may dapat kita himuon. Nagsiling si Malaquias nga dapat kita ‘magkahadlok kay Jehova kag pamalandungan naton ang iya ngalan.’ Kon magsimba kita sa iban nga persona ukon butang, panason ang aton ngalan sa libro sang kabuhi ni Jehova.—Ex. 32:33; Sal. 69:28.

⁹ Gani, indi bastante ang pagpromisa nga himuon ang kabubut-on ni Jehova kag pagpabawtismo sa tubig. Isa ka bes lang naton ini ginhimo, pero ang pagsimba kay Jehova dapat padayon nga makita sa aton pagkabuhi. Adlaw-adlaw, samtang nagakabuhi kita, dapat naton ipakita sa aton mga ginahimo nga ginatuman naton si Jehova.—1 Ped. 4:1, 2.

10. Ano nga kinatuhayan ang dapat makita sa mga nagaalagad kay Jehova kag sa mga wala nagaalagad sa iya?

¹⁰ Sa nagligad nga artikulo, ginbinagbinag ang kasaysayan ni Cain, ni Solomon, kag sang mga Israelinhon. Tanan sila nagsiling nga ginasimba nila si Jehova, pero indi bug-os ang ila pagsimba sa iya. Maathag nga ginapakita sini nga mga halimbawa nga ang mga ginapanag-iyahan ni Jehova dapat mangin malig-on sa pagpangapin sa pagkamatarong kag sa pagpamatok sa kalautan. (Roma 12:9) Nagakaigo gid nga sang ginsambit ni Malaquias ang libro nga may mga ngalan sang ginadumdom sang Dios, nagsiling man si Jehova parte sa “kinatuhayan sang matarong kag sang malaut, sang isa nga nagaalagad sa Dios kag sang isa nga wala nagaalagad sa iya.”—Mal. 3:18.

11. Ngaa dapat mangin maathag sa iban nga si Jehova lang ang aton ginasimba?

¹¹ Ari ang isa pa ka paagi nga mapasalamatan naton si Jehova sa pagpili niya sa aton bilang iya katawhan. Ang aton pag-uswag sa espirituwal dapat “makita sang tanan.” (1 Tim. 4:15; Mat. 5:16) Pamangkuta ang imo kaugalingon: ‘Makita gid bala sang iban nga mainunungon ako kay Jehova? Ginapabugal ko bala nga isa ako ka Saksi ni Jehova?’ Masubuan gid si Jehova kon nahuya kita nga isugid sa iban nga sia ang nagapanag-iya  sa aton.—Sal. 119:46; basaha ang Marcos 8:38.

12, 13. Ngaa ang iban daw indi makilala nga Saksi ni Jehova gali sila?

¹² Makapasubo nga may pila nga nagasunod sa “espiritu sang kalibutan” gani indi maathag kon bala nagaalagad sila sa Dios ukon wala. (1 Cor. 2:12) Ini nga espiritu nagapabaskog sang ‘mga handum sang unod.’ (Efe. 2:3) Halimbawa, bisan pa sang madamo nga laygay parte sa pamayo kag pamustura, ginapili gihapon sang iban ang estilo nga indi maugdang. Nagasuksok sila sing pikit, malip-ot, kag silangon, bisan sa Cristianong mga pagtilipon. Ukon ang estilo sang ila buhok kag gunting indi nagakaigo. (1 Tim. 2:9, 10) Gani kon upod nila ang iban, daw indi maathag kon bala Saksi ni Jehova sila ukon “abyan [sila] sang kalibutan.”—Sant. 4:4.

¹³ May pila ka Saksi nga ginailog gihapon ang paggawi sang kalibutan. Sa mga paglingawlingaw, ang ila pagsaot kag mga ginahimo indi nagakaigo sa isa ka Cristiano. Makita sa ila gina-post nga mga piktyur kag mga komento sa social media ang panghunahuna sang kalibutan. Mahimo nga wala sila gindisiplina sa Cristianong kongregasyon bangod wala sila nakahimo sing serioso nga sala, pero indi sila maayo nga impluwensia sa mga kauturan nga nagatinguha nga ipakita ang maayo nga paggawi bilang katawhan ni Jehova.—Basaha ang 1 Pedro 2:11, 12.

14. Ano ang dapat naton himuon para maamligan ang aton kaangtanan kay Jehova?

¹⁴ Ginapasanyog sang kalibutan “ang kailigbon sang unod kag ang kailigbon sang mga mata kag ang pagpadayawdayaw sang palangabuhian sang isa.” (1 Juan 2:16) Pero, bangod iya kita ni Jehova, ginalaygayan kita nga “sikwayon ang pagkadidiosnon kag kalibutanon nga mga kailigbon kag magkabuhi nga may maligdong nga hunahuna kag pagkamatarong kag diosnon nga debosyon sa tunga sining karon nga sistema sang mga butang.” (Tito 2:12) Dapat mangin maathag sa iban paagi sa tanan naton nga ginahimo, lakip ang aton panghambal, batasan sa pagkaon kag pag-inom, pamayo kag pamustura, kag pagtrabaho, nga si Jehova lang ang aton ginasimba.—Basaha ang 1 Corinto 10:31, 32.

15. Ngaa dapat naton pakitaan sing kaayo kag gugma ang aton mga kauturan?

¹⁵ Mapakita naton ang aton pagpabalor sa aton pagpakig-abyan kay Jehova paagi sa maayo nga pagtratar sa aton mga kauturan. Ginapanag-iyahan man sila ni Jehova. Kon dumdumon naton ini, pirme naton sila pakitaan sing kaayo kag gugma. (1 Tes. 5:15) Ginsilingan ni Jesus ang iya mga sumulunod: “Paagi sini mahibaluan sang tanan nga mga disipulo ko kamo, kon nagahigugmaanay kamo.”—Juan 13:35.

16. Ano nga halimbawa sa Mosaikong Kasuguan ang nagapakita sang pagpabalor ni Jehova sa iya katawhan?

¹⁶ Para iilustrar kon paano naton dapat trataron ang kada isa sa kongregasyon, binagbinaga ini nga halimbawa. Ang mga kagamitan sa templo ni Jehova gindedikar, ukon ginpain, para gamiton sa putli nga pagsimba. Gin-athag sa Mosaikong Kasuguan kon paano halungan ini nga mga kagamitan, kag patyon ang mga indi magsunod sa sini. (Num. 1:50, 51) Kon ginapabaloran ni Jehova ining wala sing kabuhi nga mga kagamitan nga ginagamit sa pagsimba sa iya, indi bala nga mas pabaloran niya ang iya matutom nga mga sumilimba nga ginpili niya nga mangin iya katawhan? Ginsilingan sadto ni Jehova ang iya katawhan: “Ang nagatandog sa inyo nagatandog sa tawotawo sang akon mata.”—Zac. 2:8.

17. Ano ang ginapamatian sing maayo ni Jehova?

¹⁷ Nagsiling si Malaquias nga “nagapamati sing maayo” si Jehova sa mga paghambalanay sang Iya katawhan. (Mal. 3:16) Gani, “kilala ni Jehova ang mga ginapanag-iyahan niya.” (2 Tim. 2:19) Nahibaluan gid niya ang tanan naton nga ginahimo kag ginahambal. (Heb. 4:13) Kon wala naton ginatratar sing maayo ang aton mga kauturan, “nagapamati sing maayo” si Jehova. Kon maabiabihon, maalwan, mapinatawaron, kag mainayuhon kita sa kada isa, makasigurado kita nga nakita man ini ni Jehova.—Heb. 13:16; 1 Ped. 4:8, 9.

18. Paano naton mapakita ang aton pagpasalamat nga bahin kita sang katawhan ni Jehova?

¹⁸ Gusto gid naton ipakita kay Jehova nga nagapasalamat kita nga mangin bahin sang iya katawhan. Nahibaluan naton nga sang kinabubut-on kita nga nagdedikar sa iya, amo ini ang pinakamaayo nga desisyon. Bisan pa nagakabuhi kita “sa tunga sang tiko kag balingag nga kaliwatan,” gusto naton makita sang mga tawo nga “wala [kita] sing kasawayan kag putli, . . . nagasiga [kita] subong mga suga sa kalibutan.” (Fil. 2:15) Ginadumtan naton ang malain. (Sant. 4:7) Kag ginapalangga naton kag ginarespeto ang aton mga kauturan bangod ginapanag-iyahan man sila ni Jehova.—Roma 12:10.

19. Paano ginapadyaan ni Jehova ang mga ginapanag-iyahan niya?

¹⁹ Ang Biblia nagpromisa: “Indi pagsikwayon ni Jehova ang iya katawhan.” (Sal. 94:14) Masaligan gid ini bisan pa makaeksperiensia kita sang mga kabudlayan. Bisan ang kamatayon indi makapugong sa gugma ni Jehova sa aton. (Roma 8:38, 39) “Kon kita nagakabuhi, nagakabuhi kita para kay Jehova, kag kon kita mapatay, mapatay kita para kay Jehova. Gani kon kita nagakabuhi kag kon kita mapatay, kita iya ni Jehova.” (Roma 14:8) Nalangkag na gid kita sa tion nga banhawon ni Jehova ang tanan niya nga matutom nga abyan nga napatay. (Mat. 22:32) Pero bisan subong, madamo kita sing pagpakamaayo. Ang Biblia nagasiling: “Malipayon ang pungsod nga ang Dios amo si Jehova, ang katawhan nga iya ginpili nga panag-iyahan.”—Sal. 33:12.