1. Ngaa dapat naton handaan ang paghingabot?

SANG gab-i antes ginpatay ang aton Ginuo nga si Jesus, nagsiling sia nga ang tanan niya nga disipulo pagadumtan sang kalibutan. (Juan 17:14) Halin sadto asta subong, ang matutom nga Cristiano nga mga Saksi ni Jehova ginhingabot sang mga tawo nga wala nagasimba sa iya. (2 Tim. 3:12) Samtang malapit na matapos ini nga sistema, mas labi pa gid kita nga pamatukan sang aton mga kaaway.—Mat. 24:9.

2-3. (a) Ano ang matabo kon mahadlok kita? (b) Ano ang binagbinagon naton sa sini nga artikulo?

² Paano kita magahanda subong para mabatas naton ang paghingabot? Indi kinahanglan nga imadyinon naton ang tanan nga malain nga mahimo matabo sa aton. Kon amo ini ang pensaron naton, mahadlok lang kita kag mabalaka. Basi mag-untat na kita sa pag-alagad kay Jehova antes pa mag-abot ang mga problema. (Hulu. 12:25; 17:22) Gusto gid sang aton “kaaway, ang Yawa,” nga mahadlok kita. (1 Ped. 5:8, 9) Ano ang himuon naton subong para mabatas naton ang paghingabot sa ulihi?

³ Sa sini nga artikulo, binagbinagon naton kon paano naton pabakuron ang aton kaangtanan kay Jehova kag kon ngaa dapat gid naton ini himuon subong. Binagbinagon man naton kon paano kita mangin maisog pa gid kag kon ano ang aton himuon kon dumtan kita sang mga tawo.

4. Suno sa Hebreo 13:5, 6, ano ang indi naton dapat pagduhaduhaan, kag ngaa?

⁴ Indi gid magduhaduha nga palangga ka ni Jehova kag indi ka gid niya pagpabay-an. (Basaha ang Hebreo 13:5, 6.) Ang madugay na nga isyu sang The Watchtower nagsiling: “Kon kilala gid  sang isa ka tawo ang Dios, indi gid madula ang iya pagsalig sa Dios bisan pa may paghingabot.” Matuod gid ini! Para mabatas naton ang paghingabot, dapat naton higugmaon si Jehova kag magsalig kita sa iya sing bug-os, kag indi kita dapat magduhaduha nga palangga niya kita.—Mat. 22:36-38; Sant. 5:11.

5. Ano ang makabulig para mabatyagan mo nga palangga ka ni Jehova?

⁵ Basaha ang Biblia kada adlaw para mangin suod ka pa gid kay Jehova. (Sant. 4:8) Samtang nagabasa ka, pamensara ang dalayawon nga mga kinaiya ni Jehova. Mabatyagan mo nga palangga ka gid niya samtang ginabasa mo ang iya mga ginasiling kag ginahimo. (Ex. 34:6) Pero may pila nga daw indi makapati nga palangga sila sang Dios bangod wala pa gid nila mabatyagan nga may nagpalangga sa ila. Kon isa ka sa ila, tilawi nga isulat kada adlaw ang ginapakita ni Jehova nga kaluoy kag kaayo sa imo. (Sal. 78:38, 39; Roma 8:32) Kon pamensaron mo ang nagakatabo sa imo mismo kabuhi kag kon pamalandungan mo ang ginabasa mo sa Pulong sang Dios, posible gid nga madamo ka sang masulat nga ginahimo ni Jehova para sa imo. Kon pasalamatan mo gid ang tanan nga ginahimo ni Jehova, mangin mabakod pa gid ang imo kaangtanan sa iya.—Sal. 116:1, 2.

6. Suno sa Salmo 94:17-19, paano makabulig sa imo ang tinagipusuon nga pangamuyo?

⁶ Pirme mangamuyo. Imadyina ang isa ka bata nga ginahakos sang iya amay. Nabatyagan niya nga palangga sia kag naamligan, gani ginasugid niya sa iya amay ang tanan nga natabo sa iya sa bilog nga adlaw, maayo man ini ukon malain. Mangin pareho man sini kasuod ang imo kaangtanan kay Jehova kon tinagipusuon ka nga mangamuyo sa iya kada adlaw. (Basaha ang Salmo 94:17-19.) Kon nagapangamuyo ka kay Jehova, “ibubo ang imo balatyagon . . . kaangay sang tubig” kag isugid sa imo mahigugmaon nga Amay ang tanan mo nga ginakahadlukan kag ginakabalak-an. (Pan. 2:19) Kon himuon mo ini, mabatyagan mo ang ginasiling sang Biblia nga “paghidait sang Dios nga labaw sa tanan nga paghangop.” (Fil. 4:6, 7) Kon pirme ka mangamuyo sing tinagipusuon, mangin suod ka pa gid kay Jehova.—Roma 8:38, 39.

7. Ngaa indi ka dapat magduhaduha nga matuman ang mga ginpromisa sang Dios parte sa iya Ginharian?

⁷ Indi gid magduhaduha nga matuman ang ginpromisa nga mga pagpakamaayo sang Ginharian sang Dios. (Num. 23:19) Kon nagaduhaduha ka sa sini, madali ka pahadlukon ni Satanas kag sang mga nagasunod sa iya. (Hulu. 24:10; Heb. 2:15) Paano mo mapabakod ang imo pagsalig sa Ginharian sang Dios subong? Tun-i sing maayo ang mga ginpromisa sang Dios parte sa iya Ginharian kag ang mga rason nga makasalig ka nga matuman gid ini. Paano ini makabulig sa imo? Binagbinaga ang natabo kay Stanley Jones, nga napriso sing pito ka tuig bangod sang iya pagtuo. * Ano ang nakabulig sa iya nga mangin matutom kag magbatas?  Nagsiling sia: “Mabakod ang akon pagtuo bangod sang akon nabal-an parte sa Ginharian sang Dios kag sa pagahimuon sini, kag wala gid ako nagduhaduha. Gani wala gid ako magbiya kay Jehova.” Kon nagatuo ka gid sa mga ginpromisa sang Dios, mangin suod ka pa gid kay Jehova, indi ka mahadlok, kag indi ka mag-untat sa pag-alagad sa iya.—Hulu. 3:25, 26.

8. Ano ang mabal-an naton parte sa aton kaugalingon kon hibaluon naton ang aton pagtamod sa pagtambong sa mga miting? Ipaathag.

⁸ Pirme magtambong sa Cristianong mga miting. Nagasuod pa gid kita kay Jehova paagi sa aton mga miting. Ang aton pagtamod sa pagtambong sa mga miting subong makabulig para mabal-an naton kon bala mabatas naton ang paghingabot sa ulihi. (Heb. 10:24, 25) Ngaa masiling naton ini? Kon subong pa lang indi na kita magtambong sa mga miting bangod sang gagmay nga mga problema, ano ayhan ang matabo kon delikado na nga magtipon upod sa aton mga kauturan sa ulihi? Pero kon determinado kita nga magtambong sa mga miting, indi gid kita mag-untat bisan pa dumilian kita nga magtipon sang mga nagapamatok sa aton. Subong na ang tion nga pabaloran naton ang aton mga miting. Kon gusto gid naton magtambong sa mga miting, indi gid kita mapunggan sang mga nagapamatok ukon sang kasuguan sang gobierno. Tumanon gid naton ang Dios sa baylo sang mga tawo.—Binu. 5:29.

9. Ngaa makabulig ang pagsaulo sang mga teksto para mahandaan naton ang paghingabot?

⁹ Sauluha ang paborito mo nga mga teksto. (Mat. 13:52) Indi perpekto ang aton memorya, pero puede gamiton ni Jehova ang iya balaan nga espiritu para madumduman naton ini nga mga teksto. (Juan 14:26) Ang isa ka utod nga ginpriso kag ginbartolina sa East Germany nagsiling: “Nalipay gid ako kay may nasaulo na ako nga ginatos ka teksto antes pa ako napriso! Bisan pa nagaisahanon ako, napamalandungan ko ang madamo nga topiko sa Biblia.” Nakabulig ini sa aton utod nga mangin suod gihapon kay Jehova, mangin matutom, kag magbatas.

10. Ngaa dapat kita magsaulo sang mga ambahanon?

¹⁰ Sauluha kag kantaha ang mga ambahanon nga nagadayaw kay Jehova. Sang ginpriso sanday Pablo kag Silas sa Filipos, ginkanta nila ang nasaulo nila nga mga ambahanon nga nagadayaw kay Jehova. (Binu. 16:25) Sang gintapok sa Siberia ang aton mga kauturan sa Soviet Union sang una, paano nila ginpabakod ang ila kaugalingon? Si Sister Mariya Fedun nagsiling: “Ginkanta namon ang tanan nga ambahanon nga amon nabal-an sa songbook.” Nagsiling man  sia nga napalig-on sila tanan bangod sini nga mga ambahanon kag nangin suod pa gid sila kay Jehova. Mabatyagan mo man bala nga nagabakod ka kon ginakanta mo ang paborito mo nga mga ambahanon sa aton songbook kag website? Maayo gid kon masaulo mo na subong ini nga mga ambahanon!—Tan-awa ang kahon nga “ Hatagi ’Ko Kaisog.”

11-12. (a) Suno sa 1 Samuel 17:37, 45-47, ngaa maisog gid si David? (b) Ano ang matun-an naton kay David?

¹¹ Kinahanglan naton ang kaisog para mabatas naton ang paghingabot. Kon pamatyag mo wala ka sing kaisog, ano ang himuon mo? Dumduma nga ang matuod nga kaisog wala nagadepende sa kadakuon, kusog, ukon ikasarang sang isa. Binagbinaga ang halimbawa sang pamatan-on nga si David sang ginbatuan niya ang higante nga si Goliat. Mas daku si Goliat kay David, mas makusog, kag kompleto sing armas. Wala gani sing espada si David. Pero maisog gid sia. Dalidali sia nga nagdalagan para batuan ang tikalon nga higante.

¹² Ngaa maisog gid si David? Sigurado sia nga kaupod niya si Jehova. (Basaha ang 1 Samuel 17:37, 45-47.) Wala ginpamensar ni David nga kadaku gid kay Goliat kon ikumparar sa iya. Ginpensar niya nga kagamay gid kay Goliat kon ikumparar kay Jehova. Ano ang matun-an naton sa sini? Mangin maisog kita kon magsalig kita nga kaupod naton si Jehova kag kon pensaron naton nga kagamay gid sang mga nagapamatok sa aton kon ikumparar sa Labing Gamhanan nga Dios. (2 Cron. 20:15; Sal. 16:8) Paano kita mangin maisog pa gid subong antes mag-abot ang paghingabot?

13. Paano kita mangin maisog pa gid? Ipaathag.

¹³ Mangin maisog pa gid kita subong kon ibantala naton ang maayong balita sang Ginharian sang Dios. Ngaa? Bangod kon nagabantala kita, mapalig-on kita nga magsalig kay Jehova kag indi mahadlok sa tawo. (Hulu. 29:25) Pareho sang aton lawas nga nagabakod kon nagaehersisyo kita, mangin maisog pa gid kita kon nagabantala kita sa mga pamalay, sa pangpubliko nga mga lugar, sing indi pormal, kag sa mga lugar sang negosyo. Kon maisog kita nga nagabantala subong, padayon kita nga magabantala bisan pa dumilian ini sang gobierno sa ulihi.—1 Tes. 2:1, 2.

14-15. Ano ang matun-an naton kanday Nancy Yuen kag Valentina Garnovskaya?

¹⁴ May matun-an gid kita sa ginpakita nga kaisog sang aton duha ka matutom nga utod. Ang isa amo si Nancy Yuen. Mga isa ka metro kag  tunga lang ang iya kataason, pero maisog sia. * Wala gid sia mag-untat sa pagbantala sang maayong balita sang Ginharian sang Dios. Bangod sini, ginpriso sia sing sobra 20 ka tuig sa Komunista nga China. Ang mga opisyal nga nag-interogar sa iya nagsiling nga sia ang “pinakabatinggilan” sa ila pungsod!

¹⁵ Sa Soviet Union sang una, ginpriso man si Valentina Garnovskaya sing tatlo ka beses kag sing 21 ka tuig. * Ngaa? Determinado gid sia nga indi mag-untat sa pagbantala amo nga gintawag sia sang mga opisyal nga “makatalagam gid nga kriminal.” Ngaa maisog gid ining duha ka matutom nga babayi? Bangod nagsalig gid sila nga kaupod nila si Jehova.

16. Ano ang dapat naton himuon para mangin maisog gid kita?

¹⁶ Nabinagbinag naton nga para mangin maisog pa gid kita, indi kita dapat magsalig sa aton kusog kag mga ikasarang. Dapat kita magsalig nga kaupod naton si Jehova kag sia ang nagapakig-away para sa aton. (Deut. 1:29, 30; Zac. 4:6) Amo ini ang dapat naton himuon para mangin maisog gid kita.

17-18. Suno sa Juan 15:18-21, ano ang ginpaandam ni Jesus sa aton? Ipaathag.

¹⁷ Gusto naton nga respetuhon kita sang iban, pero indi naton paghunahunaon nga wala na kita sing pulos kon pakalainon nila kita. Nagsiling si Jesus: “Malipayon kamo kon ginadumtan kamo sang mga tawo, kag kon ginasikway nila kamo, ginapakahuy-an, kag ginapakamalaut ang inyo ngalan tungod sa Anak sang tawo.” (Luc. 6:22) Ano ang buot silingon ni Jesus?

¹⁸ Indi buot silingon ni Jesus nga gusto sang mga Cristiano nga dumtan sila sang iban. Ginpaandaman niya kita sang posible nga matabo sa aton. Indi kita bahin sang kalibutan. Ginasunod naton ang mga gintudlo ni Jesus kag ginabantala naton ang mensahe nga ginbantala niya. Gani ginadumtan kita sang kalibutan. (Basaha ang Juan 15:18-21.) Gusto naton pahamut-an si Jehova. Gani kon dumtan  kita sang iban bangod palangga naton ang aton Amay, indi kita dapat maluyahan sing buot.

19. Paano naton mailog ang mga apostoles?

¹⁹ Indi gid kita mahuya nga mga Saksi kita ni Jehova bangod lang sang ginasiling ukon ginahimo sang mga tawo. (Miq. 4:5) Madula ang aton kahadlok sa tawo kon pamensaron naton ang ginhimo sang mga apostoles sa Jerusalem sa tapos nga ginpatay si Jesus. Kabalo sila nga ginadumtan gid sila sang Judiyo nga mga lider sang relihion. (Binu. 5:17, 18, 27, 28) Pero wala sila mag-untat sa pagkadto sa templo kada adlaw kag nagpakilala sila nga mga disipulo sila ni Jesus paagi sa pagbantala. (Binu. 5:42) Wala sila nahadlok. Madula man ang aton kahadlok sa tawo kon pirme kita magpakilala nga mga Saksi kita ni Jehova sa aton ginaubrahan, eskwelahan, kag sa lugar nga aton ginaistaran.—Binu. 4:29; Roma 1:16.

20. Ngaa malipayon ang mga apostoles bisan pa ginadumtan sila sang iban?

²⁰ Ngaa malipayon ang mga apostoles? Kabalo sila kon ngaa ginadumtan sila sang iban, kag ginkabig nila nga kadungganan kon hingabuton sila sa paghimo sang kabubut-on ni Jehova. (Luc. 6:23; Binu. 5:41) Nagsulat sang ulihi si apostol Pedro: “Kon mag-antos gid man kamo tungod sa pagkamatarong, mangin malipayon kamo.” (1 Ped. 2:19-21; 3:14) Kon nahangpan naton nga ginadumtan kita sang iban bangod nagahimo kita sang maayo, indi kita mahadlok nga dumtan kita sang mga tawo kag indi kita mag-untat sa pag-alagad kay Jehova.

21-22. (a) Paano mo mahandaan ang paghingabot? (b) Ano ang binagbinagon naton sa masunod nga artikulo?

²¹ Wala kita kabalo kon san-o kita hingabuton ukon san-o dumilian sang gobierno ang aton pagsimba kay Jehova. Pero mahandaan naton ini subong kon pabakuron naton ang aton kaangtanan kay Jehova, kon mangin maisog pa gid kita, kag kon hibaluon naton ang aton himuon kon dumtan kita sang mga tawo. Kon handa kita subong, padayon kita nga magaalagad kay Jehova sa palaabuton.

²² Pero ano abi kon dumilian na sang gobierno ang aton pagsimba? Sa masunod nga artikulo, binagbinagon naton ang mga prinsipio sa Biblia nga makabulig sa aton nga magpadayon sa pag-alagad kay Jehova bisan pa dumilian ini.