1-2. (a) Suno sa sugo ni Jesus sa Mateo 28:18-20, ano ang panguna nga responsibilidad sang Cristianong kongregasyon? (b) Ano nga mga pamangkot ang binagbinagon naton sa sini nga artikulo?

NALIPAY gid ang mga apostoles sang nagtipon sila sa kilid sang bukid. Sa tapos mabanhaw si Jesus, ginpakadto niya sila sa sini nga lugar para makigkita sa iya. (Mat. 28:16) Mahimo nga amo ini ang tion nga “nagpakita sia sa kapin sa 500 ka kauturan sa isa ka higayon.” (1 Cor. 15:6) Ngaa ginpakadto ni Jesus ang iya mga disipulo sa sini nga pagtilipon? Para ihatag sa ila ini nga sugo: “Kadtui ninyo ang mga tawo sa tanan nga pungsod kag tudlui ninyo sila agod mangin disipulo ko.”—Basaha ang Mateo 28:18-20.

² Ang mga disipulo nga nakabati sang ginsiling ni Jesus nangin bahin sang Cristianong kongregasyon sang unang siglo. Ang panguna nga responsibilidad sini nga kongregasyon amo ang pagtudlo sa madamo pa nga tawo nga mangin disipulo sang Cristo. * Subong, may linibo na ka kongregasyon sang matuod nga mga Cristiano sa bilog nga kalibutan, kag wala magbag-o ang ila panguna nga responsibilidad. Sa sini nga artikulo, binagbinagon naton ang apat ka pamangkot: Ngaa importante gid ang pagtudlo sa mga tawo nga mangin disipulo? Ano ang mga dapat himuon para matudluan sila? Makabulig bala ang tanan nga Cristiano sa pagtudlo sa mga tawo nga mangin  disipulo? Kag ngaa dapat kita mangin mapinasensiahon sa pagtudlo?

3. Suno sa Juan 14:6 kag 17:3, ngaa importante gid ang pagtudlo sa mga tawo nga mangin disipulo?

³ Ngaa importante gid ang pagtudlo sa mga tawo nga mangin disipulo? Bangod ang mga disipulo lang sang Cristo ang puede mangin abyan sang Dios. Isa pa, ang mga nagasunod sa Cristo may malipayon nga kabuhi subong kag may paglaum nga mabuhi sing wala sing katapusan sa palaabuton. (Basaha ang Juan 14:6; 17:3.) Gani isa gid ka importante nga responsibilidad ang ginhatag ni Jesus sa aton, pero indi lang kita ang magahimo sini. Nagsulat si apostol Pablo parte sa iya kaugalingon kag sa iya suod nga mga kaupod: “Kami mga masigkamanugpangabudlay sang Dios.” (1 Cor. 3:9) Isa gid ini ka pribilehiyo nga ginhatag ni Jehova kag sang Cristo sa indi perpekto nga mga tawo!

4. Ano ang matun-an naton kanday Ivan kag Matilde?

⁴ Makalilipay gid ang pagtudlo sa mga tawo. Binagbinaga ang mag-asawa nga sanday Ivan kag Matilde sa Colombia. Nabantalaan nila ang pamatan-on nga si Davier nga nagsiling sa ila: “Gusto ko magbag-o, pero indi ko ini masarangan himuon.” Si Davier isa ka boksingero. Nagadroga sia, palahubog, kag naga-live-in sila sang iya nobya nga si Erika. Si Ivan nagsiling: “Ginbisitahan namon sia para tun-an ang Biblia. Malayo gid ang ila baryo, gani nagabisikleta kami sing pila ka oras nga nagaagi sa lunangon nga mga dalan. Sang nakita ni Erika nga nagbag-o ang batasan kag panimuot ni Davier, nag-upod man sia sa pagtuon sang Biblia.” Sang ulihi, nag-untat si Davier sa pagdroga, pagpahubog, kag pagboksing. Nagpakasal man sila ni Erika. Si Matilde nagsiling: “Sang nagpabawtismo sanday Davier kag Erika sang 2016, nadumduman namon ang ginsiling ni Davier sang una, ‘Gusto ko magbag-o, pero indi ko ini masarangan himuon.’ Naghibi gid kami sa grabe nga kalipay.” Sigurado nga malipay gid kita kon ginabuligan naton ang mga tawo nga mangin disipulo sang Cristo.

5. Ano ang una nga dapat naton himuon para matudluan ang mga tawo?

⁵ Una, dapat naton ‘pangitaon’ ang mga tawo nga gusto magtuon parte kay Jehova. (Mat. 10:11) Mga Saksi gid kita ni Jehova kon ginapanaksihan naton ang tanan sa aton teritoryo. Kag matuod kita nga mga Cristiano kon ginatuman naton ang sugo sang Cristo nga magbantala.

6. Ano ang himuon naton para pamatian kita sang mga tawo?

⁶ May pila ka tawo nga gusto magtuon sang kamatuoran sa Biblia, pero madamo ang daw wala nagasapak sa primero. Mahimo nga dapat naton sila palig-unon para magustuhan man nila ang pagtuon. Para pamatian kita sang mga tawo, dapat kita maghanda sing maayo. Magpili sang mga topiko nga posible nga magustuhan sang imo maistorya. Dayon maghanda sing introduksion para sa kada isa sini nga mga topiko.

7. Ano ang puede mo isiling sa isa ka tawo, kag ngaa dapat mo sia pamatian kag respetuhon?

⁷ Halimbawa, puede mo isiling sa tagbalay: “May ipamangkot lang ako tani sa imo. Siguro natalupangdan mo man nga madamo sa aton problema subong ang problema man sa bilog nga kalibutan. Sa banta mo masolbar ayhan ini nga mga problema kon may isa lang ka gobierno sa bilog nga kalibutan?” Dayon puede mo binagbinagon ang Daniel 2:44. Ukon  puede mo ipamangkot sa isa ka tawo: “Para sa imo, paano naton matudluan ang mga bata sang maayo nga pamatasan?” Dayon binagbinaga ang Deuteronomio 6:6, 7. Ano man nga topiko ang imo pilion, hunahunaa ang mga tawo nga magapamati sa imo. Pamensara ang kaayuhan nga mabaton nila kon matun-an nila ang ginatudlo sang Biblia. Kon nagaistorya ka sa ila, dapat mo man sila pamatian kag respetuhon ang ila opinyon. Kon himuon mo ini, mahangpan mo sila, kag mahimo gid nga mamati sila sa imo.

8. Ngaa dapat padayon gid naton nga balikan ang mga interesado?

⁸ Mahimo nga dapat mo anay balikan sing madamo nga beses ang isa ka interesado antes sia magdesisyon nga magtuon sang Biblia. Ngaa? Kay basi pagbalik naton, wala sa balay ang mga tawo ukon masako sila. Isa pa, mahimo nga dapat mo anay balikan sing pila ka beses ang isa ka tagbalay para mapahamtang ang iya buot sa pagtuon sang Biblia. Dumduma nga magatubo gid ang tanom kon pirme ini bunyagan. Gani magatubo man ang gugma sang isa ka interesado para kay Jehova kag sa Cristo kon pirme naton ginasugid sa iya ang Pulong sang Dios.

9-10. Ngaa masiling naton nga makabulig ang tanan nga Cristiano para makita ang mga gusto mangin disipulo?

⁹ Makabulig ang tanan nga Cristiano para makita ang mga gusto mangin disipulo. Pareho ini sa pagpangita sa isa ka bata nga nadula. Paano? Binagbinaga ang natabo sa tatlo ka tuig nga bata nga nagtalang kag indi na katultol magpauli sa ila balay. Mga 500 ka tawo ang nagpangita sa iya. Pagligad sang mga 20 ka oras nga pangitaay, nakita sia sa kamaisan sang isa sa mga nagboluntaryo. Indi gusto sini nga tawo nga sia ang dayawon kay nakita niya  ang bata. Nagsiling sia: “Nakita ang bata bangod nagbuligay ang ginatos ka tawo.”

¹⁰ Madamo nga tawo ang pareho sini nga bata. Nabalaka gid sila. Wala sila sing paglaum, gani gusto nila nga may magbulig sa ila. (Efe. 2:12) Sobra kita walo ka milyon nga nagabuligay para makita sila. Basi wala ka pa sing nakita nga gusto magtuon sang Biblia. Pero basi ang iban nga manugbantala sa inyo teritoryo nakakita sang isa nga gusto magtuon sang kamatuoran sa Pulong sang Dios. Kon ang nabantalaan sang isa ka utod mangin disipulo sang Cristo sa ulihi, malipay gid ang tanan nga nagbulig sa pagpangita sa iya.

11. Kon wala ka pa sing ginatudluan sang Biblia subong, paano ka makabulig para mangin disipulo ang iban?

¹¹ Kon wala ka pa sing ginatudluan sang Biblia subong, may mabulig ka gihapon para mangin disipulo ang iban. Halimbawa, kon may makita ka nga interesado nga nagkadto sa Kingdom Hall, puede mo sia abiabihon kag buligan. Paagi sa pagpakita sing gugma sa iya, mahimo niya hunahunaon nga matuod kita nga mga Cristiano. (Juan 13:34, 35) Bisan pa malip-ot lang ang imo mga komento sa mga miting, mapalig-on sini ang mga bag-uhan nga magkomento man sing tinagipusuon kag matinahuron. Puede mo man maupdan sa ministeryo ang bag-o nga manugbantala kag mabuligan sia sa paggamit sang Kasulatan sa pagtudlo sa mga tawo. Kon himuon mo ini, ginatudluan mo sia nga ilugon ang Cristo.—Luc. 10:25-28.

12. Dapat bala may pinasahi gid kita nga ikasarang para matudluan naton ang iban nga mangin disipulo? Ipaathag.

¹² Indi naton paghunahunaon nga dapat may pinasahi gid kita nga ikasarang para matudluan naton ang iban nga mangin disipulo ni Jesus. Ngaa? Binagbinaga ang halimbawa ni Faustina nga taga-Bolivia. Sang una niya nga nakilala ang mga Saksi ni Jehova, indi sia kabalo magbasa. Subong, medyo kabalo na sia magbasa. Bawtismado na sia, kag gusto gid niya magtudlo sa iban. Kada semana, lima ang ginatudluan niya sang Biblia. Mas maayo magbasa ang kalabanan sang mga ginatudluan ni Faustina sangsa iya, pero anom na ang nabuligan niya nga magpabawtismo.—Luc. 10:21.

13. Bisan pa masako gid kita, ano nga mga pagpakamaayo ang mabaton naton kon tudluan naton ang iban nga mangin disipulo?

¹³ Madamo nga Cristiano ang masako gid sa ila mga responsibilidad. Pero ginahatagan gihapon nila sing tion ang pagtudlo sang Biblia sa iban, kag malipayon gid sila. Binagbinaga ang halimbawa ni Melanie nga taga-Alaska. Isa lang sia nga nagapadaku sa iya walo ka tuig nga bata nga babayi. May regular sia nga trabaho kag ginaatipan man niya ang iya  ginikanan nga may kanser. Sia lang ang Saksi sa ila malayo nga banwa. Bangod gusto gid niya makakita sang interesado nga matudluan niya sang Biblia, pirme sia nagapangamuyo nga hatagan sia sing kusog nga makabantala bisan pa matugnaw gid ang panahon. Nabantalaan niya si Sara, nga nalipay sang mabal-an niya ang ngalan sang Dios. Sang ulihi, gusto na ni Sara magtuon sang Biblia. Nagsiling si Melanie: “Kada Biernes sang gab-i, kapoy gid ako pero ginakadtuan gihapon namon sang akon bata si Sara para tudluan sia. May maayo gid ini nga resulta sa akon kag sa akon bata. Nanamian kami mag-research para masabat ang mga pamangkot ni Sara, kag nalipay gid kami nga nangin abyan man sia ni Jehova.” Bisan pa ginpamatukan si Sara, maisog niya ini nga ginbatas. Naghalin sia sa iya relihion kag nagpabawtismo.

14. (a) Ngaa pareho sa pagpangisda ang aton hilikuton? (b) Ano ang ginapalig-on sa imo sang ginsiling ni Pablo sa 2 Timoteo 4:1, 2?

¹⁴ Kon wala ka pa sing nakita nga gusto mangin disipulo, padayon lang nga magpangita. Nagsiling si Jesus nga pareho sa pagpangisda ang aton hilikuton. Mahimo nga madamo nga oras ang ginagamit sang mga mangingisda para may makuha sila nga isda. Masami nga nagapangisda sila sing gab-i na ukon sa kaagahon, kag kon kaisa nagapangisda sila sa malayo nga kadagatan. (Luc. 5:5) Gani madamo man nga oras ang ginagamit sang pila ka manugbantala sa pagpangita sa mga interesado, kag nagapangita sila sa lainlain nga tion kag lugar. Ngaa? Para mas madamo nga tawo ang maistorya nila. Bangod sang  ila pagpanikasog, masami sila makakita sang mga tawo nga interesado sa aton mensahe. Puede ka bala makabantala sa tion ukon sa lugar nga posible mas madamo ang imo maistorya?—Basaha ang 2 Timoteo 4:1, 2.

15. Ngaa dapat kita mangin mapinasensiahon kon nagatudlo sang Biblia?

¹⁵ Ngaa dapat kita mangin mapinasensiahon kon nagatudlo sang Biblia? Bangod dapat naton buligan ang nagatuon nga mabal-an kag pabaloran ang mga ginatudlo sang Biblia. Dapat man naton sia buligan nga makilala kag palanggaon si Jehova, ang Awtor sang Biblia. Kag dugang pa sa pagtudlo sa isa kon ano ang ginsugo ni Jesus sa iya mga disipulo, dapat man naton sia buligan kon paano niya ini matuman para mangin matuod nga Cristiano. Dapat kita mangin mapinasensiahon sa pagbulig sa iya samtang ginatinguhaan niya nga sundon ang mga prinsipio sa Biblia. Nabag-o sang iban ang ila panghunahuna kag batasan sa pila lang ka bulan, pero kinahanglan sang iban ang mas malawig nga tion para mahimo ini.

16. Ano ang natun-an mo sa natabo kay Raúl?

¹⁶ Maayo gid ang nangin resulta sang pagkamapinasensiahon sang isa ka misyonero sa Peru. Nagsiling sia: “Duha na ka libro ang gintun-an namon ni Raúl, nga ginatudluan ko sang Biblia. Pero nabudlayan sia gihapon sa pag-aplikar sang iya natun-an. Pirme lang magamo ang ila pag-asawahay, grabe sia magpamuyayaw, kag wala sia ginataha sang iya kabataan bangod sang iya malain nga batasan. Pero pirme sia nagakadto sa mga miting, gani padayon ko sia nga ginabisitahan para mabuligan sia kag ang iya pamilya. Pagligad sang sobra tatlo ka tuig sugod sang una ko sia nga naistorya, nakalipikar sia nga magpabawtismo.”

17. Ano ang binagbinagon naton sa masunod nga artikulo?

¹⁷ Ginsugo kita ni Jesus nga ‘kadtuan ang mga tawo sa tanan nga pungsod kag tudluan sila agod mangin disipulo niya.’ Para mahimo ini, nagaistorya kita sa mga tawo nga may lainlain nga ginapatihan. Ang iban sa ila wala sing relihion ukon wala nagapati nga may Dios. Binagbinagon sa masunod nga artikulo kon paano naton isugid ang maayong balita sa ila.