1. Ano ang ginsiling ni apostol Pablo parte sa iya kaugalingon?

NAGSILING si apostol Pablo nga naluyahan sia kon kaisa. Nagsiling sia nga “nagaluya” ang iya lawas, nabudlayan sia nga himuon ang husto, kag kon kaisa ang sabat ni Jehova sa iya pangamuyo indi amo ang iya ginapangabay. (2 Cor. 4:16; 12:7-9; Roma 7:21-23) Nagsiling man si Pablo nga para sa mga nagapamatok sa iya, kinaandan lang sia ukon maluya. * Pero wala sia magpaapekto sa malain nga ginasiling sang iban. Bisan pa may mga kaluyahon sia, wala sia maghunahuna nga wala sia sing pulos.—2 Cor. 10:10-12, 17, 18.

2. Suno sa 2 Corinto 12:9, 10, ano ang naeksperiensiahan ni Pablo?

² Naeksperiensiahan ni Pablo nga puede mangin mabakod ang isa ka tawo bisan pa naluyahan sia. (Basaha ang 2 Corinto 12:9, 10.) Ginsilingan ni Jehova si Pablo nga ang Iya gahom “mapakita sing bug-os sa kaluyahon,” buot silingon, hatagan ni Jehova si Pablo sang kinahanglan niya nga kusog. Tun-an anay naton kon ngaa indi kita dapat maluyahan kon ginainsulto kita sang mga nagapamatok sa aton.

3. Ngaa malipayon kita gihapon bisan pa ginainsulto kita?

³ Indi gid naton gusto nga insultuhon kita. Pero kon insultuhon kita sang mga nagapamatok sa aton kag magpaapekto kita sa ila mga ginasiling, mahimo nga magluya ang aton buot. (Hulu. 24:10) Gani paano naton dapat tamdon ang mga insulto  sang mga nagapamatok sa aton? Pareho kay Pablo, makabatyag man kita sang kalipay bisan pa ginainsulto kita. (2 Cor. 12:10) Ngaa? Bangod kon ginainsulto kita kag ginapamatukan sang mga tawo, nagapamatuod ini nga mga disipulo kita ni Jesus. (1 Ped. 4:14) Nagsiling si Jesus nga pagahingabuton ang iya mga sumulunod. (Juan 15:18-20) Naeksperiensiahan ini sang mga Cristiano sang unang siglo. Para sa mga naimpluwensiahan sang kultura sang mga Griego, ang mga Cristiano indi maalam kag maluya. Kag para sa mga Judiyo, ang mga Cristiano ‘ordinaryo lang nga mga tawo kag indi edukado,’ pareho sang pagkabig nila kay apostol Pedro kag kay apostol Juan. (Binu. 4:13) Madamo nga tawo ang nagahunahuna nga maluya ang mga Cristiano. Kay man, wala sila nagaentra sa pulitika, gani wala sing mabulig sa ila sa gobierno. Wala man sila nagasoldado, gani indi nila maproteksionan ang ila kaugalingon. Kag manubo gid ang pagtan-aw sa ila sang mga tawo.

4. Ano ang ginhimo sang mga Cristiano sang ginpakalain sila sang mga nagapamatok sa ila?

⁴ Nag-untat bala sa pag-alagad kay Jehova ang mga Cristiano sang unang siglo bangod ginpakalain sila sang mga nagapamatok sa ila? Wala. Halimbawa, para kay apostol Pedro kag kay apostol Juan, isa ka kadungganan nga hingabuton bangod sang pagsunod nila kay Jesus kag pagtudlo sa iban parte sa iya. (Binu. 4:18-21; 5:27-29, 40-42) Wala gid sing dapat ikahuya ang mga disipulo. Bisan pa ginapakanubo sang mga tawo ining mapainubuson nga mga Cristiano, mas madamo sila sang nabulig sa iban sangsa mga nagapamatok sa ila. Halimbawa, ang mga libro sa Biblia nga ginsulat sang pila sa sini nga mga Cristiano padayon nga nagapalig-on kag nagahatag sang paglaum sa minilyon ka tawo. Kag ang ginbantala nila nga Ginharian nagagahom na sa langit kag sa indi madugay gamhan na sini ang katawhan. (Mat. 24:14) Pero madugay na nga wala nagagahom ang emperyo sang Roma nga naghingabot sa mga Cristiano. Dugang pa, ining matutom nga mga Cristiano mga hari na sa langit. Pero ang mga nagpamatok sa ila patay na, kag kon banhawon gid man sila, magapasakop sila sa Ginharian nga ginbantala sang mga Cristiano nga ginkaugtan nila.—Bug. 5:10.

5. Suno sa Juan 15:19, ngaa ginapakanubo sang kalibutan ang katawhan ni Jehova?

⁵ Subong, bilang katawhan ni Jehova, ginapakanubo kita kon kaisa kag ginahikayan nga indi maalam kag maluya. Ngaa? Bangod wala naton ginasunod ang mga pamatasan sang mga tawo sa kalibutan. Ginatinguhaan naton nga mangin mapainubuson kag matinumanon. Pero mas ginadayaw sang mga tawo sa kalibutan ang mga bugalon kag wala nagatuman. Wala man kita nagaentra sa pulitika, kag wala kita nagasoldado sa pungsod nga ginaistaran naton ukon sa iban pa. Bangod lain kita sa mga tawo sa kalibutan, ginapakanubo nila kita.—Basaha ang Juan 15:19; Roma 12:2.

6. Ano ang dalayawon nga mga hilikuton nga ginahimo sang katawhan ni Jehova paagi sa iya bulig?

⁶ Bisan pa nga ginapakanubo kita sang kalibutan, ginagamit kita ni Jehova para maghimo sang dalayawon nga mga hilikuton. Ginpaposible niya ang pinakamasangkad nga pagbantala nga ginahimo subong. Ang iya mga alagad nagahimo sang mga magasin nga amo ang pinakamadamo nga na-translate kag napanagtag, kag ginagamit nila ang Biblia para buligan ang minilyon ka katawhan para mangin malipayon ang ila kabuhi. Si Jehova ang dapat padunggan sa sini, kay ginagamit niya ang mga tawo nga ginakabig sang kalibutan nga maluya para mahimo ini tanan. Pero mahimo man bala ini ni Jehova para sa kada isa sa aton? Mabuligan bala niya kita nga mangin mabakod? Ano ang dapat  naton himuon para buligan niya kita? Binagbinagon naton ang tatlo ka leksion nga matun-an naton sa halimbawa ni apostol Pablo.

7. Ano ang isa ka leksion nga matun-an naton sa halimbawa ni Pablo?

⁷ Amo ini ang isa ka leksion nga matun-an naton sa halimbawa ni Pablo: Indi magsalig sa imo kaugalingon nga kusog ukon ikasarang sa pag-alagad kay Jehova. May mapabugal si Pablo kag puede sia magsalig sa iya kaugalingon bangod sang iya kahimtangan sa kabuhi kag mga ikasarang. Nagdaku sia sa Tarso, ang kapital nga siudad sang isa ka probinsia sang Roma. Manggaranon ini nga siudad kag may bantog ini nga unibersidad. May tinun-an si Pablo, kag ang nagtudlo sa iya amo si Gamaliel, nga isa sa mga ginatahod gid nga lider sang mga Judiyo sadto. (Binu. 5:34; 22:3) Kag gintaha man si Pablo sang mga Judiyo. Nagsiling sia: “Nalabawan ko sa Judaismo ang madamo ko nga katubotubo sa akon pungsod.” (Gal. 1:13, 14; Binu. 26:4) Pero wala nagsalig si Pablo sa iya kaugalingon.

8. Suno sa Filipos 3:8, ano ang pagkabig ni Pablo sa mga butang nga iya ginbayaan, kag ngaa ‘nalipay sia sa iya mga kaluyahon’?

⁸ Wala nanugon si Pablo sang ginbayaan niya ang mga butang nga ginapabaloran gid sang kalibutan. Ang matuod, ginkabig niya ini nga “mga basura.” (Basaha ang Filipos 3:8.) Nakaeksperiensia si Pablo sang madamo nga kabudlayan sang nangin Cristiano sia. Gindumtan sia sang iya mga kasimanwa. (Binu. 23:12-14) Kag ginkastigo sia kag ginpriso sang pareho niya nga mga Romano. (Binu. 16:19-24, 37) Bangod indi sia perpekto, nabudlayan man sia nga himuon ang husto. (Roma 7:21-25) Pero ini tanan wala nagpauntat sa iya sa pag-alagad. ‘Nalipay pa gani sia sa iya mga kaluyahon.’ Ngaa? Bangod sa mga tion nga maluya sia, kabalo sia nga ginabuligan sia sang Dios.—2 Cor. 4:7; 12:10.

9. Kon wala kita sang mga butang nga ginapabaloran sang kalibutan, paano naton dapat tamdon ang aton sitwasyon?

⁹ Ginapabaloran sang kalibutan ang kusog, tinapusan, gindak-an, ukon manggad sang isa. Pero kon gusto naton nga buligan kita ni Jehova, indi naton paghunahunaon nga amo ini ang  iya ginabasihan para mahimo naton ang iya mga hilikuton. Ang matuod, ‘pila lang sa katawhan sang Dios ang ginakabig sang mga tawo nga maalam, gamhanan, ukon ginbun-ag nga dungganon.’ Mas ginpili ni Jehova ang mga “ginakabig sang kalibutan nga maluya.” (1 Cor. 1:26, 27) Gani bisan pa wala ka sang mga butang nga ginapabaloran sang kalibutan, maalagad mo gihapon si Jehova. Ang imo sitwasyon nagahatag sa imo sang kahigayunan nga makita kag maeksperiensiahan ang bulig ni Jehova. Halimbawa, kon daw ginakulbaan ka bangod ginakuestyon sang iban ang imo ginapatihan, mangamuyo kay Jehova nga hatagan ka sing kaisog nga ipaathag ini. (Efe. 6:19, 20) Kon nabudlayan ka bangod sang malala nga balatian, mangamuyo kay Jehova nga hatagan ka sing kusog para padayon ka nga makaalagad sa iya sa bug-os mo nga masarangan. Sa kada tion nga maeksperiensiahan mo ang bulig ni Jehova, nagabakod ka kag ang imo pagtuo.

10. Ngaa dapat naton tun-an ang mga halimbawa sang matutom nga mga alagad ni Jehova sa Biblia, pareho sang mga ginsambit sa Hebreo 11:32-34?

¹⁰ Serioso gid si Pablo sa iya pagtuon sang Kasulatan. Madamo sia sang natun-an sa mga halimbawa sang matutom nga mga alagad ni Jehova nga nabasa niya sa Pulong sang Dios. Sang ginsulatan niya ang Hebreo nga mga Cristiano, ginpangabay niya sila nga pamalandungan ining madamo nga halimbawa. (Basaha ang Hebreo 11:32-34.) Binagbinaga ang halimbawa ni Hari David. Indi lang ang iya mga kaaway ang nagpamatok sa iya, kundi pati man ang pila niya ka abyan sang una. Kon tun-an naton ang parte kay David, mabal-an naton kon paano napalig-on si Pablo sang ginpamalandungan niya ang halimbawa ni David kag makabulig ini sa aton kon paano mailog si Pablo.

11. Ngaa daw wala sing tsansa nga magdaug si David kay Goliat? (Tan-awa ang piktyur sa kober.)

¹¹ Para sa makusog nga soldado nga si Goliat, wala gid sing padaug si David sa iya. Sang makita ni Goliat si David, “ginyaguta niya sia.” Mas daku si Goliat, kompleto sing armas, kag nahanas sing maayo sa pagpakig-away. Pero si David isa lang ka pamatan-on nga wala nahanas sa pagpakig-away kag wala sia sing armas para sa inaway. Daw wala gid sing tsansa nga magdaug si David. Pero ang matuod, nagapati sia nga masarangan niya ang iya kontra. Nagsalig sia kay Jehova, kag ginbuligan sia ni Jehova nga mapierde si Goliat.—1 Sam. 17:41-45, 50.

12. Ano ang isa pa ka mabudlay nga sitwasyon nga naeksperiensiahan ni David?

¹² May isa pa ka sitwasyon sa kabuhi ni David nga mahimo kuntani nagpaluya sang iya buot. Matutom nga nag-alagad si David kay Saul, nga ginpili ni Jehova nga mangin hari sang Israel. Sang primero, nanamian si Hari Saul kay David. Pero sang ulihi, bangod sang bugal ni Saul, nahisa sia kay David. Ginhingabot ni Saul si David, kag gintinguhaan pa gani niya nga patyon si David.—1 Sam. 18:6-9, 29; 19:9-11.

13. Ano ang ginhimo ni David sang ginhingabot sia ni Hari Saul?

¹³ Bisan pa ginhingabot ni Hari Saul si David, gintahod gihapon ni David ang ginpili ni Jehova nga hari. (1 Sam. 24:6) Wala niya ginbasol si Jehova sa malain nga ginhimo ni Saul sa iya. Sa baylo, nagsalig si David nga hatagan sia ni Jehova sang kusog para mabatas niya ining mabudlay nga sitwasyon.—Sal. 18:1 kag superskripsion.

14. Ano ang naeksperiensiahan ni apostol Pablo nga daw pareho sa sitwasyon ni David?

¹⁴ Daw pareho man sa sitwasyon ni David ang naeksperiensiahan ni apostol Pablo. Maimpluwensia gid nga mga tawo ang nagpamatok kay Pablo, kag lakip sa ila ang madamo nga lider sang relihion kag mga manuggahom sang  panahon niya. Pila ka beses nga ginpakastigo nila sia kag ginpapriso. Pareho kay David, ginhimuan man si Pablo sang malain sang ginkabig niya nga mga abyan. Ginpamatukan pa gani sia sang pila ka kauturan sa kongregasyon. (2 Cor. 12:11; Fil. 3:18) Pero wala mapauntat si Pablo sang tanan nga nagpamatok sa iya. Ano ang ginhimo niya? Padayon sia nga nagbantala bisan pa ginpamatukan sia. Palangga niya gihapon ang iya mga kauturan bisan pa ginpalain nila ang iya buot. Labaw sa tanan, matutom sia sa Dios asta sa iya kamatayon. (2 Tim. 4:8) Nasarangan niya ang mabudlay nga mga sitwasyon, indi bangod sa iya kaugalingon nga kusog, kundi bangod nagsalig sia kay Jehova.

15. Paano naton madaug ang malaut, kag ano ang dapat naton himuon?

¹⁵ Ginainsulto ka bala ukon ginahingabot sang imo mga klasmeyt, kaupod sa trabaho, ukon sang imo pamilya nga indi Saksi? Ginhimuan ka bala sang malain sang isa ka utod sa kongregasyon? Dumduma ang halimbawa ni David kag ni Pablo. Masarangan mo nga ‘daugon ang malaut paagi sa maayo.’ (Roma 12:21) Gindaug ni David ang malaut nga si Goliat paagi sa pagpakig-away sa iya. Pero indi pareho sina nga pagpakig-away ang himuon naton sa mga nagapamatok sa aton. Sa baylo, madaug naton ang malaut paagi sa pagbulig sa mga tawo nga makatuon parte kay Jehova kag sa Biblia. Mahimo mo ini kon gamiton mo ang Biblia sa pagsabat sa mga pamangkot sang mga tawo, kon ginatahod mo gihapon ang mga naghimo sa imo sang malain, kag kon maghimo ka sang maayo sa tanan, bisan pa sa imo mga kaaway.—Mat. 5:44; 1 Ped. 3:15-17.

16-17. Ano nga leksion ang wala ginkalimtan ni Pablo?

¹⁶ Antes nangin disipulo sang Cristo si apostol Pablo, isa sia ka arogante nga lamharon nga nagahingabot sang mga sumulunod ni Jesus. (Binu. 7:58; 1 Tim. 1:13) Si Jesus mismo ang nagpauntat kay Pablo sa ginahimo niya nga paghingabot sa Cristianong kongregasyon. Saulo pa ang ngalan ni Pablo sadto. Nagpakighambal si Jesus kay Pablo halin sa langit kag ginbulag niya sia. Para makakita liwat si Pablo, dapat sia magpabulig sa mga tawo nga ginhingabot niya. Mapainubuson nga ginbaton ni  Pablo ang bulig sang disipulo nga si Ananias nga ginpadala sa iya para makakita sia liwat.—Binu. 9:3-9, 17, 18.

¹⁷ Sang ulihi, si Pablo nangin kilala nga utod sa Cristianong kongregasyon, pero wala gid niya ginkalimtan ang mga gintudlo ni Jesus sa iya sang nagpakighambal si Jesus sa iya halin sa langit sang nagapakadto sia sa Damasco. Mapainubuson gihapon si Pablo, kag ginbaton niya ang bulig sang iya mga kauturan. Nagsiling sia nga ‘nagapabakod sila nga bulig’ sa iya.—Col. 4:10, 11, footnote.

18. Ano ang rason kon ngaa daw indi na naton pagbatunon ang bulig sang iban kon kaisa?

¹⁸ Ano ang matun-an naton kay Pablo? Sang nagpakig-upod kita sa katawhan ni Jehova, mahimo gid nga gusto naton nga buligan kita sang iban, kay kabalo kita nga madamo pa kita sang dapat matun-an. (1 Cor. 3:1, 2) Pero kamusta naman subong? Kon madugay na kita nga nagaalagad kay Jehova kag madamo na kita sang nabal-an bangod sang aton mga eksperiensia, mahimo nga daw indi na naton pagbatunon ang bulig sang iban, ilabi na gid kon ang nagabulig sa aton ulihi na nangin Saksi sangsa aton. Pero ginagamit ni Jehova ang aton mga kauturan para pabakuron kita. (Roma 1:11, 12) Gani para mapabakod kita ni Jehova, dapat naton batunon ang bulig sang aton mga kauturan.

19. Ngaa nakahimo si Pablo sang dalayawon nga mga hilikuton?

¹⁹ Dalayawon gid ang mga nahimo ni Pablo sang nangin Cristiano sia. Ngaa? Bangod natun-an niya nga wala nagadepende sa kusog sang tawo, sa iya tinapusan, manggad, ukon gindak-an ang masarangan niya nga himuon, kundi sa iya pagkamapainubuson kag pagsalig kay Jehova. Kabay pa nga ilugon naton si Pablo paagi sa (1) pagsalig kay Jehova, (2) pagtuon sa mga halimbawa sa Biblia, kag (3) pagbaton sang bulig sang aton mga kauturan. Kon himuon naton ini, makasalig kita nga kon maluyahan kita, pabakuron gid kita ni Jehova!