Nangin Mataas nga Saserdote si Jesus sang ginbawtismuhan sia sang 29 C.E. Ano ang pamatuod sini? Sang ginbawtismuhan si Jesus, ginpakita niya nga handa sia nga himuon ang “kabubut-on” sang Dios, ukon handa sia nga ihatag ang iya kabuhi bilang gawad. (Gal. 1:4; Heb. 10:5-10) Ang kabubut-on ni Jehova daw pareho sa halaran. Sang ginhatag ni Jesus ang iya kabuhi, daw pareho lang nga ginhalad sia sa halaran. Ang halaran importante nga bahin sang templo, gani ang espirituwal nga templo nagsugod sang ginbawtismuhan si Jesus. Ang daku nga espirituwal nga templo ni Jehova amo ang kahimusan para masimba naton sia sa husto nga paagi pasad sa halad ni Jesus.—Mat. 3:16, 17; Heb. 5:4-6.

Ang daku nga espirituwal nga templo dapat may mataas nga saserdote. Gani ginhaplasan ni Jehova si Jesus “sing balaan nga espiritu kag ginhatagan sing gahom” para mangin mataas nga saserdote. (Binu. 10:37, 38; Mar. 1:9-11) Pero ano ang pamatuod naton nga si Jesus gintangdo nga Mataas nga Saserdote antes sia mapatay kag ginbanhaw? Para masabat naton ini nga pamangkot, binagbinagon naton ang halimbawa ni Aaron kag sang mataas nga mga saserdote nga nagbulos sa iya.

Suno sa Kasuguan, ang mataas nga saserdote lang ang makasulod sa Labing Balaan sang tabernakulo ukon sang templo. May kurtina sa tunga sang Labing Balaan kag sang Balaan. Makasulod lang sa Labing Balaan ang mataas nga saserdote nga nagaagi sa kurtina kon Adlaw sang Pagtumbas Para sa Sala. (Heb. 9:1-3, 6, 7) Si Aaron kag ang mga nagbulos sa iya ginhaplasan bilang mataas nga mga saserdote antes sila makasulod sa Labing Balaan nga nagaagi “sa [literal nga] kurtina.” Gani si Jesus ginhaplasan man bilang Mataas nga Saserdote antes sia mapatay kag makakadto sa langit nga nagaagi “sa kurtina, nga amo ang iya unod.” (Heb. 10:20) Bangod sini, ginsiling ni apostol Pablo nga si Jesus nag-abot “bilang mataas nga saserdote” kag “nagsulod sia sa mas daku kag mas himpit nga tolda nga wala ginhimo sang mga kamot sang tawo” kag “sa langit mismo.”—Heb. 9:11, 24.

Dungan nga ginpalig-on kag gin-inagurahan ang bag-o nga katipan. Ngaa masiling naton ini? Sang nagbalik si Jesus sa langit kag ginpresentar ang balor sang iya perpekto nga kabuhi bilang gawad para sa aton, ginsugdan na niya ang mga dapat himuon para mapalig-on, ukon mangin legal, ang bag-o nga katipan. Amo man ini ang mga dapat himuon para mainagurahan ukon magsugod ang bag-o nga katipan. Ano ini?

Una, nagkadto si Jesus sa atubangan ni Jehova; dayon, ginpresentar ni Jesus kay Jehova ang balor sang iya halad; kag ginbaton ni Jehova ang balor sang dugo nga ginhalad ni Jesus. Nagsugod lang ang bag-o nga katipan sang ginhimo ini.

Wala ginasugid sang Biblia kon san-o gid ginbaton ni Jehova ang balor sang halad ni Jesus. Gani indi kita makasiling kon san-o ginpalig-on kag ginsugdan ang bag-o nga katipan. Pero kabalo kita nga nagbalik si Jesus sa langit napulo ka adlaw antes sang Pentecostes. (Binu. 1:3) Sa sining malip-ot nga tion, ginpresentar niya kay Jehova ang balor sang iya halad, kag ginbaton ini ni Jehova. (Heb. 9:12) Ang pamatuod nga nagsugod na ang bag-o nga katipan makita gid sang Pentecostes. (Binu. 2:1-4, 32, 33) Ginapakita sini nga ginpalig-on na ang bag-o nga katipan.

Gani, ang bag-o nga katipan ginpalig-on kag gin-inagurahan sa tapos ginbaton ni Jehova ang balor sang dugo nga ginhalad ni Jesus kag gindala sa sini nga katipan ang mga hinaplas. Sa sini man nga tion, nagsugod ang bag-o nga katipan. Si Jesus, bilang Mataas nga Saserdote, amo ang Manugpatunga sini.—Heb. 7:25; 8:1-3, 6; 9:13-15.