TULUN-AN NGA ARTIKULO 30
Padayon nga Maglakat sa Kamatuoran
“Wala na sang makapahalipay sa akon sangsa sini: Ang mabatian ko nga ang akon mga anak nagalakat sa kamatuoran.”—3 JUAN 4.
AMBAHANON 54 “Amo Ini ang Dalan”
ANG BINAGBINAGON SA SINI NGA ARTIKULO *
1. Suno sa 3 Juan 3, 4, ano ang makapahalipay sa aton?
MAIMADYIN mo bala ang kalipay ni apostol Juan sang mabatian niya nga ang iya mga ginbuligan nga makatuon sang kamatuoran padayon nga nagaalagad kay Jehova sing matutom? Madamo sing problema ining matutom nga mga Cristiano. Gani ginpalig-on gid ni Juan ang ila pagtuo kay para sa iya daw mga anak na niya sila. Nalipay man kita kon ang aton kabataan ukon mga Bible study magdedikar kay Jehova kag padayon nga mag-alagad sa iya.—Basaha ang 3 Juan 3, 4.
2. Ano ang katuyuan sang mga sulat ni Juan?
2 Sang 98 C.E., mahimo nga nagaistar si Juan sa Efeso ukon sa lugar nga malapit diri. Posible nga didto sia nagsaylo halin sa isla sang Patmos diin priso sia anay. Sa sini nga tion, gintuytuyan sia sang balaan nga espiritu ni Jehova sa paghimo sang tatlo ka sulat. Ano ang katuyuan sini nga mga sulat? Para pabakuron ang pagtuo sang matutom nga mga Cristiano kay Jesus kag palig-unon sila nga magpadayon sa paglakat sa kamatuoran.
3. Ano nga mga pamangkot ang sabton naton?
3 Si Juan na lang ang buhi nga apostol sadto, kag nabalaka gid sia sa malain nga impluwensia sa kongregasyon sang indi matuod nga mga manunudlo. * (1 Juan 2:18, 19, 26) Nagsiling ining mga apostata nga kilala nila kuno ang Dios, pero wala nila ginasunod ang mga sugo ni Jehova. Sa sini nga artikulo, binagbinagon naton ang ginlaygay ni Juan kag sabton naton ang tatlo ka pamangkot: Ano ang buot silingon sang paglakat sa kamatuoran? Ano ang posible nga makapauntat sa aton sa paglakat sa kamatuoran? Kag paano naton mabuligan ang kada isa para makapadayon sa paglakat sa kamatuoran?
ANO ANG BUOT SILINGON SANG PAGLAKAT SA KAMATUORAN?
4. Suno sa 1 Juan 2:3-6 kag 2 Juan 4, 6, ano ang dapat naton himuon para makalakat kita sa kamatuoran?
4 Para makalakat kita sa kamatuoran, dapat naton hibaluon ang kamatuoran nga ara sa Pulong sang Dios, ang Biblia. Dapat man naton ‘tumanon ang mga sugo ni Jehova.’ (Basaha ang 1 Juan 2:3-6; 2 Juan 4, 6.) Si Jesus ang pinakamaayo nga halimbawa sa pagtuman kay Jehova. Gani ang isa ka paagi nga matuman naton si Jehova amo ang pagsunod kay Jesus sing maayo.—Juan 8:29; 1 Ped. 2:21.
5. Sa ano kita dapat mangin kumbinsido?
5 Para padayon kita nga maglakat sa kamatuoran, dapat kumbinsido kita nga si Jehova pirme nagasugid sang kamatuoran, gani makasigurado kita nga matuod gid ang tanan nga ginasiling niya sa aton sa iya Pulong, ang Biblia. Kag dapat kumbinsido man kita nga si Jesus ang ginpromisa nga Mesias. Subong, madamo ang indi magpati nga si Jesus amo ang Hari sang Ginharian sang Dios. Nagpaandam si Juan nga mahimo patalangon sang “mga manugdaya” ang mga indi pa malig-on sa ila pagpati kay Jehova kag kay Jesus. (2 Juan 7-11) Si Juan nagsulat: “Sin-o ang butigon? Indi bala ang isa nga nagapanghiwala nga si Jesus amo ang Cristo?” (1 Juan 2:22) Para indi kita mapatalang, dapat naton tun-an ang Pulong sang Dios. Kon himuon naton ini, makilala naton si Jehova kag si Jesus. (Juan 17:3) Kag mangin kumbinsido kita nga matuod ang aton ginapatihan.
ANO ANG POSIBLE NGA MAKAPAUNTAT SA ATON SA PAGLAKAT SA KAMATUORAN?
6. Ano ang posible nga makapauntat sa pamatan-on nga mga Saksi sa paglakat sa kamatuoran?
6 Ang tanan nga Cristiano dapat maghalong nga indi sila mapatalang sang mga ginatudlo sang mga tawo nga base lang sa ila kaalam. (1 Juan 2:26) Dapat gid maghalong sa sini ilabi na ang mga pamatan-on. Si Alexia, * nga 25 anyos nga sister nga taga-France, nagsiling: “Sang nagaeskwela ako, gintudluan kami sang parte sa ebolusyon kag iban pa nga ideya nga base lang sa kaalam sang mga tawo. Bangod sini, ginduhaduhaan ko ang kamatuoran. May mga tion nga daw nanamian ako sa sini nga mga ideya. Pero nahunahuna ko nga indi gid husto nga magpati lang dayon sa ginatudlo sa eskwelahan kag indi pagpatihan ang ginasiling ni Jehova.” Gintun-an ni Alexia ang libro nga Life—How Did It Get Here? By Evolution or by Creation? Sa pila lang ka semana, wala na ang iya pagpangduhaduha. Si Alexia nagsiling: “Napamatud-an ko nga matuod gid ang tanan nga ginasiling sang Biblia. Kag nahangpan ko nga kon sundon ko ini, mangin malipayon gid ako kag mangin matawhay ang akon hunahuna.”
7. Sa ano kita dapat maghalong, kag ngaa?
7 Dapat maghalong ang tanan nga Cristiano, bata man ukon tigulang, nga indi magpakunokuno nga nagaalagad kay Jehova pero may ginahimo gali sila nga sala. Nagsiling si Juan nga indi kita makalakat sa kamatuoran kon nagahimo kita sang imoral. (1 Juan 1:6) Para malipay sa aton si Jehova, dapat naton dumdumon nga makita niya ang tanan naton nga ginahimo. Bisan pa matago naton sa mga tawo ang ginahimo naton nga sala, makita ini gihapon ni Jehova.—Heb. 4:13.
8. Ano ang indi naton dapat pagsundon?
8 Indi naton dapat pagsundon ang pagtamod sang kalibutan sa sala. Si apostol Juan nagsulat: “Kon magsiling kita, ‘Wala kita sing sala,’ ginapatalang naton ang aton kaugalingon.” (1 Juan 1:8) Sang panahon ni Juan, nagsiling ang mga apostata nga puede gihapon mangin suod sa Dios ang isa ka tawo bisan pa nagahimo sia sang sala. Amo man sini ang pagpati sang mga tawo subong. Madamo ang nagapati sa Dios, pero wala sila nagakomporme sa pagtamod ni Jehova sa sala, ilabi na parte sa pagpakig-sex. Bisan pa para kay Jehova sala ang ila ginahimo, nagasiling sila nga indi ini sala kay amo ini ang ila gusto.
Mga pamatan-on, hibalua kon ngaa ginasiling ni Jehova nga husto ukon sala ang isa ka buhat para mapaathag ninyo sa iban ang inyo ginapatihan (Tan-awa ang parapo 9) *
9. Ano ang benepisyo sang mga pamatan-on kon sundon nila ang ginasiling sang Biblia?
9 Mahimo mabudlayan ang mga pamatan-on kon ang ila mga klasmeyt ukon kaupod sa trabaho wala nagakomporme sa ginasiling sang Biblia parte sa pagpakig-sex. Amo ini ang naeksperiensiahan ni Aleksandar. Nagsiling sia: “Ang pila ka babayi sa amon eskwelahan nagapamilit gid nga mag-sex kami. Ginpangindian ko sila, gani nagsiling sila nga agi kuno ako kay wala ako sing nobya.” Kon matabo ini sa imo, dumduma nga kon sundon mo ang ginasiling sang Biblia, indi mo madula ang imo dignidad, malikawan mo ang balatian kag ang kasubo, kag suod ka gihapon kay Jehova. Kag sa kada tion nga mabatuan mo ang pagsulay, nagabakod pa gid ang imo handum nga himuon ang husto. Dumduma man nga ang sala nga pagtamod sang kalibutan sa pagpakig-sex naghalin kay Satanas. Gani kon indi mo pagsundon ang panghunahuna sang mga tawo sa kalibutan, ‘ginadaug mo ang isa nga malauton.’—1 Juan 2:14.
10. Suno sa 1 Juan 1:9, ngaa posible nga maalagad naton si Jehova nga may matinlo nga konsiensia?
10 Ginabaton naton nga si Jehova ang may kinamatarong nga magsiling kon ano ang sala. Kag ginatinguhaan naton nga indi makahimo sang sala. Pero kon makasala kita, ginatu-ad naton ang aton sala kay Jehova sa pangamuyo. (Basaha ang 1 Juan 1:9.) Kag kon makahimo kita sang mabug-at nga sala, mangayo kita sang bulig sa mga gulang nga gintangdo ni Jehova nga mag-atipan sa aton. (Sant. 5:14-16) Kon nakasala kita sang una, indi kita dapat magbatyag nga indi na gid kita mapatawad. Ngaa? Bangod ginhatag sang aton mahigugmaon nga Amay ang iya Anak bilang halad-gawad para mapatawad ang aton mga sala. Sang nagsiling si Jehova nga patawaron niya ang aton mga sala kon maghinulsol gid kita, masaligan gid ini. Gani ginpaposible ni Jehova nga maalagad naton sia nga may matinlo nga konsiensia.—1 Juan 2:1, 2, 12; 3:19, 20.
11. Ano ang himuon naton para indi kita maimpluwensiahan sang mga ginatudlo sang mga apostata nga makapaluya sang aton pagtuo?
11 Indi gid naton dapat pagpamatian ang mga ginatudlo sang mga apostata. Halin sang una, ginatinguhaan gid sang Yawa nga magluya ang pagtuo sang mga Cristiano. Gani dapat kabalo kita kon ano ang matuod kag kon ano ang butig. * Mahimo magpalapta sang mga kabutigan ang aton mga kaaway paagi sa Internet ukon social media para madula ang aton pagsalig kay Jehova kag ang aton gugma sa aton mga kauturan. Indi gid magpati sa sini nga mga kabutigan, kay naghalin ini kay Satanas.—1 Juan 4:1, 6; Bug. 12:9.
12. Ngaa dapat gid naton pabakuron ang aton pagsalig sa mga kamatuoran nga natun-an naton?
12 Para indi mapaluya ni Satanas ang aton pagtuo, dapat naton pabakuron ang aton pagsalig kay Jesus kag kon paano sia ginagamit ni Jehova sa pagtuman sang Iya katuyuan. Dapat man kita magsalig sa matutom kag mainandamon nga ulipon, kay sila lang ang ginagamit ni Jehova para tuytuyan ang iya organisasyon subong. (Mat. 24:45-47) Ginapabakod naton ang aton pagsalig paagi sa pagtuon pirme sang Pulong sang Dios. Ang aton pagtuo mangin pareho sang kahoy nga madalom ang gamot. Pareho man sa sini ang ginsiling ni Pablo sang ginsulatan niya ang kongregasyon sa Colosas. Nagsiling sia: “Bangod ginbaton ninyo si Cristo Jesus nga Ginuo, padayon kamo nga maglakat nga nahiusa sa iya. Manggamot kamo kag matukod sing malig-on sa iya kag pabakura ang inyo pagtuo.” (Col. 2:6, 7) Kon panikasugan naton nga pabakuron ang aton pagtuo, indi gid kita mapaluya ni Satanas ukon sang mga nagasunod sa iya.—2 Juan 8, 9.
13. Ano ang maeksperiensiahan naton, kag ngaa?
13 Dumtan gid kita sang kalibutan. (1 Juan 3:13) Nagsiling si Juan nga “ang bug-os nga kalibutan yara sa gahom sang isa nga malauton.” (1 Juan 5:19) Dali na lang matapos ini nga sistema, gani grabe gid ang kaakig ni Satanas. (Bug. 12:12) Magluwas sa indi direkta nga pag-atake nga ginagamit ni Satanas, pareho sang imoralidad kag kabutigan sang mga apostata, nagagamit man sia sang direkta nga pag-atake, pareho sang mapintas nga paghingabot. Kabalo si Satanas nga malip-ot na lang ang iya tion para mapauntat kita sa pagbantala ukon mapaluya ang aton pagtuo. Gani indi na kita matingala nga ginadumilian ang aton hilikuton sa pila ka pungsod. Pero nagapadayon gihapon sa pag-alagad ang aton mga kauturan sa sini nga mga pungsod. Gani bisan ano pa ang himuon ni Satanas sa katawhan ni Jehova, makapabilin gid kita nga matutom.
BULIGI ANG KADA ISA NGA MAGPADAYON SA PAGLAKAT SA KAMATUORAN
14. Paano naton mabuligan ang aton mga kauturan nga magpadayon sa paglakat sa kamatuoran?
14 Para mabuligan naton ang aton mga kauturan nga magpadayon sa paglakat sa kamatuoran, dapat kita magpakita sang kaluoy sa ila. (1 Juan 3:10, 11, 16-18) Dapat naton higugmaon ang isa kag isa, indi lang kon maayo ang sitwasyon, kundi bisan may mga problema. Halimbawa, may nabal-an ka bala nga napatyan sang pinalangga kag dapat paumpawan ukon nagakinahanglan sang bulig? Ukon may mga kauturan bala nga naapektuhan sang kalamidad kag kinahanglan patindugan sila liwat sang Kingdom Hall ukon balay? Mapabatyag naton ang aton gugma kag kaluoy sa aton mga kauturan paagi sa aton ginahambal, pero mas mapakita naton ini paagi sa aton ginahimo.
15. Suno sa 1 Juan 4:7, 8, ano ang dapat naton himuon?
15 Ginailog naton ang aton mahigugmaon nga Amay sa langit kon nagahigugmaanay kita. (Basaha ang 1 Juan 4:7, 8.) Mapakita naton nga nagahigugmaanay kita kon ginapatawad naton ang isa kag isa. Halimbawa, may ginhimo ang isa ka utod nga nagpalain sang aton buot, pero nagpangayo sia sing pasaylo. Mapakita naton nga palangga naton sia kon patawaron naton sia kag kalimtan ang nahimo niya sa aton. (Col. 3:13) Naglain gid ang buot ni Aldo sang ginhikayan sang brother nga ginataha gid niya ang mga tawo nga pareho sa iya sing rasa. Si Aldo nagsiling, “Madamo nga beses ako nga nangamuyo kay Jehova nga buligan ako nga madula ang akon kalain sang buot sa sini nga brother.” Pero may ginhimo pa gid si Aldo. Ginhagad niya ang brother nga mag-updanay sila sa pagbantala. Sang nagabantala na sila, ginsugid ni Aldo nga naglain ang iya buot sa ginsiling sini nga brother. Nagsiling si Aldo: “Pagkabalo sang brother nga naglain ang akon buot sa iya ginsiling, nangayo sia sing pasaylo. Bal-anon sa iya tingog nga naghinulsol gid sia sa iya ginsiling. Gani wala naguba ang amon pag-abyanay kag ginkalimtan na namon ang natabo.”
16-17. Ano ang dapat naton himuon?
16 Palangga gid ni apostol Juan ang iya mga kauturan kag gusto niya nga mangin mabakod ang ila pagtuo. Makita gid ini sa ginlaygay niya sa ila sa iya tatlo ka sulat. Pareho kay Juan, ang iban pa nga magagahom kaupod ni Jesus sa langit mahigugmaon man kag nagaulikid gid sa ila mga kauturan. Makapalig-on gid ini!—1 Juan 2:27.
17 Kabay pa nga sundon naton ang mga laygay nga ginbinagbinag naton. Padayon kita nga maglakat sa kamatuoran paagi sa pagtuman sing bug-os kay Jehova. Tun-an naton ang iya Pulong, kag magsalig kita sa sini. Pabakuron naton ang aton pagtuo kay Jesus. Indi kita magpamati sa mga ginatudlo sang mga tawo nga base lang sa ila kaalam kag sa mga ginatudlo sang mga apostata. Indi gid kita magpakunokuno nga nagaalagad kay Jehova pero may ginahimo gali kita nga sala, kag indi kita magpamati sa mga nagasulay sa aton nga maghimo sang sala. Sundon naton ang mga ginapatuman ni Jehova. Kag patawaron naton ang mga nakasakit sa aton kag buligan ang mga nagakinahanglan para indi magluya ang ila buot. Kon himuon naton ini bisan pa may mga kabudlayan, padayon kita nga magalakat sa kamatuoran.
AMBAHANON 49 Pagpahalipay sa Tagipusuon ni Jehova
^ par. 5 Ginagamhan ni Satanas nga amay sang kabutigan ang kalibutan subong. Gani mabudlay gid sa aton nga maglakat sa kamatuoran. Amo man ini ang naeksperiensiahan sang mga Cristiano sang unang siglo. Para buligan sila pati kita, gintuytuyan ni Jehova si apostol Juan sa paghimo sang tatlo ka sulat. Ginsambit sa sini nga mga sulat kon ano ang posible nga makapauntat sa aton sa pag-alagad kag kon ano ang mahimo naton para indi ini matabo sa aton.
^ par. 3 Tan-awa ang kahon nga “ Ang Rason kon Ngaa Nagsulat si Juan.”
^ par. 6 Gin-islan ang pila ka ngalan.
^ par. 11 Tan-awa ang tulun-an nga artikulo nga “Matuod Bala ang Impormasyon nga Nabaton Mo?” sa Agosto 2018 nga Ang Lalantawan.
^ par. 59 MGA PIKTYUR: Sa eskwelahan, pirme mabatian kag makita sang pamatan-on nga sister nga daw normal lang ang homoseksuwalidad. (Sa pila ka pungsod, ginagamit nga simbulo sang mga homoseksuwal ang kolor sang rainbow.) Sang ulihi, nag-research sia para pabakuron ang iya pagtuo sa kon ano ang ginasiling ni Jehova nga husto. Nakabulig ini sa iya nga magdesisyon sing husto.
