1. Ngaa wala kita ginakumparar ni Jehova sa iban?

NANAMIAN si Jehova magtan-aw sa sarisari nga mga butang. Gani nagtuga sia sang sarisari nga mga tanom kag mga sapat, kag may sarisari man nga rasa sang mga tawo. Pinasahi ang kada isa sa aton, gani wala kita ginakumparar ni Jehova sa iban. Kilala gid niya kita, ukon ang aton nasulod nga pagkatawo. (1 Sam. 16:7) Kabalo man sia sang aton mga ikasarang, kaluyahon, kag kon ano ang mga nakaimpluwensia sa aton kabuhi. Wala man niya ginapahimo sa aton ang indi naton masarangan. Dapat naton ilugon si Jehova. Dapat naton tan-awon ang aton kaugalingon pareho sa pagtan-aw ni Jehova sa aton. Kon himuon naton ini, mangin ‘maligdong ang aton panghunahuna.’ Buot silingon, indi naton dapat pagpakataason ukon pagpakanubuon ang aton kaugalingon.—Roma 12:3.

2. Ngaa indi maayo nga ikumparar naton ang aton kaugalingon sa iban?

² Makatuon kita sa maayo nga halimbawa sang iban. (Heb. 13:7) Halimbawa, basi may kilala kita nga utod nga maayo magbantala. Makatuon kita sa iya kon paano naton mapauswag ang aton pagbantala. (Fil. 3:17) Lain ang pag-ilog sa maayo nga halimbawa sang iban, kag lain man ang pagkumparar naton sang aton kaugalingon sa ila. Kon ginakumparar naton ang aton kaugalingon sa iban, mahimo nga mahisa kita, maluyahan sang buot, ukon magbatyag nga wala kita sing pulos. Kon tinguhaan naman naton nga labawan ang aton mga kauturan, maguba man ang aton kaangtanan kay Jehova, nga amo ang natun-an naton sa nagligad nga artikulo. Gani bangod palangga kita ni Jehova, ginlaygayan niya kita: “Dapat usisaon sang kada isa ang iya kaugalingon nga hinimuan, kag kon makita niya nga maayo ini magkalipay sia, apang indi niya dapat pag-ipaanggid ini sa hinimuan sang iban.”—Gal. 6:4.

3. Ano ang nahimo mo nga pag-uswag nga nagpahalipay gid sa imo?

 ³ Gusto ni Jehova nga malipay ka sa imo pag-uswag sa pag-alagad sa iya. Halimbawa, sigurado gid nga nalipay ka sang ginbawtismuhan ka. Ikaw mismo ang nagdesisyon nga himuon ini bangod palangga mo ang Dios. Hunahunaa ang imo pag-uswag sugod sang nabawtismuhan ka. Halimbawa, mas nanamian ka na gid bala magbasa kag magtuon sang Biblia? Mas hanuot na bala subong ang imo pagpangamuyo? (Sal. 141:2) Mas maayo ka na bala mag-istorya sa mga tawo nga imo ginabantalaan kag mas kabalo ka na maggamit sang aton mga gamit sa pagbantala? Kag kon may pamilya ka, nangin mas maayo ka bala nga bana, asawa, ukon ginikanan sa bulig ni Jehova? Mahimo nga nalipay ka gid sa imo pag-uswag.

4. Ano ang binagbinagon naton sa sini nga artikulo?

⁴ Mabuligan naton ang iban nga malipay man sa ila pag-uswag. Mabuligan man naton sila nga indi pag-ikumparar ang ila kaugalingon sa iban. Sa sini nga artikulo, binagbinagon naton kon paano mabuligan sang mga ginikanan ang ila kabataan, kon paano magbuligay ang mag-asawa, kag kon paano mabuligan sang mga gulang kag sang iban pa ang ila mga kauturan. Binagbinagon man naton ang pila ka prinsipio sa Biblia nga makabulig sa aton nga hunahunaon ang mga puede naton himuon sa pag-alagad depende sa aton mga ikasarang kag kahimtangan.

5. Suno sa Efeso 6:4, ano ang indi dapat paghimuon sang mga ginikanan?

⁵ Indi dapat pag-ikumparar sang mga ginikanan ang ila bata sa iban nga bata, kag indi nila dapat pag-ipahimo sa ila bata ang indi niya masarangan. Kon himuon ini sang mga ginikanan, magaluya ang buot sang ila bata. (Basaha ang Efeso 6:4.) Ang isa ka sister nga si Sachiko * nagsiling: “Gusto sang akon mga maestro kag maestra nga panikasugan ko gid nga mangin top sa amon klase. Gusto man ni Nanay nga panikasugan ko gid nga mataas ang akon grades kay maayo kuno ini nga panaksi sa akon mga maestro kag maestra kag sa akon amay nga indi Saksi. Gusto pa gani niya nga ma-perfect ko ang akon mga exam, pero indi ko ina masarangan. Dugay na ako naggradweyt, pero may epekto ini gihapon sa akon. Kay man, ginapamensar ko kon kaisa nga wala nalipay si Jehova bisan pa ginahimo ko ang akon bug-os nga masarangan.”

6. Ano ang matun-an sang mga ginikanan sa ginasiling sang Salmo 131:1, 2?

⁶ May importante gid nga matun-an ang mga  ginikanan sa ginasiling sang Salmo 131:1, 2. (Basaha.) Nagsiling si Hari David nga wala niya ‘ginhandum ang dalagku nga mga butang’ ukon ang mga indi niya masarangan himuon. Bangod mapainubuson sia, ‘nangin kalmado sia kag nangin malinong’ ang iya hunahuna. Ano ang matun-an sang mga ginikanan sa ginsiling ni David? Mapakita sang mga ginikanan nga mapainubuson sila kon indi nila paghandumon ang indi nila masarangan kag kon indi nila pag-ipahimo sa ila bata ang indi niya masarangan. Mapabatyag sang mga ginikanan sa ila bata nga importante sia kon buligan nila sia nga mabal-an ang iya mga ikasarang kag mga kaluyahon. Dayon, buligan nila sia nga hunahunaon ang mga puede niya himuon suno sa iya ikasarang. Ang isa ka sister nga si Marina nagsiling: “Wala gid ako ginakumparar ni Nanay sa akon tatlo ka utod ukon sa iban pa nga kabataan. Gintudluan niya ako nga mahangpan nga ang kada isa may lainlain nga ikasarang kag importante kita tanan kay Jehova. Bangod sang ginhimo ni Nanay, daw wala ako sing madumduman nga tion nga ginkumparar ko ang akon kaugalingon sa iban.”

7-8. Paano mapadunggan sang isa ka bana ang iya asawa?

⁷ Dapat padunggan sang isa ka bana ang iya asawa. (1 Ped. 3:7) Ang pagpadungog amo ang paghatag sa iban sang pinasahi nga atension kag pagrespeto. Halimbawa, ginapadunggan sang bana ang iya asawa kon ginapabatyag niya sa iya nga importante sia. Wala niya ginapahimo sa iya asawa ang indi masarangan sang iya asawa. Kag wala gid niya ginakumparar ang iya asawa sa iban nga babayi. Pero kon himuon ini sang isa ka bana, ano ang mabatyagan sang iya asawa? Pirme ginakumparar si Rosa sang iya indi Saksi nga bana sa iban nga babayi. Bangod sang masakit nga ginapanghambal sang iya bana, nangin manubo ang pagtan-aw ni Rosa sa iya kaugalingon kag nagbatyag sia nga wala sing nagapalangga sa iya. Nagsiling sia, “Dapat ako pirme pahanumdumon nga importante ako kay Jehova.” Pero ginapadunggan gid sang isa ka Saksi nga bana ang iya asawa. Kabalo sia nga may maayo ini nga epekto sa iya kaangtanan sa iya asawa kag sa iya kaangtanan kay Jehova. *

⁸ Ginapadunggan sang isa ka bana ang iya asawa kon ginadayaw niya sia, kag kon ginasilingan niya sia pirme nga palangga niya sia kag importante sia sa iya. (Hulu. 31:28) Amo ini ang ginahimo sang bana ni Katerina, nga ginsambit sa nagligad nga artikulo. Nakabulig ini sa iya sang nagbatyag sia nga waaywaay sia kon ikumparar sa iban. Sang bata pa si Katerina, ginapakanubo sia sang iya iloy kag pirme sia ginakumparar sa iban nga bata, pati na sa iya mga abyan. Gani ginakumparar niya ang iya kaugalingon sa iban kag padayon niya ini nga ginahimo bisan sang nag-Saksi na sia. Pero ginbuligan sia sang iya Saksi nga bana nga mauntat ang ginahimo niya nga pagkumparar sang iya kaugalingon sa iban kag mangin husto ang pagtan-aw niya sa iya kaugalingon. Nagsiling sia: “Palangga ako sang akon bana, ginadayaw niya ako sa akon maayo nga ginahimo, kag nagapangamuyo sia para sa akon. Ginapahanumdom man niya sa akon ang dalayawon nga mga kinaiya ni Jehova, kag ginabuligan niya ako nga madula ang akon indi husto nga panghunahuna.”

9-10. Paano ginbuligan sang mahigugmaon nga mga gulang ang isa ka sister para indi na niya pag-ikumparar ang iya kaugalingon sa iban?

⁹ Paano mabuligan sang mga gulang ang mga kauturan nga nagakumparar sang ila kaugalingon sa iban? Binagbinaga ang eksperiensia sang isa ka sister nga si Hanuni. Sang bata pa sia, talagsa lang sia ginadayaw. Nagsiling sia: “Mahuluy-on ako, kag pamatyag ko mas maayo ang iban nga  bata sangsa akon. Gani halin sang bata pa ako, ginakumparar ko na ang akon kaugalingon sa iban.” Bisan pa nangin Saksi na si Hanuni, ginakumparar niya gihapon ang iya kaugalingon sa iban. Gani pamatyag niya daw wala sia sing mabulig sa kongregasyon. Pero subong, isa na sia ka malipayon nga payunir. Ano ang nakabulig sa iya?

¹⁰ Nagsiling si Hanuni nga ginbuligan sia sang mga gulang nga nagaulikid gid sa iya. Ginsilingan nila sia nga importante sia sa kongregasyon kag gindayaw nila ang iya katutom. Nagsiling sia: “Pila ka beses ako nga ginpangabay sang mga gulang nga palig-unon ang pila ka sister nga nagakinahanglan sang bulig. Bangod sini, nabatyagan ko nga may mabulig ako sa kongregasyon. Nadumduman ko nga ginpasalamatan ako sang mahigugmaon nga mga gulang sang ginpalig-on ko ang pila ka pamatan-on nga sister. Dayon, ginbasa nila sa akon ang 1 Tesalonica 1:2, 3. Grabe gid ang akon kalipay. Sa bulig sining mahigugmaon nga mga gulang, narealisar ko nga may mabulig ako sa organisasyon ni Jehova kag ginpabaloran ko gid ini.”

11. Paano naton mabuligan ang mga “nalisdan” kag “kubos” nga ginsambit sa Isaias 57:15?

¹¹ Basaha ang Isaias 57:15. Palangga gid ni Jehova ang mga “nalisdan” kag “kubos.” Makabulig ang mga gulang para mapalig-on ini nga mga kauturan. Pero ang matuod, makabulig kita tanan. Mapalig-on naton sila kon ipakita naton nga nagaulikid kita sa ila. Gusto ni Jehova nga ipabatyag naton sa ila nga palangga gid niya sila. (Hulu. 19:17) Mabuligan man naton ang aton mga kauturan kon mangin mapainubuson kita kag kon indi naton pag-ipabugal ang aton mga ikasarang. Indi naton dapat pag-ipadayawdayaw ang aton mga hinimuan kay indi naton gusto nga mahisa sa aton ang iban. Sa baylo, panikasugan naton nga mangin makapalig-on sa aton mga kauturan ang aton mga ginahambal kag ginahimo.—1 Ped. 4:10, 11.

12. Ngaa nanamian ang ordinaryo nga mga tawo kay Jesus? (Tan-awa ang piktyur sa kober.)

¹² Madamo kita sing matun-an sa mga ginhimo kag ginsiling ni Jesus para ipabatyag sa iya mga sumulunod nga importante sila. Sia ang pinakabantog nga tawo nga nagkabuhi sa duta. Pero ‘malulo sia kag mapainubuson sing tagipusuon.’ (Mat. 11:28-30) Wala niya ginpadayawdayaw ang iya kaalam kag mga nabal-an. Sang gintudluan niya ang mga tawo, naggamit sia sang simple nga mga tinaga kag mga ilustrasyon nga mahapos mahangpan kag makapalig-on gid sa mga kubos. (Luc. 10:21) Indi sia pareho sa bugalon nga mga lider sang relihion kay wala gid niya ginpabatyag sa iban nga indi sila importante sa Dios. (Juan 6:37) Ginrespeto niya ang ordinaryo nga mga tawo.

13. Ano ang ginhimo ni Jesus para mabatyagan sang iya mga disipulo ang iya kaayo kag gugma?

¹³ Nabatyagan gid sang mga disipulo ni Jesus ang iya kaayo kag gugma. Kabalo sia nga lainlain ang ila mga ikasarang kag kahimtangan. Gani indi puede nga pareho nga responsibilidad ang ihatag sa ila tanan, kag indi man posible nga pareho ang ila mahimo sa pag-alagad. Pero nalipay gid sia nga ginhimo sang kada isa sa ila ang ila bug-os nga masarangan. Makita naton ini nga kinaiya ni Jesus sa iya ilustrasyon parte sa mga talanton. Sa sini nga ilustrasyon, ginhatagan sang agalon ang iya mga ulipon sang hilikuton ‘suno sa ikasarang sang kada isa.’ Mapisan ang iya duha ka ulipon, pero mas madamo ang nahimo sang isa. Pero pareho sila nga gindayaw sang agalon. Nagsiling sia sa kada isa sa ila: “Dalayawon gid ang ginhimo mo, maayo kag matutom nga ulipon!”—Mat. 25:14-23.

14. Paano naton mailog si Jesus?

¹⁴ Palangga gid kita ni Jesus kag maayo gid sia sa aton. Kabalo sia nga lainlain ang aton mga ikasarang kag kahimtangan, kag nalipay gid sia kon ginahimo naton ang aton bug-os nga masarangan. Dapat naton ilugon si Jesus. Indi gid naton pag-ipabatyag sa isa ka utod nga wala sia sing pulos ukon dapat sia mahuya kay indi  niya masarangan ang ginahimo sang iban. Sa baylo, dapat naton pirme dayawon ang aton mga kauturan kay ginahimo nila ang ila bug-os nga masarangan sa pag-alagad kay Jehova.

15-16. Paano nakabenepisyo ang isa ka sister kay ginpanikasugan niya nga himuon ang iya masarangan sa pag-alagad kay Jehova?

¹⁵ Kon may mga gusto kita himuon sa aton pag-alagad kay Jehova, may direksion ang aton kabuhi kag mangin mas malipayon kita. Pero dapat suno ini sa aton mga ikasarang. Indi kinahanglan nga himuon naton ang mga gusto himuon sang iban. Kay kon himuon naton ina, masubuan lang kita kag maluyahan sang buot. (Luc. 14:28) Binagbinaga ang halimbawa sang isa ka payunir nga si Midori.

¹⁶ Pirme si Midori ginahambalan sang iya amay nga indi Saksi nga waaywaay sia kon ikumparar sa iya mga manghod kag mga klasmeyt. “Pamatyag ko wala ako sing pulos,” siling ni Midori. Pero samtang nagadaku si Midori, narealisar niya nga importante sia. Nagsiling sia, “Ginabasa ko ang Biblia kada adlaw para mangin malinong ang akon hunahuna kag para mabatyagan ko nga palangga ako ni Jehova.” Ginpamalandungan man niya kon ano ang masarangan niya sa iya pag-alagad, kag ginpangamuyo niya nga buligan sia nga mahimo ini. Bangod sini, nalipay gid si Midori sa iya pag-uswag sa iya pag-alagad kay Jehova.

17. Paano naton ‘padayon nga mabag-o ang aton panghunahuna,’ kag ano ang resulta sini?

¹⁷ Kinahanglan ang malawig nga tion para mabag-o naton ang aton indi husto nga pagtan-aw sa aton kaugalingon. Gani ginapalig-on kita ni Jehova: “Padayon nga bag-uha ninyo ang inyo panghunahuna.” (Efe. 4:23, 24) Para mahimo naton ini, dapat kita mangamuyo, magtuon sang Pulong sang Dios, kag magpamalandong. Padayon naton nga himuon ini, kag magpangabay kita  kay Jehova sang kusog. Buligan kita sang iya balaan nga espiritu nga indi pag-ikumparar ang aton kaugalingon sa iban. Buligan man kita ni Jehova para marealisar naton nga amat-amat na kita nga nagabatyag sang kahisa ukon bugal, kag buligan niya kita nga mabag-o ini gilayon.

18. Paano ka mapalig-on sang ginasiling sang 2 Cronica 6:29, 30?

¹⁸ Basaha ang 2 Cronica 6:29, 30. Kabalo si Jehova sang aton ginabatyag. Kabalo man sia nga ginapakigbatuan naton ang aton mga kaluyahon kag ang malain nga impluwensia sang kalibutan. Kon makita ni Jehova nga ginapanikasugan gid naton nga pakigbatuan ining indi maayo nga impluwensia, mas palanggaon pa gid niya kita.

19. Sa ano ginpaanggid ni Jehova ang iya gugma sa aton?

¹⁹ Para mahangpan naton ang gugma ni Jehova sa aton, gingamit niya nga halimbawa ang gugma sang isa ka iloy sa iya anak. (Isa. 49:15) Ang isa ka iloy nga si Rachel nagsiling: “Kulang sa binulan ang akon bata nga si Stephanie sang ginbun-ag ko sia. Sang makita ko sia, kagamay gid sa iya kag makaluluoy. Pero gintugutan ako sang doktor nga kuguson sia kada adlaw asta mag-isa sia ka bulan samtang ara sia sa incubator. Sa sini nga mga tion, nabatyagan ko nga nagsuod gid ako sa iya. Anom ka tuig na sia subong kag mas gamay sia kon ikumparar sa mga kaedad niya. Pero palangga ko gid sia kay kabalo ako nga indi mahapos ang iya inagyan para mabuhi sia. Nalipay gid ako nga sia ang akon bata!” Nalipay gid kita nga mabal-an nga amo man sini ang pagpalangga sa aton ni Jehova kon makita niya nga nagapanikasog gid kita nga himuon ang aton bug-os nga masarangan sa pag-alagad sa iya.

20. Bilang alagad ni Jehova, ngaa malipayon ka?

²⁰ Bangod alagad ka ni Jehova, hamili ka nga miembro sang iya pamilya. Pinasahi ka para sa iya. Ginbuyok ka ni Jehova, indi bangod mas maayo ka sangsa iban. Ginbuyok ka niya kay sang gin-usisa niya ang imo tagipusuon, nakita niya nga mapainubuson ka, gusto mo nga magtuon parte sa iya, kag handa ka magbag-o. (Sal. 25:9) Makasalig ka nga malipay gid sia kon ginahimo mo ang imo bug-os nga masarangan sa pag-alagad sa iya. Ginapakita sang imo pagbatas kag katutom nga may ‘maayo ka nga tagipusuon.’ (Luc. 8:15) Gani padayon nga ihatag kay Jehova ang imo pinakamaayo. Kon himuon mo ini, mangin malipayon ka gid.