Gusto gid ni Jehova nga ang mag-asawa padayon nga mangin malipayon kag suod sa isa kag isa. (Mat. 19:4-6) Kon gusto mo nga may kaupod sa kabuhi, paano ka makakita sang maayo nga asawa ukon bana? Si Jehova ang nagtuga sa aton, gani nakahibalo sia kon ano ang dapat naton himuon para mangin malipayon kita kon mangasawa kita ukon mamana. Kon sundon mo ang iya mga prinsipio, mangin malipayon ka gid. Binagbinaga ang pila sa sini nga mga prinsipio.

Una, dapat naton mahangpan ini nga prinsipio: “Ang tagipusuon madaya labaw sa tanan nga butang kag makatalagam.” (Jer. 17:9) Kon mag-date ang isa ka lalaki nga gusto na gid mangasawa kag ang isa ka babayi nga gusto na gid mamana, posible nga madasig magtubo ang ila balatyagon sa isa kag isa, kag indi na sila makapamensar sing maayo. Kon magdesisyon sila nga magpakasal base lang sa ila nabatyagan, posible nga masakitan lang sila sa ulihi. (Hulu. 28:26) Gani kon indi pa gid nila kilala sing maayo ang isa kag isa, indi gid maalamon nga isugid nila dayon ang ila nabatyagan ukon pasaligon ang isa kag isa.

Ang Hulubaton 22:3 nagasiling: “Makita sang tawo nga maalamon ang katalagman kag nagapanago sia, apang ang kulang sing kinaalam nagadiretso lang kag nagaantos sang malain nga resulta.” Ngaa delikado ang paggamit sang mga dating website? May pila nga nagagamit sini nga mga website kag may nakilala sila. Dayon, nag-date sila sang nakilala nila. Pero sang ulihi, natukiban nila nga gintunto lang sila kay ginhampangan lang ang ila balatyagon. Isa pa, may mga tawo nga nagagamit sang fake account para manunto kag makakuarta paagi sa pagpang-scam. Kon kaisa, nagapakilala nga mga Saksi ining malain nga mga tawo.

Ari ang iban pa nga peligro. Ang iban nga dating website nagagamit sang mga program sa computer nga kabalo kuno magpangita kon sin-o nga mga tawo ang compatible sa isa kag isa. Pero wala sing ebidensia nga nagapamatuod nga epektibo ini nga paagi. Maalamon bala nga magsalig sa mga program sa computer nga gin-imbento sang tawo kon nagahimo ka sang importante nga mga desisyon pareho sang pagpangita sang asawa ukon bana? Mas masaligan gid ang mga prinsipio sa Biblia sangsa mga program sa computer!—Hulu. 1:7; 3:5-7.

Ang prinsipio sa Hulubaton 14:15 nagasiling: “Ang tawo nga mapinatihon, nagapati sa bisan ano nga mabatian niya, apang ang tawo nga maalamon nagabinagbinag sang tagsa niya ka tikang.”  Dapat mo anay kilalahon sing maayo ang isa ka tawo antes mo masiling nga mangin maayo sia nga asawa ukon bana. Pero mabudlay ini himuon kon sa dating website lang kamo nagkilalahay. Bisan pa makita mo ang pila ka impormasyon parte sa imo nakilala kag pirme kamo nagaistoryahanay, masiling mo bala nga kilala mo na gid sia? Abi sang iban nakita na nila ang babayi ukon lalaki nga bagay gid sa ila, pero nakibot sila sang naistorya na nila sing personal ang ila nakilala sa dating website.

Ang salmista nagsiling: “Wala ako nagapakig-upod sa madaya nga mga tawo, kag ginalikawan ko ang mga nagapakunokuno.” (Sal. 26:4) Balewala lang sa madamo nga tawo bisan pa indi matuod nga impormasyon ang ginabutang nila sa ila profile. Gusto nila nga madamo ang maluyag sa ila. Wala nila ginasugid ang ila indi maayo nga mga kinaiya, ukon ginatago nila ini kon nagaistorya sila sa dating website. Ang iban nagapakilala nga mga Saksi ni Jehova sila kuno, pero bawtismado bala sila? Hamtong bala sila sa espirituwal? Suod bala sila kay Jehova? Ginarespeto bala sila sa kongregasyon? Ukon basi indi sila maayo nga halimbawa ukon ‘malain pa gani sila nga mga kaupod’? (1 Cor. 15:33; 2 Tim. 2:20, 21) Hilway bala sila nga magpakasal suno sa mga prinsipio sa Biblia? Dapat mo sabton ini nga mga pamangkot. Pero mabudlay ini sabton kon indi mo pagpamangkuton ang iban nga mga Saksi nga nakakilala sa ila sing maayo. (Hulu. 15:22) Kag kon matutom kita nga nagaalagad kay Jehova, indi gid naton paghunahunaon nga “magpagota sing sampihakan” sa indi tumuluo.—2 Cor. 6:14; 1 Cor. 7:39.

Maathag nga may mga peligro ang paggamit sang dating website. Gani may mas maayo nga mga paagi para makakita ka sang pangasaw-on ukon pamanahon. Sa ano nga mga sitwasyon mahimo may makilala ka nga posible mangin isa ka maayo nga asawa ukon bana? Sa mga lugar nga puede kita makatipon, pareho sa tion sang mga miting sang kongregasyon, asembleya, kag kombension, may kahigayunan kita nga makilala ang iban.

Kon indi posible ini nga mga pagtilipon bangod sang pila ka rason, pareho sang COVID-19 nga pandemic, nagagamit kita sang mga videoconference para maka-attend sa mga miting sang kongregasyon. Kahigayunan man ini nga makilala mo ang mga Saksi nga soltero kag dalaga. Paagi sa sini nga mga miting, mabatian mo kon paano nila ginapresentar ang ila bahin kag kon paano sila nagakomento. (1 Tim. 6:11, 12) Mahimo man kamo makaistorya pagkatapos sang miting paagi sa breakout room upod ang iban pa nga kauturan. Paagi sa virtual nga pagtilipon sang pila ka Saksi, maobserbahan mo man kon paano nagaistorya sa iban ang imo naluyagan, gani mahatagan ka sini sang ideya parte sa iya mga kinaiya. (1 Ped. 3:4) Sa ulihi, mas makilala ninyo ang isa kag isa, gani makita mo kon pareho ang inyo mga gusto nga himuon kag mga prinsipio nga ginasunod, kag mabal-an mo kon compatible kamo.

Kon ginagamit sang mga soltero kag dalaga ang mga prinsipio sa Biblia sa pagpangita sang ila gusto pangasaw-on ukon pamanahon, posible gid nga mangin malipayon ang ila pag-asawahay. Amo gid ini ang ginasiling sang isa ka hulubaton: “Ang nakakita sing maayo nga asawa nakakita sing maayo nga butang, kag mabaton niya ang kahamuot ni Jehova.”—Hulu. 18:22.