1. Wala madugay pagkatapos makasala si Adan kag si Eva, ano ang ginhimo ni Jehova? (Genesis 3:15)

 WALA madugay pagkatapos makasala si Adan kag si Eva, may ginsugid si Jehova nga isa ka importante nga tagna nga nagahatag sing paglaum sa kaliwat ni Adan kag ni Eva. Mabasa naton ini sa Genesis 3:15.—Basaha.

2. Ngaa importante gid ini nga tagna?

² Mabasa ini nga tagna sa una nga libro sang Biblia. Pero ang tanan nga libro sang Biblia may koneksion sa sini nga tagna. Ang Genesis 3:15 daw pareho sa spring sang isa ka notebook nga nagatingob sang tanan nga pahina sini. Paagi sa sini nga teksto, natingob sa isa ka mensahe ang tanan nga libro sang Biblia. Amo ini ang mensahe: Magapadala ang Dios sang Manluluwas para laglagon ang Yawa kag ang tanan niya nga sumulunod. * Isa gid ini ka matahom nga paglaum para sa mga nagapalangga kay Jehova.

3. Ano ang binagbinagon naton sa sini nga artikulo?

³ Sa sini nga artikulo, binagbinagon naton ang mga pamangkot parte sa tagna sa Genesis 3:15: Sin-o ang mga karakter nga ginsambit sa sini nga tagna? Paano natuman ini nga tagna? Kag paano kita nagabenepisyo sa sini?

4. Sin-o ang “man-ug,” kag paano naton ini nabal-an?

⁴ Nalakip sa mga karakter nga ginsambit sa Genesis 3:14, 15 amo ang “man-ug,” ang “kaliwat” sang man-ug, ang “babayi,” kag ang “kaliwat” sang babayi. Ginasugid sang Biblia kon sin-o ang ginapatuhuyan sang kada karakter. * Umpisahan naton sa “man-ug.” Kon isa ka matuod nga man-ug ang ginhukman ni Jehova sa hardin sang Eden, indi gid sini mahangpan si Jehova. Gani posible nga isa ka maalam nga tinuga ang iya ginaistorya. Sin-o ini? Ginasugid sang Bugna 12:9 ang sabat. Nagsiling ini nga “ang orihinal nga man-ug” amo si Satanas nga Yawa. Pero sin-o ang kaliwat sang man-ug?

5. Sin-o ang kaliwat sang man-ug?

⁵ Kon kaisa, ginagamit sang Biblia ang tinaga nga “kaliwat” para ilaragway ang mga nagailog sa mga ginahimo sang gusto nila ilugon. Matawag nga mga anak ang mga nagailog, kag matawag naman nga amay ang ila ginailog. Gani ang kaliwat sang man-ug nagapatuhoy sa indi matutom nga mga anghel kag mga tawo nga nagarebelde kay Jehova nga Dios kag nagapamatok sa Iya katawhan, pareho sa ginahimo ni Satanas. Nalakip sa sini ang mga anghel nga nagbiya sa ila asaynment sa langit sang panahon ni Noe, kag ang malain nga mga tawo nga nagailog sa ila amay nga amo ang Yawa.—Gen. 6:1, 2; Juan 8:44; 1 Juan 5:19; Jud. 6.

6. Ngaa indi puede nga si Eva ang “babayi”?

⁶ Hibaluon naman naton kon sin-o ang “babayi.” Indi puede nga sia si Eva. Ngaa  masiling naton ini? Ari ang isa ka rason. Suno sa tagna, “dugmukon” sang kaliwat sang babayi ang ulo sang man-ug. Ginbinagbinag naton nga ang man-ug amo ang malain nga anghel nga si Satanas. Indi gid masarangan sang indi perpekto nga tawo nga kaliwat ni Eva nga dugmukon si Satanas. Gani paano malaglag si Satanas?

7. Suno sa Bugna 12:1, 2, 5, 10, sin-o ang babayi nga ginsambit sa Genesis 3:15?

⁷ Ginasugid sang katapusan nga libro sang Biblia kon sin-o ang babayi nga ginsambit sa Genesis 3:15. (Basaha ang Bugna 12:1, 2, 5, 10.) Indi sia isa ka babayi sa duta. Ang bulan ara sa idalom sang iya mga tiil, kag ang korona sa iya ulo 12 ka bituon. Nagbun-ag sia sang isa ka anak nga lalaki nga amo ang Ginharian sang Dios. Bangod ang Ginharian ara sa langit, ang babayi dapat ara man sa langit. Gani ang babayi amo ang langitnon nga bahin sang organisasyon ni Jehova nga ginahuman sang iya matutom nga mga anghel.—Gal. 4:26.

8. Sin-o ang panguna nga kaliwat sang babayi, kag san-o sia nangin panguna nga kaliwat? (Genesis 22:15-18)

⁸ Ginasugid man sang Pulong sang Dios kon sin-o ang panguna nga kaliwat sang babayi. Suno sa tagna, mangin kaliwat sia ni Abraham. (Basaha ang Genesis 22:15-18.) Natuman gid ini nga tagna kay si Jesus nangin kaliwat sinang matutom nga tawo. (Luc. 3:23, 34) Pero ang kaliwat sang babayi dapat nga mas gamhanan sa isa ka tawo kay dugmukon niya si Satanas nga Yawa. Para mahimo ini, sang mga 30 anyos si Jesus, ginhaplasan sia sang balaan nga espiritu bilang Anak sang Dios. Sang ginhaplasan si Jesus, nangin panguna sia nga kaliwat sang babayi. (Gal. 3:16) Pagkatapos napatay si Jesus kag nabanhaw, ‘ginkoronahan sia sang Dios sing himaya kag dungog’ kag ginhatag sa iya “ang bug-os nga awtoridad sa langit kag sa duta.” Nalakip sa iya awtoridad ang ‘pagguba sa mga binuhatan sang Yawa.’—Heb. 2:7; Mat. 28:18; 1 Juan 3:8.

9-10. (a) Sin-o ang ikaduha nga bahin sang kaliwat sang babayi, kag san-o sila nangin bahin sini? (b) Ano naman ang binagbinagon naton?

⁹ Pero may ikaduha nga bahin ang kaliwat sang babayi. Ginsugid ni apostol Pablo kon sin-o sila sang ginsilingan niya ang mga Judiyo kag mga Gentil nga hinaplas nga mga Cristiano: “Kon kamo iya sang Cristo, kaliwat gid kamo ni Abraham, mga manunubli suno sa saad.” (Gal. 3:28, 29) Sang ginhaplasan ni Jehova sang balaan nga espiritu ang isa ka Cristiano, nangin bahin sia sang kaliwat sang babayi. Gani ang kaliwat ginahuman ni Jesucristo kag sang 144,000 nga kaupod niya nga mga manuggahom. (Bug. 14:1) Ginailog gid nila ang ila Amay nga si Jehova nga Dios.

¹⁰ Nabal-an na naton kon sin-o ang mga karakter nga ginsambit sa Genesis 3:15. Binagbinagon naman naton kon ano ang ginahimo ni Jehova para matuman ini nga tagna kag kon paano kita nagabenepisyo sa sini.

11. Ano ang buot silingon sang tagna nga pilasan ang kaliwat sang babayi sa “iya tikod”?

¹¹ Suno sa tagna sa Genesis 3:15, pilasan sang man-ug ang kaliwat sang babayi sa “iya tikod.” Ginhimo ina ni Satanas sang gin-impluwensiahan niya ang mga Judiyo kag mga Romano nga patyon ang Anak sang Dios. (Luc. 23:13, 20-24) Kon mapilasan ang isa ka tawo sa iya tikod, posible nga indi sia makalakat sing pila ka adlaw. Daw pareho sa sini ang natabo kay Jesus. Sang napatay sia, wala sia sing may nahimo sa sulod sang halos tatlo ka adlaw.—Mat. 16:21.

12. Paano dugmukon ang ulo sang man-ug, kag san-o ini matabo?

 ¹² Para matuman ang tagna sa Genesis 3:15, indi puede nga magpabilin si Jesus sa lulubngan. Ngaa? Kay suno sa tagna, dugmukon sang kaliwat ang ulo sang man-ug. Gani dapat nga mabanhaw si Jesus. Kag amo gid sina ang natabo. Sa ikatlo nga adlaw sa tapos sia mapatay, ginbanhaw si Jesus para magkabuhi sing imortal sa langit. Sa gintalana nga tion sang Dios, dugmukon ni Jesus si Satanas. (Heb. 2:14) Laglagon sang Cristo kag sang kaupod niya nga mga manuggahom ang tanan nga kaaway sang Dios sa duta nga amo ang kaliwat sang man-ug.—Bug. 17:14; 20:4, 10. *

13. Paano kita nagabenepisyo sa sini nga tagna?

¹³ Kon isa ikaw ka alagad sang Dios, nagabenepisyo ka sa sini nga tagna. Nagkabuhi si Jesus sa duta bilang isa ka tawo. Kag perpekto niya nga gin-ilog ang mga kinaiya sang iya Amay. (Juan 14:9) Gani bangod gintun-an naton ang kabuhi ni Jesus, nakilala naton kag ginhigugma si Jehova nga Dios. Kag bangod ginapangunahan ni Jesus ang Cristianong kongregasyon subong, nakabenepisyo man kita sa iya mga panudlo kag mga instruksion. Gintudluan niya kita kon paano mapahamut-an si Jehova paagi sa aton pagkabuhi. Kag nakabenepisyo gid kita tanan sa pagpilas sa tikod ni Jesus ukon sa iya kamatayon. Paano? Pagkatapos ginbanhaw si Jesus, ginbaton ni Jehova ang iya perpekto nga halad nga “nagatinlo sa aton sa tanan naton nga sala.”—1 Juan 1:7.

14. Ngaa masiling naton nga magaligad pa ang tion antes matuman ang gintagna ni Jehova sa Eden?

¹⁴ Mahangpan naton sa gintagna ni Jehova sa Eden nga magaligad pa ang tion antes ini matuman sing bug-os. Kinahanglan sang tion para mabun-ag sang babayi ang ginpromisa nga kaliwat, para matipon sang Yawa ang iya mga sumulunod, kag para magluntad ang kaawayon (ukon, dumot) sa duha ka grupo. Bangod nahangpan naton ini nga tagna, napaandaman kita nga dumtan sang kalibutan nga ginakontrol ni Satanas ang mga alagad ni Jehova. Amo man ini ang ginpaandam ni Jesus sa iya mga disipulo. (Mar. 13:13; Juan 17:14) Sang nagligad nga 100 ka tuig, nakita naton nga natuman ang pila ka bahin sini nga tagna. Paano?

15. Ngaa ginadumtan pa gid sang kalibutan ang katawhan sang Dios, pero ngaa indi kita dapat mahadlok kay Satanas?

¹⁵ Sang 1914, ginhimo si Jesus nga Mesianiko nga Hari. Wala madugay pagkatapos sini, gintagbong si Satanas sa duta kag nagahulat na lang sia sang paglaglag sa iya. (Bug. 12:9, 12) Pero wala sia nagapahimunong. Akig gid si Satanas, gani ginpaukpan niya ang katawhan sang Dios. (Bug. 12:13, 17) Bangod sini, ginadumtan pa gid sang kalibutan ni Satanas ang katawhan sang Dios. Pero, indi kita dapat mahadlok kay Satanas kag sa iya mga sumulunod. Sa baylo, dapat kita magsalig pareho sa pagsalig ni apostol Pablo. Nagsulat sia: “Kon ang Dios dampig sa aton, sin-o ang makadaug sa aton?” (Roma 8:31) Natuman na ang kalabanan nga bahin sang tagna sa Genesis 3:15. Nagapabakod pa gid ini sang aton pagsalig kay Jehova.

16-18. Paano nakabenepisyo sanday Curtis, Ursula, kag Jessica kay nahangpan nila ang Genesis 3:15?

¹⁶ Ang promisa ni Jehova sa Genesis 3:15 makabulig sa aton nga mabatas ang bisan  ano nga kabudlayan. Si Curtis, nga isa ka misyonero sa Guam, nagsiling: “May mga tion nga nakaeksperiensia ako sang mga kabudlayan nga nagtilaw sang akon katutom kay Jehova. Pero sang ginpamalandungan ko ang tagna sa Genesis 3:15, nakabulig ini sa akon nga padayon nga magsalig sa akon Amay sa langit.” Ginapaabot gid ni Curtis ang tion nga dulaon na ni Jehova ang tanan nga kabudlayan.

¹⁷ Nagsiling ang isa ka sister nga si Ursula nga taga-Bavaria nga sang nahangpan niya ang Genesis 3:15, nangin kumbinsido gid sia nga gingiyahan sang Dios ang pagsulat sang Biblia. Nagdayaw gid sia sang natun-an niya ang koneksion sini nga tagna sa iban pa nga mga tagna. Nagsiling pa sia: “Sang natun-an ko nga may ginhimo dayon si Jehova para hatagan kita sing paglaum, mas ginpalangga ko pa gid sia.”

¹⁸ Si Jessica nga taga-Micronesia nagsiling: “Indi ko gid malipatan ang ginbatyag ko sang natun-an ko ang kamatuoran. Nagakatuman gid subong ang tagna sa Genesis 3:15. Nagapahanumdom ini sa akon nga indi katuyuan ni Jehova ang pag-antos nga naeksperiensiahan naton subong. Ini nga tagna nakabulig man sa akon nga magsalig pa gid nga ang pag-alagad kay Jehova amo ang makahatag sa akon sang pinakamaayo nga kabuhi subong kag mas maayo nga kabuhi sa palaabuton.”

19. Ngaa makasalig kita nga matuman ang katapusan nga bahin sang tagna?

¹⁹ Natun-an naton nga nagakatuman subong ang tagna sa Genesis 3:15. Nabal-an naton kon sin-o ang kaliwat sang babayi kag ang kaliwat sang man-ug. Si Jesus, nga amo ang panguna nga kaliwat sang babayi, nag-ayo na sa iya pilas sa tikod kag nagagahom na sia bilang gamhanan kag imortal nga Hari. Subong, malapit na lang makompleto ang ikaduha nga bahin sang kaliwat. Natuman na ang una nga bahin sang tagna, gani makasalig kita nga matuman man ang katapusan nga bahin sini nga amo ang pagdugmok sa ulo sang man-ug. Sigurado nga malipay gid ang mga alagad sang Dios kon malaglag na si Satanas. Gani, indi kita dapat mag-untat sa pag-alagad. Makasalig gid kita sa aton Dios. Paagi sa kaliwat sang babayi, pakamaayuhon niya sing bugana “ang tanan nga pungsod sa duta.”—Gen. 22:18.