1. Ano ang kabubut-on ni Jehova subong?

 SUBONG, kabubut-on sang Dios nga ibantala ang maayong balita sang Ginharian sa bug-os nga duta. (Mar. 13:10; 1 Tim. 2:3, 4) Hilikuton ini ni Jehova. Importante gid ini sa iya amo nga gintangdo niya mismo ang iya pinalangga nga Anak para pangunahan ini. Makasigurado kita nga bangod si Jesus ang nagapanguna sa aton, matapos gid ang pagbantala nga hilikuton suno sa gusto ni Jehova antes mag-abot ang katapusan.—Mat. 24:14.

2. Ano ang binagbinagon naton sa sini nga artikulo?

² Sa sini nga artikulo, binagbinagon naton kon paano ginagamit ni Jesus ang “matutom kag mainandamon nga ulipon” para hatagan kita sang mga instruksion halin sa Pulong sang Dios kag para mangin organisado ang pinakamasangkad nga pagbantala nga ginahimo sang iya mga sumulunod subong. (Mat. 24:45) Binagbinagon man naton ang puede himuon sang kada isa sa aton para masuportahan si Jesus kag ang matutom nga ulipon.

3. Ano nga awtoridad ang ginhatag kay Jesus?

³ Ginapangunahan ni Jesus ang pagbantala. Ngaa sigurado kita sa sini? Antes nagpalangit si Jesus, nakigkita sia sa pila niya ka matutom nga sumulunod sa isa ka bukid sa Galilea. Ginsilingan niya sila: “Ginhatag sa akon ang bug-os nga awtoridad sa langit kag sa duta.” Talupangda ang masunod niya nga ginsiling: “Gani kadtui ninyo ang mga tawo sa tanan nga pungsod kag tudlui ninyo sila agod mangin disipulo ko.” (Mat. 28:18, 19) Gani, nalakip sa awtoridad nga ginhatag kay Jesus amo ang pagpanguna sa pagbantala.

4. Ngaa makasigurado kita nga ginapangunahan gihapon ni Jesus ang pagbantala?

 ⁴ Nagsiling si Jesus nga ang pagbantala kag ang pagtudlo sa mga tawo himuon sa “tanan nga pungsod” kag mangin kaupod sia sang iya mga sumulunod “sa tanan nga tion tubtob sa hingapusan sang sistema sang mga butang.” (Mat. 28:20) Ginapakita sang ginsiling ni Jesus nga ginapangunahan niya gihapon ang pagbantala asta subong.

5. Paano kita nagabulig para matuman ang tagna sa Salmo 110:3?

⁵ Wala nabalaka si Jesus nga sa hingapusan sang sistema sang mga butang basi diutay lang ang manugbantala. Nagasalig sia nga matuman ang tagna nga ginsiling sang salmista: “Ang imo katawhan magahalad sing kinabubut-on sang ila kaugalingon sa adlaw nga tipunon mo ang imo kasuldadusan.” (Sal. 110:3) Gani ang imo pagpakigbahin sa pagbantala nagapakita nga ginasuportahan mo si Jesus kag ang matutom nga ulipon kag nagabulig ka para matuman ina nga tagna. Malapit na lang matapos ang pagbantala nga hilikuton, pero may mga kabudlayan ini.

6. Ano ang isa ka kabudlayan sang mga manugbantala sang Ginharian subong?

⁶ Ang isa ka kabudlayan sang mga manugbantala sang Ginharian amo ang pagpamatok. Indi matuod nga mga impormasyon ang ginasugid sang mga apostata, mga lider sang relihion, kag mga pulitiko sa madamo nga tawo parte sa aton hilikuton. Ang pila sa aton mga paryente, kakilala, kag kaupod sa trabaho posible magpati sa sini nga mga impormasyon, gani posible nga piliton nila kita nga mag-untat sa pag-alagad kay Jehova kag sa pagbantala. Sa iban nga pungsod, ginapahog sang aton mga kaaway ang aton mga kauturan, ginasakit sila, ginadakop, kag ginapriso. Wala na kita natingala sa sini. Nagtagna si Jesus: “Dumtan kamo sang tanan nga pungsod bangod sa akon ngalan.” (Mat. 24:9) Gani ang pagdumot sang mga tawo sa aton nagapakita nga ginasunod naton ang halimbawa ni Jesus kag nalipay sa aton si Jehova. (Mat. 5:11, 12) Si Satanas ang nagaimpluwensia sa mga tawo nga pamatukan kita. Pero mas gamhanan si Jesus sa iya. Paagi sa bulig ni Jesus, ginabantala ang maayong balita sa mga tawo sa tanan nga pungsod. Binagbinagon naton ang pamatuod sini.

7. Ano nga pamatuod ang nakita mo nga nagakatuman subong ang tagna sa Bugna 14:6, 7?

⁷ Lainlain man ang lenguahe sang mga tawo nga ginabantalaan naton. Pero sa palanan-awon nga ginhatag ni Jesus kay apostol Juan, gintagna ni Jesus nga mabantala naton gihapon ang maayong balita bisan pa sa sina nga kabudlayan. (Basaha ang Bugna 14:6, 7.) Paano? Ginatinguhaan naton nga masugid sa mas madamo nga tawo ang mensahe sang Ginharian. Subong, ang mga impormasyon nga nabase sa Biblia sa aton website nga jw.org mabasa sa sobra 1,000 ka lenguahe. Gani, posible ini mabasa sang mga tawo sa bilog nga kalibutan. Gin-aprobahan nga i-translate sa sobra 700 ka lenguahe ang libro nga Magkabuhi sing Wala Katapusan! nga amo ang panguna naton nga ginagamit sa pagtudlo sa iban. May ginhimo man nga mga video para sa mga apa, kag braille nga mga publikasyon para sa mga bulag. Gani makabenepisyo sila sa mga instruksion nga nabase sa Biblia. Nagakatuman gid ang mga tagna sa Biblia subong. Ginatun-an sang mga tawo “halin sa tanan nga lenguahe sang mga pungsod” ang “putli nga lenguahe” sang kamatuoran sa Biblia. (Zac. 8:23; Sof. 3:9) Natuman ini tanan sa pagpanguna ni Jesucristo.

8. Ano na ang mga resulta sang aton pagbantala?

⁸ Subong, sobra 8,000,000 ka tawo halin sa 240 ka kadutaan ang bahin sang organisasyon ni Jehova, kag kada tuig linibo ang ginabawtismuhan. Talalupangdon ang ila kadamuon, pero  mas talalupangdon ang “bag-o nga personalidad” ukon ang Cristianong mga kinaiya nga ginapakita sining bag-o nga mga disipulo. (Col. 3:8-10) Madamo sa ila ang indi na imoral, indi na bayolente, wala na nagapasulabi, kag wala na nagapensar nga mas maayo ang ila pungsod. Nagakatuman gid ang tagna sa Isaias 2:4 nga “indi na sila magtuon sa pagpakig-away.” Kon panikasugan naton nga ipakita ang bag-o nga personalidad, mapalig-on ang mga tawo nga mangin bahin sang organisasyon sang Dios, kag ginapakita man naton nga ginasunod naton ang aton manugtatap nga si Cristo Jesus. (Juan 13:35; 1 Ped. 2:12) Natabuan lang bala ini tanan? Wala. Ginabuligan kita ni Jesus nga mahimo ini.

9. Suno sa Mateo 24:45-47, ano ang matabo sa tion sang katapusan?

⁹ Basaha ang Mateo 24:45-47. Gintagna ni Jesus nga sa tion sang katapusan, magatangdo sia sang “matutom kag mainandamon nga ulipon” para hatagan kita sang mga instruksion halin sa Pulong sang Dios. Gani mapaabot naton nga madamo gid sing himuon sa aton tion subong ini nga ulipon. Nagakatuman gid ini. Ginagamit ni Jesus ang gamay nga grupo sang mga hinaplas para hatagan sing espirituwal nga “pagkaon sa nagakaigo nga tion” ang katawhan sang Dios kag ang mga interesado. Wala ginakabig sini nga mga hinaplas nga agalon sila sang pagtuo sang iban. (2 Cor. 1:24) Para sa ila, si Jesucristo amo ang “lider kag pangulo” sang iya katawhan.—Isa. 55:4.

10. Ano nga publikasyon nga makita sa piktyur ang nagkumbinsi sa imo nga mag-alagad kay Jehova?

¹⁰ Halin pa sang 1919, sarisari na nga publikasyon ang ginhimo sang matutom nga ulipon. Paagi sa sini, natun-an sang mga interesado ang kamatuoran sa Pulong sang Dios sa pinakauna nga tion. Sang 1921, ginhimo sini nga ulipon ang libro nga The Harp of God para buligan ang  mga interesado nga matun-an ang panguna nga mga panudlo sang Biblia. Samtang nagabag-o ang kahimtangan, may iban pa nga mga publikasyon nga ginhimo. Ano nga publikasyon ang nakabulig sa imo nga makilala kag higugmaon ang aton Amay sa langit? Ang publikasyon bala nga “Pakamatuura Ang Dios,” Ang Kamatuoran nga Nagadul-ong sa Kabuhi nga Dayon, Mahimu Ka Mabuhi sing Dayon sa Paraiso sa Duta, Ang Ihibalo nga Nagadul-ong sa Kabuhi nga Walay Katapusan, Ano Gid ang Ginatudlo sang Biblia?, Ano ang Ginatudlo sang Biblia sa Aton?, ukon ang Magkabuhi sing Wala Katapusan!, nga pinakabag-o naton nga publikasyon? Sang ginhimo ini nga mga publikasyon, suno gid ini sa tion kag bagay gid ini sa kahimtangan.

11. Ngaa dapat naton tanan dugangan ang aton nahibaluan parte kay Jehova kag sa Biblia?

¹¹ Dapat dugangan sang bag-uhan nga mga interesado ang ila nahibaluan parte kay Jehova kag sa Biblia. Pero indi lang sila ang dapat maghimo sini. Dapat naton ini himuon tanan. Si apostol Pablo nagsulat: “Ang matig-a nga pagkaon para sa hamtong nga mga tawo.” Nagsiling pa si Pablo nga ang pag-aplikar sang aton natun-an sa Biblia makabulig sa aton nga “makilala ang maayo kag malain.” (Heb. 5:14) Posible nga mabudlay gid nga sundon ang mga kasuguan ni Jehova kay madamo nga tawo ang grabe na gid ka imoral subong. Pero ginasigurado ni Jesus nga matun-an naton ang mga instruksion nga makapabakod sang aton pagtuo. Ini nga mga instruksion nabase sa Pulong sang Dios, ang Biblia. Paagi sa paggiya ni Jesus, ginahanda ini sang matutom nga ulipon kag ginahatag sa aton.

12. Pareho kay Jesus, paano naton ginapadunggan ang ngalan sang Dios?

¹² Pareho kay Jesus, ginapadunggan man naton ang ngalan sang Dios. (Juan 17:6, 26) Halimbawa, sang 1931, gintawag kita nga mga Saksi ni Jehova, kag nabase ini sa Kasulatan. Paagi  sa sini, ginapakita naton nga importante sa aton ang ngalan sang Dios, kag gusto naton nga tawgon sa ngalan sang aton Amay sa langit. (Isa. 43:10-12) Kag sugod sang Oktubre sina nga tuig, makita sa kober sini nga magasin ang ngalan sang Dios. Kag sa Bag-ong Kalibutan nga Badbad sang Balaan nga Kasulatan, ginbalik ang ngalan sang Dios sa mga teksto diin makita ini sa orihinal nga sinulatan. Tuhay gid ini sa ginhimo sang mga relihion sang Cristiandad kay gindula nila ang ngalan ni Jehova sa madamo nila nga translation sang Biblia.

13. Ngaa kumbinsido ka nga ginagamit ni Jesus subong ang “matutom kag mainandamon nga ulipon”? (Juan 6:68)

¹³ Paagi sa “matutom kag mainandamon nga ulipon,” nakahimo si Jesus sang dalayawon nga organisasyon sa duta para suportahan ang putli nga pagsimba. Ano ang masiling mo parte sa sini nga organisasyon? Posible nga masiling mo man ang ginsiling ni apostol Pedro kay Jesus: “Kay sin-o kami makadto? Ikaw ang may pinamulong sang kabuhi nga wala sing katapusan.” (Juan 6:68) Ano ayhan ang kabuhi naton subong kon indi kita bahin sang organisasyon ni Jehova? Paagi sa sini nga organisasyon, ginasigurado sang Cristo nga makabaton kita sang mga instruksion nga makabulig sa aton nga mangin matutom sa Dios. Ginahanas man niya kita para mangin mas epektibo kita sa aton pagbantala kag pagtudlo sa iban. Kag ginabuligan niya kita nga mapakita ang “bag-o nga personalidad” para mapahamut-an naton si Jehova.—Efe. 4:24.

14. Bilang bahin sang organisasyon ni Jehova, paano ka nakabenepisyo sa tion sang COVID-19 nga pandemic?

¹⁴ Sa tion sang kabudlayan, may ginahatag si Jesus nga praktikal nga mga instruksion. Naeksperiensiahan naton ang mga benepisyo sini  sang nagsugod ang COVID-19 nga pandemic. Madamo nga tawo sa kalibutan ang indi kabalo sang ila himuon, pero ginhatagan kita ni Jesus sang maathag nga mga instruksion para maamligan naton ang aton kaugalingon. Ginpalig-on kita nga kon magkadto kita sa publiko nga mga lugar, dapat kita magsuksok sing face mask kag magdistansia sa iban. Ginpahanumdom man ang mga gulang nga regular nga kontakon ang tanan nga kauturan sa kongregasyon, kag hibaluon kon paano sila mabuligan para maamligan ang ila kaugalingon kag mangin suod kay Jehova. (Isa. 32:1, 2) Nakabaton man kita sing mga instruksion kag pagpalig-on sa mga update sang Nagadumala nga Hubon.

15. Ano nga mga instruksion ang aton nabaton parte sa paghiwat sang mga miting kag pagbantala sa tion sang pandemic, kag ano ang resulta?

¹⁵ Sa tion sang pandemic, nakabaton man kita sing mga instruksion kon paano hiwaton ang mga miting sang kongregasyon kag kon paano himuon ang pagbantala. Kadasig gid sang mga instruksion kay ginhiwat naton dayon ang aton mga miting, mga asembleya, kag mga kombension paagi sa videoconference. Kag ginhimo naton ang pagbantala paagi sa paghimo sing sulat kag pagtawag sa telepono. Ginpakamaayo gid ni Jehova ang aton mga panikasog. Madamo nga branch office ang nagreport nga tumalagsahon ang pagdamo sang ila mga manugbantala. Kag madamo nga kauturan ang may makapalig-on nga mga eksperiensia sa sini nga tion.—Tan-awa ang kahon nga “ Ginapakamaayo ni Jehova ang Aton Pagbantala.”

16. Sa ano kita makasalig?

¹⁶ Posible nga ginahunahuna sang iban nga nasobrahan sa paghalong ang organisasyon sa tion sang pandemic. Pero madamo nga beses nga napamatud-an naton nga may basihan gid ang mga instruksion nga aton nabaton. (Mat. 11:19) Mahigugmaon gid nga ginapangunahan ni Jesus ang iya katawhan. Kon pamalandungan naton ini, makasalig kita nga bisan ano man ang matabo sa palaabuton, indi gid kita pagpabay-an ni Jehova kag sang iya pinalangga nga Anak.—Basaha ang Hebreo 13:5, 6.

17. Ano ang nabatyagan mo kay ginapangunahan kita ni Jesus?

¹⁷ Nalipay gid kita kay ginapangunahan kita ni Jesus. May paghiusa gid sa aton organisasyon bisan pa lainlain ang aton kultura, pungsod, kag lenguahe. Madamo kita sing nabaton nga instruksion halin sa Pulong sang Dios, kag ginahanas kita kon paano magbantala. Ginatudluan man kita kon paano ipakita ang bag-o nga personalidad kag maghigugmaanay. Gani ginapabugal gid naton ang aton manugtatap nga si Jesus.