Isa ka gulang si Tatay sa United Church of Canada. Gani kada semana, ginapakadto niya kami sang akon manghod nga babayi sa simbahan para mag-attend sa ginatawag nga Sunday school. Dayon nagaupod kami sa iya sa misa nga nagaumpisa sa alas onse sang aga. Pagkahapon, nagaupod kami kay Nanay sa Kingdom Hall. Nakita gid namon ang kinalain sang duha ka relihion.

Ginsugid ni Nanay ang iya mga natun-an sa Biblia sa iya madugay na nga mga abyan nga sanday Bob kag Marion Hutcheson, kag nangin Saksi ni Jehova man sila. Sang 1958, gin-upod ako sang mag-asawa nga Hutcheson kag sang ila tatlo ka bata nga lalaki sa Divine Will International Assembly sa New York City. Walo ka adlaw ini nga kombension. Kon ginadumdom ko ini, ginapamensar ko nga grabe gali ang ila sakripisyo para iupod ako sadto nga tion. Ini nga kombension amo ang isa sa indi ko gid malipatan nga eksperiensia sa akon kabuhi.

Sang tin-edyer ako, nagaistar kami sa uma. Nanamian ako magsagod sang mga sapat, gani gusto ko gid nga mangin isa ka veterinarian. Ginsugid ni Nanay sa isa ka gulang ang akon plano. Mainayuhon ako nga ginpahanumdom sini nga gulang nga ari na kita “sa katapusan nga mga adlaw,” kag ginpahunahuna niya sa akon ang posible mangin epekto sang pag-eskwela sa unibersidad sing pila ka tuig sa akon kaangtanan kay Jehova. (2 Tim. 3:1) Bangod sini, wala ako nag-eskwela sa unibersidad.

Pero nagapalibog gihapon ako kon ano ang himuon ko pagkatapos ko high school. Naga-preaching ako kada semana, pero wala ako nanamian sa sini kag wala ako plano nga magpayunir. Sa sini man nga tion, gusto sang akon indi Saksi nga amay kag tiyo nga mag-obra ako sa isa ka daku nga insurance  company sa Toronto. May mataas nga posisyon ang akon tiyo sa sini nga kompanya, gani nag-obra ako didto.

Sa Toronto, pirme ako naga-overtime kag indi mga Saksi ang akon pirme mga upod. Bangod sini, indi regular ang akon pag-attend sa mga miting kag pag-preaching. Sa umpisa, nag-istar ako sa akon lolo nga indi Saksi. Pero sang napatay sia, kinahanglan ko mangita sang iban nga ilistaran.

Ginpaistar ako sang pamilya Hutcheson sa ila balay. Daw mga ginikanan ko na ang mag-asawa nga Hutcheson nga nagsakripisyo para iupod ako sa isa ka kombension sang 1958. Samtang nagaistar ako sa ila balay, ginbuligan nila ako nga magbakod ang akon kaangtanan kay Jehova. Sang 1960, nabawtismuhan ako upod sa ila bata nga si John. Nagpayunir si John, gani napalig-on ako nga dugangan ang akon tion sa pag-preaching. Nakita sang mga kauturan ang akon pag-uswag sa espirituwal. Sang ulihi, gintangdo ako nga magdumala sang Teokratikong Eskwelahan Para sa Ministeryo. a

Sang 1966, ginpakaslan ko si Randi Berge. Matutom sia nga payunir nga gusto gid mag-alagad sa lugar nga diutay lang ang manugbantala. Ginbuligan kami kag ginpalig-on sang amon circuit overseer nga magsaylo sa kongregasyon sa Orillia, Ontario. Gani nagsaylo kami dayon didto.

Pag-abot namon sa Orillia, nagpayunir ako dayon. Napalig-on gid ako sa kalipay ni Randi sa pagpayunir, gani ginpanikasugan ko gid nga mangin maayo nga payunir. Nalipay gid ako kon ginagamit ko ang Biblia para ipaathag sa mga tawo ang kamatuoran kag kon makita ko nga nahangpan nila ini. Halimbawa, nalipay gid ako sang nabuligan ko ang isa ka mag-asawa sa Orillia nga maghimo sang mga pagbag-o sa ila kabuhi kag mangin alagad ni Jehova.

Sang nagkadto kami sa Toronto, nakilala ko si Arnold MacNamara, nga isa sa mga brother nga nagapanguna sa Bethel. Ginpamangkot niya ako  kon gusto namon mangin espesyal payunir. Nagsabat ako dayon, “Huo, basta indi lang sa Quebec.” Indi maayo ang ginahunahuna sang mga tawo sa Canada nga nagahambal sang English parte sa mga tawo sa Quebec nga nagahambal sang French. Naimpluwensiahan ako sang panghunahuna sini nga mga tawo. Sadto nga tion, nagaprotesta sa gobierno ang mga tawo sa Quebec kag gusto nila nga mangin independiente ang probinsia sang Quebec.

Nagsabat si Arnold, “Sa sini nga tion, sa Quebec lang nagapadala sang mga espesyal payunir ang branch office.” Nagpasugot ako dayon bangod kabalo ako nga gusto ni Randi nga mag-alagad didto. Sang ulihi, narealisar ko nga isa ini sa pinakamaayo nga desisyon nga ginhimo namon.

Pagkatapos namon mag-eskwela sing French sa sulod sang lima ka semana, nagkadto kami ni Randi sa Rimouski, nga mga 540 ka kilometro sa aminhan-sidlangan sang Montreal. Kaupod namon sa amon pagbiyahe ang isa pa ka mag-asawa. Madamo pa kami sang dapat matun-an sa bag-o nga lenguahe. Narealisar ko ini sang ginbasa ko ang pila ka pahibalo sa amon miting. Nagsiling ako nga sa amon nagahilapit nga kombension, madamo kita sang “ostrich nga mga delegado” imbes nga “Austrian nga mga delegado.”

Sa Rimouski, nag-istar kami nga apat sa isa ka balay. Gin-updan kami sa sini nga balay sang apat ka matutom nga sister, nanday Brother kag Sister Huberdeau, kag sang ila duha ka bata nga babayi. Isa ini ka daku nga balay nga gin-arkilahan sang mag-asawa nga Huberdeau, kag nagabulig sa pagbayad sa arkila ang tanan nga payunir nga nagaistar diri. Gintawag namon ini nga White House bangod puti ang pinta sang mga haligi sini kag puti man ang dingding sini sa atubang. Sa masami, 12 asta 14 ka tawo ang nagaistar diri. Bangod mga espesyal payunir kami ni Randi, naga-preaching kami kada aga, kada hapon, kag kada gab-i. Nagapasalamat gid kami nga may upod kami pirme sa pag-preaching bisan pa sa mga tion nga naga-snow kag grabe katugnaw kon gab-i.

Nagsuod gid kami sa sining matutom nga mga payunir kag daw nangin pamilya na namon sila. Kon kaisa, nagapungko kami tanan sa palibot sang isa ka campfire ukon dabok. Kag may mga adlaw man nga tingob kami nga nagaluto sang pagkaon. Maayo magtokar sang instrumento ang isa ka brother, gani pirme kami nagakanta kag nagasaot kon Sabado sang gab-i.

Madamo ang interesado magtuon sang Biblia sa Rimouski. Sa sulod sang lima ka tuig, nalipay gid kami nga madamo nga Bible study ang nagpabawtismo kag nalakab-ot sa mga 35 ang kadamuon sang mga manugbantala sa kongregasyon.

Sa Quebec, nahanas kami sing maayo sa pagbantala. Ginabuligan gid kami ni Jehova sa amon pagministeryo kag sa amon mga kinahanglanon. Natun-an man namon nga palanggaon ang mga tawo nga nagahambal sing French. Nanamian gid kami sa ila lenguahe kag sa ila kultura. Bangod sini, nangin mahapos para sa amon nga manamian man sa iban pa nga mga kultura.—2 Cor. 6:13.

Ginpangabay kami sang branch office nga magsaylo sa banwa sang Tracadie, nga ara sa nasidlangan nga baybayon sang New Brunswick. Wala gid namon ini ginpaabot. Medyo mabudlay ini desisyunan bangod bag-o lang kami nakapirma sa isa ka kontrata para arkilahan ang isa ka apartment kag nagaobra ako bilang part-time nga maestro. Dugang pa, bag-o lang nangin mga manugbantala ang pila sa amon mga Bible study kag nagapatindog kami sang Kingdom Hall.

Bilog nga weekend namon ini nga ginpangamuyo. Ginbisitahan namon ang Tracadie, kag nakita namon  nga lain gid ini sa Rimouski. Pero bangod gusto ni Jehova nga magsaylo kami didto, nagsaylo kami. Gintilawan namon si Jehova kag nakita namon kon paano niya gindula ang tanan nga posible nga problema sa amon pagsaylo. (Mal. 3:10) Nangin mahapos ang amon pagsaylo bangod mabakod ang kaangtanan ni Randi kay Jehova, handa sia magsakripisyo, kag pirme sia malipayon.

Si Robert Ross lang ang gulang sa amon bag-o nga kongregasyon. Nagpayunir sia didto upod sa iya asawa nga si Linda, kag nagdesisyon sila nga magpabilin didto sang matawo ang ila subang nga bata nga lalaki. Bisan pa may ginaatipan sila nga gamay pa nga bata, maabiabihon gid sila kag mapisan sa pagbantala. Napalig-on gid kami ni Randi sa ila.

Pagkatapos namon magpayunir sa Tracadie sing duha ka tuig, nakabaton kami liwat sang wala ginapaabot nga sorpresa. Ginpangabay kami nga mag-alagad sa sirkito. Pito ka tuig kami nga nag-alagad sa English nga mga sirkito. Dayon gin-asayn kami sa French nga sirkito sa Quebec. Ang amon district overseer sa Quebec amo si Léonce Crépeault. Ginakomendahan niya ako sa akon mga pamulongpulong, pero pirme niya ako ginapamangkot, “Ano pa ang puede mo himuon para mas mangin maathag pa gid sa mga kauturan kon ano ang dapat nila iaplikar?” b Bangod sang iya bulig, ginpanikasugan ko nga mangin maathag kag simple ang akon paagi sang pagtudlo.

Ang isa sa indi ko gid malipatan nga asaynment amo ang akon asaynment sa “Victorious Faith” International Convention sa Montreal sang 1978. Naasayn ako sa Food Service. Mga 80,000 ka tawo ang ginapaabot namon, kag may bag-o nga kahimusan parte sa pagpakaon sa ila. Bag-o ang mga gamit, ang menu, kag ang paagi sa paghanda sang pagkaon. Mga 20 ang amon dalagku nga mga refrigerator, nga nagakaguba kon kaisa. Antes sang una nga adlaw sang kombension, tungang-gab-i na kami nakasulod sa stadium para magpreparar bangod may nagahampang pa sa stadium. Kag dapat kaagahon pa lang, nagaluto na kami sang pamahaw. Kapoy gid kami, pero napalig-on gid ako sa kaupod ko nga mga boluntaryo. Mapisan sila, responsable, kag pirme malipayon. Suod ko gihapon sila nga mga abyan asta subong. Nalipay gid ako nga masaksihan ining importante nga kombension sa probinsia sang Quebec nga nakaeksperiensia sang grabe nga paghingabot sugod sang 1940 asta sang 1960.

Madamo ako sang natun-an sa kaupod ko nga mga overseer sa amon dalagku nga mga kombension sa Montreal. May tuig nga si David Splane amo  ang convention overseer. Miembro na sia subong sang Nagadumala nga Hubon. Sang ulihi, sang gin-asayn ako nga mangin convention overseer, ginsuportahan gid ako ni David.

Sang 2011, pagkatapos sang 36 ka tuig nga pag-alagad sa sirkito, ginpangabay ako nga mangin instruktor sa School for Congregation Elders. Nakatulog kami ni Randi sa 75 ka lainlain nga tululugan sa sulod sang duha ka tuig. Nalipay gid kami bisan pa may mga sakripisyo. Kada tapos sang semana, grabe gid ang pagpasalamat sang mga gulang bangod nabatyagan nila nga ginabuligan sila sang Nagadumala nga Hubon para mangin mabakod ang ila kaangtanan kay Jehova.

Sang ulihi, nagtudlo ako sa School for Kingdom Evangelizers. Sa masami, nakapoy kag nabalaka ang mga estudyante bangod sang masako nga iskedyul. Mga pito ka oras sila nga nagapungko sa klase kada adlaw, tatlo ka oras sila nga nagatuon kag nagahimo sang ila bahin kada gab-i, kag apat asta lima ang ila bahin kada semana. Ginpaathag ko sa ila kag sang kaupod ko nga instruktor nga indi nila ini masarangan kon wala ang bulig ni Jehova. Naeksperiensiahan gid sang mga estudyante nga kon magsalig sila kay Jehova, mahimo nila ang abi nila indi nila masarangan. Indi ko gid malipatan ang ila kalipay.

Bangod sang kinaiya ni Nanay nga handa sa pagbulig sa iban, nag-uswag ang iya mga Bible study kag nangin interesado si Tatay sa kamatuoran. Pagligad sang tatlo ka adlaw pagkatapos mapatay si Nanay, nakibot gid kami sang nag-attend si Tatay sa Kingdom Hall para mamati sa isa ka pamulongpulong. Padayon sia nga nag-attend sa mga miting sa sulod sang 26 ka tuig. Bisan pa wala nabawtismuhan si Tatay, ginsilingan ako sang mga gulang nga sia pirme ang una nga nagaabot sa mga miting kada semana.

Napalig-on gid kami tanan nga mag-ulutod sa maayo nga halimbawa ni Nanay. Matutom nga nagaalagad kay Jehova ang tatlo ko ka manghod nga babayi pati ang ila mga bana. Ang isa ko ka manghod nagaalagad sa branch office sa Portugal, kag ang isa naman nagaalagad sa branch office sa Haiti.

Subong, mga espesyal payunir kami ni Randi sa Hamilton, Ontario. Sang nagaalagad kami sa sirkito, nalipay kami nga updan ang mga kauturan sa ila mga return visit kag mga Bible study. Pero subong, nalipay gid kami nga makita ang amon mga Bible study nga nagauswag sa espirituwal. Nangin abyan man namon ang mga kauturan sa amon bag-o nga kongregasyon. Maayo man ukon malain ang sitwasyon, ginabuligan gid sila ni Jehova. Napalig-on gid kami sa ila mga eksperiensia.

Kon ginadumdom ko ang mga natabo sa amon kabuhi, nagapasalamat gid ako sa mga nagbulig sa amon. Gani, ginapanikasugan man namon nga ipakita ang amon “hanuot nga pagkabalaka” sa iban, kag ginapalig-on namon sila nga alagaron si Jehova sa bug-os nila nga masarangan. (2 Cor. 7:6, 7) May nakilala kami sadto nga isa ka pamilya nga payunir ang asawa, ang bata nga lalaki, kag ang bata nga babayi. Ginpamangkot ko ang bana kon bala may plano man sia nga magpayunir. Nagsiling sia nga tatlo ka payunir ang iya ginasuportahan. Gani ginpamangkot ko sia, “Sa banta mo, ano ang masarangan mo nga ihatag sa ila nga indi masarangan nga ihatag ni Jehova?” Ginpalig-on ko sia nga magpayunir para mabatyagan niya ang kalipay nga ila nabatyagan. Pagligad sang anom ka bulan, nangin payunir man sia.

Padayon namon nga isugid ni Randi “sa masunod nga kaliwatan” ang parte sa “makatilingala nga mga binuhatan” ni Jehova, kag kabay pa nga mabatyagan man nila ang kalipay nga amon nabatyagan sa pag-alagad kay Jehova.—Sal. 71:17, 18.