Nagapadihon Ka Bala sa Gamhanan nga Maninihon?
“Subong nga ginadihon sang maninihon ang daga, ginadihon ko man kamo.”—JER. 18:6.
1, 2. Ngaa ginkabig sang Dios si Daniel nga “hamili gid nga tawo,” kag paano kita mangin matinumanon pareho ni Daniel?
SANG ginbihag kag gindala ang mga Judiyo sa Babilonia, nakita nila nga ang siudad puno sang mga diosdios kag ang mga tawo nagasimba sa malaut nga mga espiritu. Pero ang matutom nga mga Judiyo, pareho ni Daniel kag sang iya tatlo ka kaupod, wala magpadihon sa mga tawo sa Babilonia. (Dan. 1:6, 8, 12; 3:16-18) Determinado sila nga si Jehova lang ang ila mangin Maninihon. Kag nagmadinalag-on sila sa paghimo sini! Halos bug-os nga kabuhi nga nagtener sa Babilonia si Daniel, pero nakasiling ang anghel sang Dios nga sia “hamili gid nga tawo.”—Dan. 10:11, 19.
2 Sa panahon sang Biblia, ginabutang sang maninihon ang daga sa nagustuhan niya nga hurmahan. Ginakilala sang matuod nga mga sumilimba subong nga si Jehova amo ang Soberano sa uniberso, gani may awtoridad sia sa pagdihon sa mga tawo kag mga pungsod. (Basaha ang Jeremias 18:6.) May awtoridad man ang Dios sa pagdihon sa kada isa sa aton. Pero ginatahod niya ang aton kahilwayan sa pagpili kag luyag niya nga kinabubut-on kita nga magpadihon sa iya. Tun-an naton sa sini nga artikulo kon paano kita mahapos dihunon sang Dios. Binagbinagon naton ang tatlo ka pamangkot: (1) Paano naton malikawan ang mga panimuot nga mahimo mangin rason nga sikwayon naton ang laygay sang Dios? (2) Paano naton mapalambo ang mga kinaiya nga makabulig sa aton nga madihon pirme kag mangin mapinasakupon? (3) Paano matuman sang Cristianong mga ginikanan ang Dios kon nagadihon sang ila kabataan?
LIKAWI ANG MGA PANIMUOT NGA MAHIMO MAKAPATIG-A SANG TAGIPUSUON
3. Ano nga mga panimuot ang mahimo makapatig-a sang aton tagipusuon? Iilustrar.
3 “Labaw sa tanan nga dapat mo bantayan, bantayi ang imo tagipusuon, kay nagahalin sa sini ang mga tuburan sang kabuhi,” siling sang Hulubaton 4:23. Anong malain nga mga panimuot ang dapat naton bantayan? Nagalakip ini sang pagkabugalon, sulitsulit nga sala, kag pagkadula sing pagtuo. Mangin malalison kag rebelyuso ang isa bangod sini. (Dan. 5:1, 20; Heb. 3:13, 18, 19) Si Hari Uzias sang Juda isa nga nangin bugalon. (Basaha ang 2 Cronica 26:3-5, 16-21.) Sang primero, ginhimo niya “ang matarong sa panulok ni Jehova,” kag “nagdangop sia sa Dios.” “Apang, sang mabakod na sia, nangin matinaastaason ang iya tagipusuon,” bisan pa nga ang iya gahom halin sa Dios! Gintinguhaan pa gani niya nga magsunog sing incienso sa templo—isa ka pribilehiyo nga para lamang sa mga saserdote nga kaliwat ni Aaron. Kag sang ginsaway sia sang mga saserdote, naakig gid ang bugalon nga si Uzias! Ang resulta? Ginpakahuy-an sia sang Dios kag napatay sia nga aruon.—Hulu. 16:18.
4, 5. Ano ang matabo kon indi naton pagsikwayon ang bugal? Maghatag sing halimbawa.
4 Kon indi naton pagsikwayon ang bugal, mahimo ‘magapakataas man kita sa aton kaugalingon,’ kag sikwayon na naton ang laygay sang Biblia. (Roma 12:3; Hulu. 29:1) Binagbinaga ang eksperiensia sang isa ka Cristianong gulang nga si Jim nga wala mag-ugyon sa desisyon sang mga gulang sa ila kongregasyon. Nagsiling sia: “Ginsilingan ko sila nga indi sila mahigugmaon, kag wala ko ginpatapos ang miting namon nga mga gulang.” Mga anom ka bulan sang ulihi, nagsaylo sia sa kaingod nga kongregasyon pero wala sia matangdo nga gulang didto. Nagsiling pa sia: “Indi ko mabaton ini amo nga nag-untat ako sa pag-alagad kay Jehova.” Napulo ka tuig sia nga nangin indi aktibo. Gin-aku niya: “Natandog ang akon bugal kag ginbasol ko na si Jehova sa natabo. Pila ka tuig nga ginakadtuan ako sang mga kauturan para buligan pero wala ako magpabulig.”
5 Ginapakita sang eksperiensia ni Jim kon paano ang bugal magapahulag sa aton nga pakamatarungon ang aton mga buhat, amo nga mabudlay na kita dihunon. (Jer. 17:9) “Ang makita ko lang pirme amo ang sayop sang iban,” paathag ni Jim. Naglain bala ang imo buot sa isa ka Cristiano ukon sa pagkadula sang pila ka pribilehiyo? Kon amo, ano ang imo reaksion? Apektado ka bala sang bugal? Ukon ang ginakabalak-an mo gid bala amo ang pagpakighidait sa imo utod kag pagpabilin nga matutom kay Jehova?—Basaha ang Salmo 119:165; Colosas 3:13.
6. Ano ang mahimo matabo kon sulitsulit ang aton sala?
6 Kon sulitsulit ang sala sang isa kag taguon niya ini, mahimo mabudlayan sia sa pagbaton sang laygay halin sa Dios. Mangin mahapos na ang pagpakasala. Ang isa ka utod nagsiling nga wala na sia ginakonsiensia sadto sang iya ginahimo nga sala. (Man. 8:11) Ang isa pa ka utod nga nahuyog anay sa pagtan-aw sang pornograpiya nag-aku sang ulihi: “Pirme ko ginapakalain ang mga gulang.” Ang iya malain nga paggawi nagaguba sang iya kaangtanan kay Jehova. Sang ulihi, nahibaluan ang iya sala kag nabuligan sia. Matuod nga makasasala kita tanan. Pero kon nangin mamulayon kita ukon ginapakamatarong na naton ang aton sayop nga paggawi sa baylo nga mangayo sing pasaylo sa Dios kag magpabulig sa iya, mahimo nga nagatig-a na ang aton tagipusuon.
7, 8. (a) Paano ginpakita sang mga Israelinhon sadto ang epekto sang pagkadula sang pagtuo nga nagpatig-a sang ila tagipusuon? (b) Ano ang leksion sini sa aton?
Num. 14:1-4, 11; Sal. 78:40, 41) Napatay sa kamingawan yadto nga henerasyon bangod sang katig-a sang ila tagipusuon kag pagkadula sang pagtuo.
7 Ang halimbawa sang nagtig-a nga tagipusuon bangod sa pagkadula sang pagtuo amo ang mga Israelinhon nga ginluwas ni Jehova sa Egipto. Nakita sang pungsod ang madamo nga milagro nga ginhimo sang Dios para sa ila, ang pila gani makatilingala gid! Pero sang malapit na sila sa Ginsaad nga Duta, nadula ang ila pagtuo. Sa baylo nga magsalig kay Jehova, hinadlukan sila kag nagkumod kay Moises. Luyag pa gani nila magbalik sa Egipto nga nag-ulipon sa ila! Nasakitan gid si Jehova. “Tubtob san-o nga indi ako pagtahuron sini nga katawhan?” siling niya. (8 Ginatilawan man subong ang aton pagtuo samtang malapit na kita sa bag-ong kalibutan. Dapat usisaon naton ang aton pagtuo. Halimbawa, mahimo naton binagbinagon ang ginsiling ni Jesus sa Mateo 6:33. Pamangkuta ang imo kaugalingon: ‘Ginapakita bala sang akon mga prioridad kag desisyon nga nagapati gid ako sa ginsiling ni Jesus? Indi bala ako magtambong sa mga miting ukon maggua sa latagon para lang madugangan ang akon kita? Ano ang akon himuon kon ginaubos sang obra ang akon tion kag kusog? Tugutan ko bala nga dihunon ako sini nga kalibutan kag pauntaton sa pag-alagad kay Jehova?’
9. Ngaa dapat ‘padayon nga usisaon’ naton kon malig-on ang aton pagtuo, kag paano naton ini mahimo?
9 Binagbinaga ang isa pa ka halimbawa. Ang isa ka alagad ni Jehova nagapangalag-ag sa pagsunod sa mga talaksan sang Biblia, mahimo parte sa mga kaupdanan, pag-disfellowship, ukon sa kalingawan. Pamangkuta ang imo kaugalingon, ‘Amo bala ako sini?’ Kon mamutikan naton nga nagatig-a na ang aton tagipusuon, dapat usisaon naton dayon ang aton pagtuo! “Padayon nga usisaa kon malig-on ang inyo pagtuo; padayon nga pamatud-i kon ano kamo,” laygay sang Biblia sa aton. (2 Cor. 13:5) Usisaa sing maid-id ang imo kaugalingon kag gamita pirme ang Pulong sang Dios sa pagbag-o sang imo panghunahuna.
MAGPADIHON
10. Ano ang makabulig sa aton para mahapos kita dihunon ni Jehova?
10 Ang mga aman sang Dios para mahapos kita dihunon nagalakip sang iya Pulong, Cristianong kongregasyon, kag ministeryo sa latagon. Nagahumok ang daga kon may tubig, gani ang pagbasa kag pagpamalandong sang Biblia kada adlaw makabulig sa aton nga mahapos dihunon ni Jehova. Ginpatuman ni Jehova nga dapat kopyahon sang mga hari sang Israel ang Kasuguan sang Dios kag basahon ini kada adlaw. (Deut. 17:18, 19) Nahibaluan sang mga apostoles nga importante sa ila ministeryo ang pagbasa kag pagpamalandong sang Kasulatan. Ginkutlo nila kag ginpatuhuyan sa ila mga sinulatan sing ginatos ka beses ang Hebreong Kasulatan kag ginpalig-on nila ang ila mapanaksihan nga amo man sini ang himuon. (Binu. 17:11) Nahangpan man naton subong kon daw ano ka importante nga basahon kada adlaw ang Pulong sang Dios kag pamalandungan ini. (1 Tim. 4:15) Makabulig ini sa aton nga mangin mapainubuson kay Jehova kag mahapos niya dihunon.
Gamita ang mga aman sang Dios para mahapos ka dihunon (Tan-awa ang parapo 10-13)
11, 12. Paano ginagamit ni Jehova ang Cristianong kongregasyon sa pagdihon sa aton suno sa aton mismo mga kinahanglanon? Iilustrar.
11 Paagi sa Cristianong kongregasyon, madihon kita ni Jehova suno sa aton mismo mga kinahanglanon. Si Jim nga ginsambit kaina, nagbag-o ang panimuot sang gintalupangod sia sang isa ka gulang. “Wala gid niya ako ginbasol sa akon kahimtangan ukon ginpakalain Indi si Jehova ang Dapat Basulon’ kag ‘Alagara si Jehova sing Maunungon,’ sa Nobiembre 15, 1992, nga Ang Lalantawan.”
ako,” komento ni Jim. “Sa baylo, nangin makapalig-on sia kag luyag gid niya nga magbulig sa akon.” Pagligad sang mga tatlo ka bulan, gin-agda si Jim sang gulang sa miting sang kongregasyon. “Gin-abiabi gid ako sang mga kauturan,” siling ni Jim, “kag natandog gid ako sang ila gugma. Narealisar ko nga indi gid man amo sina ka importante ang akon ginabatyag. Amat-amat nga naglig-on ako paagi sa pagsakdag sang mga kauturan kag sang akon asawa nga wala gid magluya sa espirituwal. Napalig-on man ako sang mga artikulo nga ‘12 Sang ulihi, nangin gulang liwat si Jim. Sugod sadto, nakabulig sia sa mga utod nga may amo man nga mga pagtilaw kag napalig-on sila liwat sa espirituwal. Naghinakop sia: “Abi ko suod na gid ako sadto kay Jehova pero ang matuod indi gali! Naghinulsol ako nga bangod sa bugal, indi ko na makita ang mas importante nga mga butang kag nagpokus lang ako sa mga sayop sang iban.”—1 Cor. 10:12.
13. Ano nga mga kinaiya ang mapalambo naton paagi sa ministeryo sa latagon, kag ano ang mga benepisyo sini?
13 Paano ang ministeryo sa latagon makadihon sa aton para mangin maayo kita? Ang pagpaambit sa iban sang maayong balita makabulig sa aton nga mapalambo ang pagkamapainubuson kag ang mga kinaiya nga ginapatubas sang espiritu sang Dios. (Gal. 5:22, 23) Hunahunaa kon anong maayo nga mga kinaiya ang napalambo mo sa ministeryo. Dugang pa, samtang ginapakita naton ang personalidad sang Cristo, ginapatahom naton ang aton mensahe nga mahimo magpahulag sa pila ka tagbalay. Halimbawa, duha ka Saksi sa Australia ang nangin matinahuron gihapon bisan gin-akigan sila sang tagbalay. Pero narealisar sang tagbalay sang ulihi ang iya ginhimo kag nagsulat sia sa sanga talatapan. Nagsiling sia: “Gusto ko mangayo sing pasaylo sa akon pagkaarogante sa sadtong duha ka tawo nga mapinasensiahon gid kag mapainubuson. Kabuang gid sa akon nga gin-akigan kag ginpahalin sila nga duha kay nagapalapnag lang sila sang Pulong sang Dios.” Masulat bala sing subong sina ang tagbalay kon sa banta niya naakig ang duha ka manugbantala? Mahimo indi. Gani, makabenepisyo gid kita kag ang aton mga isigkatawo bangod sang aton ministeryo!
TUMANA ANG DIOS KON NAGADIHON SANG IMO KABATAAN
14. Ano ang himuon sang mga ginikanan para mangin madinalag-on sila sa pagdihon sang ila kabataan?
14 Kalabanan nga kabataan luyag gid nga magtuon, kag may huyog sila nga magpaubos. (Mat. 18:1-4) Gani mas maayo kon buligan sang mga ginikanan ang ila kabataan nga tun-an kag higugmaon ang kamatuoran. (2 Tim. 3:14, 15) Pero para magmadinalag-on ang mga ginikanan, dapat ipatudok nila anay ang kamatuoran sa ila tagipusuon, nga iaplikar nila ang ila natun-an sa Biblia. Kon himuon ini sang mga ginikanan, mas mahapos sa mga kabataan nga higugmaon ang kamatuoran. Dugang pa, mahangpan sang kabataan nga ang pagdisiplina sa ila pagpakita sang gugma sang ila ginikanan kag ni Jehova.
15, 16. Paano mapakita sang mga ginikanan ang ila pagsalig sa Dios kon ma-disfellowship ang ila anak?
15 Pero bisan pa nga gintudluan sang mga ginikanan ang ila kabataan sang kamatuoran, ang pila ka kabataan nagbiya sa kamatuoran ukon na-disfellowship. Kon matabo ini, apektado gid ang pamilya. “Sang na-disfellowship ang akon magulang nga lalaki,” siling sang isa ka sister sa South Africa, “daw pareho lang nga napatay sia. Puerte gid kasubo!” Ano ang reaksion nila sang iya ginikanan? Ginsunod nila ang sugo sang Pulong sang Dios. (Basaha ang 1 Corinto 5:11, 13.) “Determinado kami nga sundon ang Biblia,” siling sang mga ginikanan, “kay nahibaluan namon nga ang pagtuman sa Dios amo ang pinakamaayo. Gintamod namon ang pag-disfellowship nga disiplina halin kay Jehova kag kumbinsido kami nga ini base sa gugma kag makatarunganon gid. Gani nakig-angot lang kami sa amon anak kon kinahanglanon gid kag parte lang sa pamilya.”
16 Ano ang ginbatyag sang na-disfellowship nga anak? “Nahibaluan ko nga wala ako ginakaugtan sang akon pamilya,” siling niya sang ulihi, “pero nagatuman lang sila kay Jehova kag sa iya organisasyon.” Nagsiling pa sia: “Kon mapilitan ka nga mangayo sing bulig kag pagpatawad ni Jehova, marealisar mo kon daw ano sia ka importante.” Imadyina ang kalipay sang pamilya sang nakapanumbalik ining pamatan-on nga lalaki! Gani kon talupangdon naton ang Dios sa tanan naton nga dalanon, pinakamaayo gid ang resulta.—Hulu. 3:5, 6; 28:26.
17. Ngaa dapat kita pirme magtuman kay Jehova, kag ano nga benepisyo ang matigayon naton?
17 Si manalagna Isaias nagtagna nga ang ginbihag nga mga Judiyo magahinulsol kag magasiling: “O Jehova, ikaw ang amon Amay. Kami ang daga, kag ikaw ang amon Maninihon; kami tanan binuhatan sang imo kamot.” Magapakitluoy pa sila: “Indi pagdumduma sing dayon ang amon sala. Palihug tan-awa kami, kay tanan kami imo katawhan.” (Isa. 64:8, 9) Kon mangin mapainubuson man kita kag pirme magtuman kay Jehova, mangin hamili gid kita sa iya pareho ni manalagna Daniel. Padayon kita nga dihunon niya paagi sa iya Pulong, espiritu, kag organisasyon, kag sa palaabuton mangin himpit na kita nga “mga anak sang Dios.”—Roma 8:21.