TULUN-AN NGA ARTIKULO 25
‘Ako Mismo ang Magapangita sa Akon mga Karnero’
“Ako mismo ang magapangita kag magaatipan sa akon mga karnero.”—EZEQ. 34:11.
AMBAHANON 105 “Ang Dios Gugma”
ANG BINAGBINAGON SA SINI NGA ARTIKULO *
1. Ngaa ginpaanggid ni Jehova ang iya kaugalingon sa isa ka nagapatiti nga iloy?
“MALIMTAN bala sang iloy ang iya nagatiti pa nga lapsag?” Ginpamangkot ini ni Jehova sang panahon ni manalagna Isaias. “Bisan pa ining mga babayi malipat, indi gid ako malipat sa imo,” siling sang Dios sa iya katawhan. (Isa. 49:15) Talagsa lang ginapaanggid ni Jehova ang iya kaugalingon sa isa ka iloy. Pero ginpaanggid ni Jehova ang iya ginabatyag sa iya mga alagad sa pagpalangga sang isa ka iloy sa iya bata. Ginhimo niya ini bangod gusto niya nga mabal-an nila nga palangga niya sila. Ang kalabanan nga mga iloy magakomporme gid sa ginsiling sang isa ka iloy nga si Jasmin. Nagsiling sia, “Kon ginapatiti sang iloy ang iya bata, nagaresulta ini sa suod nga kaangtanan nga pabaloran gid nila sa bilog nila nga kabuhi.”
2. Ano ang ginabatyag ni Jehova kon ang isa niya ka alagad nag-untat sa pag-alagad sa iya?
2 Mabal-an ni Jehova kon ang isa niya ka alagad mag-untat sa pagtambong sa mga miting kag sa pagbantala. Nasubuan gid sia nga linibo sa iya mga alagad ang nagauntat sa pag-alagad sa iya kada tuig kag nangin indi aktibo. *
3. Ano ang gusto ni Jehova?
3 Madamo sang pinalangga naton nga kauturan nga nangin indi aktibo ang nagabalik sa kongregasyon, kag nalipay gid kita sa sini! Gusto ni Jehova nga magbalik sila, kag amo man ina ang gusto naton. (1 Ped. 2:25) Paano naton sila mabuligan nga makabalik? Antes naton sabton ini nga pamangkot, mas maayo kon hibaluon anay naton kon ngaa ang pila nag-untat sa pagtambong sa mga miting kag sa pagbantala.
NGAA NAG-UNTAT SA PAG-ALAGAD KAY JEHOVA ANG PILA KA KAUTURAN?
4. Ano ang natabo sa iban bangod sang ila trabaho?
4 Gin-una sang iban nga kauturan ang ila trabaho. “Ang kalabanan ko nga oras kag kusog ginaubos ko sa akon trabaho,” siling ni Hung * nga isa ka brother sa Southeast Asia. “Indi gid husto ang akon ginhunahuna. Abi ko mas maalagad ko pa gid si Jehova kon madamo ako sing kuarta. Gani madamo nga oras ako nga nagatrabaho. Bangod sini, malaka na lang ako nagatambong sa mga miting. Sang ulihi, wala na gid ako nagatambong. Ginagamit ni Satanas ang kalibutan para amat-amat kita nga pauntaton sa pag-alagad sa Dios.”
5. Ano ang natabo sa isa ka sister bangod sa iya mga problema?
5 Ang pila ka kauturan nagluya ang buot bangod sa madamo nga problema. Si Anne nga taga-Britain may lima ka kabataan. “Ang isa ko ka bata natawo nga may diperensia sa lawas,” siling ni Anne. “Sang ulihi, ang isa ko ka bata nga babayi na-disfellowship, kag ang isa ko ka bata nga lalaki nagkaproblema sa pamensaron. Na-depress gid ako, gani wala na ako nagtambong sa mga miting kag wala na ako nag-preaching. Sang ulihi, nangin indi aktibo ako.” Nasubuan gid kita sa natabo kay Anne kag sa iya pamilya, kag sa iban pa nga may pareho man sini nga mga problema!
6. Kon indi pag-iaplikar sang isa ka utod ang Colosas 3:13, ngaa posible nga mag-untat sia sa pagpakig-upod sa katawhan ni Jehova?
6 Basaha ang Colosas 3:13. Naglain ang buot sang pila ka alagad ni Jehova bangod sa ginhimo sang isa ka utod sa kongregasyon. Si apostol Pablo nagsiling nga may mga tion nga mahimo ‘may rason kita nga magreklamo’ bangod sa ginhimo sang isa ka utod. Basi ginhimuan pa gani kita sang malain. Kon indi kita maghalong, posible nga magdumot kita. Kon ang isa ka utod nagahinakit, posible gid nga magauntat sia sa pagpakig-upod sa katawhan ni Jehova. Binagbinaga ang eksperiensia ni Pablo nga isa ka brother sa South America. Ginpatupatuan sia nga nakahimo sia sing sala, gani ginkuha sa iya ang pribilehiyo niya sa kongregasyon. Ano ang reaksion niya sa sini? “Naakig gid ako,” siling ni Pablo, “kag amat-amat ako nga nagpalayo sa kongregasyon.”
7. Kon ang isa ka utod ginakonsiensia gihapon, ano ang posible nga matabo sa iya?
7 Kon ang isa nakahimo sang serioso nga sala sang una, mahimo nga ginakonsiensia sia gihapon kag nagabatyag sia nga indi na gid sia pagpalanggaon sang Dios. Bisan pa naghinulsol sia kag ginpakitaan sang kaluoy, mahimo nagabatyag sia nga indi na sia puede mangin alagad sang Dios. Amo ini ang ginbatyag sang isa ka brother nga si Francisco. “Ginsabdong ako bangod nakahimo ako sing imoral,” siling niya. “Sang primero, nagatambong pa ako sa mga miting, pero na-depress ako kag pamatyag ko indi na ako bagay nga magpakig-upod sa katawhan ni Jehova. Ginakonsiensia gihapon ako, kag nagapati gid ako nga wala pa ako ginpatawad ni Jehova. Sang ulihi, nag-untat ako sa pag-alagad.” Paano mo ginatamod ang mga kauturan nga ara sa mga sitwasyon nga ginbinagbinag naton? May empatiya ka bala sa ila? Kag ang mas importante, paano sila ginatamod ni Jehova?
PALANGGA NI JEHOVA ANG IYA MGA KARNERO
Nabalaka gid ang Israelinhon nga manugbantay sa iya nadula nga karnero (Tan-awa ang parapo 8-9) *
8. Ginakalimtan bala ni Jehova ang mga nag-alagad sa iya? Ipaathag.
8 Wala ginakalimtan ni Jehova ang iya mga alagad nga nag-untat sa pagpakig-upod sa kongregasyon. Wala man niya ginakalimtan ang ila ginhimo nga pag-alagad sa iya. (Heb. 6:10) Naggamit si manalagna Isaias sang manami nga ilustrasyon para ipakita nga palangga gid ni Jehova ang iya katawhan kag ginaatipan niya sila. Nagsulat si Isaias: “Kaangay sang manugbantay sang karnero atipanon niya ang iya panong. Paagi sa iya butkon tipunon niya ang mga kordero, kag dalhon niya sila sa iya dughan.” (Isa. 40:11) Ano ang ginabatyag sang aton Daku nga Manugbantay nga si Jehova kon ang isa sa iya mga alagad nag-untat sa pag-alagad sa iya? Mahangpan naton ang ginabatyag ni Jehova sa ginsiling ni Jesus sa iya mga disipulo: “Ano sa banta ninyo? Kon ang isa ka tawo may 100 ka karnero kag nagtalang ang isa, indi bala bayaan niya ang 99 sa kabakuluran kag pangitaon ang isa nga nagtalang? Kon makita niya ini, nagasiling gid ako sa inyo, mas daku ang iya kalipay tungod sining isa sangsa 99 nga wala magtalang.”—Mat. 18:12, 13.
9. Sang panahon sang Biblia, paano ginaatipan sang maayo nga mga manugbantay ang ila mga karnero? (Tan-awa ang piktyur sa kober.)
9 Ngaa mapaanggid naton si Jehova sa isa ka manugbantay sang karnero? Sang panahon sang Biblia, palangga gid sang isa ka maayo nga manugbantay ang iya mga karnero. Ang isa ka halimbawa amo si David. Ginpatay niya ang leon kag ang oso para amligan ang iya mga karnero. (1 Sam. 17:34, 35) Matalupangdan sang isa ka maayo nga manugbantay bisan isa lang ka karnero ang madula. (Juan 10:3, 14) Ibutang niya sa toril ang 99 ka karnero ukon pabantayan niya anay ini sa iban nga manugbantay, kag dayon pangitaon niya ang isa nga nadula. Gingamit ni Jesus ina nga ilustrasyon para itudlo ining importante nga kamatuoran: “Indi luyag sang akon Amay sa langit nga malaglag ang bisan isa sining mga kubos.”—Mat. 18:14.
Ang isa ka manugbantay sang karnero sa Israel sang una nagaatipan sang iya karnero nga nadula (Tan-awa ang parapo 9)
GINAPANGITA NI JEHOVA ANG IYA MGA KARNERO
10. Suno sa Ezequiel 34:11-16, ano ang ginpromisa ni Jehova nga himuon niya para sa nadula niya nga mga karnero?
10 Palangga kita tanan ni Jehova, lakip na ang “mga kubos” nga nagpalayo sa iya panong. Paagi kay manalagna Ezequiel, nagpromisa ang Dios nga pangitaon niya ang iya nadula nga mga karnero, kag buligan niya sila nga mangin suod liwat sa iya. Ginsambit niya kon ano ang iya himuon para luwason sila. Kag pareho ini sa ginahimo sang isa ka Israelinhon nga manugbantay nga nadulaan sang karnero. (Basaha ang Ezequiel 34:11-16.) Una, pangitaon sang manugbantay ang nadula nga karnero. Kinahanglan ang daku nga tion kag pagpanikasog para mahimo ini. Kon makita na niya ang karnero, dalhon niya ini pabalik sa panong. Kon nabalian ukon nagutom ang karnero, atipanon gid ini sang manugbantay. Bugkusan niya ang bali sini, hakwaton niya ini, kag pakan-on. Dapat man ini himuon sang mga gulang nga mga manugbantay sang “panong sang Dios” para buligan ang mga nagpalayo sa kongregasyon. (1 Ped. 5:2, 3) Pangitaon sila sang mga gulang, buligan nila sila nga makabalik sa kongregasyon, kag mahigugmaon nila sila nga buligan nga mangin suod liwat kay Jehova. *
11. Ano ang nabal-an sang isa ka maayo nga manugbantay?
11 Kabalo ang isa ka maayo nga manugbantay nga puede madula ang karnero. Kag kon ang karnero nagpalayo sa panong, wala ini ginahanot sang manugbantay. May tion man sa kabuhi sang pila ka alagad ni Jehova nga nag-untat sila sa pag-alagad sa iya. Binagbinagon naton ang ginhimo sang Dios para buligan sila.
12. Ano ang ginhimo ni Jehova sang wala sia gintuman ni Jonas?
12 Wala gintuman ni manalagna Jonas ang ginsugo sa iya ni Jehova nga magkadto sa Ninive. Pero wala dayon nag-untat si Jehova sa pagbulig kay Jonas. Pareho sa isa ka maayo nga manugbantay, ginluwas sia ni Jehova kag ginbuligan sia nga mangin maisog para matuman niya ang iya asaynment. (Jon. 2:7; 3:1, 2) Sang ulihi, gingamit sang Dios ang tanom nga kalubay para buligan si Jonas nga mahangpan kon daw ano ka importante ang kabuhi sang kada tawo. (Jon. 4:10, 11) Ano ang matun-an naton sa sini? Indi dapat magpadalidali ang mga gulang sa pagdesisyon nga untatan ang pagbulig sa mga indi aktibo. Sa baylo, dapat hangpon sang mga gulang kon ngaa nagpalayo sila sa kongregasyon. Kag kon magbalik sila kay Jehova, padayon sila nga buligan kag atipanon sang mga gulang.
13. Ano ang matun-an naton sa reaksion ni Jehova sa ginsiling sang manunulat sang Salmo 73?
13 Nagluya ang buot sang manunulat sang Salmo 73 sang nakita niya nga daw maayo pa ang kabuhi sang mga malauton. Nagduhaduha sia kon bala may benepisyo gid ang paghimo sang kabubut-on sang Dios. (Sal. 73:12, 13, 16) Ano ang reaksion ni Jehova? Wala niya sia ginpakalain. Ginpasulat pa gani sang Dios sa Biblia ang ginsiling sang salmista. Sang ulihi, nahangpan sang salmista nga wala na sing mas maayo pa sangsa mangin abyan ni Jehova. (Sal. 73:23, 24, 26, 28) Ano ang matun-an naton sa sini? Dapat indi dayon paghukman sang mga gulang ang mga kauturan nga nagaduhaduha kon bala may benepisyo gid ang pag-alagad kay Jehova. Sa baylo nga pakalainon ang ginahambal kag ginahimo sini nga mga kauturan, dapat sila hangpon sang mga gulang. Paagi sa sini, mabal-an sang mga gulang kon ano nga mga teksto sa Biblia ang makapalig-on sa ila.
14. Ngaa kinahanglan buligan si Elias, kag paano ini ginhimo ni Jehova?
14 Nagpalagyo si manalagna Elias kay Rayna Jezebel. (1 Hari 19:1-3) Abi niya sia na lang ang nabilin nga manalagna ni Jehova, kag pamatyag niya wala sing pulos ang iya mga ginhimo. Nasubuan gid si Elias amo nga gusto niya nga mapatay na lang. (1 Hari 19:4, 10) Sa baylo nga pakalainon si Elias, ginpasalig sia ni Jehova nga wala sia nagaisahanon, nga makasalig sia sa gahom sang Dios, kag madamo pa sia sing himuon. Ginpamatian sing maayo ni Jehova ang mga kabalaka ni Elias, kag ginhatagan sia sang bag-o nga mga asaynment. (1 Hari 19:11-16, 18) Ano ang matun-an naton sa sini? Tanan kita, ilabi na ang mga gulang, dapat magpakita sang kaayo sa mga alagad ni Jehova. Kon ginasugid sang isa ka utod ang iya mga hibubun-ot ukon magsiling sia nga pamatyag niya indi gid sia mapatawad ni Jehova, dapat sia pamatian sang mga gulang. Dayon pasaligon nila sia nga palangga gid sia ni Jehova.
PAANO NATON DAPAT TAMDON ANG NADULA NGA MGA KARNERO SANG DIOS?
15. Suno sa Juan 6:39, paano gintamod ni Jesus ang mga karnero sang iya Amay?
15 Ano ang gusto ni Jehova nga pagtamod naton sa iya nadula nga mga karnero? Mabal-an naton ini sa ginhimo ni Jesus. Kabalo sia nga hamili kay Jehova ang tanan niya nga karnero, gani ginhimo ni Jesus ang bug-os niya nga masarangan para buligan ang “nadula nga mga karnero sang panimalay sang Israel” nga magbalik kay Jehova. (Mat. 15:24; Luc. 19:9, 10) Bilang maayo nga manugbantay, ginhimo ni Jesus ang tanan para wala sing madula sa mga karnero ni Jehova.—Basaha ang Juan 6:39.
16-17. Paano dapat tamdon sang mga gulang ang pagbulig sa mga indi aktibo? (Tan-awa ang kahon nga “ Ano ang Ginabatyag sang mga Indi Aktibo?”)
16 Ginpalig-on ni apostol Pablo ang mga gulang sa kongregasyon sa Efeso nga ilugon si Jesus. “Dapat ninyo buligan ang mga maluya kag dapat ninyo dumdumon ang ginsiling ni Ginuong Jesus: ‘Mas malipayon ang nagahatag sangsa nagabaton.’” (Binu. 20:17, 35) Maathag nga ginapakita sini nga ang mga gulang may importante nga responsibilidad nga atipanon ang katawhan ni Jehova. Si Salvador nga isa ka gulang sa Spain nagsiling: “Pirme ko ginahunahuna nga palangga ni Jehova ang iya nadula nga mga karnero. Bangod sini, gusto ko gid himuon ang akon bug-os nga masarangan para buligan sila. Sigurado ako nga gusto gid ni Jehova nga atipanon ko sila.”
17 Ang tanan nga nangin indi aktibo nga ginsambit sa sini nga artikulo nabuligan nga makabalik kay Jehova. Pero madamo pa nga indi aktibo ang gusto man makabalik. Binagbinagon sa masunod nga artikulo kon paano naton sila mabuligan nga makabalik kay Jehova.
AMBAHANON 139 Handurawa nga Bag-o Na ang Tanan
^ par. 5 Ngaa nangin indi aktibo ang pila ka kauturan nga tinuig na nga matutom nga nagaalagad kay Jehova? Paano sila ginatamod sang Dios? Binagbinagon sa sini nga artikulo ini nga mga pamangkot. Sang panahon sang Biblia, may tion sa kabuhi sang pila ka alagad ni Jehova nga nag-untat sila sa pag-alagad sa iya. Binagbinagon man sa sini nga artikulo kon paano sila ginbuligan ni Jehova kag kon ano ang matun-an naton sa sini.
^ par. 2 DUGANG NGA PAATHAG: Mangin indi aktibo ang isa ka manugbantala kon wala sia nagabantala kag nagareport sing anom ka bulan ukon sobra pa. Pero mga kauturan gihapon naton ang mga indi aktibo, kag palangga naton sila.
^ par. 4 Gin-islan ang pila ka ngalan.
^ par. 10 Binagbinagon sa masunod nga artikulo kon paano ini himuon sang mga gulang.
^ par. 60 PIKTYUR: Nabalaka ang isa ka Israelinhon nga manugbantay sang nadula ang isa niya ka karnero, gani ginpangita niya ini kag ginbuligan nga makabalik sa panong. Amo man sini ang ginahimo sang mga gulang subong.
^ par. 64 PIKTYUR: May duha ka Saksi nga malipayon nga nagabantala sa publiko nga lugar kag nakita sila sang isa ka indi aktibo nga sister nga nagasakay sa depasahero nga salakyan.
